كل مكان جديد بـ نروحه بـ يختلف عن اللي قبله بحاجات كثيرة منها الذوق والجودة والسعر، وده كله متوفر في محلات الفضة اللي في شارع 9 بالذات محلنا النهارده "هلال – Helal".. محل صغير في أول شارع 9 بعد محطة المعادي، وجنبه أكثر من محل فضة، بس إحنا اختارناه هو بالذات علشان كانت الواجهة بتاعته منورة ومبينة منتجات الفضة مش زي الباقيين مش واضحة وضلمة.

أول ما دخلنا لفت نظرنا الخواتم جدًا، لأننا لقينا تشكيلة أكثر من رائعة ومتنوعة جدًا، طبعًا بالنسبة للأسعار ده بـ يختلف من حجمها وسعر الجرام في الوقت اللي سألت فيه، لأننا أول مرة رحنا الأسعار كانت أرخص من ثاني مرة نروح.

عجبنا خاتم حلو قوي مربع وجواه كلمة "حب" مزخرفة، وكان فيه واحد زيه بس مدور سعره بـ يبدأ من 90 جنيه على حسب وزنه، وواحد ثاني نفس الحجم مكتوب عليه كلمة "مودة".

كمان كان فيه خاتم حلو قوي على شكل سمبوكسة أقرب للمربع شوية مكتوب عليها كلمة "صحة" ومزخرفة بأسلوب أقرب لعزة فهمي، والحقيقة أنه كان حلو قوي برضه وبـ 150 جنيه تقريبًا. كمان كان فيه خاتم على شكل مربع كبير مكتوب عليه "ومازال للحب بقية"، وهو حجمه كبير يعنى تقريبًا بـ 250 جنيه. ولفت نظرنا برضه خاتم مربع مكتوب عليه "فالله خير حافظًا" بحوالي 150 جنيه. طبعًا الخواتم العادية كانت موجودة اللي مكتوب عليها "سبحان الله" و"الحمد لله" و"ما شاء الله" بأشكال مربعة ومدورة ومستطيلة. وكان فيه خواتم مرصعة بالأحجار الكريمة الزرقاء والخضراء وسعرها بـ يتحدد على حسب الحجم والحجر الكريم.

وعلى الجانب الآخر كان فيه حلقان فضة صغيرة حلوة قوي بأشكال متنوعة تبدأ من 50 جنيه على حسب حجمها طبعًا، والدلايات العادية برضه كانت كويسة، وطبعًا ما نقدرش ننسى الميداليات اللي كان فيها أحجام كبيرة وصغيرة، أكثر واحدة عجبتنا كانت ميدالية فيها مثلث صغير نازل منه ثلاثة ملثاث صغيرة أو دوائر مكتوب فيها كلمات زي "فالله خير حافظًا" أو " من ينصره الله فلا غالب له" أو "سبحان الله" و"الحمد لله" أو أي حاجة عاوز تكتبها، وكانت بحوالي 250 جنيه، كمان كان متوفر ميداليات مربعة عليها آيه قرآنية أو مفرغة ومجرد الكلام بس على شكل دائرة أو مثلث، وممكن برضه تكتبوا فيها اللي أنتم عاوزينه، ولما بـ تطلبوه حاجة تكتبوها مخصوص بـ تستلموها في حوالي 4 أيام.

محل هلال تقدر تعتبره بيتك الثاني اللي لما تتزنق في هدية تلاقيها عنده بسعر معقول، ومعاملة الناس لك لطيفة جدًا.