شارع زهراء المعادي تحول في البداية من أنه منطقة صحراوية، لمنطقة سكنية، ودلوقت بقى منطقة تجارية، فيه محلات لبس كثيرة ومحلات ديكور (أثاث منزلي)، وكل اللي تحتاجه، بس في الفترة الأخيرة فتح أكثر من محل أزياء خاص بملابس السهرة والمناسبات الخاصة، فأشعل المنافسة على المحل اللي روحناه ولسه فاتح من شهر "بيرل -Pearl ".

أول ما بـ تدخل بـ تلاقي صاحبة المحل بنفسها معاك لو محتاج تسأل عن أي أسعار، أو لو عاوز تشوف صور موديلات مختلفة وتختار الموديل اللي تحبه، لأنهم بـ يفصَلوا ودي في حد ذاتها ميزة.

الجميل أن المحل مافيهوش فساتين بس، لأ ده فيه كل حاجة ممكن تحتاجها سواء جاكيت أو جيبة أو تايير، كل قطعة لوحدها عادي.

عجبنا تايير مكون من توب بيج كات وجيبة أبيض شفافة في بيج مخططة بالعرض بس طبعًا محتاج البطانة بتاعته تطول شوية للمحجبات، كمان كان فيه توب أسود عليه دوائر صغيرة مرصعة ذهبي على الأيد ومن تحت لحد أول البطن بـ 550 جنيه، وتوب ثاني سادة عليه دوائر زيها أخف ولونها فضي بـ 350 جنيه، ولو عاوزة جيبة بس كان فيه جيبة بيج مشجرة (Fleurie) برضه كانت حلوة قوي وبـ 450 جنيه.

أما عن الموديلات الغريبة فكان فيه فستان أسود عادي بأكمام طويلة وكل حاجة، لكن من فوق بعد الصدر بحاجة بسيطة عليه دانتيل شفاف مسافة كبيرة وبعدين مكمل بالقماش الأسود، وقبل الركبة بحاجة بسيطة عليه برضه مسافة كف أيد كده دانتيل شفاف أسود، فى الحقيقة إحنا نتمنى أنهم ما ينسوش البطانة وإلا.. يعنى كل واحد حر بقى، وهو بـ 1800 جنيه عامة.

أما آخر فستان فكان أسود وواخد موديل مضبوط من فوق ومن تحت على شكل سمكة ومن الجانبين البطانة لونها بيج وفوقها دانيل أسود والحقيقة أنه كان حلو برضه بـ 1700 جنيه.

كان فيه موديلات كثيرة جدًا باختلاف الأذواق، فيه اللي تلاقي فيه ترتر كثير أو دبابيس بـ تلمع من عند الصدر بشكل مبالغ فيه، كل واحد وذوقه، بس الأهم أنك تلاقي حاجة حلوة بسعر مناسب، وإن كان فيه بعض القطع مبالغ في أسعارها إلا أنه بالمقارنة بأماكن ثانية أسعارهم معقولة.