اختار لك شارع: مبادرة لحسن رمزي ومجموعة من الموسيقيين في شوارع القاهرة - فن وثقافة Feature - كايرو 360
 







اختار لك شارع: مبادرة لحسن رمزي ومجموعة من الموسيقيين في شوارع القاهرة
اختار لك شارع: مبادرة لحسن رمزي ومجموعة من الموسيقيين في شوارع القاهرة
اصدرت في: 11/05/2016

فكرة العروض الفنية في الشارع موجودة من مئات السنين، ولما تفكر فيها بموضوعية هتشوف أنها طريقة عظيمة لتوصيل الفن للناس، على طريقة الشارع هو مسرحك! والمبادرة اللي هنكلمكم عليها مختلفة، الهدف منها استغلال ميزة المساحة الكبيرة المتوفرة في الأماكن العامة لتقديم رسالة هادفة.

المغني والكاتب الموسيقي حسن رمزي بيؤمن أن الموسيقى تقدر تغير المجتمع، وعلشان كده عمل مبادرة "اختار لك شارع" للتوعية بمعاناة أصحاب مشاكل السمع، وعن طريقها بيجمعوا تبرعات يقدروا بيها يعملوا عمليات زراعة سماعة وكل ده بتقديم حفلات موسيقية في شوارع القاهرة.

اتكلمنا مع حسن عن المبادرة وقال: "الهدف من مبادرة اختار لك شارع هي تقديم موسيقى تنشر روح إيجابية في بلدنا وتساعدنا على عمل تغيير في مجتمعنا، أنا راجل موسيقي وعايز أوظّف موهبتي في عمل إيجابي". حسن بيشوف كمان أنه لو قدر حتى يشجع أي واحد على التغيير، يبقى قدر يحقق جزء من هدفه.

مبادرة اختار لك شارع بتعمل حفلة أيام الخميس والجمعة والسبت في ثلاثة شوارع مختلفة، وبيعلنوا عن حفلاتهم على صفحة اختار لك شارع على فيس بوك بالاشتراك مع جمعية وصلة خير، وهي واحدة من الجمعيات التابعة لمؤسسة الأورمان الخيرية ومن أوائل الجمعيات المتخصصة في زراعة سماعات الأذن وهناك بيستمتع الجمهور بحفلات ممتعة وممكن يساهموا في تغيير حياة شخص للأحسن.

 

كل حفلات اختار لك شارع بيحضرها مندوبين عن جمعية وصلة خير، وبيجمعوا فيها تبرعات عن طريق "كارت الخير" وهو عبارة عن بطاقة بيشتريها الجمهور ويدفعوا أي مبلغ لدعم القضية.

حسن بيكمل كلامه: "طبيعة الناس بتخليهم عايزين يعملوا حاجات حلوة، بس الحياة بتشتتهم. اختار لك شارع قربت عمل الخير للناس مع الاستمتاع بموسيقى رائعة".

أول مجموعة حفلات لاختار لك شارع اتعملت في الفترة من 31 مارس لغاية 15 أبريل، واشترك فيها حسن رمزي مع مجموعة من الفرق المصرية منهم المغني كركدن وفريق النوتالنت، بالإضافة للفنان شادي أحمد، الحفلات حققت نجاح كبير، وقدرت تجمع تبرعات كبيرة وصلت لـ 5000 جنيه.

 

"معظم الناس رحبت بالمبادرة وتفاعلت بشكل هايل مع حفلات الشارع، رغم إن في عدد بسيط رفضوا الفكرة، عمومًا أنا اتعلمت عمري ما أهتم بالآراء السلبية والإحباط".

حسن باعتباره فنان محبوب وسط أسرة موسيقى الأندر جراوند ما واجهش مشكلة في الاتفاق مع فنانين لتقديم عروض في مبادرة اختار لك شارع، وكمان تواصل مع مشاهير شبكات التواصل الاجتماعي وشخصيات معروفة لحضور الحفلات، وعلى حسب كلامه دعوته لقت ترحيب كبير وكثير منهم عرضوا مساعدته في المبادرة.

اختار لك شارع مش مجرد ظاهرة وهتنتهي، الفكرة مهمة بجد، وحسن بيعمل كل اللي يقدر عليه لنشرها.

"إحنا شغالين رسمي 100% والجمعية الأهلية مسجلة في وزارة التضامن الاجتماعي، وبكده نقدر نجمع التبرعات بشكل قانوني".

آخر حفلات اختار لك شارع كانت في شهر أبريل، وبعدها قرروا يأخذوا أجازة ويرجعوا مع الموسم، واللي هنشوف فيه فنانين أكثر وموسيقى أجدد.

وكمل حسن كلامه وقال "أنا عايز أشجع عروض الشارع بشكل عام ونفسي الناس تتعود عليها وتفهم إنها فن مهم". حسن كمان عنده تطلعات وأحلام نفسه يحققها لاختار لك شارع، ونفسه يقدم حفلات في كل أنحاء العالم في نفس الوقت، طبعًا واضح أن طموح حسن كبير، بس الموضوع محتاج شغل جامد.

وختم رمزي كلامه وقال "أنا بحاول أركز على مشاكل المجتمع ونفسي أساعد بأي طريقة".

أعرف أكثر عن اختار لك شارع من صفحتهم على فيس بوك.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هند صلاح الدين
حرر بواسطة:
هند صلاح الدين
تاريخ النشر:
11/05/2016
كاتبة