أحذية تسوق in مدينة نصر Cairo, Egypt

تسوق

هوت برايس: ملابس مناسبة لكل أفراد العائلة فى مدينة نصر
اصدرت في: 31/05/2012

بالرغم من أن شوارع القاهرة فيها أماكن تسوق كثير بـ تزيد يوم بعد يوم، لكن بـ تبقى حاجة مثيرة أنك تكتشف محل لسه فاتح جديد، خصوصًا لما يكون فى شارع معروف ومزدحم بالحركة زى شارع عباس العقاد. «هوت برايس – Hot Price» محل أكيد هـ يعجبك، المكان عبارة عن دورين وعنده تشكيلة كبيرة من الملابس لكل أفراد العائلة وبأسعار مناسبة. فى الدور الأول هـ نلاقى الأحذية وملابس الأطفال، نبدأ بحذاء باليرينا كله لون واحد بيج أو أبيض (55 جنيه لكل لون) كمان هـ نلاقى باليرينا من غير كعب لونها بنى غامق (64 جنيه) وصنادل بكعب عالى (95 جنيه) ودي كانت بارزة عن باقى الأحذية والصنادل بتصميماتها اللى تخطف العين. أما فى قسم ملابس الأطفال، تقدر تلاقى ملابس من سن الرضاعة لحد 10 سنين، ودائمًا هـ تلاقى مساعدة مفيدة علشان ترشدك للمقاس المناسب من بين صفوف الفساتين اللطيفة، وسالوبيتات للأطفال اللى عليها تصميمات على شكل ورود أو قماشها مطرز، بالرغم أنك ممكن تلاقى أخطاء إملائية لو عليها كتابة. سالوبيت وردى نص كم مقاسه صفر (20 جنيه) موجود برضه بألوان ثانية وكان مقاسه وجودته كويسين رغم أن خامته من القطن الثقيل. كمان بيجامة قطعتين لطفل عنده سنه واحدة سعرها حوالى 45 جنيه، فى حين أن فيه بنطلونات جينز للأطفال الأكبر سنًا شوية يبدأ تقريبًا من 115 جنيه. بعديها طلعنا الدور الثانى، لاقينا الملابس الحريمى وشوفنا جاكيت بدون أكمام خامته صوف مع بوليستر خفيف (95 جنيه) وأشكال ثانية فيها خياطة (45 جنيه) بألوان ترابية زى البيج والرمادى المخضر. قسم الملابس اليومية كمان فيه جيبات طويلة عليها طباعة على الأطراف، مصنوعة من خامات مناسبة لفصل الصيف وسعرها حوالى 60 جنيه. قسم ملابس البيت والبيجامات الحريمى بـ يتكون معظمه من أطقم قطعتين وحاجات بسيطة بـ يكون البنطلون لوحده والتوب لوحده، ورغم كده هـ نلاقى حاجة أو اثنين حلوين زى توب أزرق سماوى ومعاه بنطلون أسود مريح (85 جنيه). قسم الرجالى يعتبر أهدأ قسم والمعروضات فيه تقريبًا متشابهة شكله زى دولاب مُعلق فيه تي شيرتات على بنطلونات وشورتات تقريبًا شبه بعض. الحاجة الوحيدة اللى كسرت حالة الملل كانت صديرى ستايل الثمانينات لونه موف فاقع (85 جنيه) مُعلق أمام التي شيرتات البولو (85 جنيه) ودي عندهم بكل ألوانها، بالإضافة لشورتات صيفى شيك بألوان مختلفة (50 جنيه). هوت برايس بـ يعرض ملابس رجالى وحريمى وأطفال مريحة بأسعار معقولة، ده بالإضافة لأحذية شيك للكل، ولازم نقول لك أنك محتاج تدور كويس وسط الملابس الموجودة علشان توصل للى تقدر تقول عليه صفقة كسبانة.

...

بيرتو: أحذية وشنط ملونة على قد الجيب فى مدينة نصر
اصدرت في: 06/05/2012

موجود وسط المحلات على جانبي شارع عباس العقاد الأكثر شهرة فى مدينة نصر، «بيرتو» محل أحذية بـ يقدم لبنات حواء أحذية جودتها متوسطة وبأسعار على قد الجيب. بمجرد ما تدخلى المحل هـ تلاقى نفسك فى طرقة طويلة مكدسة بالجزم والشنط من الأرض للسقف. وبعدين بـ يبدأ المحل يوسع أكثر وهـ تلاقى كراسيى في المنتصف، على الرغم من أن المحل كئيب لكن شبابيكه الزجاج بـ تدخل شوية ضوء شمس، أرفف المحل كانت متهالكة وكنا خايفين وإحنا بـ نأخذ المعروضات من عليها. الناس الشغالين فى المحل متعاونين جدًا، ولو أنتى وضحت لهم بطريقة مهذبة أنك حابة تبقى براحتك فى الفرجة هـ يبعدوا عنك ويبصوا عليك من بعيد فى حالة احتاجتى لهم فى حاجة. «بيرتو» هـ تلاقى فيه كل أنواع الأحذية اللى ممكن تحتاجيها، الجزم السحافى موجودة بوفرة وبتشكيلة كبيرة من الألوان والتصميمات، واللى بألوان ملمعة فضى وذهبي وكمان بمبى وأسود وأزرق وأخضر سعرها بـ 85 جنيه، وفيه العادي منها من غير لمعة بألوان أسود وبني وأزرق ورمادى. هـ تلاقى فى المحل كمان أحذية جلد عادية ومسائية من الستان وفيها أنواع زينة مختلفة، وفيه كمان صنادل بكعب عالى وفيه منها الجلد بألوان فوشيا وتركواز وأسود. تشكيلة المحل لأحذية المساء والسهرة رائعة، وموجود منها كل الألوان اللى ممكن تخطر على بالك زي الفضى والذهبي والأسود والبني مرصعة بأحجار فلصو، وأحذية المساء فيه منها ستان أحمر وموف وبمبى وأبيض، ومع ذلك البيضاء منها كان شكلها مش قيم زي سعرها اللى بـ 100 جنيه، وفيه زوج أحذية بنفس السعر عليه لمعة. تشكيلة الشنط فى بيرتو مش محدودة تمامًا لكن التصميمات محدودة على اللى بشكل طبعات النمور متوفرة بألوان بني ورمادى بـ تبدأ من 140 جنيه، وشنط تقليد ماركة لوي فيتون موجودة هناك بـ 145 جنيه، فيه كمان محافظ سيدات فضى وذهبى وبطبعات جلد الثعابين لونها موف بـ 140 جنيه. عندهم تشكيلة لملابس الأطفال موجودة فى نهاية المحل، وكمان حزام جلد بألوان رمادي وأسود وبني بـ تبدأ من 70 جنيه، فيه كمان شنط سفر متناثرة فى أرجاء المحل. تشكيلة «بيرتو» من الشنط والأحذية ما نعتبرهاش الأفضل فى كايرو، لكن لو كنتى بـ تتسوقى فى شارع عباس العقاد ما يخسرش لو عديتى وبصيتى على التشكيلة اللى هناك.

...

دريس فور ليس: محل ملابس وإكسسوارات جديد في طيبة مول
اصدرت في: 04/01/2012

أول ما بـ نشوف كلمة تخفيضات أو Sale على واجهة أي محل بـ نفرح جدًا ونفسنا بـ تتفتح للتسوق. طيب تخيل لو الكلمة دي مكتوبة على المحل طول السنة؟ والأسعار مخفضة طول السنة؟ هو ده بالضبط اللي حاصل في محل «دريس فور ليس – Dress for Less» اللي فتح جديد في طيبة مول في مدينة نصر. وزي اسمه ما بـ يقول هو فعلًا بـ يبيع بأسعار أقل من كل المحلات وطول السنة مش مواسم ومواسم. وميزة ثانية هنا أن التخفيضات دي مش على الملابس العادية فقط، إنما على بعض المعروضات من ماركات عالمية زي "إيتام Etam" و"كاش كاش Cache Cache"، وأسعار مش محتاجة فصال. ولو كنت اشتريت الماركات الأصلية دي من محلات ثانية، هـ تحس بالندم أول ما تدخل وتشوف أسعارها في «دريس فور ليس». والتفسير المنطقي الوحيد للأسعار دي هي أن الموديلات المعروضة بـ ترجع لكذا موسم فاتوا، لكن ده ما يمنعش أن الأسعار لسه خيالية! يعني البووت الرائع اللي كان ثمنه 235 جنيه كان عليه خصم 50% من سعره الأصلي، ولا يمكن تقول عليه موديل قديم. وكذلك الجزمة الـ مورجان Morgan بالكعب العالي واللون الأخضر الزيتوني اللي سعرها نزل من 910 جنيه لـ 275 جنيه بس. التخفيضات موجودة كمان على فساتين ماركة Cache Cache الطويلة، ألوانها جريئة وعليها طباعة بخطوط عريضة، لكن تعتبر غير مناسبة للثلج اللي في ديسمبر ويناير رغم أنها جذابة جدًا وأسعارها من 180 لـ 300 جنيه، يعني لو جبنا 3 ولا 4 من الفساتين اللي من غير أكمام دي للصيف يبقى إحنا الكسبانين. التي شيرتات مكون رئيسي لأي محل ملابس، وهنا هـ تلاقي تشكيلة كبيرة من التي شيرتات على وجه الخصوص اللي بـ تتلبس تحت الجواكيت الثقيلة في الشتاء. تي شيرت قطن عادي بـ 70 جنيه، والتوب البناتي الوردي بـ 90 جنيه وكان لائق قوي على جاكيت بيج سعره 120 جنيه. الجينز متوفر بقصات ومقاسات مختلفة؛ بنطلون (إيتام) أزرق بـ 126 جنيه، وفيه موديلات تليق أكثر للمظهر الرسمي زي البنطلونات والبلوفرات الصوف باللون الأسود (95 جنيه). تشكيلة الإكسسوارات في المحل مش مغرية قوي، لكن فيه بعض الحلي وأدوات تجميل اللي ما شفناش زيها في أي محل ثاني، ومتعلق على الحائط مجموعة من الأعقاد (60 جنيه) والأساور. وفي قسم الماكياج هـ تلاقي موظفين المحل بـ يساعدوك في عملية التجريب والشراء في ماركات زي (آرت ديكو ArtDeco) المتميزة في كريمات الأساس (135 جنيه) وروﭺ الباستيل (95 جنيه). من الملابس اليومية للإكسسوارات والمكياج، التخفيضات المستمرة في «دريس فور ليس» بـ تخليه من المحلات اللي ممكن تقف فيه تشتري كل حاجة مرة واحدة، صحيح هو مش عنده أرخص أسعار في القاهرة، لكن الماركات اللي عنده والتخفيضات اللي أحيانًا بـ تكون غير منطقية بـ تخليه مكان جدير بالزيارة.

...

كات ووك: محل أحذية رخيص ومبهج في مدينة نصر
اصدرت في: 14/11/2011

أكيد فيه حاجة في جينات البنات بـ تخلينا ننجذب للأحذية بشكل تلقائي، وعلشان كده عمرنا ما مرينا على محل أحذية إلا ودخلنا وبصينا عليه، حتى لو في الآخر ما اشتريناش فتفوتة منه. وده سبب أننا لما عدينا على محل «كات ووك - Catwalk» في شارع عباس العقاد المزدحم ما قدرناش نقاوم وقلنا هـ ندخل حتى في زيارة خاطفة. كان فيه يافطة كبيرة حمراء عليها كلمة "خصم" شدت رجلنا لداخل المحل، وكان فيه لافتة ثانية مكتوب عليها أن أي زوج أحذية بـ 95 جنيه، وساعتها كان فكرة أننا نخرج من المحل كانت مستحيلة. الدور العلوي للمحل مساحته محدودة جدًا ومافيهوش غير كام زوج أحذية ومحافظ سيدات، الدور السفلي مساحته أكبر شوية وفيه تشكيلة أكبر من الأحذية والشنط. الناقدة كاتبة الموضوع كانت بـ تدور على صندل بني، الولد اللي بـ يشوف طلبات الزبائن في المحل حاول يساعدها بإحضار صندل لونه أسمر مصفر وعليه جوهرة مش شيك لونها تركواز وخرزة صفراء. أصر أننا نجربه وإحنا بدورنا أصرينا أن ده مش الذوق اللي بـ ندور عليه. زوج الصنادل الوحيد اللي كان على مزاجنا وذوقنا كان متوفر منه فقط الأبيض والأسود مش البني. "كات ووك" عنده تشكيلة كبيرة من الصنادل وأحذية الباليه واللي بدون كعب والشباشب. بعضها هـ تلاقي عليه خرز وترتر، وبعضها هـ تلاقيه بسيط في تصميمه، وفيه تصميمات للشخصيات العملية وبألوان محايدة. وفيه بعضها مفتوح من عند الأصابع، وعجبنا زوجين من الأحذية من القش لونهم أحمر. في وقت زيارتنا للمحل كل الأحذية كان سعرها 95 جنيه، وكل الشنط كان سعرها موحد بـ 145 جنيه، وكان فيه شبشب ذهبي اللون عليه جوهرة عيرة لونها أصفر بـ 95 جنيه، لكن بجد كان شكلها ما يجيبش أكثر من 20 جنيه. كمان كان فيه تشكيلة من المعروضات في آخر المحل وسعر الزوج منها بـ 69 جنيه فيها صنادل بكعب عالي، أحذية رياضية، وأحذية باليرينا، ولكنها كانت متربة ورثة ومتهالكة. وبالنسبة لتشكيلة الشنط مافيش حاجة نجحت أنها تجذب انتباهنا، كان فيه شنطة حمراء بوردة ضخمة في الواجهة لكن كانت براقة قوي فما لاقتش إعجابنا. على الرغم من أن "كات ووك" مش المحل اللي ممكن يخطر على بالنا لو بـ ندور على محل للأحذية عالية الجودة، ولكن أسعاره القليلة بـ تشفع للجودة المنخفضة.

...

بيل: أحذية فرنساوي- صيني لأصحاب الأقدام الصغيرة فقط!
اصدرت في: 15/05/2011

اليومين دول بقى صعب جداً ان البنات والستات يلاقوا أحذية حريمي جودتها عالية٬ تقعد وفي نفس الوقت سعرها كويس وموضة. «بيل - Belle» محل موجود في أكتر من حي من أحياء القاهرة الراقية٬ عالج مشكلة الجودة والذوق٬ لكن مش السعر أبداً. «بيل» ماركة عالمية وموجودة في حتت كتيرة بره مصر (بيل أصلها صيني ورقم واحد في بيع الأحذية في الصين) المحل فروعه في مصر الجديدة٬ مدينة نصر٬ الرحاب٬ المعادي٬ الدقي وكمان شرم الشيخ. أحنا روحنا فرع سيتي سنتر اللي في مكرم عبيد. الفرع مساحته معقولة وكافية للقياس وللمشي في المكان وهو مش زحمة٬ لكن مرياته مش كافية٬ إضاءته قوية ومريحة للعين وعنده تشكيلة هايلة من الأحذية اللي خاماتها فرنسية لكن "تقفيل" صيني٬ على حسب ما قال المسئول عن البيع. وده ثار شكي في الموضوع٬ لكن الجودة بتاعة الجزم نفت أي شك. الجزم حلوة٬ جلدها من الطبيعي للشامواه٬ واضح عليه انه رائع مش زي البلاستيك اللي بـ يتباع على انه جلد كتير قوي اليومين دول. عنده بوتات أنيقة وراقية٬ أسعارها بـ تبدأ من 700 لفوق الألف شوية (الكلام ده أثناء التنزيلات) وكمان عنده بوت «پيپ تو – peep toe» وده البوت اللي مفتوح من قدام وده موضة بقى له حوالي سنتين٬ واللي عند «بيل» شاموا طويل٬ وبكعب عالي٬ و كان فوق الألف جنيه. الجزم أغلبها بكعب عالي أو متوسط بـ تبدأ من حوالي 350 وده بعد الخصم الـ50%٬ الفلات والباليرينا كانوا قليلين٬ وفيه عدد قليل من الشنط. الموديلات أقرب للكلاسيكية منها للفانكي والموديلات المطرقعة. مناسبة جداً لسيدات الأعمال٬ والسيدات اللي بـ تحتاج تلتزم بالزي الرسمي في أشغالها. كمان عنده تشكيلة سواريهات جميلة. الأسعار بقى هي المشكلة٬ أغلى من «تشارلز أند كيث – Charles and Keith»٬ فيه نفس أسعار «ألدو - Aldo» (الغالي مش «كلوب ألدو»). وخاماته بـ تنافس الإتنين بجدارة وقد تكون أحسن. اللي كان مفاجأة للناقدة اللي مقاس رجلها آخر مقاس في الحريمي: 41 ان المحل مافيهوش مقاس 41 خالص! أمر مزعج لكل اللي ده مقاسهم٬ خاصةً ان الجزم اللي عند المحل مميزة جداً. لكن اللي ممكن يكون عزاء ما ان الشركة صاحبة المحل ليها محل أحذية تاني اسمه «إكس واي زد - XYZ» ودي أحذية صيني٬ وموديلاتها شبابي أكتر وكانت معروضة مؤقتاً في فرع سيتي سنتر. وخاماتها كانت أفضل من الصيني المغرق السوق٬ ومع ذلك كانت أسعارها ممتازة٬ الـ أجز Uggs (بوت أصله أسترالي أو نيوزلاندي٬ معمول من صوف الخرفان تقليدياً) اللي الناس كانت مهووسة به الشتا اللي فات كان معروض (اسود وبني وأشكال مختلفة) بـ190 جنيه٬ و فيه شنط من نفس الماركة قليلة برضه وكانت موديلات شبابي وشيك بـ 200 جنيه. الخدمة في المكان كويسة والقائمين على البيع فاهمين المنتج بتاعهم٬ بـ يساعدوا وفي نفس الوقت بـ يدوا الزبون مساحة يجرب ويشوف الجِزم براحته. من شكل أحذية «بيل» هي أحذية هـ تقعد وتستحمل٬ ولو عندك فرصة تضيفي على دولابك واحدة من عنده ولا إتنين هـ تكون إضافة تستاهل.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن