دليل أحداث نهاية الأسبوع: لايك جيلي ومشوار باند وذكرى محمد عبد الوهاب وسينما عالمية - الحياة في كايرو Feature - كايرو 360
 







دليل أحداث نهاية الأسبوع: لايك جيلي ومشوار باند وذكرى محمد عبد الوهاب وسينما عالمية
دليل أحداث نهاية الأسبوع: لايك جيلي ومشوار باند وذكرى محمد عبد الوهاب وسينما عالمية
اصدرت في: 14/03/2013
حد مصدق أننا في منتصف شهر مارس؟! ثالث شهور السنة اللي بدأت إمبارح تقريبًا بالنسبة لنا! الموضوع بقى مرعب ولاقينا أن من واجبنا نفكركم أن اللي كان ناوي يعمل حاجة السنة دي وفاكر السنة أمامه طويلة يلحق يعملها فورًا علشان هـ تنام وتصحى تلاقي نفسك في سبتمبر! رمضان هـ يقسم السنة نصفين ومش هـ نبدأ نستوعب إلا وإحنا داخلين في 2014 فكله يركز كده ويشوف وراءه إيه. الأسبوع ده هادئ إلى حد ما من حيث الأحداث الثقافية والحفلات الموسيقية، وده الهدوء اللي بـ يسبق الصخب اللي هـ يكون من الأسبوع اللي مع احتفالات أعياد الربيع وعيد الأم وكثير من الحفلات والكرنفالات اللي أكيد هـ نغطيها ونعرفكم بها أول بأول. ومع ذلك رشحنا لكم عدد من الحاجات الظريفة اللي ممكن تحضروها الأسبوع ده. نبدأ بعروض دار الأوبرا المتميزة جدًا الأسبوع ده. الليلة دي فيه عرضين؛ الأول هو باليه راسبوتين على مسرح الجمهورية في وسط البلد. العرض من تصميم وإخراج هاني حسين، والتذاكر متوفرة في شباك الحجز. والثاني على المسرح الكبير بدار الأوبرا المصرية فرقة عبد الحليم نويرة هـ تقيم حفل موسيقي تقدم من خلاله مجموعة من أغاني موسيقار الأجيال محمد عبد الوهاب في إطار الاحتفال بذكراه، التذاكر برضه متاحة لدى شباك الحجز. في كايرو جاز كلوب وبسبب النجاح والإقبال الكبير على عروضهم فريق Glass Onion اللي بـ يلعب أغاني البيتلز هـ يكون موجود في العرض الثاني اللي هـ يبدأ الليلة دي في كايرو جاز. وقبلهم هـ يلعب دانيال ملاك اللي هـ يقدم أغاني بوب وروك على الجيتار الأكوستك وده أول ظهور له في كايرو جاز. الحجز ضروري جدًا. أغاني بكلمات عربية وموسيقى الريجي الأفريقية بهدف توصيل رسالة سلام، مشوار باند الليلة دي في سهرة مليانة بطاقة آلات البيركشن والجيتار في درب 17 18 بالفسطاط، التذاكر متاحة لدى الدخول بـ 10 جنيه. يوم الأحد الماضي بدأ معرض الفنان كريم القريطي بعنوان "وجوه عابرة" في جاليري المسار للفن المعاصر. يستوحي الفنان أعماله من حالة الإنسان والشارع المصري حوله وتعتبر الشوارع المزدحمة ووجوه الأشخاص عنصر أساسي في تكوين أفكار لوحاته. المعرض مستمر ليوم 11 أبريل القادم. ومعرض ثاني مهم في جاليري المسار للفنان عمر النجدي اللي هـ يقدم أحدث أعماله في معرض بعنوان "تعبيرية اللحظات II " اللي بـ يستوحيها من الجانب غير الحسي للفنان اللي أعماله تأثرت بالظروف السياسية والاجتماعية في مصر. المعرض مستمر ليوم 11 أبريل برضه. النهارده آخر أيام أسبوع السينما اليابانية بالتعاون مع مؤسسة اليابان في مركز طلعت حرب الثقافي، تبدأ العروض في الساعة 6 مساءً وتُختتم اليوم بعرض فيلم (سوينج جيرلز) الفائز بجائزة أفضل سيناريو من أكاديمية اليابان. نرجع ثاني لحفلات دار الأوبرا يوم الجمعة اللي هو بكره. يقدم الفنان عثمان المهدي حفل موسيقي على المسرح الصغير بدار أوبرا القاهرة يضم مقطوعات موسيقية على البيانو والفيولينة، التذاكر متاحة في شباك الحجز. يوم السبت جريدة Egyptian Independent هـ تنظم حفل في درب 17 18 بعنوان "يا مسهل" هـ يستضيفوا فرقة لايك جيلي اللي ظهرت مع باسم يوسف في آخر حلقة من «البرنامج» ومعاهم مي وليد وذي خودز ورامي عصام وهاني بدير. احجز تذكرتك من دلوقت. مرة ثانية الشهر ده الموسيقار عمر خيرت يحيي حفل موسيقي يتضمن مجموعة من مؤلفاته الموسيقية. الأسبوع اللي فات في الأوبرا، الأسبوع ده في قاعة النهر بساقية الصاوي، سعر التذاكر 100 جنيه أول وثاني صف، 80 جنيه ثالث ورابع صف، 60 جنيه جلوس و40 جنيه وقوف. تابعوا أجندة كايرو 360 واعرفوا باقي الأحداث الخاصة بالويك إند والأسبوع اللي جاي. وخصوصًا الأسبوع اللي جاي اللي من أوله فيه حفلات ونشاطات كثير حابين أنكم تحضروها. نشوفكم على خير كمان أسبوع.
مزيد من الصور
  • دليل أحداث نهاية الأسبوع: لايك جيلي ومشوار باند وذكرى محمد عبد الوهاب وسينما عالمية
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
14/03/2013
-