إكسسوارات تسوق in المهندسين Cairo, Egypt

تسوق

بربيري: تصميمات عالمية من لندن لكايرو في المهندسين
اصدرت في: 28/09/2011

لو كنت سافرت بره مصر يبقى أكيد لفت نظرك العلامة المميزة لـ «بربيري - Burberry» في الأماكن الراقية وبالقرب من ساحات الهوكي وملاعب التنس والجولف والبيسبول، وعلى ملابس وإكسسوارات سيدات الطبقات الأرستقراطية وأولادهم المدللين اللي دواليبهم أكيد مليانة بمنتجات عليها الكاروهات المميزة لـ «بربيري». الماركة البريطانية الشهيرة بـ تعرض منتجاتها من خلال متاجر فخمة في جميع أنحاء العالم، موديلات شيك من التي شيرتات البولو والبالطوهات القيمة والإيشاربات والأحذية، وكل المعروضات بـ تفوح برائحة الفخامة وتعبر عن الثراء. تم افتتاح أول فرع «بربيري» في مصر في المهندسين وبالتحديد على ناصية شارع جزيرة العرب وشارع لبنان جنب محلات «بيرشكا» و«بول & بير». الأسعار غالية جدًا ومش في متناول المشتري العادي أو المتوسط، وده لأن الموديلات كلها لمصممين عالميين، واللي غاوي يدفع بقى. وبما أن كثير من سلاسل المحلات العالمية المتخصصة في الموضة دخلت السوق المصري مؤخرًا، نقدر نقول أن «بربيري» مش بـ يقدم أحدث موديلات، وأماكن ثانية ممكن يكون عندها الأحدث. مساحة المحل مش كبيرة، الدور السفلي مخصص للأحذية والشنط والإكسسوارات. الكوفية الكاروهات الشهيرة اللي بـ تميز الماركة غالية بشكل مضحك (2650 جنيه)، أه طبعًا هي خامتها ممتازة وشيك جدًا لكن في النهاية هي مجرد كوفية. الأحزمة الجلد الرفيعة بـ 1575 جنيه، والشنط بـ تبدأ من 5200 جنيه لأصغر حجم. وفيه شنطة لاب توب صغيرة بـ 6350 جنيه! مقارنة بأسعار الشنط، الأحذية تعتبر لُقطة: الفلات البناتي العادية بـ تبدأ من 1995 جنيه، والكعب العالي بـ يبدأ من 2850 جنيه. طبعًا رخيصة بالنسبة لأسعار الإكسسوارات الثانية اللي عرضناها.. ولكن! الدور العلوي للمحل مخصص للملابس، وممكن تلمس بأيدك البالطو السميك اللي عليه علامة المحل، موجود بألوان مختلفة زي البيج والرمادي والأسود. والبالطوهات الحريمي بـ تبدأ من 6450 جنيه والرجالي أغلى شوية وبـ تبدأ من 6690 جنيه. الجينز بـ 1900 جنيه والبنطلون العادي بـ 1995 جنيه. التي شيرت الرجالي من 1375 جنيه وأنت طالع والبولو بـ 1150 جنيه، وأرخص حاجة في القسم الرجالي هي الكرافتات (950 جنيه). مرة ثانية بـ نأكد أن الجودة في المعروضات كلها عالية جدًا، وأي حد متابع خطوط الموضة والمصممين المشاهير هـ تعجبه محتويات المحل خصوصًا البالطوهات والجينز، لكن مش هـ تعجبه الأسعار غير المنطقية. الموظفين في المحل ودودين، لكن طبيعي في أي محل غالي زي ده أنهم يفضلوا قريبين من الزبائن ويلفوا وراه زيادة شوية.

...

123 صندوق كنز كبير للإكسسوارات في المهندسين
اصدرت في: 15/09/2011

الموضوع بنانيتي أوي أن أي واحدة تتحمس للحاجات البسيطة اللي في حياتنا كبنات زي الحلقان، السلاسل ورطبات الشعر وأدوات المكياج. كل اللي أنتي محتاجة تعمليه أنك تلبسي فستان أسود وعليه إكسسورات حلوة علشان تكملي شكلك الرائع. محل «123« في المهندسين هو محل اكسسورات فيه كل حاجة من أول الحلقان لغاية الملابس الخفيفة، وكمان ممكن وأنت هناك تعمل ثقب في أذنك أو أي مكان أنت عايزه. المحل منقسم إلى جزئين، في الجزء الشمال هـ تلاقي المجوهرات أو الإكسسورات، أما إكسسورات الشعر، الأحزمة وأدوات الماكياج في الجزء اليمين. فيه أكثر من ألف نوع حلق، وسلسلة بجميع الأشكال والأحجام والألوان. معظم السلاسل العادية أسعارها بـ تتراوح ما بين 30 و50 جنيه، زي مثلاً سلسلة فضي ولها عليقة لطيفة. لو ذوقك في الإكسسوارات اللي تفاصيلها كثيرة يبقى 123 هو المكان المناسب لكي. بـ 80 جنيه ممكن تجيبي سلسة لها عليقة مغطاة بالألماس. فيه تصميمات براقة أكثر أسعارها ما بين 120 لـ 250 جنيه زي مثلاً سلسة كلها ألماس. ولحاجة شكلها كلاسيكي، هـ تلاقي سلاسل بـ اللؤلؤ بـ 60 جنيه. فيه أشكال مختلفة لعليقات زي مثلاً على شكل تاج، شبشب، قلوب وصليب. فيه كمان حاجات مقلدة لشانيل، دي & جي، لوي فيتون، وكمان فيه سبت مليان بأساور بجميع الأشكال والأحجام بـ 3 جنيه. قسم الحلقان كان برضه مغامرة. هنا ممكن تلاقي حلقان على شكل شاكوش ومفك لو أنتي بـ تحبي الحاجات دي. ولو أنت من البنات اللي بـ تحب الحفلات. يبقى اشتري حلق على شكل فتاحة المشروبات، وطبعًا الحلقان الطبيعية متوفرة. معظم الحلقان أسعارها ما بين 20 لـ 60 جنيه وفيه كمان حلقان على شكل شمعدان لكن لما شفناهم حسينا أنها ممكن تعمل مشاكل في الأذن. أسعارها ما بين 200 لـ 300 جنيه و هـ تفيدك علشان تظهر في وسط الزحمة. قسم الشعر فيه توك وتيجان وربطات شعر. أسعار التيجان بـ تبدأ من 8 جنيه ومعظم ربطات الشعر بـ تبدأ من 3 جنيه. جنبه في قسم الأحزمة ممكن تلاقي كل أنواع الأحزمة اللي أنت عايزاها بألوان وأشكال مختلفة بـ 25 جنيه الحزام أو أكثر. كل الأحزمة معمولة من جلد مش أصلي والأسعار كويسة. في قسم أدوات الماكياج هـ تلاقي أنواع مختلفة للمنتجات، فيه منهم نوع أرماني ونوع ثاني YSL. مش محتاجين نقول أنهم مش أصلي. أسعار ملمع الشفاة تبدأ بـ 15 لـ 45 جنيه. وبرضه ده بـ ينطبق على ظلال الجفون ومحدد العيون والشفاه. كل كريمات الأساس أسعارهم من 40 جنيه لأكثر. ممكن تشتري فرشة بـ 10 جنيه أو مجموعة فرش بـ 40 جنيه. لو لسه مش مرضي، ممكن تثقب أذنك، الحواجب أو سرة البطن أو اللسان بـ 150 جنيه. إحنا ما جربناش نعمل كده فما نقدرش نحكم على مهارتهم لكن الغرفة اللي بـ يثقبوا فيها كان شكلها نظيف وكمان اللي بـ يعمل الثقب دكتور. "123" محل متنوع ومافيش شك أنك هـ تخرج من عنده وأنت مشتري حاجة لنفسك.

...

سورس: أحذية رخيصة وتخطف العين في المهندسين
اصدرت في: 06/09/2011

أعطي أي بنت شنطة وحذاء جميل وأكيد هـ تبقى سعيدة، فيه كده حاجات لما البنات بـ تلاقيها أو تكون معانا بـ تخلينا أسعد كائن وبـ تطير برج من دماغنا، نفس الإحساس الجميل بالفرحة لما تشوف قطة صغيرة أو طفل جميل، محل «سورس – Source» في شارع سوريا في المهندسين مليان من الأرض للسقف بالأحذية والشنط بكل الألوان والتصميمات اللي ممكن تلاقيها، وخلت الناقدة لما شافتها كان هـ يغمى عليها من الفرحة. على الرغم من أن محل «كلوب ألدو – Club Aldo» مشهور بأحذيته رخيصة الثمن، لكن يجي محل سورس ويحتل نفس المرتبة معاه، مثلاً الباليرينا بـ 80 جنيه، والشباشب بـ 75 جنيه، في حين أن اللي بالجلد تتكلف 100 جنيه، الشباشب تصميماتها عصرية طالما أنت بـ تحبي الأحذية اللي فيها ماس ومجوهرات مزينة التصميمات، ففيه شبشب مزخرف بزجزاج ملون وفيه حذاء ثاني مصمم بحيث لما تيجي تلبسه يبقى كأنك لابسة نجمة كبيرة جدًا في رجلك. الباليرينا المعروضة في سورس تصميماتها عادية وتقليدية، وتقدري تلاقي هناك كمان أشكال أصلية للأسبدري الأسباني بـ 80 جنيه فقط، أغلب الجزم الطرية بحوالي 130 جنيه بتصميمات عادية مع أنك ممكن تلاقي استثناءات، الصنادل اللي كعبها منخفض بـ 90 جنيه اختيار أفضل لأن تصميماتهم أرق والكعب أريح. الاختيارات كثيرة، ناقدة الموضوع لما راحت لقت هناك قسم بـ يُباع فيه أغرب تشكيلة شباشب شافتها في حياتها، زي شبشب بلاستيك عليه شكل فلفل ممكن ينفع يتلبس في حفلة تنكرية، فيه جزمة ثانية فيها سمكة بلاستيك بـ تعوم وسط فقاعات ماء، وفي تصميم ثاني فيه بطة مطاطية ما بين كرتين لونهم أسود، لو الجو الكارتوني ده مناسب لكي ولذوقك وما عندكيش مانع تمشي بشبشب عليه علامة "صنع في الصين" كبيرة على الجنب هـ تكلفك الزوج منها 80 جنيه. فيه قسم ثاني للأسف بـ يعرض تصميمات مقلدة لماركات معروفة زي محافظ "شانيل" و"لوي فيتون" ثمنها 50 جنيه، لكن شكلها مش جامد قوي وتقليدها مش مضبوط، ولكن لو بـ تدوري على شنطة جديدة ممكن المحل ده يحقق لك حلمك، هـ تلاقي تصميمات وتشكيلة ما بين 80 و100 جنيه على حسب التصميم، والشنط اللي شبه شنط التسوق بـ يتراوح سعرها من 100 جنيه وممكن توصل لـ 175 جنيه. أغلب الشنط مصنوعة من البلاستيك طبعًا والجودة مش قد كده، لكن بالنسبة للأسعار دي ده كافي بالنسبة لنا. احرصي على أنك تزوري سورس المرة الجاية لو خرجتي في نطاق المهندسين بـ تدوري على شنط أو أحذية، المحل فيه تشكيلة كبيرة بأسعار رخيصة بتصميمات لطيفة، على الرغم من أن الجودة ممكن ما تكونش عالية.

...

النمرسي: خردواتي القاهرة المفضل
اصدرت في: 06/07/2011

لو سيرة الترتر والخرز والدانتيل بـ تخليك عاوز تحط إيدك على أقرب إبرة وخيط، يبقى هـ تنبسط من موضوعنا النهاردة. في شارع شهاب الزحمة، هـ تلاقي محل صغير جنب قبنوري، اسمه «النمرسي». «النمرسي» عيلة تجار خردوات أبًا عن جد في الموسكي بالأساس وقدروا أنهم يتوسعوا بتجارتهم وبقى لهم أكثر من فرع في أحياء كثيرة. وأنت داخل هـ تلاقي على شمالك ويمينك أرفف عرض مليانة برطمانات فيها ترتر، وألماظ ولولي وقروش للتطريز، حاجات ثانية كثير بـ تلمع. الترتر والألماظ (وده ممكن يبقى بلاستيك أو زجاج حسب المتوفر) بـ يتباع بالجرام. جرام الترتر بـ 25 قرش وألماظ من 2 جنيه. (وفي الأحجام الكبيرة ممكن يتباع بالواحدة). سلاسل ذهب وفضة فلصو متعلقة من السقف وجنبها فيه لولي كبير بألوان الطيف، لما بـ تدخل أكثر داخل المحل هـ تلاقي سوست بألوان كثيرة جدًا وكمان أثواب دانتيل. فيه بقى علب حليات وبادجات بـ تتخيط على الملابس، فيه منها عليه لولي أو ترتر وغير كده كتير. فيه كمان مجموعة ورد متنوعة، من الصغير الجميل للضخم المتكلف بالجليتر والريش.. إلخ السعر المتوسط للأصناف دي 5 جنيه. وفي آخر الممر فيه مكان متخصص للأزرار، وعلى فكرة فيه ناس غاويه زراير، وبالنسبة لهم الموضوع بـ يفرق قوي! المكان مرصوص فيه علب أزرار بكل الأشكال والأحجام، لو بـ تدور على زرار ذهبي ضخم عليه علامة فرساتشي أو زرار قميص عاج بسيط هـ تلاقيه عند «النمرسي». أسعار الأزرار بـ تختلف مع الخامات المستخدمة فيها وهـ تلاقي منها الرخيص جدًا ومنها بـ يوصل سعره لـ15 جنيه للواحد والغالي في الغالب بـ يبقى السواريه وبـ يكون فيه ألماظ أو كريستال. وعندهم أثواب مغرية من الستان والترتر المتطرز والدانتيل وبطانة وكردون قماش منقط. الكردون أسعاره بـ تبدأ من 50 قرش للمتر والتُل من 2 جنيه ويزيد. لو كل ده مش كافي أنه يرضي رغبتك في الخياطة بإبداع وجراءة، فيه كمان ريش أسود أحمر، أبيض، وأزرق. غير حاجات المحترفين والغاويين في احتياجات الخياطة الأساسية من إبر لخيوط كل الألوان، لتباشير وأقفال أعقاد ومسدسات شمع. للأسف البياعين في المكان كانوا متجاهلين الزبائن تمامًا، فبـ ننصحك أنك ما تعتمدش عليهم وتدور على حاجتك بنفسك. الحاجة أه رخيصة بس خلي بالك وأنت بـ تشتري ممكن فرق في الخامات ما تاخدش بالك منه يفرق جامد في السعر. وممكن تسرح وتلاقي نفسك دافع 100 جنيه في شوية زراير وخرز. ولو محظوظ ممكن يبقى صاحب المكان قاعد ويعمل لك خصم كبير. هو مش في رخص الموسكي ولا زنقة الستات لكن قربه وسهولة الوصول له معوضة فرق الأسعار، وهـ يسعفك لو نفسك تزين فستان أو بلوزة بسرعة وتخليها مميزة ومفيش وقت تنزل الموسكي.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن