دليلك لويك إند سعيد: حفلات ومسرحيات وفاعليات أكثر في القاهرة - الحياة في كايرو Feature - كايرو 360
 







دليلك لويك إند سعيد: حفلات ومسرحيات وفاعليات أكثر في القاهرة
دليلك لويك إند سعيد: حفلات ومسرحيات وفاعليات أكثر في القاهرة
اصدرت في: 11/08/2016

في ناس بيقضوا حياتهم كلها بيدوروا على لحظة سعادة واحدة حقيقية وناس تانية بيحاولوا يخلوا كل لحظة في حياتهم سعيدة وسط يومهم العادي، بيدوروا على اللي يسعدهم ويعملوه بلا تردد أو خوف. اعملوا اللي يبسطكم وما تستنوش العمر يسرقكم. وإحنا بنحاول في أجندتنا نوفر لكم كل الأحداث اللي تساعدكم تعملوا ده وتكتشفوا تجارب فنية وإبداعية حلوة بتحصل في القاهرة.

 

نبدأ بالنهارده يوم الخميس، وعلى مسرح الجنينة فيه ليلة غنائية بحضور فرقة "الميناء" وفرقة "دروشة"، وسعر التذكرة 30 جنيه. كمان في علبة ألوان في الزمالك فيه حفل موسيقي للفنانة "نهى فكري" والفنان "رامي عطاالله"، وسعر التذكرة 50 جنيه.

ولعشاق الكتب خبرين أحلى من بعض، طبعًا أنتم عارفين إننا بقى لنا أسبوع في حملة #صاحب_كتاب اللي بنقدم لكم من خلالها كل الكتب الجديدة والقراء بيتصوروا مع كتبهم مع نبذة عنها وهيكون فيه مفاجأت تانية أجمل، فطبعًا هتستمتعوا بمعرض الكتاب اللي الساقية عاملاه وبتعرض فيه كتب من دور نشر مختلفة. كمان الكاتب المعروف والمحبوب من الشباب الدكتور "أحمد خالد توفيق" هيكون موجود في حفل توقيع كتابه الجديد "في ممر الفئران"، واللي كنا كتبنا عنه مقال نقدي هنا.

وننتقل ليوم الجمعة، وعلى المسرح القومي بالعتبة ابتدأ تاني العرض المسرحي "ليلة من ألف ليلة" من بطوالة الفنان القدير "يحيى الفخراني". وأسعار التذاكر: 30 للبلكون، و 50، 70، 100 للصالة. برضه على مسرح الهوسابير فيه عرض مسرحي بعنوان "البروفة" هيقدمها فريق العرض المسرحي الشهير "1980 وأنت طالع"، وسعر التذكرة 25 جنيه.

كمان على مسرح قاعة الحكمة بساقية الصاوي فيه حفل غنائي لفرقة "الجيل الصاعد" للموسيقى العربية واللي بتضم عدد من الفنانين صغار السن بقيادة المايسترو إيمان سليمان، وسعر التذكرة 20 جنيه لغير أعضاء الساقية و15 جنيه للأعضاء. وبرضه في مركز الربع الثقافي في شارع المعز فيه حفل لفرقة المستربع اللي هتقوم بتقديم بعض ألون الفن الشعبي المصري بتوزيعات جديدة، وسعر التذكرة 30 جنيه.

ونختم بيوم السبت، وخروجة مختلفة منظماها فريق "مشربية" في قصر "محمد علي" بالمنيل مع مرشدين لللإفادة التاريخية والأثرية. كمان في علبة ألوان بالزمالك فيه حفل بعنوان "موسيقى من الخشب" لمشروع سرور، وسعر تذكرة الحضور 50 جنيه شاملة المشروبات. ومن ضمن فعاليات المهرجان القومي للموسيقى والغناء هيستضيف المسرح المكشوف بدار الأوبرا المصرية حفل غنائي لمجموعة "بغدادي باند"، سعر التذكرة 35 جنيه.

كمان من ضمن فعاليات المهرجان القومي للمسرح هيستضيف مسرح الهوسابير العرض المسرحي "الصفحة رقم 13"، وسعر التذكرة 20 جنيه. وكعادة كل يوم سبت حفل التنورة في مركز إبداع وكالة الغوري، وسعر التذكرة 5 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
11/08/2016
-