دليل أحداث نهاية الأسبوع: إسكندريلا ونغم مصري وسينما ومعارض فنية - الحياة في كايرو Feature - كايرو 360
 







دليل أحداث نهاية الأسبوع: إسكندريلا ونغم مصري وسينما ومعارض فنية
دليل أحداث نهاية الأسبوع: إسكندريلا ونغم مصري وسينما ومعارض فنية
اصدرت في: 12/09/2013

أسبوع سعيد يا رب يكون عدى هادئ وظريف عليكم، وتكونوا وصلتم معانا ليوم الخميس وأنتم متحمسين ليومين أجازة حلوين، وإحنا متوقعين أن كثير من قرائنا هـ يكونوا بـ يستعدوا لقضاء آخر أيام الصيف على السواحل الشمالية والشرقية ومش هـ يحضروا معانا قائمة الأحداث اللي هـ نرشحها لكم النهارده، بس المهم تنبسطوا وترجعوا بالسلامة. والموجودين معانا في القاهرة بـ نقول لهم أن المراكز الثقافية بدأت تستعيد حيويتها وعملت كام حفلة جامدين الويك إند ده، هـ نقول لكم عليها حالًا.

الليلة دي الخميس ممكن تحضر حفل فريق نغم مصري ومطربه الشهير شربيني اللي بـ يقدم أشعار صلاح جاهين وأحمد فؤاد نجم بطريقة مبتكرة على أنغام الفيوجن جاز، فرقة نغم مصري هـ تقدم حفل في بيت الرصيف الليلة دي الساعة 7 مساءً وسعر التذكرة 30 جنيه. 

ولأن ساقية الصاوي لسة ما اشتغلتش بكامل طاقتها فهي معتمدة على عدد من عروض مسرح الساقية للعرائس وبـ تقدم ندوات مفيدة كل يوم تقريبًا في قاعاتها المختلفة. النهارده هـ يقدم مسرح الساقية للعرائس عرض موسيقي للفنان فريد الأطرش في قاعة الحكمة بـ يضم مجموعة من أغاني الفنان الراحل، سعر التذكرة 5 جنيه لأعضاء الساقية و10 جنيه لغير الأعضاء.

وفي قاعة الكلمة هـ يكون فيه ندوة للأستاذ الدكتور محمد علي حجازي أستاذ طب الأطفال بجامعة القاهرة عن الاكتشاف المبكر لأمراض القلب، كمان هـ يتناول مخاطر الإصابة وسبل الوقاية وأفضل طرق العلاج، الدعوة عامة. 

نروح لكايرو جاز كلوب وسهرة الخميس، فرقة ScrewDriver هـ تلعب الليلة دي بس بدري شوية عن الميعاد المعتاد، الدخول من الساعة 5 مساءً. وهـ تقدم الفرقة أحلى أغاني الروك أند رول والبلوز والبوب، حفلة جامدة جدًا صعب تتفوت، الحجز ضروري. 

بقى لنا كثير ما تكلمناش عن المعارض الفنية والاتيليهات، بـ نرشح لكم معرض فني بـ يضم مجموعة من آخر الأعمال الفنية لفنانين مصريين معاصرين بـ تعرض التنوع في الأساليب الفنية خلال الحركة الفنية في مصر، المعرض بعنوان Gallery Artists وهيكون في جاليري المسار بالزمالك وهو مفتوح لغاية يوم 30 سبتمبر ومغلق أيام الجمعة. 

يوم الجمعة ولهواة السينما العالمية هـ يكون فيه عرض لفيلم جديد ضمن برنامج عروض الأفلام في شهر سبتمبر في آرت اللوا، الفيلم بعنوان "Twenty one grams" للمخرج أليخاندرو جونزاليز وتمثيل شون بن وناعومي واتس، لمزيد من المعلومات اتصلوا بـ 01288108880. 

يوم السبت في ساقية الصاوي هـ يقدم الباحث بسام الشماع المحاضرة رقم 95 من سلسلة إعادة كتابة التاريخ بأيد مصرية، عنوان ندوة اليوم "جهابذة في دولة الإسلام"، الدعوة عامة والمحاضرة هـ تبدأ الساعة 5 مساءً. 

وبعد فترة غياب طويلة بسبب الظروف الأمنية في القاهرة، فرقة سلالم هـ تقدم حفل في كايرو جاز كلوب يفكرونا بأغانيهم اللي مالهاش حل بكلمات مصرية أصلية والموسيقى الشرقي والريجي والفانك. احجز مكانك قبل ما تروح، والحفل الساعة 8 مساءً.

وأخيرًا فرقة "إسكندريلا" بقيادة حازم شاهين هـ تلعب يوم السبت على مسرح الجنينة بحديقة الأزهر، فرقة "إسكندريلا" غنية عن التعريف، بـ تقدم أغاني سيد درويش والشيخ إمام عيسى وأغنيات ثانية من تأليف شعراء معاصرين ومن ألحان أعضاء الفريق، سعر التذكرة 10 جنيه بخلاف تذكرة دخول الحديقة. 

نتمنى اختيارتنا تعجبكم الأسبوع ده وتستفيدوا بالساعات القليلة اللي مش في وقت حظر التجوال علشان تعملوا نشاط تكسروا فيه الرتابة والملل، وتابعوا أجندة كايرو 360 أول بأول علشان لو فيه أحداث جديدة بـ نقولها لكم أول بأول.. وأجازة سعيدة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/09/2013
-