جوائز اختيارات محرري كايرو 360 لعام 2016 لأفضل المطاعم الإيطالية - مطاعم Feature - كايرو 360
 







جوائز اختيارات محرري كايرو 360 لعام 2016 لأفضل المطاعم الإيطالية
جوائز اختيارات محرري كايرو 360 لعام 2016 لأفضل المطاعم الإيطالية
اصدرت في: 15/05/2016

ومين ما بيحبش الأكل الإيطالي؟ أكيد كلنا بنحبه خصوصًا لما يكون من مطعم مميز فاهم يعني إيه أكل إيطالي بجد، والقاهرة مليانة مطاعم بتقدم النوع ده من الأكل، يمكن أكتر من أي نوع مطبخ تاني، لكن طبعًا مش كل المطاعم تستحق الزيارة، علشان كده قررنا نوفر عليك مجهود اللف والدوران ونعرض عليك نتائج جوائز محرري كايرو 360 لأفضل مطاعم الأكل الإيطالي.. يلا نبدأ الرحلة!

الفائزين بجوائز اختيارات المحررين لعام 2016 لأفضل المطاعم الإيطالية هم:

 

سترادا – Strada

بصفة عامة الأكل في الفنادق معناه الفخامة، خصوصًا لما يكون الأكل في فندق فورسيزونز فيرست ريزيدنس القاهرة، وهناك مطعم سترادا، محافظ على مكانته ومستواه، وبيقدم أكل إيطالي يستحق منك زيارة علشان تجربه، مش بس الأكل اللي هيعجبك هناك، ديكو المكان مبهر، ده غير أن القعدة على النيل أصلًا تفتح النفس.

 

لا تراتوريا – La Trattoria

الزمالك فيها أكتر من مطعم بيقدم الأكل الإيطالي، لكن مطعم لا تراتوريا هو أفضلها، مش بس علشان موقع المطعم الهادئ وديكوراته الكلاسيكية الجميلة، لكن كمان علشان الأكل مميز جدًا، خصوصًا أنواع الريزوتو، اللي بيقدمها المطعم بشكلها الأصلي، تجربتنا في المطعم ده كانت إيجابية جدًا علشان كده بننصحكم تجربوه.

 

إل ديفينو – Il Divino

واضح أن الزمالك أصبحت مقر الأكل الإيطالي المميز في مصر، وده اللي بيثبته مطعم إل ديفينو اللي قدر يثبت نفسه بقائمة طعام مميزة جدًا ومنوعة، بتثبت أنك مش لازم تسافر إيطاليا علشان تاكل أكل إيطالي حلو ومميز، البيتزا هناك جودتها عالية، وطعمها مش ممكن! وده يمكن لأن طريقة تسويتها بتكون على الحطب مش الفرن العادية، المكان بيتمز كمان بمستوى خدمة مميز جدًا.

 

ميزون توماس - Maison Thomas

القاهرة الجديدة لها نصيب من الأكل الإيطالي المميز كمان، وميزون توماس في سفن ستارز مول في التجمع الخامس قدر يثبت نفسه وسط مطاعم القاهرة ويجذب قاعدة عريضة من عشاق الأكل الإيطالي، خصوصًا أنه واحد من الأماكن القليلة في القاهرة اللي بتقدم بيتزا إيطالي على الطريقة الأصلية، ده غير الديكورات المميزة، ومستوى الخدمة اللي يخليك تحس أنك ملك.

 

بيلا - Bella

في فندق فور سيزونز نايل بلازا في منطقة جارن سيتي قدر بيلا يقول لعشاق الأكل الإيطالي أنا موجود يا جماعة! المطعم نفسه يتميز بشكل راقي وديكورات في منتهى الشياكة بمجموعة من اللوحات الجميلة، وطبعًا لازم نذكر المطبخ المفتوح هناك، بيلا بيتميز بأصناف إيطالية مميزة زي المكرونات الإيطالي الأصلي، وأطباق الأسماك واللحوم، وبيديك فرصة هايلة للاستمتاع بنكهات مميزة من إقليم توسكان.

عيش وملح – Eish& Malh

وما ينفعش نتكلم عن الأكل الإيطالي المميز وما نجيبش سيرة عيش وملح، اللي موجود في وسط البلد أمام المعبد اليهودي، واللي بيتميز بقعدة مريحة وديكور عصري، ومجموعة لوحات مميزة، المطعم بيقدم كل أنواع المكرونة والبيتزا، ووجبات السمك واللحم والدجاج. وكلها معمولة على الطريقة الإيطالية الأصلية. كمان الخدمة هايلة، وما تنساش تجرب الحلو لأن عيش وملح من الأماكن القليلة اللي بتعمل بيناكوتا في القاهرة.

 

بانيه فينو - Pane Vino

لما تكون في فندق سميراميس انتركونتيننتال، كورنيش النيل أوعى تنسى تجرب بانيه فينو، المطعم المميز اللي بيقدم منيو منوع من أول البيتزا واللازانيا لغاية أطباق إيطالي أصلية زي الكاتوليتا آلّا ميلانيز Catoletta alla Milanese وده طبق مشهور من ميلان عبارة عن لحم بقري مقلي، المكان فخم جدًا والخدمة مميزة، وطعم الأكل إيطالي زي ما بيقول الكتاب.. وعلشان كدة كان لازم نختاره ونقول لكم عليه.

 

بيبيـنيرو – Pepenero

بيبنيرو مطعم إيطالي رائع في الكوربة بيقدم قائمة كبيرة من أفضل أنواع الأكل الإيطالي، زي الباستا والبيتزا والريزوتو وأطباق اللحوم والفراخ، إجمالًا، التجربة أكثر من رائعة، من أول الأكل وحتى الخدمة السريعة والممتازة، والقائمين على الخدمة منتبهين ومش هتضطر أنك تقعد تدور عليهم لأنهم عارفين هم بيعملوا إيه.. لازم تروحوه.

 

فابيانو- Vapiano

فابيانو موجود داخل كايرو فيستيفال سيتي في القاهرة الجديدة، وهو فعلًا واحد من أحسن مطاعم القاهرة، مش بس علشان خدمته مميزة، لكن كمان علشان بيقدم مجموعة كبيرة من الأطباق الإيطالية على أصولها، وديكورات المكان هتعجبكم، مريحة وهتحسسكم أنكم في إيطاليا، بنعتبر تجربتنا في فابيانو من أجمل التجارب الإيطالية اللي خضناها، من أول فواتح الشهية مرورًا بالأطباق الرئيسية ولحد الحلو ما كانش فيه ولا غلطة.

 

ألف مبروك للفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
15/05/2016
-