جوائز اختيارات المحررين لعام 2014 لأفضل المطاعم الشرقية فى القاهرة - مطاعم Feature - كايرو 360
 







جوائز اختيارات المحررين لعام 2014 لأفضل المطاعم الشرقية فى القاهرة
جوائز اختيارات المحررين لعام 2014 لأفضل المطاعم الشرقية فى القاهرة
اصدرت في: 12/06/2014

حب المصريين للأكل حاجة مُعدية جدًا، سواء بالنسبة للزوار أو السياح، والأكل المصري عامة جزء لا يتجزأ من جولة أى شخص لما بـ ييجي يزور مصر، وكلمة "أكل شرقي" فى مصر بـ توعدك بأكثر مما تحمله الكلمة من معنى.

حافظت المطابخ اللبنانية على شعبيتها اللى عمرها ما هـ تموت، مافيش جائزة أكثر تنافسية من الجائزة دي مع وجود أماكن كثيرة بـ تثبت نفسها على الساحة، حتى أننا ممكن نعتبر المطاعم دي على رأس القائمة.

 

أبو السيد – Abou El Sid

بـ نحب الاسم واللوجو الخاصين بمحلات "أبو السيد" وكل تفصيلة بـ يحطها في فروعه بـ تعبر بقوة عن الطابع المصري الخالص، وبـ نحب ولائم الإفطار والسحور اللي بـ يعملها في رمضان، وشايفين أنه يستحق عن جدارة لقب "أبو المطابخ المصرية" في العاصمة. هنا تأكل أحلى ملوخية بالأرانب وشركسية بالفراخ وأنت قاعد وسط السجاد العجمي وتحت النجف العملاق ولمبات الشمعدان وبـ تسمع الست أم كلثوم.

 

كايرو كيتشن – Cairo Kitchen

قصة نجاح بدأت بفرع صغير في الزمالك وبدأ يتوسع ونشوف فروع في المعادي ومصر الجديدة، ومتوقعين نشوفه في أماكن جديدة في المستقبل القريب. زيارتنا المتكررة لفروع كايرو كيتشن خليتنا متأكدين أننا أمام مطبخ مصري من طراز خاص، التميز مش نابع من جودة المذاق وبس، لكن من طريقة التقديم والاهتمام بالأواني وأدوات الطعام، والزجاج الملون للنوافذ والتابلوهات المرحة على الجدران، هنا كل حاجة مصرية قوي ومعاصرة قوي في نفس الوقت، لو فيه جائزة مخصوصة للـ Branding أكيد كايرو كيتشن كان هـ يحصل عليها عن جدارة.


زوبا – Zooba

برضه البداية كانت في الزمالك، والهدف كان تقديم الفول والطعمية والكشري للأجانب والسياح الموجودين في الجزيرة الراقية، لكن سرعان ما ذاع صيته وأصبح سكان القاهرة بـ ييجوا من كل مكان علشان يجربوا أحلى طبق كشري بالحَب الكامل وشوربة العدس والفول النابت وغيرها من الأكلات والمشروبات المصرية شديدة الخصوصية. وفتح بعدها "زوبا" أبوابه في المعادي وفي مول سيتي ستارز العملاق.

 

أيادينا – Ayadina

الأكل الشرقي هنا شكل ثاني، لما المطبخ اللبناني يأخذ لمسات من المطبخ المصري في أجواء شرقية معاصرة يبقى إحنا بـ نتكلم عن "أيادينا". موجود في مصر الجديدة ومالوش فروع ثانية. فتوش مع فتة الفراخ، ورق عنب مع أحلى بابا غنوج لبناني، أنت هنا في أيد أمينة، وهـ تعرف معنى مختلف للمطبخ الشرقي العريق.

 

بيسترو زيتونة اللبناني – Zeitouna Lebanese Bistro

يتهيأ لنا أن كلنا كمصريين عندنا قناعة بأن أي حاجة لبناني بـ تبقى جامدة؛ يعني لكنتهم لذيذة، مزيكتهم حلوة... وحاجات ثانية كثير بـ تحببنا في لبنان وأهل لبنان... طبعًا نقصد الأكل اللبناني. بيسترو زيتونة اللبناني مش بس بـ يقدم المأكولات اللبنانية في ألذ صورها، ده كمان طريقة التقديم عندهم مبتكرة جدًا وترحاب طاقم الضيافة يشجعك أنك تبقى زبونهم الدائم.

 

الكبابجي – El Kebabgy

موقع المطعم الساحر في فندق سوفيتل الجزيرة قادر على أنه يفتح نِفس أي إنسان، ده غير رائحة المشويات اللي بسهولة جدًا تجوعك، حتى لو أنت لسه قايم من على وليمة. ده كده وإحنا ما قلناش أي شيء عن الأكل، ببساطة شديدة الكبابجي عنده أعظم ميكس جريل ممكن تتذوقه في حياتك.

 

تبولة – Taboula

من الأماكن اللي اكتسبت شهرة واسعة ونجاح ساحق عن جدارة واستحقاق، والأجمل كمان أنه استمر محافظ على الجودة والخدمة اللي تعودنا عليها دائمًا منه. فطبيعي جدًا أنه يشق طريقه لقائمتنا المميزة، لأنه مافيش في الدنيا أجمل من أكل لبناني حلو وعلى أصوله مقدم في أجواء مريحة. "تبولة" موجود في مصر الجديدة وجاردن سيتي.

 

بيسترو تامارا اللبناني – Tamara Lebanese Bistro

آخر مطعم عندنا في القائمة هو "بيسترو تمارا اللبناني" والحقيقة مافيش كلام كفاية ممكن يوصف روعة المذاق، سواء الأكلات اللبنانية أو المصرية هنا، ده لو بـ نتكلم عن الأكل، أما عن مستوى الخدمة والجو العام فهو أكثر من ممتاز، وكان طبيعي أنه يجد مكان في قائمتنا للأفضل بلا أي تفكير.

 

ألف مبروك للفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/06/2014
-