هدايا تسوق in المهندسين Cairo, Egypt

تسوق

جراب & راپ: محل هدايا ممتع في المهندسين
اصدرت في: 13/05/2011

محلات الهدايا في القاهرة ممكن تكون متعبة بالذات لو بـ تدور على هدية مبتكرة والوقت ضيق وانت محتاجها بسرعة. لحسن الحظ لقينا محل ممكن تشتري منه هدية (وتلف الهدية عنده) من عدد لا بأس به من الهدايا اللي فيها أفكار جديدة ومش تقليدية وفي وقت قياسي. وأخيراً بقى عندنا في القاهرة محل هدايا بـ يبيع حاجات غير الدباديب الحمراء العملاقة. موجود في المهندسين في شارع البطل أحمد عبدالعزيز، صعب ماتخدش بالك منه عشان يافطته الملونة والشبابيك المنورة بتاعة المحل اللي مبينة ديكور المحل كله من جوة، وهـ تخليك ماتقدرش تعدي كده من غير ما تلقي نظرة جوة المحل. الديكور الدافي للمحل هـ يحببك فيه وهـ يخليك عايز تاخد وقت أكتر في الفرجة والتنقية. لو بـ تدور على الشموع اللي لونها كريمي وليها عطر مميز ومكتوب عليها " Happy Birthday " أو" Best Friends " وحاجات تانية هـ تلاقيها بـ 18 جنيه بس وده للحجم الكبير. ممكن كمان تاخد فكرة عن الستاند القريب اللي متعلق عليه صناديق خشب فيها رسايل ملفوفة ومربوطة بشرايط بـ تلمع، وممكن تكتب فيها أي إهداء وتبقى هدايا شخصية جداً في مناسبات كتير. لو بـ تحب اللعب ماركة « Russ Love » هـ تلاقيها هناك كتير، وكمان الـ«ترول – Troll » المتوحش من نفس الماركة وأسعاره بـ تبدأ من 18 جنيه، ده غير طبعاً الدباديب بالشعر الكيرلي وسلاسل مفاتيح من المشهور ة بيها الماركة دي. الدباديب والعرايس المحشوة طبعاً موجودة عشان ليها معجبينها الكتير، بس « جراب & راب » -مقصود بيها إخطف الهدية ولفها - بـ يديلها الطابع الخاص بتاعه، يعني بدل الأرنوب البمبي اللي شايل قلب أحمر، ممكن تشتري عيلة كاملة من الأسود أو الأغنام بأحجام مختلفة؛ فيه الحجم الطبيعي بـ 500 جنيه وحجم متوسط زي شبل الأسد كده بـ 50 جنيه. لو الحاجات دي مش مبتكرة كفاية فيه أفكار تانية جديدة زي شباشب بناتي فرو مطرقعة بـ 50 جنيه وإكسسوارات عربيات وساعات ماركة « SWC » أسعارها بـ تبدأ من 500 جنيه. بعد ما تختار الهدية هـ ييجي وقت اللف، فيه ورق تغليف فضي عليه جليتر وعليه رسومات ظريفة جداً، وفيه عدد ضخم من الأشكال والأحجام والستايلات اللي هـ تميز شكل الهدية. الأسعار بـ تختلف على حسب حجم الهدية ونوع اللفة، يعني لو الحجم متوسط التغليف هـ يكلفك 20 جنيه، وماتنساش طبعاً تشتري كارت تكتب فيه إهداء، مفيش هناك كروت معقدة زي اللي بتـ تفتح وتصميمها من جوة بالبارز ( Pop-Up Cards ) مثلاً، بس هـ تلاقي حاجات تعجبك في كل الأحوال. « جراب & راب » أكتر من مجرد محل هدايا كل حاجة فيه أحمر يا بمبي، والحياة مقتصرة على دباديب وبس، بالعكس انت هـ تلاقي هدايا عملية كتير بجانب الهدايا التقليدية اللي مافيش غنى عنها.

...

مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال