أجمد 5 وجوه جديدة في دراما رمضان 2016 - تليفزيون Feature - كايرو 360
 







أجمد 5 وجوه جديدة في دراما رمضان 2016
أجمد 5 وجوه جديدة في دراما رمضان 2016
اصدرت في: 10/07/2016

رمضان زي ما هو موسم المسلسلات وبرامج المقالب، بيعتبر محطة متميزة لانطلاق الوجوه الجديدة، ولو دققتوا شوية هتلاقوا أن معظم الفنانين الكبار اللى بنحبهم ونتابع أعمالهم بشغف دلوقت، بدأت حياتهم الفنية بمسلسلات تم عرضها في رمضان، أو حتي ممكن المسلسل الرمضاني يكون العلامة الفارقة في مستقبل فنان ما، علشان كده هنستعرض معاكم أجمد 5 وجوه جديدة في رمضان.. نحفظ الأسماء دي علشان هيكونوا نجوم المستقبل.

 

مي عمر: الواسطة ولا الموهبة؟

الوجه الجديد والجميل مي عمر، واللي بتطل علينا من خلال مسلسلين هم (الطبال) و(الأسطورة).. على الرغم من جمالها الكبير، إلا أن مي بتهتم بتنمية قدراتها التمثيلية، واكتساب خبرات جديدة والإحتكاك بممثلين كبار وتقال، ونقدر نقول أن مشاركتها في مسلسل (الأسطورة) بالذات كان فاتحة خير عليها، وبدأ كتير من المشاهدين في البحث عن تاريخ (مي) الفني، فقط علشان نعرف أنها شاركت قبل كده في مسلسل (كلام على ورق) مع هيفاء وهبي و(حالة عشق) و(حكاية حياة) في أدوار صغيرة.

مي خريجة الـ AUC قسم الصحافة والإعلام أثير حواليها شائعات وكلام كتير عن أن مشاركتها في مسلسل (الأسطورة) كان نتيجة أن زوجها هو مخرج العمل (محمد سامي).. على العموم الوقت وحده هو اللي ممكن يجاوبنا على سؤال: هل مي موهبة حقيقية تستحق الدعم والمساندة، أم إن دخولها الوسط جه نتيجة الواسطة؟ إحنا شخصيًا أكتر ميلًا للإقتراح الأول.

 

هنا الزاهد: الشكل ولا التمثيل؟

لما جينا ندور على معلومات عن هنا الزاهد، لاقينا أن صورها منتشرة أكتر من الكلام عنها! هنا قدرت تسرق قلوب المشاهدين في 2016 بطلتها الخفيفة وصوتها القوي المختلف عن باقي أصوات الفنانات في رمضان، وطلتها الطفولية الخفيفة وشكلها الجميل اللي طلعت عليه شائعات أنه نتيجة عمليات التجميل، شائعات استفزت هنا علشان تنشر على صفحتها الرسمية على موقع (فيس بوك) صورة لها وهي طفلة.

هنا بتقدم دور واحد في مسلسل الزعيم عادل إمام (مأمون وشركاه) وشاركت قبل كده في فيلم (خلطة جيمي) ومسلسل (فرق توقيت) مع تامر حسني. لكن دورها مع عادل إمام يعتبر الصاروخ اللي دخلها دنيا الفن وقفز بمعجبيها لحوالى 70 ألف على موقع فيس بوك.

استمرار هنا واثباتها لنفسها فى الأعمال القادمة هيكون مرهون على قدرتها على التدليل على أن شكلها وصوتها مش أفضل ما فيها، وأنها قادرة على تقديم مساحات أوسع من الشخصيات والخلفيات الإجتماعية والمادية للشخصيات اللي بتقدمها، وقدرتها على الخروج من بوتقة الفنان طلعت زكريا واللي طلعت عليها شائعة أنها ابنته، بينما في الحقيقة هو زوج والدتها.

 

نهي عابدين: الدراسة ولا الموهبة؟

من المعهد العالي للفنون المسرحية خرجت علينا نهى عابدين.. الوجه الجميل البريء اللي طل علينا في رمضان 2016 من خلال مسلسل (ونوس) مع العبقري يحيى الفخراني.

ونوس مش العمل الأول لنهي، شاركت قبل كده في أعمال زي مسلسل طوق نجاة وفيلم سفاري وأعمال تانية، لكن العمل اللي أطلق شهرتها الحقيقية هو دورها في مسلسل ونوس، واللي بتلعب فيه دور نرمين، البنت الفقيرة اليتيمة اللي بتعيش في منزل العائلة، ثم بتتغير شخصيتها 360 مع إجبارها على الزواج من عزيز قريبها.

بنتوقع لنهي المشاركة في أعمال أكثر قوة وانتشارًا الفترة القادمة، ونتوقع منها الإجابة على سؤال مهم: هل الدراسة المتخصصة لوحدها اللي تقدر تحدد مصير الفنان؟ أم أن الموهبة والشكل كمان لهم عامل قوي؟

 

محمد كيلاني: الغناء ولا التمثيل!

ولسه مع مسلسل ونوس واللي قدم من خلال أحداثه مجموعة كبيرة من الفنانين الشباب، ومن هنا لازم نقدم تحية واجبة للنجوم الكبار زي يحيي الفخراني وعادل إمام على إصرارهم كل سنة على تقديم مواهب شابة جديدة في أعمالهم الدرامية علشان يعطوهم الفرصة للظهور وللجمهور فرصة للحكم عليهم.

محمد كيلاني في الأساس مطرب مش ممثل، من مواليد 1983 ومن الناس اللي اتربت واتعلمت فى دار الأوبرا المصرية، يعني عارف الغناء على أصوله وأساسياته السليمة، وشارك قبل كده في كليب (أكيد فى مصر) ويعتبر (ونوس) تاني محاولاته مع التمثيل بعد مسلسل مريم اللي تم عرضه فى 2015.

كيلاني بيلعب في ونوس دور الابن الأصغر لياقوت اللي بيتعرض لإغواء شيطاني من ونوس، وبيظهر كأكثر الأبناء حبًا في مقابلة والده بعيدًا عن الطمع في ثروته، لكن أخلاقه بتتعرض لاختبار قوي بعد غواية الراقصة (معاني) له، ومحاولته الصمود أمام اغراء قريبته (نرمين) اللي بتلعب دورها (نهي عابدين) اللي لسه متكلمين عنها.

بنقول لكيلاني: حاول الفترة القادمة تحدد موقفك، هل عاوز تدخل التمثيل من باب الغناء؟ ولا عاوز تدخل عالم الغناء كمطرب ممثل؟ لكن من بعد ونوس إحنا شخصيًا شايفين فيك ممثل قوي وصوت محترم قادر على إثبات نفسه في الفترة القادمة.

 

محمد مهران.. الشجاعة ولا الموهبة؟!

نقدر نقول بدون مواربة، أن الفنان الشاب محمد مهران واحد من أجرأ الفنانين الشباب في جيله.. محمد وافق على بطولة فيلم (أسرار عائلية) واللي كان بيحكي عن تجربة شاب مثلي جنسيًا، وهي تجربة خطيرة وممكن تعرض الفنان اللي بيعملها للوصم مدي الحياه، لكن مهران كان قدها وقدود وقدم دور متميز جدًا.

في رمضان 2016 بنشوف مهران في مسلسل تاني هو (المغني) عن قصة حياة الكينج محمد منير، والحقيقة أن محمد مهران قدر يقدم دور متميز وقوي، وهيكون علامة فارقة في مشواره الفني في المستقبل.. كل اللي نقدر نقوله لمحمد مهران: أن القلب الجامد والجرأة مش كل حاجة، ولو قدراتك التمثيلية لم تنمو بقدر قوة قلبك وقدرتك على أداء الأدوار الصعبة والمعقدة.. ساعتها ممكن نجمك يخبو بسرعة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
10/07/2016
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.