شارع المعز: تطبيق جديد على الأندرويد لعشاق الفسح - معالم وسياحة Feature - كايرو 360
 







شارع المعز: تطبيق جديد على الأندرويد لعشاق الفسح
شارع المعز: تطبيق جديد على الأندرويد لعشاق الفسح
اصدرت في: 08/05/2016

قد إيه بنفرح لما بنشوف أن البلد ممثلة في الحكومة ووزارتها وهيئاتها بتهتم بالآثار والكنوز الموجودة في مصر، والنهارده هنتكلم عن كنز جديد من كنوز مصرنا الجميلة والقاهرة المميزة، الكنز ده اسمه شارع المعز لدين الله الفاطمي أو زي ما هو مشهور باسم "شارع المعز" في منطقة الحسين، في مقالنا ده هنعرفكم على تطبيق جديد هيخلي زيارتك لشارع المعز متعة حقيقية.

شارع المعز من زمان بيعاني من الإهمال سواء كان من جانب الدولة أو حتى من جانبنا إحنا كمجتمع مدني عن طريق أننا بنقصر في المحافظة على التراث سواء عن طريق الهدم المتعمد لبعض البيوث الأثرية أو التخريب المتعمد عن طريق تخليد اسمين في علاقة لن تستمر أكثر من 24 ساعة على أثر عمره كام ألف سنة.

بدأت أول المحاولات للحفاظ على تراث شارع المعز في 1992 وفي سنة 1998 و2003 في عهد وزير الثقافة فاروق حسني واتغير شكل الشارع بالكامل وكان تحفة موجودة في قلب القاهرة لدرجة أن تم مد خطوط الغاز قبل ما يتوصل الغاز لضمان عدم الحفر والتكسير (أيوة ده حصل في مصر)، في السنين الأخيرة رجع الشارع لما هو أسوأ، يعني مثلًا بقينا نشوف العربيات بكل أنواعها والتكاتك والموتوسيكلات بعد ما كان الشارع مفتوح للمارة فقط، وده طبعًا أثر على زوار الشارع اللي بقوا أقل ويكتفوا بزيارة شوية معالم فيه وشكرًا ويروحوا بسرعة لأن بمنتهى الوضوح الشارع ما بقاش أمان زي الأول، يعني ممكن شاب روش بعربية روشة يخبطكم وفي الغالب مش هيأخذ باله بسبب الزجاج الغامق وأغاني المهرجانات (آه لو لعبت يا زهر) وطبعًا مع تجوال بعض الأشكال المريبة.

في خطوة جميلة من وزارة الآثار ممثلة في الإدارة العامة للقاهرة التاريخية بالتعاون مع وزارة الشئون الخارجية والتنمية الدولية الفرنسية، قرروا يعملوا تطبيق على الهواتف الذكية اسمه "شارع المعز"، ماكناش مصدقين نفسنا أن أخيرًا هيبقى فيه دليل متاح باللغة العربية والإنجليزية والفرنسية لأي حد بيزور شارع المعز اللي أكيد مننا كثير مايعرفش عن الشارع الجميل ده إلا 50% من الكنوز الموجودة فيه.

 

التطبيق متاح للأجهزة اللي بتشتغل بنظام "أندرويد" لغاية دلوقتي، وأكيد هيكون فيه إصدار متاح للأجهزة التفاحية المشهورة باسم "أبل"، زي ما قولنا لكم التطبيق متاح بثلاث لغات (عربي - إنجليزي - فرنسي)، واجهة جميلة للبرنامج فيها 6 أيقونات، بالترتيب من الشمال لليمين.

الأولى: عن المعز

وبداخلها ثلاث نقط، المقدمة اللي بتحتوي على تاريخ شارع المعز وتواريخ تطويره، تاريخ ودي بتحتوي على فيديوهات من موقع "يوتيوب" فيها تاريخ شارع المعز، كمان فيه "قبل وبعد" ودي بتحتوي على صور من شارع المعز قبل التطوير وبعده.

 

الأيقونة الثانية: التسلسل التاريخي:

وهي عبارة عن صورة فيها التسلسل التاريخي لكل مبنى من مباني شارع المعز بداية من دخول الفاطميين لمصر 969 ميلادي لغاية 1828 ميلادي وهو تاريخ بناء سبيل محمد علي.

الأيقونة الثالثة: خدمات:

ودي ممكن نقول عليها الطابع التجاري شوية في التطبيق، بسبب أنها تحتوي على نقط زي أنشطة الثقافة اللي فيها كل الأنشطة الثقافية لكن في أماكن معينة ونسبة كبيرة منها مش في منطقة شارع المعز لكنها أيقونة مميزة ومفيدة برضه لزوار منطقة القاهرة الفاطمية، وفي المقاهي فيه مثلًا "الفيشاوي" بس طيب على أي اساس الكافيهات هتتحط في اللستة دي وأنهي نوع كافيهات؟ وفيه حاجات فاضية زي مثلًا أيقونة المحلات التجارية والحرف اليدوية.

إحنا شايفين أن الأيقونة دي هي اللي هيكون عليها التطوير وكمان هي اللي هيكون عليها العين ولازم يكون الاهتمام بها أكثر شوية ويتم استخدامها صح.

الأيقونة الرابعة: أقرب الأماكن:

من ألطف الخدمات الموجودة على التطبيق لأنها ببساطة بتتحقق من مكانك على الـ GPS وتوضح لك إيه أقرب معلم لكم من معالم الشارع، علشان إحنا بنحب نجرب فتحنا الخاصية دي وإحنا في ميدان الجيزة وبصراحة التطبيق كان ذكي وكانت النتيجة أن مدرسة السلطان الغوري على بعد 4602628 متر (ما علينا من الستة دول).

الأيقونة الخامسة: امسح وشاهد

السحر كله بقى في الخاصية دي، بكل اختصار أنتم هتشغلوا الكاميرا بتاعتكم والتطبيق هيتحقق من الصورة ويقول لكم أنتم واقفين قدام ايه، بس خلاص.

الأيقونة السادسة: الخريطة

دي برضه من الخاصيات اللطيفة قوي، بتفتح لكم خريطة للشارع وباستخدام الـ GPS بتقول لكم مكانكم فين في الشارع.

تطبيق شارع المعز، خطوة جميلة وحلوة قوي وهتكون مفيدة للمصريين قبل الاجانب اللي للأسف كثير مننا كمصريين لغاية دلوقتي ممكن ما يعرفش فين شارع المعز بالرغم أن ممكن يكونوا بيعدوا عليه كله يوم.

اقروا عن شارع المعز واعرفوا أكثر عن تاريخه وتاريخ كل أثر فيه، الشارع مش مجرد شارع فيه شوية آثار من عصور مختلفة، الشارع بيوثق تاريخ مصر في العصور الوسطى أكثر عصور حصل فيها أحداث في مصر وكان لها دور كبير في شكل مصر في العصور الحديثة زي فترة محمد علي وشكل المجتمع والبلد فيها.

 

لينك بلاي ستور: من هنا

شوف فيديو بيشرح التطبيق من هنا

 

مزيد من الصور
  • شارع المعز: تطبيق جديد على الأندرويد لعشاق الفسح
  • شارع المعز: تطبيق جديد على الأندرويد لعشاق الفسح
  • شارع المعز: تطبيق جديد على الأندرويد لعشاق الفسح
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد نصر
حرر بواسطة:
محمد نصر
تاريخ النشر:
08/05/2016
منسق تحريري بالموقع العربي، دماغه مطرقعة وخيالية، بـ يحب القراءة والسفر، مدمن شوكولاتة، بـ يحب سبونج بوب وأيرون مان.