دليل البرامج والمسلسلات - مقالات عن برامج ومسلسلات العالم العربي

تليفزيون

من الجانى: من الراديو لتليفزيون الحياة
اصدرت في: 06/03/2015

الراديو: مين فاكر الراديو زمان؟.. طيب مين فاكر برنامج "أغرب القضايا"؟.. طب مين فاكر الجملة دى "إذا عرفت الحل اتصل بـ 747120 إذاعة... وله جائزة قدرها ثلاثون جنيهًا".. إحنا لسه حافظين الرقم لحد دلوقت من كثر ما سمعنا البرنامج الجامد ده.. ياه أيام كان بـ ييجى قبل صلاة الجمعة مرة واحدة فى الأسبوع. التليفزيون: هو برضه مسلسل أسبوعى.. وبـ تدور القصة حول عالم الجريمة والخطف والسرقة والقتل والنصب وعيش بقى فى كل أنواع الجرائم المختلفة. وكمان بـ تعيش حلقة مثيرة فى رحلة البحث عن المجرم عن طريق شخصية الضابط "أدهم" اللى بـ يدور وراء الجرائم الغامضة.. الموضوع كله في إطار بوليسي شيق بجد وإياد نصار كالعادة عامل شغل عالى جدًا وقادر يقدم دور الضابط اللى أتقنه خلاص من كثر ما لعبه فى مسلسلات، لكن اللى خايفين منه أن إياد نصار ينحصر فى أدوار الشرطى والجرى وراء المجرمين وده هـ يخليه فى سكة واحدة، خاصة أنه شاطر فى تمثيل الأدوار دى، وشخصيته كده من الآخر شكلها ضابط.. يعنى الموضوع جاى معاه تمام جدًا. الحبكة: الموضوع محبوك جدًا والدراما اللى مكتوبة مش أى دراما، أكيد هـ تحسوا بفرق كبير فى الدراما دى وده راجع لشوية أسباب: طريقة الكتابة قريبة من طريقة كتابة المسلسلات الأمريكية صاحبة الحلقات المنفصلة واللى بـ تدور فى إطار بوليسى زى "NCIS" ومشوق بجد مع مسحة علمية. اللى كاتب الحلقات كلها عبقرى، الجيل اللى ربى جيل كامل على أيده وقصصه وحكايته فى روايات مصرية للجيب "رجل المستحيل – ملف المستقبل". الرجل اللى فات هو د/ نبيل فاروق واللى اختار برضه اسم "أدهم" للضابط البطل علشان هو بـ يحب الاسم ده وبـ يحب الشخصية دى واللى هى "أدهم صبرى" أشهر بطل فى روايات نبيل فاروق. إياد نصار عنده مقدرة كبيرة فى التحكم بشخصيته والماكياج اللى عامله مع طبيعة الشخصية والتصرفات شبه أدهم صبرى فيما عدا حاجة واحدة.. أدهم صبرى كان بـ يكره السجاير. طريقة التصوير احترافية جدًا وده بـ يخلينا نرجع ثانى لفكرة الجديد فى التصوير واستخدام كاميرات مختلفة فى المسلسلات والأفلام المصرية علشان تنافس فى السوق العالمى وكمان المونتاج وشغل الحركة فى الموضوع عالى وبـ يقول أن مصر فى تطور لكننا لسه برضه فى مرحلة التجريب. اتفرجوا على "من الجانى" واللى هـ يعرف الجانى مين ممكن يتصل ويكسب فلوس كمان. ما تنسوش إذا عرفت الحل فاتصل بـ 747120 إذاعة.. ودمتم.

...

الصفعة: فكرة اتهرست فى ألف مسلسل قبل كده
اصدرت في: 06/08/2012

 خلال أحداث فيلم "لا تراجع ولا استسلام - القبضة الدامية" بطولة أحمد مكى وماجد الكدوانى، ضابط المخابرات بـ يقول للرئيس بتاعه لما بـ يعرض خطة تجنيد "حزلقوم": "لكن القصة دى يا فندم اتهرست فى ألف فيلم عربى قبل كده".. وبـ يكون رد ماجد الكدوانى: علشان هى اتهرست فى ألف فيلم ما حدش هـ ييجى فى باله أننا هـ نعملها ثانى. غريب أننا نبدأ نقدنا لمسلسل (الصفعة) بمشهد قصير من عمل ثانى، لكن الحقيقة.. إحنا حاسين أن ده كان لسان حال صناع المسلسل لما بدأوا فى تنفيذه.. إحنا قدمنا مسلسلات وقصص وروايات الجاسوسية بألف شكل وشكل.. وللأسف "الصفعة" ما قدمش أى شىء جديد على مستوى القصة أو الأحداث أو السيناريو. المسلسل بـ يحكى عن الجاسوس باروخ زكى مزراحى، وقصة صعوده ثم سقوطه فى عالم الاستخبارات السرية والصراع المخابراتى الدائم بين المخابرات العامة المصرية والموساد الإسرائيلى فى واحدة من أخطر فترات الصراع العقلى بين الدولتين. المسلسل إجمالاً شبه الجزء الأول من مسلسل رأفت الهجان لدرجة كبيرة جدًا، فى رأينا أن المخرج مجدى أبو عميرة فشل أنه يخرج من جلباب أشهر مسلسل مخابرات عربى وهو رأفت الهجان، رغم الفترة الزمنية الكبيرة الفاصلة بين العملين، وممكن أن ده يرجع لتشابه التفاصيل الحقيقية –القليلة دائمًا- اللى بـ تسمح بنشرها المخابرات العامة بحكم سرية العمليات دى، بالتالى بـ يتشابه مجهود المؤلفين والمخرجين فى محاولة سد ثغرات المعلومات الحقيقية القليلة بكثير من المط والتطويل. هيثم أحمد زكى لسه مش قادر يخرج من العباءة الشكلية والأدائية للراحل العبقرى أحمد زكى، مش عارفين ده نتيجة الشبه بينهم فى نظرات العين أو ملامح الوجه، أو أن هيثم متخيل أن مجرد الشبه الشكلى ممكن يؤدى لشبه فى الموهبة والنجاح! الديكورات كانت سيئة للغاية، وحسينا فى كثير من المشاهد أنها اتعملت فى آخر لحظة، وما نقلتش لنا جو الحياة داخل إسرائيل أو حتى فى مصر فى الفترة دى، على عكس مسلسل ثانى بـ يُعرض فى رمضان بـ يتناول إسرائيل فى وقتنا الحالى، هو مسلسل فرقة ناجى عطا الله بطولة عادل امام. شريف منير أداؤه التمثيلى كويس جدًا زى ما بـ يعودنا دائمًا لكن مظهره فى المسلسل Over جدًا ونقل لنا الصورة النمطية اللى كانت فى ذهننا وإحنا صغار عن الإسرائيليين، والموسيقى التصويريه ما قدمتش أى جديد، وما حسيناش أن لها أى دور فى الأحداث. باختصار.. مسلسل الصفعة هـ يكون رائع علشان تتابعه لو قدرت تفصل نفسك عن التفاصيل الصغيرة وتتغاضى عن الأداء التمثيلى السىء لبعض المشاركين فى العمل، لكن لو أنت من الناس اللى بـ تهتم بالتفاصيل الصغيرة وما بـ تحبش الأفكار المكررة يبقى ننصحك تتابع مسلسل ثانى.

...

رقم مجهول: الجريمة تكسب !
اصدرت في: 05/08/2012

رغم قلة الإمكانيات.. وضعف الإعلانات.. وعدم اهتمام القنوات بمواعيد العرض، إلا أننا نقدر نراهن بقوة على "رقم مجهول" أنه هـ يكون أفضل مسلسل فى رمضان، أو على الأقل هـ ينافس على المراتب الأولى لأعلى نسب المشاهدة والإعجاب من الجماهير. ليه؟.. علشان القائمين على المسلسل، من أول أصغر ممثل لحد المخرج (أحمد نادر جلال) بـ يحترموا عقلية المشاهد، وبـ يقدموا له دراما تليق به وتحترم عقله، بالإضافة لجرعة كبيرة من الإثارة والغموض، تخلى المشاهد مضطر يتابع المسلسل للحلقة الأخيرة دون انقطاع.. واللى يتفرج على حلقة واحدة يتشد يكمل المسلسل للنهاية ! المسلسل بـ يحكى عن محامى شاب طموح (يوسف الشريف) متزوج من سيدة جميلة (شيرى عادل) لكن الظروف بـ تحطه تحت رحمة مجرم مجهول الهوية، بـ يكلمه من رقم مجهول، وبـ يلفق له تهمة قتل وبـ يستغله لتنفيذ أعمال إجرامية تخصه.. وبـ يبدأ الشك يلعب فى قلب المحامى ناحية كل الناس حوله.. حتى أقربهم له. مش عاوزين نحرق لكم الأحداث أكثر من كده وعاوزين تتابعوا بنفسكم التطورات الجديدة فى الأحداث اللى بـ تتطور حلقة بعد حلقة، بشكل يمنع الملل ويخليك دائمًا فى تساؤل عن تطور الأحداث الساخنة. يوسف الشريف شوفناه قبل كده فى أداء ضعيف فى "هى فوضى" مع يوسف شاهين وخالد يوسف بعد كده شوفناه فى أكثر من عمل درامى وسينمائى، لكن فى "رقم مجهول" الشريف بـ يوصل لمرحلة جديدة ومختلفة من الأداء، وبـ نحس أنه فعلاً بـ يقدم الشخصية المفروض أنه يظهر بها على الشاشة كرجل مضطرب ومش عارف المفروض يعمل إيه. شيرى عادل.. إحنا بـ نحب شيرى وبـ نشجعها، لكن جاء الوقت أنها تخرج من نوعية أدوار البنت الدلوعة أو الزوجة الرقيقة.. وبـ نتوقع أن تطورات الأحداث تحمل لنا معاها تغير فى أداء الدور اللى بـ تقوم به شيرى كزوجة ليوسف الشريف. شيرين الطحان.. رغم أدوارها التمثيلية القليلة.. زى مشاركتها فى فيلم "أعز أصحاب" أو "45 يوم" إلا أن شيرين بـ تثبت يوم بعد يوم أنها ممثلة كويسة جدًا، ويمكن بـ يساعدها على أداء دورها نظرة عينيها اللى بـ تجمع بين الغموض والحزن فى نفس الوقت.. لو شيرين كملت فى دورها بنفس القوة بـ نتوقع لها انطلاقة شبه الانطلاقة اللى حالفت الفنانة رانيا يوسف فى مسلسل "أهل كايرو". رامز أمير بـ يؤدى دور أكثر من رائع، فى شخصية محامى تحت التدريب بـ يعانى من مشاكل فى النطق بسبب مشكلات نفسية.. رامز أدى الدور باحترافية وتلقائية رائعة ونتوقع له مستقبل مبهر. وأخيرًا لازم نتكلم عن الموسيقى التصويرية الأكثر من رائعة، جديدة وفكرتها طازجة وبـ تعتمد على صوت "الزنة" الشهير بتاع الموبايل.. بالإضافة لعدد جديد وجذاب من المقاطع الموسيقية اللى عملها ببراعة عمرو إسماعيل. أما الديكورات فى رأينا أنها كانت مناسبة جدًا للعمل.. وإن كانت أكثر ميلاً للطراز الأمريكى، لكن ما شوفناش فيها أى مبالغة أو ابتذال. إحنا فى كايرو 360 بـ نرشح لك "رقم مجهول" كمسلسل رائع فى رمضان لو كنت من محبى الأكشن والغموض.. أما لو مش لك فيهم لازم تغير القناة فورًا.

...

فرتيجو: عندما تجني الدراما على الرواية
اصدرت في: 31/07/2012

إحنا فى كايرو 360 أصبح عندنا هاجس من تحول الروايات إلى مسلسلات أو أفلام لأن للأسف نادرًا ما بـ نشوف رواية بـ تتحول لفيلم أو مسلسل وتفضل محتفظة برونقها، اللهم إلا بعض الأعمال النادرة زى «عمارة يعقوبيان» على سبيل المثال، الرواية اللى لما تحولت لفيلم كانت مبهرة، لكن لما تحولت رواية ثانية لمسلسل ظهرت على الشاشة بصورة باهتة وماسخة للغاية. فرتيجو مسلسل مأخوذ عن رواية للكاتب الشاب أحمد مراد، بـ يحكى المسلسل عن بنت بـ تشوف مقتل أعز الناس عليها بعينها من خلال جريمة قتل بشعة، وبـ تحاول طول الوقت توصل للفاعل الحقيقى وتفضحه. بـ ينضم لرحلة البحث عن الحقيقة أفضل أصدقاء البطلة (نضال الشافعى) وبـ يحاول الاثنين فك غموض الأحداث فى علاقة صداقة قد تتحول لعلاقة حب مع الوقت والأحداث لأن الحل الوحيد فى الدراما المصرية هو أن البطل بـ يتزوج البطلة فى النهاية. الأداء التمثيلى للممثلين فى المجمل فيه قدر كبير من المبالغة، وتعودنا لما نشوف أن الممثلين كلهم بـ يمثلوا بشكل معين، وكل أدائهم فيه نفس العيب، نقول أن العيب فى المخرج، علشان كده بـ نقول أن الإخراج ما كانش متقن، وأظهر أداء الممثلين بشكل يبان أنه Over. تحويل بطل الرواية الشاب إلى شابة فى المسلسل حسسنا كمشاهدين قراء أن فيه حاجة غلط، وكان من الأفضل أنه يتم الإبقاء على الوضع الروائى كما هو عليه مع تغيير هند صبرى بممثل شاب، الآراء على مواقع التواصل الاجتماعى والمواقع المهتمة بالمسلسلات كلها مستغربة من تحويل الرواية لمسلسل بالشكل ده. من الحاجات الجميلة فى المسلسل موسيقته التصويريه المعبرة، ما نقدرش ننسى أغنية التتر بصوت حسين الجسمى الحساس الجميل، تترات البداية كلها كانت جميلة ومتميزة عن كثير من التترات الثانية اللى شوفناها فى رمضان السنة دى، أما الديكورات كانت باينة فى كثير من الأوقات أنها مجرد ديكورات للتمثيل مش أماكن واقعية، لكن في مشاهد كثير كانت بـ تبقى جيدة ومناسبة جداً. تقييمنا لـ «فرتيجو» ممكن يكون قليل بسبب أننا قرأناها كرواية قبل ما نشوفها كمسلسل، ويمكن لو كنا شوفناها كمسلسل قبل أى شىء كان تقييمنا هـ يختلف، لكن بطبيعة الحال تحويل الأعمال الأدبية لأعمال درامية لازم يتم بحذر شديد لأن المشاهد بـ يكون أخرج وشاف العمل الدرامى فى عقله قبل ما يشوفه على الشاشة.. وده اللى حصل فى حالة فرتيجو.

...

أهل كايرو: دراما مثيرة في كايرو
اصدرت في: 08/05/2011

الفنان خالد الصاوي أصبح واحد من أحسن الممثلين في جيله، ولعب أدوار مهمة وصعبة في أضخم الأعمال المصرية منها فيلم «عمارة يعقوبيان»، والحقيقة أنه دائمًا بـ يُبدِع في أي دور يعمله. مسلسل «أهل كايرو» بـ يقوم بـ بطولته خالد الصاوي، أذيع لأول مرة في شهر رمضان، المسلسل عبارة عن دراما اجتماعية في صورة أكشن وإثارة، وقصته بـ تدور حول جريمة قتل بـ يحاول فيها خالد الصاوي -وهو بـ يلعب دور ضابط المباحث "حسن محفوظ"- أنه يحلها، والقصة بـ تتكشف وتوضح أكثر من خلال مشاكل بـ تقابله وهو بـ يحاول يدَوَر على القاتل. بـ يشاركه في بطولة المسلسل نجوم كثير زي رانيا يوسف، زكي فطين عبد الوهاب، والممثلة السورية كندة علوش. سيناريو المسلسل قدر يوضح كل الشخصيات بطريقة زي ما تكون بـ تحلل المجتمع المصري نفسيًا، من هنا جاء اسم المسلسل والمقصود به "نواقص" أهل كايرو. كل شخصية في المسلسل بـ تمثل طبقة اجتماعية معينة من ناس موجودة حولنا وممكن تبقى شبه أي حد مننا. فيه مثلاً سيدة المجتمع "صافي سليم" بـ تلعب دورها رانيا يوسف، قادمة في الأصل من حي فقير جدًا لكن عرفت تلاقي طريقها للثراء وكانت بـ تحَضَر لجوازها من عريسها "الدكتور شريف" -بـ يلعب دوره زكي فطين عبد الوهاب- اللي كان عايش طول حياته بالخارج ومصدوم ثقافيًا من كل حاجة بـ يشوفها في مجتمع القاهرة وما فيه من ازدواجية للمعايير، الممثلة السورية كندة علوش أدت شخصية "داليا" وهي صحفية صادقة وعندها مبادىء وبـ تدافع عنها وسط عالم الكذب والنفاق اللي مالي الوسط الصحفي، ورئيس تحرير الجريدة محل عملها يبقى واحد من أكبر الفاسدين في البلد. خالد الصاوي كان مناسب جدًا لدور ضابط المباحث، وعرف يقنع المشاهدين باستنتاجاته وتحليله لمواقف كثيرة، أما أداؤه كان طبيعي وتلقائي جدًا وكمان قدم شخصيته بخفة دم لذيذة. رانيا يوسف كمان عرفت تقدم دورها كسيدة مجتمع محدثة نعمة (نوﭬو ريش زي ما بـ يقولوا)، مع تناقض مظهرها الأنيق الجذاب مع الأسلوب البلدي في الكلام طوال المسلسل. عمرك ما كنت هـ تتخيل أن ده ثاني عمل فقط يخرجه المخرج محمد علي، الشطارة في أسلوب تحريك الكاميرا وفي المونتاﭺ كانت غير طبيعية، وانسيابية تدفق المَشَاهد ورا بعض جعلت الشوطات الكثيرة غير متوقعة والنتيجة طلعت تقريبًا زي السينما بالظبط. المأخذ الوحيد على الكاتب بلال فضل هو أن القصة نفسها مشابهة جدًا لرائعة الكاتب نجيب محفوظ «المذنبون» واتقدمت في فيلم سينمائي سنة 1976.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح