دليل أحداث نهاية الأسبوع: إنشاد ديني وأمسيات شعرية ومعرض بهجوري وراب من سوريا - الحياة في كايرو Feature - كايرو 360
 







دليل أحداث نهاية الأسبوع: إنشاد ديني وأمسيات شعرية ومعرض بهجوري وراب من سوريا
دليل أحداث نهاية الأسبوع: إنشاد ديني وأمسيات شعرية ومعرض بهجوري وراب من سوريا
اصدرت في: 23/01/2013
ويك إند طويل مع إضافة أجازة المولد النبوي الشريف اللي الصدفة الجميلة خلتها يوم الخميس، كل سنة وحضراتكم طيبين ويعود عليكم بالخير. والمرة دي هـ ننشر دليل الحاجات اللي ممكن تتعمل في الأجازة دي النهارده الأربعاء علشان نعرفكم بالاحتفالات الخاصة بالمولد النبوي من أول الليلة دي وطوال اليومين الجايين.
النهارده وقبل أي حاجة بـ نفكركم أنه تم افتتاح معرض القاهرة الدولي للكتاب في دورته الـ 44 بأرض المعارض في مدينة نصر، يعتبر المعرض من أقدم معارض الكتاب في العالم العربي ومن أكثرهم جذبًا لناشري الكتب حول العالم وبـ يصل عدد زواره إلى 2 مليون زائر، ضيف شرف المهرجان الدورة دي هي دولة ليبيا.
نبدأ بالليلة دي وحفل إنشاد وذكر وأغاني دينية في قاعة الحكمة في ساقية الصاوي للفنان علي الهلباوي، وسعر التذكرة 20 جنيه لأعضاء وغير أعضاء الساقية.
وفي ساحة "مكان" في وسط البلد بجوار ضريح سعد زغلول هـ يكون فيه سهرة غنائية لأغاني الجعافرة مع الفنان سيد ركابي، وهو من مواليد قرية الجعافرة بمحافظة أسوان، ويعتبر من المغنيين القلائل المتمسكين بأصول الغناء الشعبي التقليدي في جنوب مصر، أسعار التذاكر 20 جنيه عند الحجز مقدمًا و30 جنيه بدون حجز، الحجز يسقط الساعة 9 مساءً.
بكرة الخميس وبمناسبة الاحتفال بالمولد النبوي الشريف تقيم فرقة بسمة الأندلس بقاعة النهر بساقية الصاوي حفل بعنوان الليلة المحمدية يتضمن إنشاد ديني وعروض للتنورة، سعر التذكرة 20 جنيه والدخول الساعة 8 مساءً.
ممكن تغير الموود وتروح ليلة كاريوكي تغني فيها أنت وأصحابك في مطعم يوريكا بالقاهرة الجديدة، اتصل واحجز مكانك بالتليفون قبل ما تروح.
أو ممكن تروح كايرو جاز كلوب وتسمع وتشوف فرقة "جيل بيردز" اللي هـ يغني أغاني لكوين، وأواسيس والملك إلفيس بريسلي، بعدهم جلاس أونيون هـ يفكرونا شوية بأيام البيتلز لأنهم الفرقة الوحيدة في القاهرة اللي بـ تعزف للبيتلز وبس، ليلة ما تتفوتش والحجز ضروري.
نغم صالح مع الفرقة اللي بـ تحمل اسمها "فرقة نغم" بـ يقدموا نوع خاص من الغناء الفلكلوري الحماسي زي أغاني الشيخ إمام وسيد درويش وكمان أغانيهم الخاصة، فرقة نغم هـ تكون معاكم في مكتبة صوفي في حفلة فلكلورية 100%.
من المعارض اللي بـ نرشحها للزيارة الأسبوع ده معرض الفنان المشهور جورج بهجوري اللي بـ يعرض من خلاله مجموعته الفنية "حوار العقل والروح" اللي بـ تهدف إلى تمثيل الصراع الداخلي للفنان بين العقل والروح مع عناصر الحنين للماضي، كمان المعرض هـ يعرض طريقة خاصة لتصور الحياة والعادات المصرية، المعرض مقام في جاليري المسار في الزمالك.
هـ نفوت يوم الجمعة الموافق 25 يناير اللي الناس قلقانة منه ومحتارة بين نزول مظاهرات أو البقاء في البيت تحسبًا لوقوع فوضى، وهـ نقفز ليوم السبت اللي هـ يكون فيه حفل أغاني راب سوري في ساقية الصاوي تحت عنوان "حاجز دمشقي" تقدمه الفرقة السورية أراب جرام. أورينتال راب في قاعة النهر، وسعر التذكرة 20 جنيه لأعضاء ولغير أعضاء ساقية الصاوي.
وسهرة سورية ثانية في مكتبة (أ) فرع الميرغني بمصر الجديدة وهي أمسية شعرية للشاعرة السورية لجين السمان والدعوة عامة ومفتوحة للجميع.
كله بـ يتمنى الأيام الـ 4 اللي جاية تعدي على خير ومايكونش فيه خسائر لأي حد إلا للي عاوزين الخراب لمصر. بـ ندعي وبـ نترقب وفي نفس الوقت بـ نخرج وبـ نتعلم ونتثقف، الحياة ماشية وأجندة كايرو 360 بـ تفكركم دائمًا أنها ماشية مع الحياة. أجازة طويلة مفيدة إن شاء الله.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
23/01/2013
-