أفضل 10 مطاعم في القاهرة عام 2012 - الحياة في كايرو Feature - كايرو 360
 







أفضل 10 مطاعم في القاهرة عام 2012
أفضل 10 مطاعم في القاهرة عام 2012
اصدرت في: 26/12/2012
جولاتنا الغذائية في 2012 كانت مثمرة جدًا، وما عداش أسبوع إلا لما كنا بـ نكتشف مطعم جديد بـ يفتح في قلب العاصمة وأطرافها، ومن هنا تأكد لنا ملاحظة هامة جدًا، أن مهما كانت درجة سخونة الأحداث السياسية وفي عز الأزمات الاقتصادية والأمنية، نشاط واحد بس هو اللي مش بـ يتأثر بكل العوامل دي، وهو "الأكل". المطاعم اللي فتحت خلال عام 2012 كثيرة جدًا بالمقارنة بالسنتين اللي قبلها، وقدرنا نعرف من خلال زيارتنا السرية كفريق كايرو 360 مين فيهم هـ يستمر على الساحة وينافس بقوة ومين كان مجرد فقاقيع صابون وبسرعة هـ يقفل أو هـ يغير نشاطه. ورصدنا في الموضوع ده أفضل 10 مطاعم زرناهم السنة دي واللي فيه منهم الجديد والعريق، والشرقي والغربي، وفي مناطق مختلفة. علشان اللي ما كانش متابعنا طوال السنة يأخذ فكرة سريعة دلوقت.

بيسترو زيتونة اللبناني
مطعم قلب الموازين وغير لنا مفهومنا عن المطبخ اللبناني. متخصص لأبعد الحدود وبـ يقدم أكلات لبنانية فريدة مش هـ تلاقيها إلا عنده زي الحلومي المشوي والفيتانكليش وفطائر السبانخ وعصير الليمون بماء الورد والكنافة العثمانلية. المطعم موجود في أبراج نايل سيتي بكورنيش النيل، ومستوى الخدمة وتقديم الطعام غير عادي. صحيح الأسعار مش قليلة بس الغالي هنا ثمنه فيه.

كمُنة
أول فروع «كمُنة» في القاهرة بعد 50 سنة من التميز والنجاح فى الفرع الأول والرئيسي بمرسى مطروح. فرع العاصمة موجود في شارع النزهة بمصر الجديدة، مبنى ضخم من عدة طوابق بديكورات شيك وقعدات مريحة. هنا مشويات ولحوم من مراعي خاصة بالمحل موجودة في صحارى مصر. هـ تحس بطعم مختلف للحم الضاني ولحم الجديان اللي بـ تتغذى على العشب فقط. ومع الشواء المحترف والتقديم المثالي للأطباق هـ تلاقي نفسك كأنك في وليمة عربية في قلب الصحراء، مع أطباق شرقية عظيمة زي المحاشي والحمام والممبار والبط وطواجن البامية والمسقعة. «كمُنة» مطعم مثالي للعزومات.

لازياتيك
ده كان هديتنا لعشاق السوشي السنة دي. صحيح هو مش جديد لكن له شخصية مميزة وزبائنه المخلصين اللي إحنا بـ نعتبر نفسنا منهم. «لازياتيك» موجود على ظهر مركب لو باشا في الزمالك. أجمل أنواع السوشي وعدد من الأطباق التايلاندية والصينية بنكهات فريدة. وفيه أطباق بـ تقدم بطريقة حصرية للمكان زي زلابية الجمبري وسلاطة التاتاكي والساشيمي والأﭭوكادو بصوص الصويا. وما تنساش تجرب الحلويات الآسيوية زي المارنج وتارت التمر الساخن.

كركاس
مطعم لبناني ثاني بـ يدخل معانا القائمة وهو «كركاس» الموجود في أركان مول في الشيخ زايد. فوود كورت أركان مول بطبيعته مغري جدًا للقعدة وتمضية الوقت. هنا تأكل أحلى خضروات مشوية ولحمة شقف "في حديث آخر كباب" وتشرب بعدها فريسكوس "سموزي يعني" بالجوافة أو البطيخ. وممكن تستمتع بأجواء أركان مول وأنت بـ تشرب شيشة بعد الأكل. حبينا «كركاس» لأسباب كثيرة أهمها أناقة المكان وأسعارها المعقولة وأهم حاجة علشان الآيس كريم بومب الخطير اللي ختمنا به وجبتنا هناك.

سولت
مش كل يوم بـ نلاقي مطعم فرنسي في طريقنا، لازم تدور كويس وتعرف المطاعم الفرنسية موجودة فين بالضبط. وحظنا كان حلو السنة دي لما اكتشفنا مطعم «سولت» الموجود في صن سيتي مول علشان نعرف قرائنا به. مطعم فرنسي يعني فواجرا (كبد أوز) وصدور بط مشوية ولحم ضاني بأعشاب عجيبة وأرز أسود بالخرشوف والينسون وأي حاجة ما تتوقعش أنك تلاقيها مع بعض في أكلة واحدة. لكن في نفس الوقت المذاق بـ يبقى يجنن. ترجبتنا كانت رائعة في «سولت» والأسعار كانت جيدة والخدمة ممتازة.

عثمانلي
درة فندق كمبنسكي الثمينة، زرناه في 2010 وحصل على تقييم كامل 5 نجوم. كان تقريبًا مافيهوش ولا غلطة. في زيارتنا السنة دي التقييم نزل وبقى 4 نجوم. لكن ده ما يمنعش أن «عثمانلي» لا يزال محتفظ برونقه وجماله. المطبخ التركي له معجبينه في كايرو مؤخرًا، وشهدت الساحة عدد من مطاعم الدونر والأكلات التركية. لكن «عثمانلي» هو الأفخم والأرقى على جميع المستويات، وعلى مستوى الأسعار فهو الأغلى طبعًا. منظر جميل للنيل من هناك، وجربنا طبق الموساكا أو الخضروات المطبوخة والمغطاة بالجبن مع الأرز واللبنة، وكان أجمل اكتشاف في الزيارة دي هو القرع بآيس كريم بطعم الطحينة؛ اختراع ثاني.

ماندرين قويدر
ملك الحلويات قرر ينافس في عالم المطاعم، بمطبخ عالمي ومستوى خدمة فندقي فتح فرع كبير في مول داون تاون في التجمع الخامس. هنا هـ تتفاجئ بمذاق أي طبق هـ تطلبه، هـ تحب الفاهيتا والستيك والأسماك والمقبلات والباستا وأي حاجة ممكن تطلبها. شيفات محترفين بزيادة، وخدمة رشيقة وراقية وقعدة حلوة في المساحة الخارجية للمول. وطبعًا مافيش أجمل من طبق حلويات شرقي بعد ما تخلص وجبتك الخطيرة. تقييمنا العالي للمكان ده كان من منطلق أنه بـ ينافس خارج ملعبه، وحقق نتيجة إيجابية جدًا تربك كل الخصوم. وكله في صالحنا كذواقة وعشاق للأكلة الحلوة.

زوبا
قفزة بعيدة عن كل أنواع المطاعم المذكورة أعلاه، وده لأن مطعم «زوبا» حالة فريدة فعلًا. كشري وفول وطعمية ومسقعة وعدس وبصارة وحواوشي وكبدة وسجق. صحيح أنت ممكن تلاقي مطاعم ثانية بـ تقدم نفس المنيو المصري الملخبط ده، لكن الجديد في «زوبا» هو موقعه في الزمالك والتصميم العصري والمجنون جدًا للمحل، وأسعاره الغالية بالنسبة لنوعية المأكولات اللي بـ يقدمها لأنه تقريبًا بـ يستهدف فئة معينة من المجتمع اللي عاوزة تجرب الأكل المصري الشعبي بس بمواصفات جودة معينة. باختصار كده هو "بلدي ستايل". بس المهم أننا حبينا طعم الأكل ومستوى الخدمة وسرعة خدمة التوصيل بتاعته. وما تنساش تجرب عصير المانجو بالروزماري والفراولة بالريحان من هنا.
 
أويا لاونج
أضواء خافتة باللون الأزرق وغيامات بيضاء بفعل الشيشة وموسيقى Chill Out في الخلفية، أجواء حالمة جدًا في «أويا لاونج» في المهندسين. حبينا القعدة كثير وعجبنا ديكور المكان والألوان المستخدمة في كل تفاصيل المحل الخارجية والداخلية والكراسي المرجيحة اللي بـ تخلينا نستعيد طفولتنا. منيو عالمي ومذاقات متفردة في كل طبق جربناه. والزحام الشديد في الويك إند أكبر دليل على الإقبال الكبير على المكان. بـ نرشحه كواحد من أهم اكتشافتنا في 2012.

بلبع
مش بسهولة نرشح مطعم خارج القاهرة كواحد من أهم 10 أماكن السنة دي، خاصة ان إحنا مُقلين في زيارتنا لمطاعم في المحافظات، ولما بـ نروح بـ نختار الفلتات والأسماء الكبيرة. لكن «بلبع» مش أي فلتة، ده أسطورة الأسماك والمشويات في الإسكندرية اللي ما يختلفش عليه اثنين. زرنا فرع الداون تاون أو كارفور الإسكندرية مش الفرع الأصلي في قلب المدينة. تجربة ممتعة لأقصى درجة وأكلة سمك ما حصلتش. «بلبع» غني عن التعريف طبعًا لكل أهل الإسكندرية وأي حد بـ يروح هناك كثير، لكن حديثنا عنه هنا لتوثيق الزيارة التاريخية من أهل كايرو لعروس البحر الأبيض وتقديرًا لمطاعم الإسكندرية الشقيقة.

نشوفكم في السنة الجديدة ونوعدكم بعدد وفير من الاكتشافات في المطاعم لو ربنا أعطانا عمر في 2013 وكل سنة وأنتم طيبين.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
26/12/2012
-