دليل أحداث نهاية الأسبوع: غالية بن علي ومهرجان أندرجراوند وأوركسترا وندوات فوتوغرافيا - الحياة في كايرو Feature - كايرو 360
 







دليل أحداث نهاية الأسبوع: غالية بن علي ومهرجان أندرجراوند وأوركسترا وندوات فوتوغرافيا
دليل أحداث نهاية الأسبوع: غالية بن علي ومهرجان أندرجراوند وأوركسترا وندوات فوتوغرافيا
اصدرت في: 19/06/2014

مساء الخير قرائنا الأعزاء، يا رب تكونوا في أحسن حال، عدى علينا أسبوع من أهم الأسابيع في تاريخ كايرو 360 وهو الأسبوع اللي اتممنا فيه الإعلان عن الفائزين بجوائز اختيارات محرري كايرو 360 لأفضل الأماكن فى القاهرة.. من الآخر أحسن حاجة في كل حاجة، كل أنواع المطابخ والمطاعم والكافيهات والفنادق ومراكز التسوق وأماكن السهر كان لها نصيب من ترشيحات المحررين، واللي زود سعادتنا كان فرحة الفائزين نفسهم والاهتمام بالحدث من خلال صفحاتهم على مواقع التواصل الاجتماعي، مبروك للجميع ويا رب اللي ما كانش معانا السنة دي يكون معانا السنة اللي جاية بعد ما يجبرنا على اختياره بأنه يكون على قدر المنافسة، اللي أكيد عمرها ما كانت سهلة في مدينة جبارة زي القاهرة.

الويك إند اللي هـ يبدأ النهارده مافيهوش حاجات كثير نقول لكم عليها، لسه موسم الامتحانات شغال، وجو هدوء ما قبل أجازة الصيف مسيطر على المراكز الثقافية المختلفة، بس هـ نحاول نختار لكم الأفضل على مدار الـ 3 أيام اللي جاية.

يوم الخميس كايرو جاز كلوب بـ يستضيف حفل غنائي غير عادي للفنانة التونسية غالية بن علي، جمهورها العريض عنده فرصة يشوفها النهارده للمرة الثانية في القاهرة، ويليها في نفس الليلة الفريق المحبوب مسار إجباري. يرجى الحجز مسبقًا، والدخول للـ Couples فقط، والأبواب بـ يتم اغلاقها باكتمال العدد.

وعلى مسرح الجنينة وبعد طول غياب هـ يبقى فيه حفل الليلة دي لفريق "الدور الأول"، واللي بـ يقدم أغاني مصرية معاصرة تتميز بلون الجاز الشرقي، المرات اللي فاتت شوفنا الدور الأول بـ يقدم مزيكا بس بدون غناء، سعر التذكرة 10 جنيه غير شاملة سعر تذكرة دخول حديقة الأزهر. 

الساعة 7 مساءً هـ تدار حلقة نقاش مع المصور المحترف ريمون الماركيز بمركز فوتوبيا الثقافي في مصر الجديدة. يدور النقاش حول عوامل الإضاءة وأنواعها المختلفة وأهم النصائح المتعلقة بالكاميرا للمحترفين. سعر الاشتراك 40 جنيه. 

فيه معارض فنية ممكن تروحها النهارده وبكرة وبعده وبعضها مستمر لحد نهاية الأسبوع اللي جاي. ففي جاليري آرت كورنر هـ يكون فيه معرض جماعي بـ يضم عدة أعمال لمجموعة من الفنانين، من ضمنهم أيمن قدري، وضياء عوض، ووليد نايف وحنان يوسف. الدعوة عامة، وفي جاليري آرت فوياج في مصر القبطية بمنطقة الفسطاط، فيه معرض للفنان عماد أبو جرين بعنوان "طقوس وإشارات"، الدعوة عامة.

على المسرح الكبير بدار الأوبرا المصرية هـ يكون فيه حفل لفرقة جالا ميوزيكال، بمشاركة فرقة أوبرا القاهرة وأوركسترا أوبرا القاهرة. التذاكر متاحة بشباك الحجز، وأخيرًا في مركز الجزيرة للفنون بقاعة الحسين فوزي معرض فني للفنانة لميس حجاج، الدعوة عامة. 

يوم الجمعة ممكن تروح أي من المعارض اللي تكلمنا عنها، لكن مافيش حفلات موسيقية كثير أو مهرجانات فنية، لكن يوم السبت فيه حفل أوركسترا القاهرة السيمفوني على المسرح الكبير بدار الأوبرا المصرية. التذاكر متاحة بشباك الحجز، والدخول بالملابس الرسمية، وللاستعلام اتصل بـ 27390132. 

وفي حديقة الأسماك بالزمالك هـ يقام يوم السبت مهرجان بعنوان أندرجراوند القاهرة، يتضمن المهرجان بازار للتسوق وعروض فنية وموسيقية وفيه أنشطة مختلفة للأطفال. تذكرة دخول الحديقة 5 جنيه. لمزيد من المعلومات اضغط هنا

وزي كل أيام السبت والاثنين والأربعاء قطاع صندوق التنمية الثقافية بـ يقدم عروض وحفلات فرقة التنورة التراثية بمركز إبداع وكالة الغوري. تقدم الفرقة عروضها بمصاحبة الآلات الموسيقية الشعبية (الربابة، السلامية، المزمار، الصاجات والطبلة) كما يقوم بالغناء -بمصاحبة الرقص- منشد شعبي يعتمد على التلقائية والإنشاد الديني، وتعتمد عناصر الرقص بالفرقة على راقص التنورة (اللفيف) والراقصين أو الحناتية) اللي بـ يرقصوا بآلة الإيقاع (المزهر). الدعوة عامة. 

في انتظار فعالياتكم الخاصة اللي حابين نعلن عنها عندنا، ارسلوا تفاصيل الحدث على info@cairo360.com وهـ ننشرها في أقصر وقت ممكن، وهـ تقدروا تشوفوها مع كل متابعين الموقع على صفحة أجندة كايرو360.. يلا .. أجازة سعيدة ومفيدة إن شاء الله.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
19/06/2014
-