الشيطان

هو أنت ممكن تشوف الشيطان؟ طب لو شوفته هتعرف أنه شيطان، طب هو الشيطان بيظهر للناس أصلًا؟ الأول لازم نقول أن في التراث الديني سواء المسيحي أو الإسلامي، وحتى التراث الشعبي فيه حكاوي كتير عن ظهور الشيطان للإنسان، وعن غواية الشيطان وعيش بقى مع خيال الإنسان وهو بيحكي الحواديت عن فكرة الغواية وأصلها، وعن عمايل الشيطان، وطبعًا كلنا عارفين رواية (فاوست للكاتب المسرحي الألماني (جوته) واللي بتحكي عن فكرة الغواية ودكتور فاوست اللي بيمضي عقد مع الشيطان.

"فاوست" المصري بقى اسمه (ونوس) يا ترى اتعمل حلو ولا لأ؟

المصري

مبدئيًا لازم نقول أن يحيى الفخراني عامل دور حلو جدًا وقدر فيه أنه يصنع حالة جديدة وجو مختلف، ويجسد شخصية الشيطان بشكل مبتكر، فكرتنا بأداء آل باتشينو في فيلم (محامي الشيطان) وصراحة الفخراني له طريقة في أداء أدواره يخليك تقتنع جدًا بيه.. خاصة بقى لما يكون اللي قدامه ممثل ليه تقله زي نبيل الحلفاوي، واللي مثل صورة الإنسان بشكل عام، وهنا بقى لازم نتكلم عن حلاوة الفكرة.

الفكرة

الفكرة حلوة لسبب مهم.. إنها بتلعب على تيمة القيم لكن من وجهة نظر مختلفة، وجهة نظر العدو الأزلي للإنسان (الشيطان) وبتخليك طول الوقت قاعد بتفكر يا ترى ونوس هو الشيطان في تجسيده، ولا هو الشر المطلق، ولا هو إيه؟ والمسلسل اللي يخليك تفكر لازم يبقى مسلسل جيد، لأنه مش بيخليك مجرد متلقي للفكرة والأحداث وإنما بيخليك مشارك كمان فيها، وده طبعًا صعب جدًا في الكتابة، وبذكر الكتابة لازم نقول أن كمال عبد الرحيم المؤلف رسم شخصية صعبة المراس أصلًا، وهو مش كاتب تجاري بيعمل مسلسل للموسم، هو كاتب مثقف وقارئ، وكتبه خارج فكرة السيناريو، ولما بيعمل مسلسل بيعمل حاجة تفضل ويبقى لها بصمة.. زي ما عمل (الخواجة عبد القادر) واللي كان بطله بالمناسبة يحيى الفخراني برضه.

وحدوتة المسلسل بتحكي عن أب ترك أولاده لمدة عشرين سنة ومايعرفوش عنه حاجة، وفجأة بيظهر (ونوس) وبيقول لهم أنه صديق لوالدهم وأن فيه قضية ميراث بملايين الجنيهات، ولازم يمضوا له علشان القضية تتم، وهنا يبدأ الصراع ما بين الاستمرار في حياتهم، أو العودة إلى الأب والملايين.. وأنهم يمضوا لونوس (زي فكرة العقد بتاعة فاوست).

الانطباع

انطباعات الناس عن المسلسل جيدة، والكتابات اللي اتقالت عن ونوس إيجابية خاصة عن أداء الممثليين اللي واضح أنها حقيقية وقريبة من الواقع.. ومافيش هجوم من السوشيال ميديا عليه، وإنما طرح للأسئلة، وإحنا كمان بنطرح السؤال الوجودي لو طلع لك الشيطان ومعاه الملايين وطلب منك تمضي له هتعمل إيه؟