تليفونه دائمًا مشغول من كتر الطلبات خاصة في فترة الصبح من بدري، طبعًا دي حاجة متوقعة وما تضايقش لأن المحل ده من أجمد محلات المخبوزات اللي ممكن ما يكونش عندك مانع تقف طوابير علشان تشتري العيش الطري الطازج بتاعهم أو تجيب تحلية أو مشروبات علشان تبدأ يومك بإحساس مختلف.

محل مخبوزات «تي بي إس -TBS» معروف جدًا في كايرو وله فروع في الزمالك والكوربة والمعادي، المحل مشهور مخصوص في المخبوزات لأن منتجاته بـ يراعي يكون فيها قيمة غذائية عالية، ففي العيش هـ تلاقي مكونات بـ تساعدك على تنظيم نسبة الكولسترول في الجسم زي الشوفان، ومنتجات فيها عنصر أوميجا-3 واللي فيه ألياف وغيرها كثير، وده واضح بالتفصيل في مطبوعات موجودة في المحل بـ تشرح مكونات وفائدة كل نوع عيش عندهم وكمية السعرات فيه قد إيه والكربوهيدرات والدهون.

في الفرع اللي رحناه في الزمالك (موجود في شارع الجزيرة قبل نقطة شرطة الزمالك) المحل واجهته زجاج وبـ تقف بالداخل تشتري منه نوع العيش اللي بـ تحبه من تشكيلة كبيرة جدًا وأحجام مختلفة محطوطة وراء جزء الكاونتر: عيش فرنساوي، عيش باجيت، بيتى بان، أنواع عيش ألماني وإيطالي، والتوست وبـ تختار سواء العيش الأبيض أو الأسمر.

في واجهة المحل عند الكاونتر كمان فيه تشكيلة كبيرة من الحلويات الفريش: الدونتس بمختلف النكهات والأشكال، الدانش، الكيك، المافين، والكب كيك، وعلى الجنب الشمال ثلاجة ثانية فيها مكونات للساندويتشات لأنك ممكن تختار محتويات الساندويتش بتاعك من أول نوع العيش لحد الحشو والصوص (دريسنج) اللي بـ يتحط عليه مش زي المحلات الثانية اللي بـ تقدم سندويتشات جاهزة وأنت تختار منها. كل حاجة محطوطة لوحدها وأنت بـ تقول له بالترتيب أنت عاوز إيه، وكمان بـ يسألك لو حابب تسخنه ولا لأ خاصة لو فيه نوع جبنة وعايزها تسيح على المكونات.

اختارنا نوع عيش بانيني بالزيتون (2.75 جنيه) وحطينا عليه خس وجبنة أمينتال (12.5 جنيه) والدريسنج مايونيز، كان طعمه حلو جدًا وطازج والخضروات كمان صابحة، كمان جربنا العيش البانيني الأسمر (5 جنيه) عنده واختارنا مكونات ثانية من ضمنها الجبنة الشيدر وكانت رائعة ومشبعة جدًا خاصة أن العيش كان عليه شوفان من فوق. ومن ركن الحلويات جربنا دونتس الشوكولاتة (9 جنيه) وكانت طرية والشوكولاتة خفيفة وتجنن.

كل صنف هناك بـ تضيفه على الساندويتش له قيمة وهو بـ يجمعها لك في الآخر، فيه كمان هناك مكونات زي: تركي مدخن، روست بيف، صدور فراخ مدخنة، تشيكن بارميزان، تونة، والخضروات خس وطماطم ومخلل وكابري، والصوص مايونيز ومسطردة وكاتشب وجبنة كريمي، وفيه كمان ركن للمشروبات.

"تي بي إس" هو المكان اللي ممكن تروحه لو حابب تفطر إفطار مختلف وطازج ومتأكد أنك جسمك هـ يستفيد من عناصر غذائية مهمة وده طبعًا مفيد جدًا للناس اللي بـ تمارس رياضة واللي عايزة تحافظ على رشاقتها، ولو في شغلك أو في البيت ممكن تكلمهم عندهم خدمة توصيل طلبات لكن اصبر عليهم شوية لأن زي ما قلنا التليفون مش بـ يبطل يكون مشغول الصبح (فرع الزمالك)، أو كلمهم على الخط الساخن أفضل الخاص بكل الفروع.