بين كل اثنين متزوجين بـ تحصل مشاكل كثيرة إما بسبب مصروف البيت، أو الأولاد، أو تَدخل الأهل في حياة كل واحد فيهم، لكن علشان تمشي حياتنا بكل سهولة وبساطة وتهون علينا مشاكلنا لما نشوف مشاكل غيرنا وعلشان نعرف إزاي نقدر نعالجها ونوصل فيها لحل إيجابي ونستفيد من تجارب الآخرين يبقى لازم نتابع برنامج «هى وهو 2» اللي بـ يعرض على قناة mbc4.

الجميل في البرنامج أن طريقته جديدة ومختلفة في عرض موضوعات خاصة بالزوجين ومقدمي البرنامج هم الزوجين أنفسهم، لكنه بـ يبدأ بفقرة غنائية من الزوج عن موضوع أو سبب الخلاف بين الزوجين، وكل ده بـ يكون من خلال فقرة استعراضية من الزوج، وبعد كده فيه مشاهد مصورة للزوجين عن إزاي نشأ الخلاف، وكل ده طبعًا بـ يكون في شكل تمثيلية للي حصل بينهم، لكن الجميل أنهم بـ يؤدوا الأحداث بينهم بشكل تلقائي، وبين كل مشهد والثاني بـ يكون فيه تعليق من أحد الزوجين وإيه السبب وراء الخلاف اللي بينهم، وكمان الديكور الخاص بالبرنامج مختلف لأنه بـ يعرض جزء من اللقطات المصورة كخلفية وراء كلام أحد الزوجين أو الأصدقاء.

لكن الغريب أنهم بـ يعرضوا كافة التفاصيل الحياتية لكل واحد فيهم، وكمان أصدقائهم وبعد كده بـ يكون فيه تعليق من الزوجين والأصدقاء عن رأيهم في اللى حصل، وإيه الدافع وراء كل المشاكل دي زي المشكلة اللى حصلت بين شادي ونيروز عن ديكورات الشقة واللى كانت سبب لترك البيت وبعدين بـ تتوالى بينهم الأحداث وحلقات متتالية عن كافة التفاصيل اللي بـ يمروا بها، وكمان بـ يهتم البرنامج بأصدقائهم وتفاصيل حياتهم، ونلاحظ كمان أن تتر البداية هو تصوير مجسد لأبطال البرنامج ومهنة كل واحد فيهم وهما "شادي" اللي بـ يعمل كفنان ونيروز الزوجة رئيسة التحرير، آية صديقة للزوجة وهي صحفية، إيمي صديقة للزوجة وكاتبة، والملاحظ في البرنامج أنه بـ يهتم بكافة تفاصيل الأحداث بين الأصدقاء وبعضهم سواء كانت مشاكل أو أحداث يومية.

ورغم جمال البرنامج إلا أنه بـ يهتم بموضوعات تافهة مش مشاكل حياتية تمس كثير من أزواج المجتمع، وكمان بـ يهتم بفئة معينة من المجتمع مش كل الطبقات، ومش بـ يوضح إزاي تم الاشتراك في البرنامج لأنه فيه جانب كبير من التمثيل من الزوجين، وكمان بـ يهتم بعرض الحياة الشخصية لبعض أصدقائهم، وده بـ يدل على أنه مش بـ يركز على هدف البرنامج، وكمان فيه دعاية مباشرة للأماكن اللى بـ يروحوها سواء في الكافيهات أو الشركات حتى المكتبات اللي بـ يشتروا منها الكتب وكمان الصالونات.