دليل أحداث نهاية الأسبوع: حفل مسار إجباري وعمرو حسن وعلاء صابر وعرض الليلة الكبيرة - الحياة في كايرو Feature - كايرو 360
 







دليل أحداث نهاية الأسبوع: حفل مسار إجباري وعمرو حسن وعلاء صابر وعرض الليلة الكبيرة
دليل أحداث نهاية الأسبوع: حفل مسار إجباري وعمرو حسن وعلاء صابر وعرض الليلة الكبيرة
اصدرت في: 21/07/2016

كل يوم بيكون فيه منحة من ربنا أننا نتعرف على نعمه بشكل أكبر، ونعرف نفسنا وقدرتنا واللي بنحبه واللي نعرف نعمله، وعمرنا ما هنعرف الحاجات دي من غير ما نجرب ونشوف خبرات مختلفة وثقافات متنوعة، وده اللي سفر والخروج بيعمله، وإحنا بنحاول نوفر لكم في دليلنا كل الأحداث المختلفة اللي تساعدكم تعملوا ده.

نبدأ بالنهارده يوم الخميس، وليلة مختلفة في علبة ألوان بالزمالك اللي فيها حفلة نوبية مع الفنان ميدو بشير وفرقته من الجنوب واللي بتقدم الفن الأسواني والنوبي، وسعر التذكرة 50 جنيه. وبرضه ساقية الصاوي فيها حفلتين للشاعر "عمرو حسن" مع فرقته الموسيقية، من الساعة 4:00 للساعة 6:00 مساءً، ومن 7:00 لـ 9:00 مساءً، أقل سعر للتذكرة 30 جنيه.

أما على مسرح الضمة ففيه حفل غنائي لفرقة الوزيري الإسماعيلاوية اللي بتقدم الفن الشعبي السواحلي لجمهورها، وسعر التذكرة 30 جنيه. كمان على مسرح الهوسابير فيه عرض مسرحي بعنوان " الخواء"، وبيحكي عن علاقة الإنسان بربنا، وسعر التذكرة 20 جنيه.

وننتقل ليوم الجمعة، ومركز الربع الثقافي فيه حفل موسيقي للفنان علاء صابر عازف القانون والعود بفرقة الموسيقار عمر خيرت، وهيقدم في الحفل مزيج مميز لألوان مختلفة من الموسيقى على الآلات الشرقية، وسعر التذكرة 30 جنيه. وبرضه فيه في ساحة "روابط" العرض المسرحي "صح النوم" لفرقة "يوتوبيا"، وسعر التذكرة 20 جنيه.

ولعشاق الانطلاق مجموعة "بايكرز" لركوب الموتوسكيلات عاملة فعالية جماعية لركوب الدراجات من مدينة نصر إلى الكوربة في مصر الجديدة. كمان فريق مشربية عاملين زيارة تاريخية أثرية لجامع السلطان حسن وبيت الكريتلية، والفريق ده أسسه مجموعة من طلاب كلية الآثار لدعم وتنشيط السياحة الداخلية. كمان مسرح قاعة النهر بساقية الصاوي فيه حفل لفرقة "مسار إجباري"، وسعر التذكرة 50 جنيه. وفي داندي ميجا مول فيه عرض للأوبريت الشعبي الليلة الكبيرة هتقدمه فرقة فابريكا بعنوان "الليلة الكبيرة بني آدمين مش عرايس"، والدخول مجاني.

ونختم بيوم السبت، واللي بيقدم ضمن فعاليات المهرجان القومي للمسرح هيستضيف مسرح الهناجر بالأوبرا العرض المسرحي "هبط الملاك في بابل"، الدخول مجاني والدعوة عامة. وكمان هتلاقوا في ساحة "روابط" العرض المسرحي "صح النوم" لفرقة "يوتوبيا"، وسعر التذكرة 20 جنيه.

لو عاوزين تعرفوا عن الأحداث اللي بننشرها كل يوم على مدار الشهر، تابعوا أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
21/07/2016
-