ركنة: تطبيق جديد يسهل عليك رحلة البحث عن ركنة في وسط البلد - الحياة في كايرو Feature - كايرو 360
 







ركنة: تطبيق جديد يسهل عليك رحلة البحث عن ركنة في وسط البلد
ركنة: تطبيق جديد يسهل عليك رحلة البحث عن ركنة في وسط البلد
اصدرت في: 21/09/2016

أهل القاهرة نوعين؛ واحد بيركب مواصلات، والثاني بيركب عربيته، والأثنين بيشتكوا من مشكلة زحمة المرور بشكل عام. بعدها بقى تتفرع مشكلة زحمة المرور لكل واحد فيهم؛ اللي بيركب مواصلات بيعاني من مشاكل خاصة بوسائل المواصلات (زحمة، تلزيق وحر)، واللي بيركب عربيته -المقال ده هيعجبه- بيبقى عنده مشكلة "طب أنا وصلت، هركن فين؟".

بالرغم من أن امتلاك عربية يعتبر نعمة في حد ذاتها، إلا أن الموضوع مش بالسهولة اللي ناس كثير متخيلاها. لأن فقرة رحلة البحث عن ركنة لازم لها ربع ساعة -على أقل تقدير- علشان يدوب توصل في ميعادك. طب نفرض أنك لاقيت ركنة، ويالا بينا هنركن، غالبًا الزحمة والعربيات اللي وراك مش هتسيب لك الفرصة أنك تركن واحتمال كبير تسيب الركنة وتمشي، أو تتحلى ببرود أعصاب يخليك تعمل بلوك للطاقة السلبية اللي هتخرج من العربيات اللي وراك.

وبما أن فيه تطبيقات كثيرة ظهرت في الفترة الأخيرة علشان تسهل علينا حياتنا، كان لازم يظهر لنا تطبيق عبقري زي تطبيق ركنة – Rakna ، واللي بيعمل عمل الـ Valet في شوارع القاهرة، وتحديدًا منطقة وسط البلد. ولو ما عندكش فكرة عن ماهية الـ Valet، الـ Valet ده شخص بيبقى مهمته أنه ياخد منك مفتاح العربية -ويديك رقم- ويروح هو يركن لك العربية وأنت خارج تديله الرقم فيروح يجيب لك العربية لحد عندك، وعادة هتلاقيه عند الفنادق والمطاعم الكبيرة كخدمة بفلوس توفر عليك تعب الركنة.

تطبيق ركنة بيقدم لك الخدمة دي عن طريق التليفون المحمول بس في أي حتة في وسط البلد؛ هتحدد لهم المنطقة اللي أنت هتروح لها، هم هيبعتوا لك بيانات الشخص اللي هيقابلك ياخد منك العربية، وهيروح يركنها في الجراج اللي هم متفقين معاه. قبل ما تخلص مشوارك بـ 15 دقيقة –علشان ما تقفش تستنى في الشارع- تبعت من خلال التطبيق أنك عايز العربية وهم هيجيبوها لحد عندك. سعر الخدمة محدد 5 جنيه للساعة، و25 جنيه لليوم كله.

ولو مقلق على عربيتك، التطبيق بيتيح لك تتبع مسار العربية على الموبايل علشان تطمئن. والخدمة متاحة من 8:30 صباحًا ولحد الساعة 9 مساءً. علشان تعرف أكثر عن التطبيق دي صفحة الفيسبوك الخاصة بيهم، وتقدر تحمل التطبيق من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
21/09/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.