دليل كايرو 360 لأماكن بيع تي شيرتات بتصميمات عربي في القاهرة - تسوق Feature - كايرو 360
 







دليل كايرو 360 لأماكن بيع تي شيرتات بتصميمات عربي في القاهرة
دليل كايرو 360 لأماكن بيع تي شيرتات بتصميمات عربي في القاهرة
اصدرت في: 07/10/2015

البشر دائمًا يحبوا القريب المألوف، والأُنْس بعض معنى "إنسان".. والواحد فينا يتبسط جدًا لو لقى همومه وأفكاره ومشاعره مذكورة في حديث غيره.. ويتبسط أكثر لما يوصل لدرجة من التصالح مع أفكاره وطباع نفسه للدرجة اللي تخليه يعبر عنها لغيره من غير حرج أو حذر أو خوف.

يمكن تكون دي الأسباب اللي خلت التي شيرتات المكتوب عليها بالعربي تنتشر جدًا في الفترة الأخيرة في أوساط الشباب بالذات.. والإقبال عليها يفضل يزيد..
وشفنا بعد كده جهات كثير بدأت تتسابق في إنتاجها.. أو خلونا نقول أن السباق الحقيقي ما كانش في الإنتاج، إنما كان في القيم والأفكار اللي بـ تُقدم من خلال التصميمات.. ومدى تماشيها مع أفكار وهموم الشباب.. وفي الدليل ده هـ نحاول نعدي سريعًا على الجهات الأكثر انتشارًا والمشهود لها بجودة الإنتاج في المجال ده:


NAS Trends

أصحاب الريادة، بدأوا من 2009 ولسه مكملين وقادرين يحافظوا على جودة منتجاتهم وتنوعها كمان، الخامة والتفصيل ممتاز، والمنتجات مش بس مقتصرة على التي شيرتات.. بـ يعملوا تصميماتهم كمان على الشنط والـ "Notebooks" وغيرهم، والميزة الأكبر أنهم بـ يهتموا بعمل تصميمات خاصة للبنات وتفصيلات مناسبة لهم، هـ تلاقيهم موجودين في مول العرب في أكتوبر، وفي سيتي ستارز في مدينة نصر، أسعارهم أغلى نسبيًا من غيرهم، لكن ده بـ يرجع غالبًا لاهتمامهم الشديد بالحفاظ على الجودة دائمًا، تقدر تتواصل معاهم تليفونيًا على رقم 16269 وإلكترونيًا من خلال صفحتهم على الفيسبوك أو الموقع الإلكتروني.

Khotwh – خُطوة

أصحاب التصميمات المميزة والألوان المبهجة، مهما كانت حالتك المزاجية ومهما كانت الأفكار اللي بـ تدور في دماغك في فترة ما، أكيد هـ تلاقي عندهم تي شيرتات مناسبة لها وبـ تعبر عنها، مؤخرًا بقوا بـ ينفذوا تصميماتهم على تفصيلات خاصة للبنات، والأطفال كمان دخلوا معاهم في سكة الإنتاج، ودي حاجة بـ يتميزوا بها عن بقية الجهات اللي موجودة في الدليل ده، تقدر تشتري منتجاتهم إلكترونيًا من خلال موقعهم الإلكتروني أو صفحتهم على الفيسبوك، أو تليفونيًا من خلال الرقم 01021900219، وتقدر تعرف منهم أوقات معارضهم المتكررة في ساقية الصاوي في الزمالك (آخر معارضهم هناك كان الأسبوع اللي قبل عيد الأضحى مباشرة).


HEDMA Stores

من الأسماء اللي حققت انتشار واسع جدًا مؤخرًا نظرًا لجودة منتجاتهم وتنوعها بالإضافة لتعاملهم البسيط المريح، "بتوع تي شيرتات وبس" زي ما بـ يقولوا على نفسهم، الميزة الأكبر أنك بـ تحس أن تصميماتهم بـ تغطي شرائح فكرية مختلفة بذكاء وإجادة عاليين، يعني حتى جمهور الكرة -مثلًا- هـ يلاقي عندهم اللي يناسبه!

مقرهم في مساحة العمل المشتركة "شفشاون" تقدر تتواصل معاهم على الرقم 01150024868 أو على صفحتهم على الفسبوك أو من خلال الموقع الإلكتروني.


Eye
جمال تصميماتهم في بساطتها الشديدة، سواء في المحتوى أو الشكل، شغالين من سنتين تقريبًا، ومستمرين بنفس نسب الانتشار والجودة، تعاملهم في نفس سهولة وبساطة تصميماتهم، وده بـ يبني بينهم وبين العملاء وُد واحترام سريع جدًا، تقدر تتواصل معاهم تليفونيًا على الرقم 01146007899 وإلكترونيًا من خلال صفحتهم على الفيسبوك.


Qaaf Gallery

"ق" بالأساس هو ستوديو في 6 شارع النبراوي فى وسط البلد، ستوديو لعرض منتجات كثير منها اللي بـ يكون عمل يدوي وغيره، إكسسوارات، ولوحات فنية، وشنط، وهكذا، وبالإضافة لكده كمان بـ ينتجوا التي شيرتات العربي، روحهم حلوة جدًا وتصميماتهم بريحة وطعم وسط البلد وأفكار شبابها وهمومهم، إنتاجهم مش بنفس غزارة الجهات الثانية، لكن شغلهم كويس وروح التعامل هـ تاخدك، تقدر تتواصل معاهم تليفونيًا على 01114009713 وإلكترونيًا من خلال صفحتهم على الفيسبوك.


Thawb Stores

تصميماتهم بـ تتكلم، مش بادئين من كثير لكن شغلهم كويس وأسعارهم مناسبة، عبقرية تصميماتهم في تناسبها مع القضايا والأفكار اللي بـ تنادي بها،
ينقصهم التنوع نسبيًا، لكن ده أكيد بـ يحصل مع الوقت بشكل أفضل، تقدر تتواصل معاهم تليفونيًا على الرقم 01013056819 وإلكترونيًا على الموقع الإلكتروني أو صفحتهم على الفيسبوك.


هُويّة
ودي قائم عليها شباب هدفهم أنهم يرجعوا الروح العربية للناس من خلال منتجاتهم، وبالتالي هـ تلاقي تي شيرتاتهم كلها عبارة عن تصميمات بـ تدور حول شخصيات رائدة أو مؤثرة اشتهرت في التاريخ العربي والإسلامي، تقدر تتواصل معاهم من خلال صفحتهم على الفيسبوك.

 
بس يا سيدي.. وتدوّب في عرق العافية!

مزيد من الصور
  • دليل كايرو 360 لأماكن بيع تي شيرتات بتصميمات عربي في القاهرة
  • دليل كايرو 360 لأماكن بيع تي شيرتات بتصميمات عربي في القاهرة
  • دليل كايرو 360 لأماكن بيع تي شيرتات بتصميمات عربي في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
07/10/2015
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟