النهارده في القاهرة: نسمة محجوب والمولوية وميوجن باند والميناء ودروشة - الحياة في كايرو Feature - كايرو 360
 







النهارده في القاهرة: نسمة محجوب والمولوية وميوجن باند والميناء ودروشة
النهارده في القاهرة: نسمة محجوب والمولوية وميوجن باند والميناء ودروشة
اصدرت في: 28/08/2016

خروجات أول الأسبوع دي خروجات الناس أصحاب المزاج، اللي الدنيا بالنسبالهم عبارة عن حركة ولف وفرجة وتجارب.. وقعدة البيت ماتجيش غير بالاضطرار! الناس اللي زي دي لازم القاهرة تعمل حسابهم بزيادة، علشان دول هما الونس الدايم لشوارعها وأماكنها في كل وقت.. وبعد نظرة سريعة على أجندتنا النهارده نقدر نقول أن القاهرة واخدة بالها من أولادها كويس.

البداية هتكون من إحدى قلاع القاهرة التاريخية، قلعة صلاح الدين.. وفعاليات مهرجان القلعة اللي لسه شغالة، واللي نقدر نعتبرها الفترة دي بمثابة ضمان دايم لوجود اختيارات لطيفة للخروج أول ما ننوي، النهارده إحنا على معاد مع حفل فرقة المولوية المصرية اللي هيصاحب عرضها صوت المنشد عامر التوني، الحفل هيبدأ الساعة 8:00 مساءً، والحفل الثاني هيكون للفنانة "نسمة محجوب" الساعة 10:00 مساءً.. وسعر تذاكر دخول الحفلات 5 جنيهات.

وفي مكان قريب جدًا من القلعة، في حديقة الأزهر، هيستضيف مسرح الجنينة ليلة أخرى مغرية لعشاق الفن، بحضور فرقة "الميناء" وفرقة "دروشة" في عرضين موسيقيين غنائيين مميزين، سعر تذكرة الحضور 30 جنيه غير شاملة تذكرة دخول الحديقة، والعرض الأول هيبدأ 8:30 مساءً.

ونروح لجزء آخر من القاهرة مختلف في روحه وطبيعته.. للزمالك، جزيرة الفن، وتحديدًا من ساقية الصاوي اللي هتستضيف حفل لفرقة "ميوجن" اللي بتقدم مزيج فني بين المسموع والمرئي، سعر تذكرة الحضور هتكون 25 جنيه، والبداية هتكون الساعة 8:00 مساءً.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
28/08/2016
-