أركيد كلوب: ألعاب فيديو من الزمن الجميل في المهندسين - الحياة في كايرو Feature - كايرو 360
 







أركيد كلوب: ألعاب فيديو من الزمن الجميل في المهندسين
أركيد كلوب: ألعاب فيديو من الزمن الجميل في المهندسين
اصدرت في: 06/04/2016

أجهزة الألعاب الحديثة قدمت أبعاد جديدة لألعاب الفيديو من ناحية التكنولوجيا والرسومات المبهرة، بس إحنا قبل ما نلعب بالعميل بوكر دويت عشان ننقذ إليزابيث في لعبة BioShock، أو ندخل وسط القتلة في لعبة Assassin's Creed، زمان كان حلمنا ننقذ الأميرة في لعبة سوبر ماريو أو نختار ما بين Scorpion و Sub-Zeroفي لعبة Mortal Kombat.

أركيد كلوب مكان مميز قرر يحقق أحلام اللعيبة ويرجع أمجاد ألعاب الفيديو الشهيرة في الثمانينيات والتسعينيات. تقدر تقول إنك بتدخل كبسولة زمنية ترجعك لأيام البساطة والألعاب الجميلة، وهناك هتلاقي أجهزة قديمة زي السيجا والنينتندو تقدر تلعب تلعب عليهم Sonic و TekkenوTeenage Ninja Turtles.

أول ما تدخل أركيد كلوب الموجود عند نادي الصيد في المهندسين شريط حياتك هيجري قصاد عينيك، من بوسترات ماريو لأجهزة الأتاري القديمة للذراعات اللي بزرارين.

المكان مقسم 5 أقسام، وكل واحد منهم فيه جهاز مختلف زي الأتاري والسيجا جنيسيس ونينتندو 64، وكمان معاهم أجهزة جديدة زي بلاي ستشين 3 وبلاي ستيشن 4. سعر الألعاب القديمة في الساعة 20 جنيه، وأسعار البلاي ستيشن تتراوح بين 30 جنيه إلى 40 جنيه.

أول حاجة جربناها كانت الأتاري اللي عليه لعبتين بس (Mario و Duck Hunt) وكان شغال كأنه جديد. المشكلة إن التليفزيون القديم المتوصل ب الأتاري كان صوته سيئ، والناس هناك وعدونا يصلحوه.

جهاز السيجا المتوصل ب تلفزيون فلات كان مليان ألعاب على عكس باقي الأجهزة منها رامبو ومورتال كومبات 3 وكمان 75 لعبة ثانية. يمكن الفلاش باك بدأ معانا فعلًا لما مسكنا ذراعات السيجا وسمعنا أغنية لعبة سلاحف النينجا، فعلاً إحساس ملهوش مثيل. كل اللي كان ناقص تليفزيون قديم.

أركيد كلوب كمان بيوفر غرفة VIP اسمها غرفة بات مان عشان الناس اللي عايزة الخصوصية. غرفة بات مان مجهزة ب بروجيكتور HD وساوند سيستم وتكييف، وكمان فيها 7 كراسي bean bags وجرافيتي ب صور بات مان على الحائط، وسعرها 60 جنيه في الساعة. الغرفة مناسبة جدًا لمجموعة عايزة تعمل بطولة أو يتفرجوا على فيلم، وكمان تعتبر مكان ممتاز لحفلة عيد ميلاد وبسعر مناسب جدًا.

أركيد كلوب مكان هايل لألعاب زمان ويعتبر من الأماكن القليلة – لو مكانش الوحيد – اللي بتقدم ألعاب فيديو قديمة وجديدة ترضي كل الأذواق. صحيح المكان مش واسع للدرجة، لكن يعتبر خروجه ممتعة ومختلفة.

تابع صفحة أركيد كلوب على الفيسبوك.

مزيد من الصور
  • أركيد كلوب: ألعاب فيديو من الزمن الجميل في المهندسين
  • أركيد كلوب: ألعاب فيديو من الزمن الجميل في المهندسين
  • أركيد كلوب: ألعاب فيديو من الزمن الجميل في المهندسين
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
رامى سليمان
حرر بواسطة:
رامى سليمان
تاريخ النشر:
06/04/2016
كاتب - عامل دكتوراه فى البرجر - الأكل وتايلور سويفت ومورتال كومبات هما أولوياته فى الحياة.