توقعات كايرو 360 للفائزين بجوائز الأوسكار لعام 2016 - أفلام Feature - كايرو 360
 







توقعات كايرو 360 للفائزين بجوائز الأوسكار لعام 2016
توقعات كايرو 360 للفائزين بجوائز الأوسكار لعام 2016
اصدرت في: 25/02/2016

"يوم الامتحان يُكرم المرء أو يهان".. هى دي الحكمة اللى كلنا عارفينها... نقدر نقول أن يوم حفل توزيع جوائز الأوسكار هو يوم إعلان نتيجة امتحان سينمائى طويل استمر على مدار سنة كاملة، شوفنا فيها صراع شبه دموي على واحدة من أهم الجوائز الفنية السينمائية فى العالم إن لم تكن أهم جائزة على الإطلاق.. الجائزة اللى يُمكن وصفها بـ "جائزة نوبل فى السينما" واللى بـ ينتظر ملايين من المشاهدين حفل توزيع جوائزها اللى هـ يكون خلال أيام.. هـ نعرف بعدها مين نجح فى الامتحان.. ومين فشل.

بـ نقدم لكم فى كايرو 360 رصد لأهم الفئات اللى بـ تتصارع عليها الأفلام السنة دي، وتوقعاتنا الشخصية فى الفوز أو الخسارة، وطبعًا بـ ننتظر منكم توقعاتكم الشخصية فى التعليقات.

الحفل هـ يكون من تقديم النجم الأسمر كريس روك، والحقيقة دي بـ تكون المرة التانية للنجم كريس أنه يقدم الأوسكار، وبـ نعتقد أن اختيار ممثل أسمر لتقديم الحفل كان للرد على الإدعاءات اللى بـ تقول أن جائزة الأوسكار جائزة موجهة وأنها مش بـ تعترف فى اختياراتها بالفنانين من أصول أفريقية.

 

أفضل هندسة صوتية Sound Editing:

Sicario
Mad Max: Fury Road
The Martian
The Revenant
Star Wars: The Force Awakens

وبـ نعتقد أن الجزء الأحدث من Star Wars هـ يكون قادر على حصد الجائزة، لأن الإنفاق التقني على الفيلم كان منقطع النظير، وبشكل عام الفيلم كان واحد من أكثر أفلام السنة إثارة وتم تخصيص ميزانية ضخمة لإنتاجه، ونعتقد أن العمليات التقنية اللى صاحبت الفيلم هى كمان كانت قوية ومؤثرة، الأمر اللى بـ يخلى الفيلم من وجهه نظرنا قادر على حصد الجائزة.

 

أفضل ميكساج صوت Sound Mixing:

The Revenant
Ex Machina
Mad Max: Fury Road
The Martian
Star Wars: The Force Awakens

ومن جديد بـ نعتقد هنا أن Star Wars هو كمان قادر على حصد الجايزة زي ما قولنا علشان الميزانية الضخمة اللى تم إنتاج الفيلم بها، واللى وفرت له دعم تقني عالى المستوى بـ يخليه قادر على المنافسة بشكل كبير على الجايزة فى القطاعات التقنية أو بمعني آخر الشغل اللى بـ يحصل وراء الكاميرا.

 

أفضل مؤثرات بصرية Visual Effects:

Ex Machina
Mad Max: Fury Road
The Martian
The Revenant
Star Wars: The Force Awakens

وهنا عندنا أمنية شخصية، وهى أن فيلمMad Max يحصد الجائزة، لأن الفيلم كان متعوب عليه جدًا فيما يتعلق بالمؤثرات البصرية، لكن لو هـ نتكلم على التوقع الفني البحت بدون أي نوع من التمني، نعتقد أن الجزء الجديد من Star Wars هو كمان هـ يحصد الجايزة، وده برضه بسبب تفوق الفيلم من الناحية المادية عن معظم الأفلام اللى صدرت خلال العام.

 

أفضل موسيقى تصويرية Soundtrack:

Bridge of Spies
The Hateful Eight
Carol
Sicario
Star Wars: The Force Awakens

بـ نعتقد هنا أن فيلم Bridge of Spies هـ يقدر يحصد الجايزة بدون أدنى مشاكل فى المنافسة مع باقى الأفلام، لأن فعلاً مستوى الموسيقى التصويرية الهادية والمتميزة للفيلم، واللى تناغمت مع الأحداث بشكل رائع هـ تكون قادرة على مداعبة أذن لجنة التحكيم والفوز بالجائزة كأفضل موسيقى تصويرية خلال السنة.

 

أفضل أغنية:

Fifty Shades of Grey – Earned It
Racing Extinction – Manta Ray
Youth – Simple Song #3
The Hunting Ground – Till It Happens to You
Spectre – Writing's On the Wall

وبـ نتوقع هنا فوز The Hunting Ground – Till It Happens to You بالجائزة، نظرًا لحالة الجدل اللى أثارها تصوير الأغنية، بالإضافة للمستوى المتميز للأغنية على الصعيد الفني عن باقى الأغاني اللى بـ تتنافس على الأوسكار السنة دي.. لاحظنا أن إحساس الأغنية كان أفضل وأقوى من باقى الأغاني، كمان الأسلوب الغنائى والموسيقي الخاصين بالأغنية كانوا أفضل ما يمكن.

 

أفضل ماكياج:

The 100-Year- Old Man who climbed out the Window and Disappeared – Love Larson and Eva von Bahr
Mad Max: Fury Road – Lesley Vanderwalt, Damian Martin
The Revenant – Sian Grigg, Duncan Jarman, Robert Pandini

بـ نعتقد أن Mad Max هـ يكون قادر على حصد الجائزة، لتميز الماكياج الخاص بالفيلم، واللى أدى لتغيير شكل أبطاله كلهم تقريبًا بدون تمييز بين ممثل والتاني، بالإضافة لقدرة الماكياج على لعب دور حقيقي فى أحداث الفيلم لما قدر يعكس لنا نفسية أبطاله على وجوههم، وتحسين ردود أفعالهم فى المشاهد المختلفة.

 

أفضل مونتاج Editing:

The Big Short – Hank Corwin
Spotlight – Tom McArdle
Mad Max: Fury Road – Margaret Sixel
Star Wars: The Force Awakens – Maryann Brandon and Mary Jo Markey
The Revenant – Stephen Mirrione

بـ نعتقد هنا أن فيلم Mad Max هـ يكون حاضر بقوة وهـ يقدر يحصد جائزة أفضل تحرير أو Editing لأن الفيلم كان معتمد على عملية معقدة من المونتاج واللى أدت فى النهاية لظهور مشاهد عبقرية عكست –مع باقى عناصر الفيلم- حالة من التميز، خلتنا إحنا نفسنا متحيزين للفيلم وبـ نتمنى أنه يحصد الجائزة.

 

أفضل تصميم أزياء Costume Design:

The Revenant – Jacqueline West
Carol – Sandy Powell
Cinderella – Sandy Powell
The Danish Girl – Paco Delgado
Mad Max: Fury Road – Jenny Beavan

وبصراحة هنا كان عندنا منافسة شرسة داخل عقلنا لمعرفة مين اللى ممكن يستحق الجائزة، لأننا بـ نتكلم فى حوالى 4 أفلام من أصل 5 معتمدين على أحداث تاريخية، وبصراحة الأزياء اللى شوفناها فى معظم الأفلام دي كانت متميزة جدًا، لكن فى رأينا أن Mad Max من جديد هو اللى هـ يكون قادر على حصد الجائزة فى منطقة أفضل تصميم أزياء، وده تميز شوفناه فى أحداث الفيلم واللى تم اختيار أزياءه بشكل قوي ومؤثر فى أحداث الفيلم نفسه.

 

أفضل تصميم للإنتاج Production Design:

Bridge of Spies
The Danish Girl
Mad Max: Fury Road
The Martian
The Revenant

البعض ممكن يتهمنا بالتحيز، لكن إحنا برضه بـ نرشح Mad Max كأفضل Production Design، فى رأينا الفيلم يستحق الجائزة بسبب مستواه الفني المتميز واللى يخليه واحد من أفضل الأفلام خلال السنة.

 

أفضل تصوير سينمائي Cinematography:

The Hateful Eight – Robert Richardson
Carol – Ed Lachman
Mad Max: Fury Road – John Seale
The Revenant – Emmanuel Lubezki
Sicario – Roger Deakins

من بين كل مشاهد مطاردة السيارات والانفجارات وألعاب السيرك على صهوة السيارات المُعدلة.. مين أكتر ناس كانت بـ تنقل لنا الجو "الجحيمي" للأحداث؟ مافيش غير فريق تصوير Mad Max اللى نقدر نقول أننا على ثقة أنهم هـ يحصدوا جائزة أفضل تصوير سينمائى فى أوسكار 2016.

 

أفضل فيلم أجنبي Foreign Language Film:

Embrace of the Serpent – Colombia
Mustang -France
Son of Saul – Hungary
Theeb – Jordan
A War – Denmark

بـ نتمنى... ونتعشم.. ونأمل.. أن الفيلم الأردني Theeb يفوز بجائزة أفضل فيلم أجنبي السنة دي.. والحقيقة لو فاز، هـ تكون نقلة قوية للأفلام العربية وتأكيد على قوتها وقدرتها على المنافسة وحصد الجوائز لحسابها، وعلى الصعيد الفني كمان الفيلم يعتبر واحد من أكثر الأفلام تميزًا وقوة فى 2015.

 

أفضل فيلم رسوم متحركة Animated Feature Film:

Anomalisa
Boy and the World
Inside Out
Shaun the Sheep Movie
When Marnie Was There

بـ نعتقد أن الفيلم الفائز بالأوسكار هـ يكون Inside Out لأنه مش بس فيلم رسوم متحركة موجه للصغار، لكن كمان بـ يخاطب الكبار من خلال الإسقاط السينمائى، إلى جانب مستواه الفني وحبكته الجميلة والمختلفة، كلها أمور بـ تشجعنا على ترشيحه لأوسكار أفضل رسوم متحركة.

 

أفضل نص مقتبس Writing (Adapted Screenplay):

The Big Short – Charles Randolph and Adam McKay
Brooklyn – Nick Hornby
Carol – Phyllis Nagy
The Martian – Drew Goddard
Room – Emma Donoghue

بـ نتوقع هنا فوز Room اللى ممكن يتم اختيار فوزه بالجائزة فى بعض الجوائز الفرعية، وتفريغ الصراع على جائزة أفضل فيلم لأفلام أقوى وأكثر قدرة على المنافسة، لكن مستوي فيلم Room الفني كان متميز وقادر على الصراع على الجوائز المختلفة.

 

أفضل نص أصلي Writing (Original Screenplay):

Bridge of Spies – Matt Charman and Ethan Coen & Joel Coen
Ex Machina – Alex Garland
Inside Out – Pete Docter, Meg LeFauve, Josh Cooley
Spotlight – Josh Singer & Tom McCarthy
Straight Outta Compton – Jonathan Herman and Andrea Berloff

بـ نعتقد هنا أن Bridge of Spies هـ يفوز بالجائزة، لقدرته على تحويل النص الأصلي اللى بـ يقدمه لفيلم متميز وقوي اشتغل عليه اتنين من أهم وأكبر الأسماء فى هوليوود هما توم هانكس والمخرج ستيفن سبيلبرج.

 

أفضل ممثلة مساعدة Actress in a Supporting Role:

The Hateful Eight – Jennifer Jason Leigh
Carol – Rooney Mara
Spotlight – Rachel McAdams
The Danish Girl – Alicia Vikander
Steve Jobs – Kate Winslet

بـ نعتقد أن جنيفر جيسون فى The Hateful Eight هـ تحصد الجائزة بعد أداءها الخرافى وقدرة الفيلم على تغيير شكلها وطريقة تمثيلها بنسبة 180 درجة علشان تتحول لإنسانة ثانية أكثر شراسة وتكيفًا مع البيئة الصعبة اللى بـ تمثلها فى الفيلم.

 

أفضل ممثل مساعد Actor in a Supporting Role:

The Revenant – Tom Hardy
The Big Short – Christian Bale
Creed – Sylvester Stallone
Spotlight – Mark Ruffalo
Bridge of Spies – Mark Rylance

نعتقد أنه هـ يكون توم هاردي عن فيلم The Revenant واللى هـ يكون له نصيب الأسد فى حصد الجائزة عن دوره المتميز وقدرته غير العادية على تجسيد شخصية شريرة وصلنا معاها لمرحلة ما فى الأحداث أننا أصبحنا بـ نكره توم هاردي فعلاً!

 

أفضل ممثلة في دور رئيسي Actress in a Leading Role:

Room – Brie Larson
Brooklyn – Saoirse Ronan
Carol – Cate Blanchett
Joy – Jennifer Lawrence
45 Years – Charlotte Rampling

نعتقد هنا أن شواريز رونان هـ تحصد الجائزة عن دورها فى فيلم بروكلين، وده لقدرتها غير العادية على أداء شخصية البنت المهاجرة بطريقة تحسد عليها، واستطاعتها الوصول بالفيلم لترشيحات الأوسكار السنة دي.

 

أفضل ممثل في دور رئيسي Actor in a Leading Role:

The Revenant – Leonardo DiCaprio
The Danish Girl – Eddie Redmayne
Steve Jobs – Michael Fassbender
The Martian – Matt Damon
Trumbo – Bryan Cranston

بالنسبة لجائزة أفضل ممثل وجائزة أفضل فيلم، لازم نقول أن هـ يكون عندنا رأيين.. رأي بـ نتمناه.. ورأي بـ نعتقد أن ده اللى هـ يحصل على أرض الواقع.. فى حالة أفضل ممثل فى دور رئيسي بـ نتمنى أن إيدي ريدماين ياخد الجائزة عن فيلمThe Danish Girl لأنه قدر يؤدي شخصية الرجل المتحول جنسيًا بشكل رائع، لكننا بـ نتوقع أن الأكاديمية تعطي الجائزة لليوناردو دي كابريو عن The Revenant.

 

أفضل مخرج Directing:

The Big Short – Adam McKay
Room – Lenny Abrahamson
Spotlight – Tom McCarthy
Mad Max: Fury Road – George Miller
The Revenant – Alejandro G. Inarritu

ومن ثاني بـ يرجع معانا Mad Max اللى بـ نعتقد أن مخرجه جورج ميلر يستحق الجائزة، وإن كان أغلب الظن بـ يقول أن اللى هـ ياخد الجائزة هو أليخاندرو أيناريتو عنThe Revenant.

 

أفضل فيلم Best Picture:

The Big Short
Bridge of Spies
Brooklyn
Mad Max: Fury Road
The Martian
The Revenant
Room
Spotlight

ودلوقت مع الجائزة الأهم فى حفل توزيع الأوسكار، ألا وهي جائزة أهم وأفضل فيلم فى 2015.. إحنا نفسنا أن The Danish Girl يفوز وفى رأينا أنه الفيلم الأفضل نتيجة التمثيل المتميز والإخراج العظيم والقصة نفسها المقتبسة عن قصة حقيقية، لكن بـ نعتقد أن الجائزة هـ تروح لفيلم The Revenant بعد حالة الجدل والترقب العالمي اللى حاصلة بخصوصه وضرورة استحقاق بطله للأوسكار للمرة الأولى فى تاريخه.

 

ومن هنا لحد يوم إعلان الجوائز، هـ يفضل كل محبى السينما فى حالة ترقب واختلاف حول الجائزة وحول الفائزين.. فى رأيكم مين اللى متوقعين يكسب؟

مزيد من الصور
  • توقعات كايرو 360 للفائزين بجوائز الأوسكار لعام 2016
  • توقعات كايرو 360 للفائزين بجوائز الأوسكار لعام 2016
  • توقعات كايرو 360 للفائزين بجوائز الأوسكار لعام 2016
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
25/02/2016
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.