‏5 منتجات مميزة هتحسسك بطعم رمضان - تسوق Feature - كايرو 360
 







‏5 منتجات مميزة هتحسسك بطعم رمضان
‏5  منتجات مميزة هتحسسك بطعم رمضان
اصدرت في: 07/06/2016

كتبنا عن زينة رمضان اللي ممكن تعملها بأقل التكاليف في البيت قبل كده، كل اللي محتاجه علشان تنفذ الأفكار اللي قدمناها لك هي شوية وقت ومجهود. ولكن لو أنت ما عندكش خلق أو وقت يخليك تصنع زينة رمضان بنفسك؛ آدي مجموعة من القطع اللي ممكن تشتريها تحسسك بجو رمضان، واللي من ضمنها حاجات ممكن تتشال لرمضان الجاي:

 

أجندة To Do Ramadan:

 

الأجندة دي للناس اللي بتحب تقسم وقتها بين الطقوس الدينية المختلفة. الأجندة دي متقسم فيها العبادات المختلفة بحسب اليوم (أذكار – الصلاة ومواعيدها والسنن – وعدد صفحات القرآن اللي ممكن تقراها في الصلاة) واللي ممكن ناس كثير تعتبرها مفيدة لحد نفسه يعمل حاجات كثير في رمضان بس الوقت بيهرب منه.

الأجندة دي موجود منها في المكتبات - زي مكتبة أ- وممكن كمان تشتريها Online من الموقع الإلكتروني الخاص بمفكرة، وسعرها مش كبير مقارنة بالفايدة بتاعتها وهو 30 جنيه.

 

عروسة بوجي:

شخصيًا إحنا من جيل مسلسل العرائس المشهور "بوجي وطمطم"، واللي بالنسبة لنا بقى حاجة من ريحة رمضان زمان. وبالتالي لو أنت من الجيل ده عروسة بوجي ممكن تكون أحسن منتج يحسسك بطعم رمضان. إيه أجمل من أنك تجيب بوجي صغير كده يقضي رمضان معاك على المكتب، أو على الكنبة؟

نعتقد أنه في محلات كثير، بس إحنا شفناه في محل لا بالين شوب – La Baleine Shop في مدينة نصر، وبيعرض أحجام مختلفة منه 20 و 30 سم أسعارهم 40 و45 جنيه. الجميل بقى أنك لو مش قادر تضرب لهم المشوار في مدينة نصر، هم ممكن يوصله لك لحد البيت في أي مكان في القاهرة.

 

مج وصينية عليها نقشة الخيامية:

على أيامنا الخيامية دي يا إما تلاقيها في سرادق عزاء، يا إما مولد أو حلقة ذكر. الأيام دي الموضوع اختلف كثير؛ عندك رمضان يبدأ من هنا تلاقي الخيامية انتشرت في كل حتة... من أول الديكورات لحد اللبس والعبايات. وبالرغم من أننا من محبي فن الخيامية اللي بيميز مصر عن أي مكان ثاني في العالم، إلا أننا شفنا تقليد رديء للفن ده في منتجات مختلفة.

أحلى نسخة من المنتجات المستوحاة من الخيامية لاقينها في شكسته – Shakasta والموجود في المعادي. وهي عبارة عن مجموعة من المجات المطبوع عليها نقوش الفن ده بألوان وأشكال متنوعة؛ سعر المج بيختلف حسب الحجم –من 50 لـ 55 جنيه.

أما الصواني فهي كالآتي: عندك المستطيل منها حجمه 30×25 سم، وسعره 190 جنيه. أما المربع ففيه منه حجمين الأول 30×30 سم وسعره 195 جنيه، الثاني 25×25 جنيه سعره 175 جنيه.

 

مفارش عزومات رمضان:

رمضان يعني عزومات، وعزومة يعني سفرة؛ من الحاجات اللي ممكن تعيشك الجو الرمضاني هي مجموعة المفارش اللي بيبقى فيها خيامية –أيوه، خيامية ثاني- واللي هتلاقيها بأشكال وألوان كثيرة في كل حتة، من ضمنها مليكة هوم أكسسوريز – Malika Home Accessories، واللي عندهم مجموعة كبيرة من المفارش القطيفة اللي ألوانها وأحجامها تناسب أي سفرة.

أصغر حجم منهم 75×75 سم وسعره 35 جنيه، 150×150 سم بـ 75 جنيه، أما 300×150 سم فسعرهم 120 جنيه؛ وبرضه المحل بيوصل لو أنت مكسل تروح تشتريهم.

 

مجموعة الدروايش:

من الحاجات اللي بتميز مصر في العالم العربي هي رقصة التنورة المستوحاة من الطرق الصوفية، مين فين ما رحش أو ما شافش عرض التنورة قبل كده؟ دلوقتي ممكن تجيب الدراويش لحد عندك في مجموعة خزفية مكونة من 3 قطع بـ 190 جنيه أو واحد بـ 80 جنيه، واللي هتلاقيهم على موقع ذا جيفتري – The Giftery واللي عملاهم "بالعربي". وزي معظم الحاجات اللي عرضناها في القائمة دي تقدر تطلب المجموعة دي Online، وهتوصل لحد عندك.

ولو مالكش في الدروشة، ممكن قوي تختار من مجموعة التماثيل الموجودة عند دكان دابيكتشر – Dokan Dapicture، واللي بتصور تفاصيل الحياة المصرية الشعبية البسيطة. التماثيل متوفر منها أحجام وأشكال كثيرة، منها تمثال لفلاحة بتأكل حمام، طوله 32 سم وسعره 120 جنيه. وزي بقيت الأماكن الموجودة فوق، دكان دابيكتشر بيوصل Online لو حبيت تشتري من صفحتهم على الفيسبوك.

 

 

وكل سنة وأنتم طيبين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
07/06/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.