رأس سيناء: مخيم مفعم بالحيوية فى نويبع - معالم وسياحة Feature - كايرو 360
 







رأس سيناء: مخيم مفعم بالحيوية فى نويبع
رأس سيناء: مخيم مفعم بالحيوية فى نويبع
اصدرت في: 02/12/2012
من الواضح أن القاهريين بدأوا يدركوا جمال نويبع عامل إزاى. فى حين أن أماكن زى الجونة وشرم الشيخ كانوا على مدار السنين اللى فاتت هم وجهات الناس المفضلة علشان يقضوا أجازتهم فيها، بدأنا نلاحظ أن سيناء واحدة واحدة أصبحت محبوبة أكثر حتى مع الناس اللى ما يعجبهمش العجب.
في جزيرة رأس شيطان اللي في الأساس عبارة عن صخرة عملاقة بارزة من البحر، بـ يتواجد مخيم "رأس سيناء" اللي يعتبر واحد من أكبر وأشهر الأماكن الموجودة هناك. المخيم عبارة عن 70 كوخ موزعين على البحر وبعضهم بـ يبقى أعلى شوية على الجبل، والمكان معروف بين المصريين باسم "عياش".
قررنا نختار كوخ من غير كهرباء علشان شايفين أن حلاوة التجربة أساسًا فى أنك تقضى أجازتك كده، رغم أن فيه أكواخ مزودة بكهرباء. علشان اختلافات الأذواق الحاجة المميزة فى الأكواخ أن كل واحد فيها مختلف عن الثانى ومبنى بحيث يناسب البقعة اللى مبنى عليها. كل كوخ له مكان الجلوس الخاص به، رغم أن تصميماتهم وتقسيماتهم مختلفة. شوية لهم مساحة أكبر فى الأمام، وأكواخ ثانية أماكن جلوسها موجودة على الجنب؛ من الآخر مافيش شكل ثابت، وده طبعًا بـ يخليهم مختلفين ولهم شخصيتهم المستقلة.
الناس اللى عارفين سيناء كويس يعرفوا أن رأس سيناء تعتبر أكبر مخيم من الناحية التجارية. تعتبر رأس سيناء واحدة من أقدم الأماكن فى المنطقة وبـ تجذب سائحين أجانب من كل مكان. لو قررت تروح نويبع مع نفسك، أو مع مجموعة صغيرة، يبقى المخيم ده مكان مثالى، علشان دائمًا فيه حركة وعمره ما بـ يبقى فاضى، وتقدر تتعرف على الناس بمنتهى السهولة.
على الناحية الثانية لو بـ تفكر تروح الصحراء مع أصحابك وتستمتع بوقت هادئ، وتحس متعة الانعزال عن العالم، رأس سيناء يمكن مش أحسن اختيار خصوصًا لو كان وقت أجازات رسمية.
فى وقت رحلتنا، المخيم كان مليان ناس وده خلى التجربة صاخبة شوية، علشان كده بـ ننصح اللى عاوز يروح هناك يخليها بعيد عن مواسم الأجازات. بعيد بقى عن الزحمة غير المطلوبة، رأس سيناء يعطيك إحساس أنه مجتمع متكامل. فى ناس بوهيميين مقيمين هناك دائمًا، وفى المقابل بـ يعملوا أنشطة تبسط السائحين زى الرسم.
طاقم الموظفين كانوا نشيطين وودودين، وبـ يتعودوا عليك بسرعة، بطريقة كويسة طبعًا. مش هـ تحتاج وقت كبير علشان تحس أنك بـ تنتمى للمكان، بس نرجع ونقول، كل الأماكن فى نويبع بـ تقدم نفس الشعور.
الكوخ الرئيسى هنا مش مجرد مبنى منفصل، لكن بـ يتكون من أماكن صغيرة جنب بعض. بعض أماكن الجلوس أكبر، والبعض الثانى أصغر ومريح أكثر، أماكن مغلقة من فوق وأماكن ثانية مفتوحة منها للسماء؛ تقدر تقعد قريب من البحر أو من الكافيتريا. التقسيمة دى تعتبر العامل المميز لرأس سيناء لأن كل بقعة بـ تقدم تصميم ومزاج مختلفين.
مكان المخيم موجود على بقعة متميزة من البحر، بس للأسف مش أحسن مكان تقدر تغطس فيه. الشاطئ مليان حصى والشعب المرجانية بـ تصعب عليك دخول البحر الأزرق الموجود وراء الشاطئ ده. زوارق بمجاديف، بدالات وألواح ركوب الأمواج كلها موجودة وتقدر تستخدمها، وفعلاً أثبتوا أنهم ممتعين على الآخر. فيه أنشطة سباحة ثانية برضه موجودة فى المخيمات المجاورة. جزيرة "موون" على يمين رأس سيناء بحرها أفضل من ناحية السباحة وكمان بـ يوفروا أدوات للغطس السطحى أو الـ Snorkling بسعر 10 جنيه للناس اللى لها مزاج تستكشف الحياة فى أعماق البحار.
طلبات الأكل كالعادة فى المخيمات اللى زى دى بـ تأخذ وقت طويل جدًا؛ حاول دائمًا تطلب أكلك قبل ما تجوع بساعة. جودة الأكل فى رأس سيناء كويسة قوى؛ إفطار تقليدى من البيض، الجبن الأبيض، فول، سلاطة وعيش الصاج (30 جنيه)، التوستيز (30 جنيه- 35 جنيه) عبارة أساسًا عن كالزونى ممكن تبقى سناك لطيف ونفس الكلام بـ ينطبق على أم على والبان كيكس (25 جنيه). سعر الأطباق الرئيسية زى الفراخ المشوية حوالى 60 جنيه.
الحمامات المشتركة دائمًا مصدر إزعاج فى رحلات نويبع، بسبب برودة المياه والضغط الكبير. مهم أن دائمًا يبقى معاك ورق تواليت ومناديل مبللة، علشان تقدر تتقبل الوضع وتستحمله الكام يوم دول. الحمامات بـ تُنظف كل يوم بدرى، فكل ما تروح بدرى يبقى أحسن.
رأس سيناء مكان هائل لو قررت تروح نويبع كام أسبوع مع نفسك. بسرعة هـ تبقى جزء من المجتمع الموجود بالفعل وتقدر تقابل مسافرين من كل مكان، اللى بـ يعدوا هنا فى طريقهم لمحطات ثانية. لو قررت تيجى هنا مع مجموعة من أصحابك، يبقى الأحسن تروحوا مخيم منعزل شوية.
تكلفة الإقامة 30 جنيه فى الليلة الواحدة فى الأيام العادية و40 جنيه فى المواسم. للحجز اتصل على 01004442147 أو ادخل على الموقع الرسمى.
مزيد من الصور
  • رأس سيناء: مخيم مفعم بالحيوية فى نويبع
  • رأس سيناء: مخيم مفعم بالحيوية فى نويبع
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
تانيا الكاشف
حرر بواسطة:
تانيا الكاشف
تاريخ النشر:
02/12/2012
مساعد رئيس تحرير الموقع الإنجليزي، بـ تعشق الأكل لدرجة أنها بـ تخطف اللى تشوفه على مكاتب الناس، بـ تحب "باتريك" نجم البحر، كتابتها في الصميم وكلامها مش متذوق.