من فترة كبيرة، كان فيه مجموعة دعاية كبيرة لافتتاح هوم سنتر – Home Centre في داندي مول؛ كثير كنا بـ نمرّ عليه من غير ما ندخله معتقدين أنه مجرد محل كبير فيه مجموعة من الإكسسوارات المنزلية وخلاص، ولكن لما دخلناه أخيرًا عرفنا أن الموضوع أكبر مما نتخيل، لأن هوم سنتر ببساطة عبارة عن مول مصغر لجميع مستلزمات البيت من أول الإكسسوارات لحد الأثاث.

أول حاجة لاحظناها أن المكان مرتب جدًا، الإكسسوارات في منطقة، وحدات الإضاءة، إلخ... وقيس على كده كل حاجة ممكن البيت يحتاجها. مجموعة الساعات هي أول حاجة لفتت نظرنا، موجود منها كل الأحجام والأنواع، من ساعات الحوائط عجبنا واحدة طويلة مكونة من 3 ساعات لتوقيت ثلاث مدن مختلفة (999 جنيه) وواحدة ثانية دائرية شكلها عتيق بإطارها البرونزي المعدني سعرها (499 جنيه) كان متوفر منها حجم أصغر ولكن بإطار فضي سعرها 299 جنيه، من الساعات اللي ممكن تستخدم كقطعة ديكور كان فيه واحدة معدنية مربعة لها ستاند ثلاثي يشبه حامل الكاميرات سعرها كان (899 جنيه).

المحل بـ يتميز أنه عنده Range أسعار واسع ممكن يناسب أي ميزانية؛ وده لاحظناه في مجموعة الأباجورات اللي أسعارها بدأت من 390 جنيه ووصلت حتى 1049 جنيه، طبعًا فيه فرق في الخامة والحجم والطراز، يعني مثلًا الأرخص كانت عبارة عن أباجورة صغيرة من المعدن المفرغ، أما الأغلى فكانت مودرن، حجمها كبير وتنفع لحجرة استقبال ضيوف، مغطاة بقطع فضية لامعة والشابوه لونه أسود من القطيفة.

من ضمن الحاجات اللي لفتت نظرنا كانت مجموعة التابلوهات المختلفة المعروضة، بالرغم من أنها مش أفخم حاجة ممكن تشتريها في حياتك، لكنها ممكن تسند في غرفة معيشة، أو حجرة نوم شبابية لأنها كلها عن مدينة لندن وصور مختلفة معتمدة على الـ Pop Art بشكل عام، الأسعار بـ تختلف حسب الأحجام والخامات، أغلى حاجة صادفناها كان تابلوه 50 X 70 سم من خامة الكانفاس سعره (240 جنيه)، أما أرخص حاجة لها علاقة بالمعلقات كانت مجموعة من الكلمات المشكَلة من المعدن المذهب عجبنا فيها بساطتها وخصوصًا أنهم مختارين كلمات لطيفة زي الحب والسلام، والأحلى أن المجموعة منها نفس الكلمات بالعربي أو بالإنجليزي (79 جنيه). عيبها الوحيد أنها بـ تعمل أثر لاحتكاك المعدن بالحائط، فلو اشتريتها اختار مكان واحد وعلقها فيه للأبد.

وكأنه بـ بحفزك أنك تشتري من عنده كل حاجة –وده في حد ذاته ذكاء- هوم سنتر عنده من نفس الموديل أو المجموعة اللونية كذا منتج يليقوا على بعض؛ يعني إكسسوارات الحمام كلها من أول المناشف لحد حوامل فرش الأسنان لها نفس الموديلات والمجموعات اللونية، لاحظنا أن أسعار القطع المختلفة غالية جدًا يعني حامل أكواب فرش الأسنان كان بـ 99 جنيه، وحاملة علب المنديل بـ 299 جنيه... تخيل علشان تشتري مجموعة كاملة ممكن تدفع كام، ده غير أن خاماتهم كانت متوسطة المستوى لحد كبير وفوق ده وده أسعار الإكسسوارات أغلى من مجموعة المناشف اللي لايقة عليها؛ يعني البشكير (119 جنيه)، فوطة عادية (79 جنيه) أما فوط اليد (59 جنيه).

كل اللي فات ده عبارة عن قطع تقدر تأخذها وتحاسب عليها وأنت خارج. أما الأثاث، فالموضوع مختلف تمامًا بـ تختار القطعة اللي عاوز تشتريها وتوصل لك من المخزن في خلال أسبوعين أو شهر. معظم القطع شبابية ومودرن، فلو لك في الكلاسيك أو عاوز خامات فخمة ما نعتقدش أنك ممكن تلاقي اللي ينفعك هناك.

من الآخر، هوم سنتر مفيد جدًا لأي عروسين جداد محتاجين يأسسوا بيتهم، على الأقل يأخذوا فكرة عامة عن الحاجات اللي ممكن يحتاجوها؛ ده غير أن الأسعار هناك متنوعة وتناسب تقريبًا مختلف الميزانيات، ولكن لازم نقول أن فيه حاجات معروضة بـ تخاطب محبي الاستسهال، سعرها وجودتها مش أحسن حاجة في العالم بس بـ تشتريها بالمرة، نصيحة، فيه أماكن كثير ممكن تشتري منها "الرفايع" دي بجودة أحسن ونفس السعر، إذا ما كانش أقل.