فيه "مصر كل يوم" وفيه "مصر الآن" وفيه "يحدث فى مصر" وفيه "مصر على مدار الساعة" وفيه "مصر الليلة".. كلها برامج بـ تتكلم عن مصر واللى بـ يحصل فيها، لكن فيه برنامج واحد بـ يقدمه أكثر من حد شايف مصر بعين مختلفة، برنامج "مصر البيت الكبير".

 

البيت الكبير:

ليه البيت الكبير؟ ده أول سؤال سألناه لنفسنا قبل ما نكتب عن البرنامج.. الكلمة لها معانى كثير، البيت الكبير اللى هـ يلم كل التوجهات والاختلافات والأيدولوجيات المختلفة، أو أن البيت الكبير اللى هـ يجيب كل حاجة فى مصر يعنى العمال والفلاحين ورجال الأعمال والبسطاء.. أو البيت الكبير اللى فيه الصغير والكبير والعجوز والشاب والفتاة والمرأة.. وصراحة البرنامج فيه حاجات كثير وكان مميز،تصدقوا زى مين؟نقول لكم زى مين..زى "يحدث فى مصر وحلقة ليلة رأس السنة".

 

رأس السنة:

برضه البيت الكبير كان مميز جدًا فى ليلة رأس السنة لأنه جاب نجم كبير فى السينما والمسرح والتليفزيون، كان ضيفه النجم عادل إمام، وطبعًا كلنا عارفين شعبيته وكان حوار كبير تميز فيه النجم الثانى للبرنامج "أشرف عبد الباقى".

 

أشرف:

معروف عن عبد الباقى خفة دمه واللى ظهرت لما كان بـ يتكلم عن البيت الكبير على اعتباره بيت حقيقى ودى من أكثر الحاجات اللى بـ تميز البرنامج أنه بالفعل بـ يحسس الضيف أنه فى بيته عادى يعنى بـ يقدمه له مشروب وبـ يقعدوا فى مكان كأنه "صالون" فى بيت والديكور هنا عامل مهم جدًا علشان البرنامج ينجح.. والواحد لما بـ ينقل لبيت كبير وجديد بـ يقعد يفكر فى الحاجات اللى هـ ينقلها مكانها فين وبـ يبقى صعب جدًا أنه يستقبل فيه ضيوف.. لكن البيت الجديد الكبير بـ يعتبر ضيوفه مش ضيوف، بـ يعتبرهم أصحاب بيت.

 

أصحاب البيت:

أصحاب البيت هما مقدمو البرنامج وهما برضه الضيوف زى ما قولنا.. والجديد فى البرنامج أن اللى بـ يقدمه مجموعة كبيرة من النجوم.. صراحة قناة الحياة سخرت كل إمكانياتها علشان تعمل أكبر برنامج توك شو فى مصر بمشاركة الفنان أشرف عبد الباقى والفنانة بشرى فى أولى تجاربها فى مجال التقديم، والإعلامية هبة الأباصيرى.. ومع أن فى الفترة الأخيرة فيه أنباء عن غياب بشرى عن البرنامج لأسباب خاصة بها لكن الفكرة نفسها جميلة، ولازم نرجع ثانى ونقول أن أصحاب البيت مختلفين جدًا، يعنى فيهم الممثلين والسياسيين والمثقفين فيهم ناس كثيرة ومختلفة كلهم بـ يضمهم البيت الكبير اللى يعتبر رسالة مهمة لكل المصريين، رسالة بـ تقول:

"يا رب مصر كلها تبقى بيت كبير

يا رب مصر كلها تتعامل مع بعض كأنها بيت

يا رب مصر تدخل البيت

يا رب كل المختلفين فى مصر يرجعوا للبيت

يا رب المصريين يحبوا البيت

ويارب رأس البيت الكبير يبقى أحسن واحد

يبقى راجل البيت فعلًا وقادر على إدارته

يا رب اجعل لنا البيت الكبير أحلى بيت فى الدنيا.