دليل كايرو360 لشراء كاميرا ديجيتال - تسوق Feature - كايرو 360
 







دليل كايرو360 لشراء كاميرا ديجيتال
دليل كايرو360 لشراء كاميرا ديجيتال
اصدرت في: 15/11/2011

الكاميرا الديجيتال أصبحت بالنسبة لناس كثير من الحاجات اللي بـ تأخذها وأنت نازل من البيت زي المحفظة والساعة والمفاتيح، وأصبحت كمان من الضروريات أكثر من كونها مجرد رفاهية. لكن المشكلة أن أسعارها لسه غالية قوي في مصر بسبب التعريفات الجمركية. لكن ده ما يمنعش أننا ممكن نشتري كاميرات كويسة وبأسعار معقولة من القاهرة ومش لازم تستنى صاحبك اللي جاي من بره علشان يجيب لك واحدة.

المهم الأول تحدد نوع الفوتوغرافيا اللي أنت بـ تحبها وناوي تصور إيه بالظبط وإيه الإمكانيات اللي أنت محتاجها في الكاميرا بتاعتك علشان تسهل عملية الانتقاء واللف والتدوير شوية. لو بـ تدور على حاجة بسيطة للاستخدام العادي وبـ تعمل كل حاجة أوتوماتيك يبقى تسأل على الـCompact Digital العادية ودي أسعارها بـ تبدأ من 500 جنيه وممكن توصل لـ 3000 جنيه حسب جودة الصورة وسهولة التحكم فيها من خلال النظام الأوتوماتيكي. هـ تلاقي محلات كثير بـ تبيع النوع ده من الكاميرات بحجمها الصغير اللي ممكن يتحط في الجيب، وفيه منها موديلات من "كانون" و"نيكون" بأسعار عالية وبـ يكون فيها بعض الإمكانيات اللي ممكن تظبطها بشكل يدوي لو عاوز شوية احترافية.

سهل جدًا تلاقي الموديل ده من الكاميرات في الهايبر ماركت زي كارفور وسبينيز، وأحيانًا بـ يبقوا عاملين عروض خاصة وتخفيضات وهدايا عند الشراء. الميزة الحقيقية في الكاميرات الكومباكت العادية دي بجانب كونها خفيفة الوزن وحجمها صغير أن أسعارها في مصر قريبة جدًا من أسعارها في دول أوربا وأمريكا، لكن الأسعار ممكن تبقى أعلى لما تروح محلات زي راديوشاك أو كومبيو مي.

لو حسيت أنه جاء الوقت أنك تستخدم كاميرا أكثر احترافية ممكن تسأل على الـ DSLR وده نوع من الكاميرات بعدسة ضخمة كبيرة باللون الأسود وممكن تغير لها العدسات حسب الاستخدام. ودي بـ تتيح لك التحكم الكامل في تكوين الصورة، واستخدامها ممتع جدًا وطبعًا جودة صورها أحسن بكثير من من الكاميرا العادية اللي تكلمنا عنها، وهـ تخليك تعمل كل التظبيطات أو الـSettings علشان تطلع الصورة زي ما أنت عاوز بالظبط من خلال التحكم في كمية الضوء اللي داخلة للعدسة وسرعة الغالق وحاجات ثانية كثير.

من وسط البلد ممكن تجيب أحسن كاميرا DSLR أو تعمل لها صيانة، وسعرها بـ يكون أقل كثير من المحلات الكبيرة المعروفة لأنها بـ تيجي من غير ضمان. أسعارها بـ تبدأ من 3500 جنيه لحد 5000 جنيه وممكن موديلات ثانية تعدي الرقم ده بكثير. موديل Canon Rebel الـ 15 ميجابيكسل سعره 4500 مع عدستها العادية (15 – 55 mm) وموديل Nikon D3 100 اللي بـ تصور فيديو سعرها 5500 جنيه.

فيه شوية محلات صغيرة في الشوارع والحواري الضيقة في منطقة عابدين بـ تبيع كاميرات جديدة ومستعملة. محل كينج ديجيتال الموجود في 15 شارع رشدي بـ يبيع أنواع مختلفة من عدسات الكاميرات والفلاتر والستاندات والشنط وبراويز للصور، ممكن تتصل قبل ما تروح علشان تعرف طلبك موجود ولا لأ، أو تشوف صفحة الفيسبوك الخاصة بالمحل اللي بـ يتم تحديثها أول بأول.

وفيه محل ثاني متخصص في أدوات التصوير والفوتوغرافيا في نفس المبنى، يعني ممكن تفضل رايح جاي على المحلين علشان تقارن بين الأسعار وتفاصل براحتك. المحل اسمه الحوفي، وعنده معروضات كثير جدًا لدرجة أن ستاندات الكاميرات الثلاثية مرصوصة بره المحل علشان مالهاش مكان بالداخل. المحل كمان بـ يشتري ويبيع الكاميرات المستعملة، وممكن تطلب موديل معين وتسيب بياناتك وهم يكلموك أول ما يوصل لهم الموديل ده، والمحل بـ يعمل صيانة طبعًا.

في المهندسين محل الشناوي معروف كمنفذ بيع مهم لمنتجات كانون ونيكون وماركات ثانية، وبـ يعمل تخفيضات مذهلة طول الوقت. وممكن تشتري من مواقع على الإنترنت زي souq.com أو Nefsak ودي بـ تسهل لك الفرجة والتدوير على كل الموديلات وإمكانياتها، وتخليك تأخذ وقتك في التعرف على التفاصيل قبل ما تأخذ قرار الشراء.

لو ما كنتش من الجيل اللي شاف الصور المطبوعة على الورق ومسكها بإيده، ستوديو عنتر الموجود في 180 شارع التحرير في باب اللوق مشهور بطباعة الصور وتحميض الأفلام بجودة عالية وأسعار قليلة. لو هـ تطبع على ورق بحجم الـ A4 هـ تكلفك 6 جنيه للصورة وجودة الألوان مافيش أحسن من كده.

وغريبة أن القاهرة برغم كم الأماكن والحاجات اللي ممكن تتصور فيها، لسه الفوتوغرافيا فيها مجرد هواية للبعض، وبـ يمارسها المتخصصين أكثر، في حين أنها المفروض تتحول لعادة لسكان المدينة العظيمة دي، خصوصًا مع توافر الأدوات والكاميرات وتعدد أماكن شرائها وتعلم تقنيات التصوير.

بغض النظر عن موديل الكاميرا اللي معاك، اللي ماسك الكاميرا أهم من الكاميرا نفسها، فـ خليك مبدع واستمتع بالموضوع واعتبر التسوق علشان كاميرا استثمار أكثر من كونه عملية شراء.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
سلمى طنطاوي
حرر بواسطة:
سلمى طنطاوي
تاريخ النشر:
15/11/2011
محررة، دودة قراءة، عندها أذن موسيقية ما حصلتش، بـ تحب الدردشة المفيدة والتمشية الصبح بدري في شوارع القاهرة وهي فاضية.