دليل كايرو 360 لأماكن تسجيل وتدريب صوتي فى القاهرة - الحياة في كايرو Feature - كايرو 360
 







دليل كايرو 360 لأماكن تسجيل وتدريب صوتي فى القاهرة
دليل كايرو 360 لأماكن تسجيل وتدريب صوتي فى القاهرة
اصدرت في: 10/01/2016

المغنواتية، المُعَلِّقِيْن، المُقْرِئِين، بتوع الدوبلاج، أصحاب مشروعات تسجيل الكتب صوتيًا، طلبة إعلام اللي لهم مشروعات في مجال الإعلام الصوتي أو المرئي، وأي حد معدي جنب سكة من السكك دي.. اجمع هنا.. ونادوا على معارفكم اللي في الأوساط بتاعتكم برضه يجمعوا هنا.. هنا فيه كلام يهمكم تعرفوه.

عادة لو أنت حد بدأ يدوس بشدة في الشغل في مجال ما، مع الوقت –ومن غير ما تحس ولا تقصد غالبًا- بـ تبقى مكون شبكة معارف وعلاقات سواء مع أشخاص أو مع جهات ومؤسسات تفيدك وتخدم شغلك في المجال ده، لكن دايمًا أصحاب المصالح العابرة بـ يقعوا في "حيص بيص" لما يحبوا يدخلوا وسط معين علشان يقضوا مصلحتهم الصغيرة دي ويمشوا، وبالتالي فإحنا هنا هـ نحاول نوفق بين حاجتين: أننا نفتح للنوع الأول (اللي دايس) سكك معرفة أماكن جديدة ممكن يكون ما يعرفهاش وتقدم له خدمة أفضل وأنسب، ونعرف النوع الثاني (اللي معدي يسلم وماشي) على الأماكن اللي أغلب الناس في الوسط بـ يتعاملوا معاها، ونعرفه على شوية تفاصيل مهمة ممكن تفيده في التعامل ومن ثم قضاء المصلحة بشكل أفضل.

 

بص يا سيدي..

لو العملية بالنسبة لك مجرد تدريب على أداءات صوتية سواء تعليق أو غناء أو غيره، فالمكان الأنسب هـ يكون ستوديو عماد الدين على اعتبار أن طبيعة المكان مناسبة جدًا للغرض ده، وكمان السعر أرخص كثير من الأماكن الثانية، لكن خد بالك أن القاعات مش معزولة صوتيًا بالكامل، وبالتالي لو هـ يكون معاك أي معدات صوتية عالية أو آلات موسيقية قوية مش هـ ينفع تستخدمها زي الدرامز مثلًا أو غيرها، وكمان المكان مش مجهز بمعدات صوتية، هو مجرد مكان واسع، ومعزول جزئيًا تقدر تستخدمه في التدريب أو البروفات.
الساعة هناك بـ 15 جنيه في القاعات الصغيرة، و25 جنيه في القاعات الكبيرة، والأسعار دي لو أنت مش هـ تستخدم المكان لغرض ربحي، يعني لو مثلًا هـ تعمل ورشة تدريب موسيقي وأنت هـ تبقى بـ تاخد فلوس من الناس اللي بـ يحضروا، ساعتها السعر هـ يختلف، وبـ يتم الاتفاق مع المكان على نسبة لهم من عائد التدريب أو الورشة، غالبًا بـ تكون 30% في المتوسط، وطريقة الحجز عندهم بأنك تروح تعمل عضوية في المكان وتطلع كود خاص بك وتبقى حجوزاتك في المكان كلها بعد كده عليه، تقدر تتواصل معاهم من خلال رقمهم 0225763850 أو من خلال صفحتهم على الفيسبوك.

 

أما لو العملية بالنسبة لك تسجيل صوتي في مشروع إعلامي أو عملية تعليق أو تسجيل كتب صوتيًا أو غيره، فـ شفشاون مكان مناسب جدًا للأغراض دي، وهو في الأصل مساحة عمل مشتركة لكن افتتحوا من فترة ستوديو تسجيل صوت بالتعاون مع "راديو مباشر" أحد الأنشطة الطلابية في جامعة القاهرة.

المكان هناك معزول صوتيًا بشكل كويس، لكن مش هـ يستوعب عدد أفراد كبير لأنه صغير نسبيًا، وبالتالي هـ تحتاج تخلي عملية التسجيل تتم على مراحل لو هـ تستخدمه في التسجيل، أما لو هـ تستخدمه في التدريب أو البروفات يبقى عدد الأفراد ما يزيدش عن 7 بالكثير.

سعر حجز الساعة بـ يكون 40 جنيه، ولو هـ تحتاج مهندس صوت فالساعة هـ تكون بـ 70 جنيه، الحجز هناك بـ يتم تليفونيًا على رقم 01064114225، وتقدر برضه تتواصل معاهم إلكترونيًا على صفحتهم على الفيسبوك.

 

أما بقى لو العملية بالنسبة لك بروفات غنائية أو تسجيل تراكات ومشروعات محتاجة شغل ومعدات وتجهيزات أفضل، فأنت هـ تحتاج مكان تتوفر فيه 4 حاجات مهمة جدًا:

. أن الحجرات تكون معزولة صوتيًا بشكل كامل.

. أن المكان يكون بـ يستوعب عدد كبير نسبيًا.

. أن المكان يكون مجهز بمعدات صوتية للتدريبات (مايكات وميكسر) وكذلك معدات للتسجيل بجودة مقبولة.

. توفر مهندس صوت عند الحاجة.

وعليه أمامك اختيار من ثلاثة فيهم المواصفات دي بشكل كويس إلى حد بعيد:

 

Vibe Studio:

أسعار الحجز هناك بـ تكون 40 أو 50 أو 60 أو 70 للساعة حسب حجم الأوضة اللي هـ تستخدمها، وده في حالة أنك هـ تستخدمها للتدريب، أما لو للتسجيل فالسعر هـ يكون 200 جنيه للساعة، وهـ يكون موجود معاك مهندس صوت.

الأوضة الكبيرة بـ تشيل في حدود 25 فرد تقريبًا، والحجز عندهم بـ يتم تليفونيًا عادي على رقم 01090955515، وتقدر كمان تتواصل معاهم من خلال موقهم الإلكتروني.

 

Wave Studio:

وده موجود في الدقي في نهاية الشارع اللي جنب المدرسة الألمانية (جنب مطعم سمسمة)، أسعار الحجز هناك بـ 40 أو 50 في الساعة حسب حجم الأوضة اللي هـ تستخدمها وده في حالة أنك هـ تستخدمه للبروفة أو التدريب، أما في حال التسجيل فالحجز بـ 150 جنيه للساعة، وهـ يبقى معاك مهندس صوت، والحجز بـ يتم تليفونيًا برضه على رقم 01008394875، وتقدر تتواصل معاهم على صفحتهم على الفيسبوك.

 

32 Studio:

وده موجود في 32 شارع جدة، أمام بوابة 2 لنادي الصيد بالمهندسين، الحجز تليفونيًا على رقم 01096006688.

أسعار الحجز للتدريب والبروفات 40، 50 جنيه في الساعة حسب حجم الأوضة اللي هـ تستخدمها، وللتسجيل الحجز بـ 150 في الساعة مع وجود مهندس الصوت.

 

وبس كده.. ويجعل أيامكم حلوة!

مزيد من الصور
  • دليل كايرو 360 لأماكن تسجيل وتدريب صوتي فى القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
10/01/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟