دليل محلات الـ XXXL الحريمى والرجالى فى القاهرة - تسوق Feature - كايرو 360
 







دليل محلات الـ XXXL الحريمى والرجالى فى القاهرة
دليل محلات الـ XXXL  الحريمى والرجالى فى القاهرة
اصدرت في: 17/08/2012

ممكن تعمل ريجيم على مزاجك وفى الوقت اللى تحبه، لكن ممكن تبقى مجبر تعمل كده فى وقت معين وده بفعل أن لبسك ما بقاش على مقاسك وضاق عليك ومش بـ يظهرك بشكل كويس، أو مثلاً حابين أنكم تهادوا حد عزيز عليكم بس مقاساته كبيرة حبتين ومش عارف تجيب لبس يناسب مقاساته، يبقى ضرورى أنك تأخذ فكرة عن محلات الـ 3 إكس لارج وأماكنها، وهى عكس ما كثير بـ يتصوروا أن المحلات دي بـ تقدم لبس تقليدى، باهت الألوان، ومش مواكب للموضة، بس برضه الملاحظة العامة أن الأسعار غالية شوية فى معظم المحلات.

طبعاً محلات الـ XXXL بـ تنقسم إلى 3 أنواع: نوع متخصص فى اللبس الحريمى، ونوع فى اللبس الرجالى، ونوع بـ يبيع الاثنين.

من ضمن المحلات اللى بـ تقدم لبس للجنسين، محل "ميلانو" الموجود فى 8 ش البرازيل فى الزمالك، والمقاسات المتوفرة فيه من 48 لحد 66، أجمل ما فى المحل ده أنه بـ يناسب أذواق مختلفة يعنى فيه اللبس الكلاسيك بدل وجاكيتات للجنسين، وبرضه لبس كاجوال، تى شيرتات، وقمصان مقلمة وكاروهات، وجيبات وبنطلونات جينز بألوان وأطوال مختلفة، بنتاكور، وترواكار، وبنطلونات ليكرا ودي أسعارها بـ 180 جنيه، برضه هـ تلاقوا فى المحل ده لبس مستورد وأسعارها بـ تفرق شوية عن اللبس غير المستورد، يعنى مثلاً القمصان العادية بـ تبقى بـ 125 جنيه، والقمصان المستوردة بـ 150 جنيه، المحل له فرع ثانى فى منطقة الهرم، عنوانه 350 ش الهرم الرئيسى، وممكن تتواصلوا مع المحل على بريدهم الإلكتروني: milanomilanoxxl@yahoo.com

أما محل "ماركو" فهو متخصص فى اللبس الرجالى فقط، البدل فيه أسعارها بـ تتراوح ما بين 700 و800 جنيه، والقمصان بكم ونصف كم بـ تتراوح أسعارها ما بين 170 و180، وده مكانه فى المنيل فى شارع عبد العزيز آل سعود.

فى شارع صلاح سالم وبالتحديد فى عمارات العبور هـ تلاقى محل "تومى XXL" ومن اسمه واضح أنه متخصص فى اللبس الرجالى، المحل بـ يشمل كل حاجة بما فيها الملابس الداخلية والأحزمة الجلدية، وبرضه بـ يشمل لبس كاجوال حلو، يعنى التى شيرتات بـ تتراوح أسعارها ما بين 265 و235 و225 جنيه، والبنتاكور بـ 190، والشورتات بـ 160 جنيه.

وجنب جنينة مول فى شارع البطراوى هـ تلاقى محل "أكتيف" للمقاسات الكبيرة وفيه القمصان بـ 135، والتي شيرتات القطن السادة بـ 90 جنيه، والمقاسات المتوفرة فيه 48 لحد 66، 58 لحد 77. قريب منه محل "بيوتى" فى شارع محمد مصطفى حمام، وهو شارع متفرع من شارع عباس العقاد، وده متخصص فى اللبس الحريمى الشبابى والستاتى، يعنى هـ تلاقوا بنطلونات قماش بأستيك بـ 140 جنيه، وبرضه بنطلونات جينز بنفس السعر، فيه البلوزات الجيرسيه بـ 150 جنيه، والطقم جاكيت وبلوزة بـ 230، ودريلات وتونيكات بـ 150، وفيه قمصان نوم خامتها لينو بـ 130 جنيه.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي عزام
حرر بواسطة:
إنجي عزام
تاريخ النشر:
17/08/2012