السادس من أكتوبر تسوق in Cairo, Egypt

تسوق

أويشو: ملابس أنيقة للبحر والبيت وكمان لانجيري من الماركة الأسبانية في مول العرب
اصدرت في: 25/04/2015

أعزائي أهل القاهرة، جاهزين ولا لأ؟ الصيف على الأبواب وكمان الموسم الجديد من مسلسل Game of Thrones، بس خلينا إحنا نركز على التسوق، جاء الموسم اللي بـ يخلينا نندم على كل الأكل اللي ضربناه خلال الشهور اللي فاتت، خصوصًا لما نلاقي نفسنا لازم نلبس قطع صغيرة جدًا من القماش علشان نطلع على البحر، وعلشان نشتري شوية حاجات ضرورية، طلعنا على "أويشو - Oysho" في مول العرب. رغم أن مساحته مش كبيرة، فرع ماركة ملابس البيت، واللانجيري والسباحة للماركة الأسبانية في مدينة 6 أكتوبر قدر يقدم تشكيلة هائلة منهم، ألوان المحل المريحة مع الموسيقى الهادئة قدم تجربة تسوق مريحة للأعصاب. أول حاجة هـ تلاحظيها عن القطع المعروضة في المحل أنها من التصميمات، للألوان، للقصات، كلها راقية ورزينة، مافيش حاجة ممكن نقول عليها مبتذلة هنا. شدنا قسم ملابس البحر، اللي بـ يحتل الجزء الأول من المحل، من المايوهات البكيني، لمايوهات قطعة واحدة، لفساتين بحر خفيفة، نقدر نقول أن كل مستلزمات البحر موجودة عندهم. من بين بحر المايوهات المعروضة، لفت نظرنا قطعة من غير حمالات لونها وردي (499 جنيه)، مع مايوه قطعة واحدة بشرائط لونه أزرق مائل للأخضر (399 جنيه)، وكمان بيكيني مزركش قطعتين: العلوية (259 جنيه) والسفلية (169 جنيه). لما نروح على اللانجيرى، أويشو بـ يحافظ على درجة من الأناقة والبساطة، وفي نفس الوقت بـ يقدم قطع عملية ومريحة. شوفنا حمالة صدر من الدانتيل (259 جنيه) وكمان غيارات داخلية (169 جنيه)، مع اختيارات لانجيرى متنوعة. أويشو مش بس بـ يقدم لانجيرى وملابس بحر، عنده كمان عدد بسيط من الملابس الكاجوال، تشمل فساتين ماكسي طويلة لونها وردي غامق (499 جنيه) وشورتات عليها ورد (299 جنيه) وحاجات ثانية. أخيرًا، لازم نحيي موظفين المبيعات اللي يستحقوا التقدير، والفضل يرجع لمساعداتهم وروحهم الخفيفة. قدروا كمان يوفروا مقاساتنا من كل القطع اللي طلبناها، واقترحوا بدائل للحاجات الخلصانة. الأجمل كمان أنهم فضلوا يقدموا لنا كل احتياجاتنا وإحنا بـ نجرب قطع في غرف الملابس، وبكده تكون التجربة ككل سهلة ومن غير دوشة كثير.

...

سليدجرز: أحذية مريحة على الطراز الفرنسى فى مول العرب
اصدرت في: 09/09/2014

فى وقت ما سيل الماركات المشهورة مستمر فى الانتشار فى كل مكان من القاهرة، يوم عن يوم بـ يزيد احترام وتقدير الجودة والخامات المريحة اللى بـ تقدمها المصانع الكبيرة، الموضوع مش مجرد شعار مشهور وخلاص. الماركة الفرنسية "سليدجرز Sledgers" انضمت لكتيبة مول العرب بتقديمها "ستايل فرنسى مريح" من الأحذية للرجال والسيدات، مصممة خصيصًا بنعل مطاطى مريح لقدمك. بجانب تقديمهم لتشكيلة متنوعة للسيدات، المحل كمان مخصص قسم لأحذية Aerosoles، وهى ماركة أحذية حريمى عالية الجودة، وهناك بـ يعرضوا مجموعة منتجاتهم الكاملة. فى مكانه الموجود بين بوابة 18 و19، العرض الخارجى للمحل إضاءته جذابة بكشافات قوية صعب تفوتك. من الداخل، المحل مقسوم لقسمين، واحد فيهم بـ يعرض منتجات سليدجرز والثانى فيه منتجات Aerosoles. العرض المهبر داخل المكان مساحته كبيرة ومنظم بشكل أنيق، قدر يسهل من عملية الفرجة على التشكيلة المعروضة. تشكيلة Aerosolesالحريمى تبدأ من موسم الصيف لغاية موديلات الشتاء، ومن أحذية السهرة والحفلات، لصنادل الصيف وأحذية سادة بدون رباط، وكلهم معروضين بألوان متنوعة وتصميمات بسيطة. قطع بسيطة تشمل مجموعة كبيرة من صنادل صيفية مسطّحة (549 جنيه) مع صنادل بكعب عالى (649 جنيه) وصنادل بكعب قصير (599 جنيه) بمجموعة كبيرة من الألوان المرحة. تصميمات تقليدية ثانية تشمل أحذية مفتوحة من الأمام بدرجات من الرمادى مع كعوب ممتلئة (599 جنيه)، عليها رسومات ورد لطيفة، وصنادل كاجوال بكعب قصير (549 جنيه) بألوان من الأسود، والأبيض والكريمى. أكثر نوع منتشر فى العرض وقت زيارتنا كانت أحذية مناسبة للشغل؛ مريحة، بسيطة ومتينة. قطع ثانية استثنائية تشمل أحذية مسطحة عملية (549 جنيه) متوفرة بدرجات ألوان خفيفة، وكمان مجموعة أحذية شيك للمشاوير الرسمية بكعب متوسط الارتفاع (699 جنيه) درجات ألوانها هادئة. رغم أن Aerosoles بـ تقدم تشكيلة من شنط اليد، لكن الشنط المعروضة كانت قليلة -سعرها حوالى 599 جنيه– وشكلها عادى، بدرجات ألوان جذابة من الأزرق، والبرتقالى والأصفر، يعتبروا مناسبين جدًا لفصل الصيف. كل المتاح من أحذية سليدجرز الحريمى كانوا شكلين: باليرينا متعددة الألوان سعرها مبالغ فيه (999 جنيه) وواحدة كاجوال كعب عالى لونها سمنى (1199 جنيه). فى الناحية الثانية من المحل، أحذية سليدجرز الرجالى معروض منها مجموعة متنوعة من الأشكال والأذواق بجودة كويسة، وأحذية كلاسيك مع أحذية جلد مسطحة وطرية، أسعارهم بين 1099 جنيه لغاية 1499 جنيه. صحيح كل حاجة هنا غالية، لكن المجموعة الكبيرة من الأحذية بجودتها العالية تقدر تجذب الزبائن. لو كنت بـ تفكر فى حذاء بسيط، يعيش وجودته عالية، يبقى الموضوع يستحق السعر.

...

لوكسيتان أون برفونس: ماركة العناية بالبشرة الفرنسية الشهيرة بمول العرب
اصدرت في: 25/08/2014

القاهرة كم التناقضات والاختلافات فيها كبير... في كل تفاصيل الحياة، وأحلى حاجة أن كل التناقضات دي متعايشة مع بعضها في سلام. الكلام ده ينطبق على سوق منتجات التجميل؛ الوصفات الشعبية والمنتجات المحلية والعالمية كلها متوفرة، وكله له زبونه اللي مجربه وبـ يثق فيه. من ماركات التجميل والعناية بالبشرة الواردة من الخارج، الماركة الفرنسية المخضرمة لوكسيتان أون برفونس أو L'Occitane En Provence، واللي تأسست عام 1976، فتحت في مول العرب -عند بوابة 3- وبـ تقدم منتجاتها من الزيوت العطرية وكل ما له علاقة بالعناية بالجسم. أول شيء لفت انتباهنا هو الديكور الفرنسي الهادئ والمريح للأعصاب: أرفف من الخشب الغامق مرتب عليها بعناية المنتجات حسب خط الإنتاج والنوع، الأرضية بدرجات لون الطمي عليها مجموعة من سلال زهور باللون الأصفر. في وسط المحل حوض معدني ومرآة صغيرة علشان تجرب المنتجات بحرية. في المدخل قابلنا مجموعة كبيرة من العطور الأنثوية الطبيعية، بحجم 75 مللي، ومنها الفانيليا، والعنبر، والزهور، والياسمين مع الشاي الأخضر. أسعارهم تتراوح بين (390 – 549 جنيه). ومن نفس العطور دي موجود الكريم العطري لليدين 30 مللي (85 جنيه)، وجيل للاستحمام 175 مللي، وسعره يصل لـ 200 جنيه. أثناء جولتنا، عُرض علينا تجربة صابون سائل بزبدة الشيح (170 جنيه)، واللي منه برائحة اللوز الحلو، بعدما غسلنا أيدينا جربنا كريم النوع الأول (420 جنيه)... طبعًا الأسعار غالية، ولكن نعترف أن إحساسنا بعد التجربة كان أكثر من رائع، أيدينا كانت مش بس ناعمة ده كمان رائحتها رائعة لمدة طويلة. لاحظنا مجموعة محدودة من المنتجات برائحة اللافندر، وزهرة الكريز وكمان شموع عطرية برائحة الزهور (240 جنيه). ده غير عرض على صابون عضوي للوجه (100 جنيه) مع آخر لليدين بـ (85 جنيه)، مغلفين بورق ملون معاد تدويره، ومجموعة من العطور المعبئة في زجاجات عتيقة بروائح كثيرة زي الفواكة المسكرة، والقرفة، والعنبر، والورد والغابة الشتوية، أسعارهم (230 – 390 جنيه). لوكسيتان أون برفونس ما نسيتش الجنس الخشن، وخصصت لهم مجموعة من المنتجات الخاصة بهم زي عطور المفروشات برائحة اللافندر (261 جنيه)، مزيل رائحة العرق بعطر الغابة الشتوية (240 جنيه)، ومنتجات ما بعد الحلاقة بمكوناتها العضوية (274 جنيه) وأنواع مختلفة من العطور أسعارها (339 – 500 جنيه). نعتقد بعد الأسعار دي أي حد عاشق لمنتجات التجميل لازم يفكر مرتين فبل زيارة لوكسيتان أون برفونس، لأنه ببساطة ممكن يدمن الروائح العطرية الرائعة اللي الماركة بـ تقدمها، وساعتها هـ يبقى في أول طريقه للإفلاس.

...

ف. سعد الله: مجوهرات من الأحجار الكريمة في مول العرب
اصدرت في: 05/06/2014

منذ إطلاق أول مجموعة لها سنة 2007 وفاتن سعد الله بـ تضيف بُعد جديد لصناعة الحلي والمجوهرات في القاهرة. ولعها بالقيمة التاريخية والرمزية للأحجار الكريمة وعشقها لصناعة الحلي بشكل عام واضح من خلال التصميمات اللي بـ تقدمها. بالرغم من أن المحل موقعه في مول العرب سهل أنك تفوّته وأنت بـ تتجول، إلا أن تصميمات "ف. سعد الله – F.Sadallah " سواء المصنوعة من الذهب، أو الفضة أو الأحجار الكريمة، مش هـ تمر بجانبها من غير ما تشد انتباهك. فاتن سعد الله من الناس اللي بـ تؤمن أن الأحجار الكريمة لها قدرات ميتافيزيقية، وبالتالي انعكس الإيمان ده على تصميم ديكور المحل بشكل كبير... الحوائط لونها بني غامق، بينما الأثاث بلون الذهب، الديكور في مجمله وصل لنا الإحساس بأهمية وتأثير الأحجار الكريمة مع الحفاظ على الجماليات المطلوبة لديكور محل مجوهرات. بالرغم من أن المجموعة الموجودة فعليًا في المحل كبيرة ومتنوعة، إلا أن عدد الحلي المعروضة قليلة نسبيًا، الباقي مُحتفظ به في دواليب مخصوصة. المعروضات تتضمن: حلقان، وخواتم وأساور بالإضافة للمسبحات، وكلهم مصنوعين من المعادن الثمينة المُطعمة بالأحجار الكريمة. طلبنا من العامل بالمحل –واللي كان ظريف جدًا- أنه يعرض لنا مجموعة من الخواتم اللي لفتت نظرنا، المدهش أن المجموعة كلها مميزة، تحيّر أي شخص ناوي يشتري. المجموعة فيها كل ما تتخيل: ذهب، وفضة، وخواتم مُطعمة بأحجار كريمة أو حتى بموتيفات الخط العربي، أسعارهم بـ تترواح ما بين (300: 900 جنيه). بالنسبة للأعقاد، فالتصميمات تميزت بتعدد الأحجار اللي لها ألوان مبهجة في العقد الواحد، طبعًا فيه منهم معمول بنوع واحد من الأحجار، ومعظمهم له دلاية ذهب. الأسعار (400: 2000 جنيه) بحسب نوع الأحجار وعددها. لفت انتباهنا مجموعة الأساور بأشكالها الحداثية والمجنونة، فمنها مجموعة مُستخدم فيها الجلد، مع وجود الوحدة الجمالية الأساسية في المنتصف، وهي عبارة عن مربع من الذهب. معظم الأساور من النوع ده بـ تعتمد على موتيفة الخط العربي... أسعارهم (500: 550 جنيه). من الحاجات النادر وجودها في مصر، واللي اكتشفنا أنها موجودة في المحل، الأباجورات المنحوتة من ملح جبال الهيمالايا (650 جنيه)، شيء عجيب وساحر، وعلشان خيالك ما يروحش لبعيد، طبعًا الحجر مش بـ ينوّر لوحده، الحجر بـ يكون مجوّف من الداخل، وبـ يوضع لمبة داخل التجويف فـ ينعكس لون الحجر من خلال خروج شعاع النور، كان فيه منها لونين: البرتقالي المائل للإحمرار و الأزرق المائل للإخضرار. إجمالًا المحل مناسب جدًا لكل الأذواق والميزانيات، مش بس كده... ممكن يعدّلوا في التصميمات لو بـ تحب التفرد أو نفسك تهدي شخص مهم شيء مميز.

...

ذا بينك باودر رووم: ملابس صيفى كاجوال مثالية فى مول العرب
اصدرت في: 28/05/2014

موسم الصيف فى القاهرة بـ يقدم لنا أكثر من سبب أننا نبدل الجينز بحاجة مريحة أكثر. مع درجات الحرارة الملهلبة، الأقمشة المسامية والملابس المريحة لا غنى عنها، و"ذا بينك باودر رووم - The Pink Powder Room" بـ يقدم لكل السيدات بنطلونات بيتى فخمة كلنا محتاجينها بشدة. ملابس بينك باودر رووم بـ تقدم أحسن الأقمشة الخفيفة، اللى بـ تجمع بين القطن الطرى والليكرا، بحيث الهدوم تكون خفيفة وعملية. صحيح المحل صغير نسبيًا، مع ركن صغير له ستارة متحركة لتغيير الملابس، لازم هـ تحبى المكان. بصور بناتى لونها وردى، المحل بـ يغرى السيدات يدخلوا ويأخذوا فكرة. من خلال رحلتنا وسط المحل، شوفنا وقت زيارتنا مجموعة كبيرة من البنطلونات، بأشكال وألوان متنوعة. عدد قليل من بنطلونات علاء الدين (200 جنيه) بألوان أسود، رمادى وأزرق كانت متوفرة، بنطلونات بيجاما واسعة لها حزام عريض (150 جنيه) مع عدد منleggings سوداء ستريتش (90 جنيه) بأطوال مختلفة. معروض على شمال المحل رف مش منظم إلى حدٍ ما مليان تي شيرتات وقمصان حمالات سعرهم فى حدود 200 جنيه. يمكن جزء من القمصان كانوا شبه البيجامات شوية، حاجات ثانية كانت مناسبة للعالم الخارجى. قمصان بحمالات رخيصة (84 جنيه) كانت برضه معروضة بمجموعة متنوعة من الألوان المثيرة. تشكيلة كبيرة من الفساتين الصيفى الطويلة مُعلقة فى وسط المحل. رغم أن تصميماتهم بسيطة، ألوانهم كانت قوية ولافتة، منها الأزرق الأورجوانى، والبرتقالى والأصفر الكنارى. عدد بسيط من الفساتين كان تصميمهم بحمالة واحدة، أما الباقيين كانوا بحمالات، وأسعارهم فى حدود المعقول (260 جنيه). معروض على رف جنب الفساتين عدد بسيط من شنط بحر مقاومة للمياه (100 جنيه) عليهم طباعة وألوان صيفى مبهجة. على يمين المحل ستايلات مختلفة من التنورات، منها أسود ستريتش ومنها الخفيف (190 جنيه)، ده غير جيبات قصيرة لونها رمادى باهت وجيبات ثانية سوداء بشريطة وسط عالية (114 جنيه). جو المحل المريح بـ يشجع على الدخول، مع وجود تشكيلة تعتبر كبيرة بالنظر لحجم المكان. كمان فكرة وجود موظف واحد بس يساعدنا كانت ممتازة بحيث نقدر نتفرج براحتنا من غير أى تدخل. "ذا بينك باودر رووم" يعتبر اختيار هائل لو عاوزة ملابس صيفى خفيفة؛ مش هـ تحسى أنك برنسيسة فى النوع ده من الهدوم، بس أكيد هـ تحسى بالراحة.

...

خضرة: جنة مُحبي النباتات على أرض أمريكانا بلازا
اصدرت في: 05/05/2014

بما أن الزرع من الحاجات النادرة في القاهرة، فبالتالي فكرة وجود مكان مليء بالنباتات والزرع (وخاصة الغريب منها) تعتبر شيء أكثر من رائع لمُحبي النباتات. غير أن "خضرة - Khadra" بـ يبيع مجموعة متنوعة من أشجار الموالح والخضروات، وتقريبًا نبات الصبار بجميع أنواعه. المحل بـ يقدم خدماته في مجال تنسيق وتجميل الحدائق لجميع المساحات، ده غير أنه بـ يوفر مجموعة كبيرة من تصميمات المنتجات الزراعية اللي تناسب ديكورات بيتك أو مطعمك لو عندك مناسبة معينة مثلًا، أو لمجرد التغيير. المكان مُقسم لجزئين: جزء خارجي وآخر داخلي، وطبعًا الجزئين فيهم كل أنواع وألوان النباتات اللي ممكن تخطر على بالك، ومش بس كده... ده كمان أصيص الزرع له أشكال وأنواع مختلفة، منها اللي معمول من الطين (ملون وبني) وفيه اللي معمول من خامات ثانية زي المعدن والسيراميك (وطبعًا كله بثمنه). بالرغم من أن مساحة الجزء الداخلي محدودة، إلا أن النباتات والزهور شكلهم مرتب ومبهج وغير مزعج للعين، وعامة هي بـ تحتوي على النباتات الصغيرة واللي من صعب تلاقيها في أي مشتل ثاني، زي صبارة الكاماتشو المميزة (100: 150 جنيه) وشجرة البونساي الصينية (600 جنيه)، اللي بالرغم من سعرها الغالي نسبيًا، إلا أنها بـ تتميز بألوانها الرائعة وشكلها الفريد. المساحة الخارجية للمكان يعتبر فرصة لاستعراض قدراتهم في تنسيق وتجميل الحدائق والأماكن الخارجية بصفة عامة، فيه مجموعة متنوعة من الزهور والورود (120: 170 جنيه) بالإضافة للأحجام الأكبر لشجرة البونساي وأسعارهم بـ يتراوح بين (1500- 1700 جنيه). المكان فيه ركن مخصص للنباتات المتعلقة بالمطبخ: مجموعة كبيرة من أشجار الخضروات، شجر ليمون متوسط الحجم في أصيص من الطين (670 جنيه)، شجر خوخ (620 جنيه)، شجر طماطم لسه ما أثمرش في أصيص معدني (جردل بمعنى أصح) بـ (100 جنيه)، و شجر فلفل شطة أحمر أو أخضر (130 جنيه). أشهر منتجاتهم هو البرميل الخشبي اللي بـ يضم مجموعة من أعشاب الطبخ زي الزعتر، والروزماري، والنعناع، والشاي الأخضر (750 جنيه)... أظن كده ست البيت مش هـ تحتاج بعد كده لقسم التوابل والأعشاب في السوبر ماركت. إجمالًا "خضرة" مش مجرد مشتل زي المشاتل اللي بـ نقابلها في طريقنا على الكورنيش، دي فكرة فريدة وجديدة تستحق التجربة، لأنها بـ تشجع الناس على أنهم يزرعوا بنفسهم معظم الخضروات اللي بـ يشتروها من غير ما يعرفوا خطورة المبيدات اللي مرشوشة عليها.

...

وييلز: ركوبة بعجلتين فى مول العرب
اصدرت في: 10/04/2014

سواء كنت أستويت من المشى فى شوارع القاهرة المعفرة أو تعبت من الزحمة اللى مش بـ تخلص، الموتوسيكلات والسكوتر بـ يقدموا بديل مريح للمشاوير القريبة. فى مدينة 6 أكتوبر، تحديدًا فى مول العرب فتح محل الأوتوموبيلات الجديد "وييلز – Wheels" قريب من بوابة 4، وبـ يقدم مجموعة من المحركات بعجلتين تختار من بينهم اللى يعجبك. وييلز متخصص فى كل الماركات المشهورة، بتقديمه لتشكيلة تشمل عجل مناسب لكل الأعمار، سكوتر بأحجام محركات مختلفة، عربيات جولف وعربيات إلكترونية صغيرة للأطفال. طاقم الموظفين هناك مهتمين أنهم يخدموك، وفاهمين كويس فى المنتجات المعروضة وإيه المناسب لاحتياجك الشخصى. كون السكوتر بقى هو الموضة الجديدة فى الشوارع، وييلز بـ يعرض مجموعة من سكوترات بيجو موديل فيفاسيتى Vivacity، موديل سعة موتوره 125 سى سى سعره 13,900 جنيه، و150 سى سى سعره 15,900 جنيه، وإصدار خاص سعره 14900 جنيه؛ كلهم متوفرين بألوان أسود، وأبيض، وبنى وكريمى. أكيد طبعًا ركوب حاجة مش مقفولة محتاجة معدات لحماية السواق، علشان كده المحل عنده مجموعة من أدوات الحماية للأطفال والكبار. معروض مجموعة من واقيات رأس صلبة؛ خوذة لونها أسود مطفى ماركة AGV مبطنة علشان الراحة بغطاء وجه بلاستيك سعرها 2400 جنيه، وواحدة ثانية أزرق كان ثمنها 1400 جنيه. صحيح شوية من المعروض شكله احترافي أكثر، الباقى كانت ألوانهم أروش ويقدروا يشدّوا الأطفال. كثير من الناس بـ يفضلوا البسكليتة بحيث يقدروا يمارسوا شوية رياضة، والمحل كمان فيه مجموعة منهم؛ الماركة البرتغالية بيرج Berg للأطفال والكبار، أسعارها بين 1350 جنيه-4500 جنيه، على حسب الحجم والموديل. لو عاوز ركوبة محترفة أكثر، عندهم عجل ماركات أمريكية متخصصة أسعارهم بين 8900 جنيه- 12000 جنيه. أكيد الأطفال من حقهم شوية متعة، والمحل بـ يقدم عدد كبير، نادرًا ما بـ نشوفه فى القاهرة من العربيات الإلكترونية الصغيرة، بتقليد لنفس تصميمات العربيات الفخمة زى الهامر، والجاجوار، والمرسيدس والرينج روفر. صحيح المفروض أن عندهم عدد كبير معروض للبيع، بس وقت زيارتنا، كل المتوفر كان رينج روفر لونها أسود (2650 جنيه) ومرسيدس فضى الفئة S سعرها 3000 جنيه. "وييلز" بـ يلتزم أنه يقدم مجموعة متنوعة من المحركات مع كل التجهيزات والأدوات اللى يحتاجها السائق، وبـ يلبى كل احتياجات المبتدئين والمحترفين.

...

ستيف مادين: الماركة الأمريكية المشهورة دلوقت فى مول العرب
اصدرت في: 03/04/2014

مافيش دولاب فيكى يا مصر مش بـ يحب يتعلق فيه هدوم مصممين الأزياء المشهورين، وعلشان كده مشهد التسوق القاهرى لسه بـ يشوف إضافات عالمية من المحلات المشهورة. لكل عشاق الأحذية وشنط الجلد الشيك، ماركة الأحذية والإكسسوارات الأمريكية "ستيف مادين - Steve Madden" انضمت لحلبة تسوق 6 أكتوبر الضخمة مول العرب، قريب من بوابة رقم 2. وإحنا فى أواخر الشتاء، أوكازيون ضخم حصل فى المحل علشان يوسعوا مكان لمجموعتهم الصيفية الجديدة. فى الظروف العادية، منتجات ستيف مادين غالية نوعًا ما، بس وقت زيارتنا، كل حاجة فى المحل كانت بنصف سعرها. المحل بـ يغطى مساحة كبيرة، وواسع كفاية بحيث تقدر تتفرج على كل حاجة من غير توهان بين الستايلات المختلفة. على الناحية الثانية، الحوائط الوردى الفاقعة، الأصفر والأخضر كانت مشتتة شوية، بـ تأخذ تركيزنا بعيد عن مهمتنا الأساسية. وسط تدويرنا فى شباك العرض، لاحظنا مجموعة محدودة من شنط يد جلد، مع تشكيلة مختلطة من أحذية جلد إيطالي عالية الجودة. المعروضات الحريمى متنوعة بين أحذية بوت، وفلات، وكعب عالى وأحذية سهرة، أما الأحذية الرجالى كانت حوالى 20 زوج فى المحل كله. على الشمال أغلب الأحذية الكاجوال الفلات بألوان وأشكال وتصميمات مختلفة. باليرينا سوداء من الجلد المقلوب، سعرها كان فى الأساس 500 جنيه، وبعد التخفيض وصل 255 جنيه، مناسبة وعملية للوقت ده من السنة، متوفر منها لونين مختلفين. معروض فى نصف المحل مجموعة من أحذية بكعب عالى وصنادل، بأشكال وأحجام كعب مختلفة، المجموعة المعروضة كانت مزيج كبير من الأذواق الماشية مع الموضة؛ شوية منهم سادة وبسيط وشوية على أحدث طراز، ومجموعة ثانية لامعة وبراقة. مع شكلين بس من البوت الجلد القصير، كانوا هم الحاجة الوحيدة اللى بره الأوكازيون. البوت الإيطالى من الجلد المكشوط كان بلونين أسود وبنى مع كعب قصير (1399 جنيه). على يمين المحل مجموعة شنط يد بنى، وأسود، وأبيض وجلد ثعبان. كل الشنط أسعارها قريبة تبدأ من حوالى 700 جنيه وتنزل لغاية 200 جنيه. صحيح الأسعار بعد التخفيض مميزة، بس المعروضات كانت عادية من ناحية الشكل وتنوعها قليل. بشكل عام، كنا مبسوطين أن ستيف مادين بـ يقدم كل أنواع وأشكال الأحذية. وبما أن الأوكازيون لسه شغال، الأسعار المخفضة كافية أننا نعمل حملة تسوق ما حصلتش.

...

بيرشكا: الموضة الأوربية فى مول العرب بالقاهرة
اصدرت في: 16/03/2013

واضح جدًا أن وصول عدد كبير من الأسماء العالمية فى عالم الأزياء لمشهد التسوق القاهرى نتج عنه تنوع ملحوظ فى شوارع المدينة، "بيرشكا - Bershka" بواجهته الأنيقة الخالية من البهرجة، والمناسب تمامًا لمكانه وسط مول العرب الأنيق الموجود فى مدينة 6 أكتوبر. تقدر تلاقيه وسط المحلات أقاربه ستراديفاريوس وبول أند بير. الصدفة أن كل المحلات دى تملكها المجموعة الأسبانية إنديتيكس، طب ليه بيرشكا يختلف عن كل الباقيين؟ ديكورات بيرشكا بعيدة خالص عن شكل أكشاك البحر اللى بـ تحسها فى محلات ثانية كثير، على العكس بـ يفضل البساطة، وحوائط المكان باللون الأسود من غير صور لعارضات أزياء لابسين مايوهات. لو هـ نوصف بيرشكا بحاجة هـ تبقى أنه بـ يحسسك أنه نادى ليلى، وعلشان كده واخد شكل مبتكر مع سماعات عملاقة بـ تملأ لوحة تحكم فى المنتصف، وخارج منها مزيكا تكنو وترانس كأننا فى أمستردام سنة 1997. الشكل العام بـ يشع حيوية وحداثة، وفيه مانيكانات لابسين على أحدث صيحة ومنتشرين فى كل جزء من المكان المكشوف، وكمان إكسسوارات فخمة معروضة على رفوف واسعة. تشكيلة الملابس الحريمى متنوعة من تي شيرتات واسعة (99 جنيه) لحذاء كعب عالى تحفة (559 جنيه). بغض النظر أن جزء من التوبات كانت خامتها رقيقة وشفافة كان رأينا أننا نستبعد الموضة دى من حساباتنا خاصة بسبب الخياطة المهلهلة، وكمان الحاجات الأثقل كان شكلها متينة وتعيش فترة طويلة. أغرب حاجة أخذنا بالنا منها أن رغم أن بيرشكا ماركة عالمية شوفنا أخطاء إملائية فى اللغة الإنجليزية المطبوعة، تفتكر ممكن يتحسب أنه مجرد تغيير في الستايل؟ نعتقد لأ. مصممي الأزياء فى بيرشكا قدروا يبتكروا موديلات جديدة للموسم ده، حذاء طويل عتيق من الجلد السويدى لونه أخضر شبه ورق النعناع، وبلوفرات واسعة عليها أفكار مسلية. الغريب أن بيرشكا على عكس المحلات جيرانه نسى فكرة طباعة صور الأزتيك والجواكيت الجينز. المحل كمان بـ يعانى من نقص فى قسم الملابس الرجالى اللى كان منفى لركن مظلم، بمعنى أن قسم الحريمى فيه حاجات تعادل الموجود فى الرجالى ثلاث مرات. للأسف بيرشكا كمان محدد الملابس الرجالى بدرجات الأزرق بس، يمكن بس تي شيرت ليمونى فاتحة شدت انتباهنا. تي شيرتات مطبوع عليها شعارات وأحذية من الجلد السويدى كانت أبرز حاجة يومها، بس لو كانوا متابعين موسم الأزياء فى العالم، يبقى عدم وجود البالطوهات الثقيلة والجاكيتات معناه أن بيرشكا متأخر موسم بحاله عن جو القاهرة. كنا فى منتهى السعادة لما اكتشفنا أن موسم الأوكازيون شغال والأسعار نزلت جامد لحوالى الثلث، بمعنى أن سعر التي شيرت كان 19 جنيه بس. رغم أسعاره القليلة، أوكازيون بيرشكا مش هو الحدث اللى يخلق منافسة بين البنات علشان يوصلوا لطلبهم، أو أنك هـ تخرجى من المحل بكدمة تحت العين وبفردة حذاء ضايعة. على العموم، موظفين راقيين وهادئين كانوا موجودين علشان يمنعوا حصول أى مشكلة. على عكس زارا أو ماسيمو دوتى، بيرشكا ما قررش يوسع نشاطه للملابس الرسمية، أو ملابس الحمل أو الرياضة، لكن اهتماماتهم هو التركيز على الحاجات اللى شاطرين فيها بالفعل وهى ملابس الخروج العادية. بيرشكا بـ يبذل مجهود كبير فى أنه يسهل عملية التسوق، وفى حين أنك مش هـ تلاقى حاجة جريئة وسط تشكيلتهم من الأزياء، بيرشكا يعتبر مكان لطيف بعد رحلة تسوق طويلة فى محلات ملابس الشباب المطرقعة.

...

لو شاتو: فساتين وجيبات قمة في الأنوثة في مول العرب
اصدرت في: 25/03/2012

«لو شاتو – Le Chateau» اسم اعتدنا نسمعه فى عالم المطاعم وبالتحديد مطعم "لو شاتو" الموجود في الجيزة أمام النايل بولينج والمشهور بأن فيه عزف بيانو حى لرواد المكان، لكن "لو شاتو" اللى هـ نتكلم عنه النهارده محل جديد لملابس السيدات ما بقالوش ثلاثة أسابيع في مول العرب. "لو شاتو" شركة كندية رائدة تأسست فى عام 1959 وبدأت بداية متواضعة فى مونتريال، لحد ما بقى لها أكثر من 200 محل في كندا والولايات المتحدة والشرق الأوسط، لها أكثر من 40 سنة خبرة في تاريخ صناعة الموضة، والشركة بـ تصنع تقريبًا 2 مليون ثوب في السنة. بنات حواء هـ تلاقى كل ما يخصها من فساتين سهرة وخاصة بالعمل والحفلات الصباحية وكمان جيبات لنفس المناسبات وبلوزات في منتهى الشياكة وكمان قمصان رقيقة، لدرجة أن بعد زيارتنا دخلنا على موقع لو شاتو الكندي وشفنا الموديلات اللى لسه ما نزلتش مصر وتعقدنا. وعلى الرغم من أننا لقينا تشكيلة ملابس للرجال على الموقع إلا أن المحل فى مول العرب فيه تشكيلة للسيدات فقط، ربما لأنهم لسه فاتحين من وقت قريب ولسه ما نزلوش كل التشكيلة وبدأوا بالسيدات. المحل مساحته كبيرة جدًا ومش هـ تعرف تبدأ منين، لأن كل شوية هـ يشدك موديل أو شكل فستان من بعيد فـ تروح وتشوفه، التفصيل خطوطه دقيقة وبـ يبرز الجمال الأنثوي لأى واحدة هـ تلبسه وده لاحظناه جدًا هناك، بعض الفساتين عليها تطريز خفيف لكنه مش بزيادة زي ما بـ نشوف فى أغلب الفساتين التفصيل المصري اللى تحس أنها "فلة، شمعة، منورة" على رأي عمرو أديب. والمعروضات موجودة من أعلى السقف لآخره وهـ تقعد حبة حلوين فى المحل لحد ما تخلص فرجة فقط. أسعار الفساتين هناك اللى فيها لمعة خفيفة وتنفع تتلبس في سهرات أو مناسبات (تبدأ من 1099 جنيه) وفيه فساتين خامتها قطن تنفع للخروج الصبح وفساتين خامتها عاملة زي الشيفون علشان السهرات وبعضها بسيط جدًا ينفع لمناسبات صباحية، عامة أسعار الموديلات هناك بـ تتراوح بين 1000 لحد 1500 جنيه.. قد تكون الأسعار مستفزة للبعض، لكن بجد الخامة والتفصيلة والموديل يستحقوا أكثر من كده. إحنا انبهرنا، لدرجة أن كان معانا ولد صديقنا أبدى إعجابه بأشكال الموديلات وتفصيلتها. بجد زيارة استثنائية لمكان اكتشفناه بالصدفة، بقالنا كثير ما شفناش فساتين وبلوزات وجيبات بحلاوة التصميم والتصنيع والتقفيل والشكل ده، لما تشوفوا الموديلات هـ تبقوا عاوزين تشتروا كل اللي فى المحل من حلاوته زي ما حسينا، وفى الآخر "الغالي ثمنه فيه". 

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح