دليل كايرو 360 لأماكن مناسبة للمذاكرة فى القاهرة - الحياة في كايرو Feature - كايرو 360
 







دليل كايرو 360 لأماكن مناسبة للمذاكرة فى القاهرة
دليل كايرو 360 لأماكن مناسبة للمذاكرة فى القاهرة
اصدرت في: 14/05/2015

في مشهد سينمائي مستهلك:

وسط الصخب المعتاد لقعدة الهري اليومية مع شلة الأنس، يسرح البطل شوية، والمزيكا تعلو في الخلفية، وصوت دوشة الكلام يختفي ببطء، والكادر يبدأ يضيق على وش البطل تدريجيًا، وهوبا يقوم صاحبنا قايم مرة واحدة، وخابط خبطة مفزعة ببطن كفه على الترابيزة،
ثم صمت تام.. ثم كلمة حاسمة.. ثم ينتهي المشهد بعاصفة من الضحك الهستيري لأفراد الشلة.. بـ يضطر بعدها صاحبنا أنه ينسحب في هدوء ساخط.. علشان يحافظ على قراره..
وكرامته!

 

"هـ أذاكر!".. مايو ويونيو وعمايلهم..

عادة في بداية الفترة الزمنية المكونة من الشهرين دول بـ يلعب الطالب المصري دور البطل في المشهد السالف ذكره.. على اختلاف وتنوع شلة الأنس من بيئة للثانية، وعلى اختلاف مكان وزمان القعدة..

لكن يبقى دور البطل محفوظ مصون لطالب مصري أصيل وهو بـ يقول كلمته الأثيرة: "هـ أذاكر".. وعادة بعد الكلمة دي بـ يقفل المشهد الأول ويعقبه مشهد أسود تمامًا.. في خلفيته صوت شامخ يتغنى بقول موسيقار الأجيال عبد الوهاب: "امتى الزمان.. يسمح يا جميل؟".

 

إمتى وفين صحيح!

غالبًا لو معاك كارنيه عضوية في نادينا الوهمي كـ "طالب مصري أصيل"، فأنت هـ تتبسط أكثر بالمذاكرة بره البيت.. وبناء عليه فأنت أكيد هـ تتبسط لو لقيت إجابة مفصلة على سؤال: "أذاكر فين"؟.. وبناء على اللي بنينا عليه فخلينا نجاوب ونقول:

 

لو أنت من هواة الأماكن المغلقة:

يبقى المكتبات العامة والـ "Co-Working Spaces" هـ تكون خيارات ممتازة بالنسبة لك.

بالنسبة للمكتبات العامة فالاختيار الأفضل هـ يكون مكتبة مصر العامة بفروعها، وقلنا "الأفضل" لأن الهدوء هناك مضمون، وكمان لو احتاجت أي مرجع مساعد في مجال مذاكرتك أكيد هـ تلاقي، والاشتراك السنوي فيها بـ يبقى بـ 30 جنيه.. صباح الفل!

فروع المكتبة في القاهرة تلاتة: في الجيزة، وفي الزيتون، وفي الزاوية الحمراء، ممكن تشوف الموقع الرسمي وتعرف من عليه العنوان بالضبط وبقية التفاصيل، وعلى نفس الموقع هـ تلاقي تفاصيل عناوين الفروع.

أما بالنسبة للـ Co-Working Spaces واللي بدأت تنتشر مؤخرًا بشكل ملفت فخلينا نقسمها كده جغرافيًا ونسرد أهمها بشكل سريع.

 

أولًا: بلاد "الدقي" وما حولها: ودي ما شاء الله زي ما قال المثل: "عّمَار يا دقي":

هـ تلاقي هناك شفشاون - ChefChaoun وهناك الساعة عندهم بـ 5 جنيه لكل ساعة من الساعات الثلاثة الأولى، وما فوق الثلاث ساعات معفي عنه.. بلوشي يعني!.. وفيه إنترنت، ومطبخ تقدر تساعد به نفسك في أوقات البريك، ومكتبة لو حبيت تقرأ حاجة، وFunroom لو حبيت تكسر حدة الملل شوية، فاتحين يوميًا من 10 صباحًا لـ 10 مساءً، وممكن تشوف صفحتهم على الفيسبوك.

عندك كمان "Creativo" في ميدان المساحة في الدقي برضه، عمارة رقم 10 في شارع حسين واصف، وهناك عندهم أول ساعتين بـ 10 جنيه (كل ساعة بخمسة)، واليوم الكامل بـ 20 جنيه شامل المشروبات مجانًا، وبـ يبقوا فاتحين يوميًا من الساعة 9 صباحًا للساعة 11 مساءً، شوف صفحتهم على الفيسبوك.


ثانيًا: "وسط البلد" وما حولها:

ودي برضه من الأراضي العمار، وهـ تلاقي هناك أماكن كثير، من أنسبها: "Mariam Gallery" فى 8 شارع عبد المجيد الدرملي متفرع من شارع محمد محمود فى التحرير، ودول بـ يبقوا فاتحين يوميًا (ماعدا الجمعة) من 10 صباحًا لـ 10 مساءً، وعندهم مساحة هادية مخصصة للمذاكرة، بـ تدفع في اليوم 20 جنيه أيًا كانت المدة اللي هـ تقضيها في المكان وبـ يبقى لك مشروب free من المنيو الخاص بالـ Studying Area، لو هـ تطلب مشروبات ثاني أو طلبات خارج المنيو المذكور بـ تبقى خارج الحساب، ودي صفحتهم على الفيسبوك.

عندك كمان "ملاذ – Malaaz" فى شارع طلعت حرب، عندهم القعدة مجانًا، الحساب بـ يبقى على المشروبات أو الطلبات اللي بـ تطلبها بس، لكن حاول تبعد شوية عن الفترة من 7 لـ 9 بالليل علشان بـ تبقى زحمة غالبًا بسبب الورش والفعاليات اللي بـ تتعمل في الوقت ده، غير كده الهدوء مضمون بعون الله، وهما بـ يبقوا شغالين يوميًا من الساعة 11 صباحًا للساعة 11 مساءً، ودي صفحتهم على الفيسبوك.


ثالثًا: بلاد "أكتوبر":

وهناك هـ تلاقي "Qafeer Laps" في الحي الـ 11 - شارع المحور المركزي - بلوك 66 - شقة 2، ودول عندهم الساعة بـ 5 جنيه في أول أربع ساعات، بعد كده بـ يقف الحساب عند 20 جنيه، ولو حابب تشترك اشتراك شهري وتقعد يوميًا برصيد ساعات مفتوح بـ تدفع 250 جنيه في الشهر، وبـ يشتغلوا يوميًا من 11 صباحًا لـ 11 مساءً، ودي صفحتهم على الفيسبوك.

رابعًا: بلاد "الهرم":

وهناك هـ تلاقي "الرُّكْنَة" فى المريوطية، طريق شبرامنت، أمام فندق "جراند بيراميدز"، عمارة 51، الدور الثاني، ودول عندهم الأربع ساعات الأولى بـ 15 جنيه، وكل ساعة زيادة عليهم بـ تبقى بـ 5 جنيه، وبـ يبقى عندك الشاي والقهوة Free طوال الوقت، والنت هناك كويس جدًا، بـ يفتحوا يوميًا ماعدا الجمعة أو الأحد (بالتناوب) من الساعة 10 صباحًا: 10 مساءً، ودي صفحتهم على الفيسبوك.


خامسًا: بلاد "مصر الجديدة":

ودي هـ تلاقي فيها "Eco Space" فى 8 شارع الشهيد محمد عبد الهادي من شارع الثورة فى هليوبوليس، عندهم الساعة الأولى بـ 10 جنيه، وبعدها كل ساعة بـ 5 جنيه، وحد أقصى للدفع في اليوم 25 جنيه، أقل مشروب عندهم بـ 2 جنيه، وأغلى مشروب بـ 5 جنيه،
بـ يفتحوا يوميًا من الساعة 10 صباحًا: 10 مساءً، لكن يفضل قبل ما تروح تتصل تعرف المكان متاح ولا لأ علشان الفعاليات اللي بـ تتعمل هناك وكده، ودي صفحتهم على الفيسبوك.

 

أما بقى لو أنت من هواة الأماكن المفتوحة:

عندك المساجد الأثرية القديمة، وأفضلها من حيث السعة والروح والجو ثلاثة: "عمرو بن العاص" في مصر القديمة.. وده بيبقى فاتح طول اليوم من الفجر لحد نهاية اليوم .. وهادي جدًا طول الوقت تقريبًا.

الثانى "الحاكم بأمر الله" في نهاية شارع المعز، بـ يفتح يوميًا من 11 صباحًا لحد صلاة العشاء، لكن يفضل أنك ما تروحش في يوم أجازة (جمعة أو سبت) علشان بـ يكون زحمة جدًا في الغالب ومش هـ تعرف تركز.

الثالث "السلطان حسن" في السيدة عائشة، بـ يفتح يوميًا من الصبح بدري لحد الساعة 5 عصرًا، وبـ يكون فاضي وهادي في معظم الوقت.

وعندك كمان الحدائق العامة لو بـ تحب أجواء الخضرة وبـ تستريح فيها، لكن ابعد عن أيام الأجازات علشان أكيد هـ تكون زحمة و.. وبالتوفيق يا حضرة الطالب!

مزيد من الصور
  • دليل كايرو 360 لأماكن مناسبة للمذاكرة فى القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
14/05/2015
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟