دليل أحداث نهاية الأسبوع: حفل مي عبد العزيز ومدحت صالح والمولوية المصرية ويوم في قصر محمد علي - الحياة في كايرو Feature - كايرو 360
 







دليل أحداث نهاية الأسبوع: حفل مي عبد العزيز ومدحت صالح والمولوية المصرية ويوم في قصر محمد علي
دليل أحداث نهاية الأسبوع: حفل مي عبد العزيز ومدحت صالح والمولوية المصرية ويوم في قصر محمد علي
اصدرت في: 28/04/2016

كعادتنا كل يوم خميس، بنعرض لكم أجدد وأهم الأحداث اللي تساعدكم تقضوا ويك إند سعيد ومفيد. خاصة أن فيه ناس كتير هتنتهز الفرصة وتسافر، فلو أنت مش منهم إحنا مش ناسينك ومحضرين لك أحداث هايلة.

نبدأ باليوم ده الخميس، وحفل فرقة "المولوية المصرية" بقيادة المنشد الصوفي "عامر التوني" في ساقية الصاوي بالزمالك. كمان فيه في مركز الربع الثقافي حفل لفرقة النهر الخالد ودي فرقة غنائية هدفها أنها تُحيي التراث الموسيقي العربي القديم وتقدمه للناس بشكل بسيط وجميل.

ولمحبي الموسيقى الشرقية فيه في دار أوبرا جامعة مصر للعلوم والتكنولوجيا حفل للفنان مدحت صالح، وأسعار التذاكر: من 75 لـ 300 جنيه. كمان فيه جلسة غنائية لمجموعة "دعسوقة" الموسيقية في روم آرت سبيس في جاردن سيتي، وسعر التذكرة 50 جنيه.

وننتقل ليوم الجمعة، فريق "مشربية" عامل يوم سياحي هينظم فيه جولة تاريخية في قصر "محمد علي" بالمنيل برفقة مرشدين متخصصين. كمان فيه حفل غنائي للفنانة "مي عبدالعزيز" في ساقية الصاوي سعر التذكرة 40 جنيه.

ولكل الناس اللي بتحب الفنون غير التقليدية فيه عرض "الأراجوز وخيال الظل" في مركز إبداع بيت السحيمي، والدعوة عامة. ولمحبي الفطار المختلف فندق سميراميس إنتركونتيننتال عامل فطار أيام الجمعة The Big Friday Brunch واللي بيضم أكلات شرقية من المطبخ المصري واللبناني، وبيضم من المطابخ العالمية السوشي والباستا وغيرها من الأكلات الشهية. كل ده بسعر يبدأ من 235 جنيه للفرد الواحد.

ونختم بيوم السبت، لكل عشاق السينما هيعرض في ماجنوليا بالزمالك فيلم "البوسطجي"، وهو فيلم مصري من إنتاج 1968 للمخرج حسين كمال. سعر التذكرة 20 جنيه. أما لو عاوزين ترتاحوا من ضغوط الحياة مؤسسة "بلو لوتس" تحت رعاية وزارة السياحة المصرية والسفارة الهندية والسفارة الصينية عاملة حدث لترويج ثقافة السمو الروحي من خلال التأمل، وهيختموا اليوم بعرض لفرقة المولوية مع المنشد عامر التوني.

لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
28/04/2016
-