دليل فن وثقافة القاهرة، أحدث المقالات عن فن وثقافة مصر

فن وثقافة

ناستو: مكان لتعليم الساكسفون في القاهرة
اصدرت في: 07/11/2016

أكيد بتحب آلة الساكس، ولما ودنك بتسمعها بتحس بشعور عجيب كده جامع بين المتعة والهدوء والشجن اللي بتعمله، جربت تتعلم ساكس قبل كده؟ تعالوا في رحلة النهارده مع الساكس نفهمه ونشوف اللي بيعمله ويتعلمه. كتير بنشوف أماكن بتتعامل مع المزيكا بأنواعها، وكتير بنشوف أماكن ثقافية بتعلم وتدى كورسات في حاجات كتير من ضمنها المزيكا، لكن أغلبهم بيركزوا على العود والغنا والبيانو وممكن الناي، النهارده بقى معانا عاشق الساكس الصغير.. المكان في حدائق القبة، مش مكان واسع لكن متأسس كويس، وفيه مساحات فاضية، مميز جدًا علشان هو بيتعامل مع حاجة واحدة بس، الساكس. العشق: عاشق الساكس في حكايتنا النهارده هو دكتور نادر أرنست، كان حلمه من زمان يعمل حاجة متخصصة في فن العزف على الساكس وبس، وكانت تجربة محفوفة بالمخاطر، لأنه ممكن يفشل، لما تعمل مركز مهتم بالمزيكا حاجة ولما تعمل مركز مهتم بالساكس حاجة تانية خالص. "ناستو ساكسفون سنتر" هو المقر الرسمي لدكتور نادر أرنست، بيقدم السنتر كورسات متخصصه للعزف علي آلة الساكسفون بجميع أنواعه، وكمان بيقدم السنتر جميع الخدمات المتعلقة بآلة الساكسفون. المكان: هناك هتلاقي كل حاجة متعلقة بالآلة دي، بيع وصيانة وشراء وتوفير جميع الاكسسوارات المتعلقه بالساكسفون. هم متخصصون في مساعدة كل شخص مهتم بالساكسفون في تحقيق حلمه الخاص، أنه يكون عازف شاطر على الآلة ويفهم عالمها وسحرها، كمان بيقدموا خدمة جديدة من نوعها أنهم بيوفروا عازفين للحفلات والمناسبات المختلفة، يعني لو عندك حفلة وعايز تعمل حاجة مختلفة، ممكن تكلمهم وهما هيوفرولك ده بسهولة. وإيه كمان: من وقت للتاني بيعملوا سيمينار للساكسفون وبيبقى مجاني، تقدر تحجز فيه وتجرب الآلة، وكمان د/ نادر بيجاوب على كل أسئلتك حوالين التعليم وتقدر تتقنه في قد إيه، وإيه الاختلاف بتاع الساكس، وبيتكلف كام وحاجات زي كده. حالة مختلفة وموضوع شيق، وحد جرب في موضوع متخصص ونجح إن يكون ليه طلاب بيحبوا الساكس وبيتعلموه ويشاركوا في حفلات كمان.

...

كل اللي محتاج تعرفه عن الدورة التاسعة لبانوراما الفيلم الأوروبي
اصدرت في: 03/11/2016

عشاق السينما على موعد جديد مع أحد المهرجانات السينمائية متعددة العروض، لكن المرة دي مهرجان قائم على تنظيمه لجنة تضم مجموعة منوعة ممن لهم باع في العمل السينمائي سواء في النقد أو التنظيم أو الرصد والمتابعة. بانوراما الفيلم الأوروبي في دورتها التاسعة بدأت فعالياتها يوم الأربعاء الماضي 2 نوفمبر، ومستمرة لحد يوم السبت 12 نوفمبر، وهتتم العروض في عدة دور عرض في أكتر من محافظة، في القاهرة هتكون دور العرض الموكل إليها استضافة فعاليات البانوراما هي سينما زاوية وسينما كريم في وسط البلد. وكانت سينما زاوية نشرت جداول العروض كلها على الصفحة الرسمية ليها على فيسبوك، هتلاقوا فيها كل التفاصيل اللي ممكن تحتاجوا تعرفوها من المواعيد وأسماء العروض وغيرها، تقدروا تشوفوها من هنا. تقدروا كمان تتابعوا جدول فعاليات البانوراما في كل دور العرض في كل المحافظات من خلال البوابة الإلكترونية الخاصة بالفعاليات على موقعهم الإلكتروني من هنا. مشاهدة ممتعة.

...

دليل كايرو 360 لسينمات القاهرة المجانية
اصدرت في: 31/10/2016

خلونا نتفق أنه مهما رحنا وجينا بتفضل خروجات السينما ليها مذاقها الخاص وبهجتها المتجددة، يمكن علشان هي أكتر خروجة قابلة لأنها تبقى متعددة الأغراض، أو يمكن علشان تجربة المشاهدة نفسها بتدينا فرصة للشوف والتقاط التعبيرات والمعاني اللي مابنعرفش نقولها، أو يمكن علشان السينما النضيفة هي طريق ممهد لتحصيل الثقافة وأسهل بكتير من طرق تانية بتحتاج وقت ومجهود أكبر، أو، أو... المهم، مشكلة خروجات السينما الكبيرة مؤخرًا أن الصناعة نفسها اتأخرت جدًا ومعظم الأفلام الموجودة على الساحة مابقتش بالمستوى المطلوب، وبقت فكرة حضور فيلم في سينما فيها نوع من المخاطرة بالخروجة لو الفيلم طلع أي كلام، ده غير أن أغلب السينمات الكويسة والمريحة بقت تذاكرها غالية نسبيًا وده يخلي الموضوع مكلف، ومن هنا اتخلقت الحاجة لسينمات بتدينا الضمانين دول: فيلم حلو، وتكلفة قليلة.. وإحنا هنا هنديكم فكرة عن مجموعة من السينمات الـ "مجانية" في القاهرة، واللي عروضها دايمًا بتكون على المستوى المطلوب. سينما "دال" اللي يتابع أنشطة مركز "دال" للأبحاث في جاردن سيتي يعرف كويس أن القائمين على المركز مركزين جدًا في أن كل نشاط بينظمه المكان يكون ليه قيمة حقيقية ونفع كبير في وسط الشريحة المثقفة من الشباب، أحد أهم وأبرز وأكثر الأنشطة دي نجاحًا هو نشاط السينما، سينما "دال"، موعد أسبوعي متجدد كل أربعاء مع أفلام من كل طبيعة ولون، أفلام مختارة بعناية شديدة علشان تلمس قيمة معينة أو تخبط في فكرة محددة، وكتير بيصاحب العروض حلقات نقاش علشان تتميم الفايدة والتأكيد عليها، وحضور كل العروض متاح للجميع بلا تذاكر ولا حجز ولا رسوم. سينما "دكّة" سينما تانية من السينمات التابعة لمؤسسات ثقافية كبيرة بتديرها عقول تقيلة وواعية، مؤسسة التعبير الرقمي العربي "أضف" اختارت الـ "دكّة" كممثل ليها في مجال التأثير المجتمعي والعمل العام، الدور اللي لعتبه الـ "دكّة" بمنتهى الحرفية والتفاني والإتقان، وأنتجت لينا مجموعة كبيرة من الأنشطة اللي ساهمت بقسط وافر في خلق مجتمع صحي لتبادل الأفكار والانفتاح على الآخر، ومنها نشاط السينما اللي ماشي بنظام الجولات، كل فترة يمسك منطقة ما من العالم وياخد جولة في ثقافة أهلها وعاداتهم وطباعهم من خلال أهم وأقوى الأفلام اللي تم إنتاجها عندهم، والموعد الأسبوعي الثلاثاء، والدعوات دايمًا عامة ومفتوحة. سينما "الفرن" درب 17 18 بمنطقة مجمع الأديان بمصر القديمة بقى مؤخرًا منافس قوي على الساحة الفنية والثقافية مش بس بالأنشطة اللي بينظمها وإنما كمان بالمبادرات اللي بيدعمها وبالشراكات اللي بيعملها وبالفعاليات اللي بيستضيفها، أحد الجهات اللي بيستضيف فعالياتها هي فعاليات سينما "الفرن"، اللي بتطوف بشكل شبيه باللي بتعمله سينما "دكة" لكن بشكل أسرع شوية ومنوع أكتر ومتناول لدول محددة مش أقاليم كبيرة ذات طابع ثقافي موحد أو متقارب، وبرضه جميع عروضها مفتوحة للجميع وبلا رسوم أو محددات. سينمات المعاهد الدولية أبرزهم المعهد الهولندي بالزمالك، اللي محدد موعد ثابت أسبوعيًا لعروض السينما، الأحد من كل أسبوع، وبرضه الأفلام بيتم اختيارها بعناية شديدة علشان تناسب الشريحة الشبابية المثقفة، ودعوة الحضور عامة، وغيره المعهد الفرنسي بالسيدة زينب، ومعهد جوتة في التحرير والدقي، اللي بيستضيفوا برضه على فترات النوع ده من عروض السينما. سينمات مساحات العمل المشتركة معظم الـ Co-Working Spaces مؤخرًا بقت مخصصة يوم أسبوعي ثابت لعرض سينيمائي مناسب للشريحة اللي بتستهدفها كنشاط ترفيهي وتثقيفي في نفس الوقت، وفي الغالب بتكون دعوات الحضور عامة أو مقابل مبلغ رمزي جدًا لتغطية تكلفة حجز قاعة العرض بس. ماتنساش تاخد صاحبك الأنتيم في إيدك الطلعة الجاية، وتدعيلنا.

...

ليلى: مكتبة مميزة في وسط البلد
اصدرت في: 27/10/2016

عزيزي القارئ، أهلًا ومرحبًا بك، مع مكتبة جديدة على كايرو 360، النهارده هنتكلم باسم المكتبة، مش باسم حد تاني، عيش بخيالك معانا المكتبة هي اللي هتتكلم، ركز وغمض عنيك واسمع بقلبك، علشان روحك تشوف روح الثقافة. أنا مكتبة ليلى اتأسست في القاهرة عام 1960 واتخصصت في توزيع الكتب والدوريات العربية لكل الناس والمجتمع وأي حد عايز يقرأ ويطبع ويبقى مثقف وكمان للأفراد والهيئات. أنا كمكتبة بقول لكم إني بقبل جميع الطلبات اللي بتجي لي، مش بنسى حد، ولا بعطل حد، أنا على طول موجودة، أي حاجة بتوصلني على البريد الإلكتروني أو الفاكس، أو التليفون، على طول برد عليهم وببعت لهم طلبهم وأنا مبسوطة، وكمان بعمل توريد طلبات لكل حبايبي اللي عايزين يقرأوا في زمن قياسي. وأحب أقول لكم كمان إنى كمكتبة عندي الإمكانية والمعرفة في البحث عن الكتب والدوريات القديمة والنادرة، واللي خلصت من السوق، ومش لاقيها، وتعبان وعمال تدور عليها وعلى أى ريحة ليها، طب تعالى وجرب واسألني، هتلاقي عندي كل جديد، بالذات الحاجات اللي مابقتش متوفرة. وعلشان بقى لى كتير في السوق فأنا كمان عاملة خدمة جديدة بقى بس هتعجبك قوي، خدمة القارئ غير المتخصص، هنعرفك على كل جديد، وهنخليك تعرف إيه اللي الناس بتطلبه، وإيه الجديد والمشهور بين الناس. وبقدم كمان خدمة المكتبات الجامعية والعامة وتزويدها بجميع إحتياجاتها من الكتب العربية وكمان بعمل الإشتراكات السنوية في الدوريات من أنحاء العالم العربي في كافة مجالات العلوم والمعارف. وتقدر تستلم نشرة المكتبة الإلكترونية اللي باعملها، وبيقوم أصحابي بإصدارها وفيها أحدث الإصدارات العربية. سيبك بقى من كل اللي فات أنا كمان باعمل أحداث ثقافية وحفلات توقيع ولقاءات مع كتاب من كل الأطياف، بس انت تعالى. عزيزي القارئ لمزيد من المعلومات أو الإستفسارات، يرجي الإتصال بنا وسنقوم بالرد علي إستفساراتكم وأسئلتكم.

...

اعرف كل حاجة عن معرض القاهرة للكتاب 2017
اصدرت في: 21/10/2016

لسه فاضل حوالي شهرين على معرض الكتاب، لكن لازم تستعد من النهارده، توفر شوية فلوس تجيب بهم كتب، كايرو 360 هتقول لكم في المقال ده شوية معلومات مهمة عن المعرض. دورة المعرض الجديدة هتكون الـ 48، والميعاد هيكون في الفترة من 27 يناير وحتى 10 فبراير 2017، في منطقة أرض المعارض الدولية، بمدينة نصر. شعار المعرض هيكون "الشباب وثقافة المستقبل"، وهيكون فيه اهتمام كبير بأدب الشباب. وطبعًا هيتعمل ندوات كثيرة لمؤلفين شباب من مصر والعالم العربي، وتم اختيار الشاعر المصري الراحل صلاح عبد الصبور علشان يكون شخصية المعرض. والمغرب هتكون هي ضيف شرف الدورة الـ48 لمعرض الكتاب. المعرض هيشهد ندوات مهمة عن شخصيات مصرية راحلة زي العالم المصري الراحل الدكتور أحمد زويل، والشيخ علي عبد الرازق، سلامة موسى، سهير القلماوي، لويس عوض، صلاح جاهين، وغيرهم. ننصحكم من النهارده تبدأوا في توفير مبلغ شهري هيساعدكم على شراء الكتب اللي نفسكم فيها، ويا ريت كل واحد يجيب مذكرة صغيرة ويبدأ يكتب فيها اسماء الكتب اللي هو محتاجها. وكايرو 360 هتكون معكم لحظة بلحظة أيام المعرض هننشر لكم نصائح لشراء كتب، وهنقول لكم على كواليس المعرض وافضل وأرخص الأماكن اللي ممكن تشتري منها كتب.

...

محمد فوزي: صانع البهجة بالعرايس الماريونيت
اصدرت في: 18/10/2016

من أنجح الطرق المجربة إنك تخلّي شاب في العشرينات أو حتى التلاتينات يتونس جدًا بقعدتك معاه أنك تدندن قدامه "قبة سيدنا الولي دول نوروها .. محلى البيارق والناس بيزروها" اللي هي مطلع عرض (الليلة الكبيرة) وهو كان عرض من أروع ما يكون بعرايس الفنان المبدع ناجي شاكر على أنغام سيد مكاوي وهو بيغني كلمات لصلاح جاهين، ليلة كبيرة على حق يعني، ليلة سايبة علامتها الجميلة في طفولة كل واحد فينا. وكمان مش هننسى نفكركم بأول ما كليب "مش هقول علّي حصل" لحمادة هلال طلع اللي كان قائم على فكرة عرايس الماريونت اللي بتلعب ونجاحه العالي جدًا وسط الشباب والصغيرين. يمكن علشان الجيل الصاعد حاليًا مايتحرمش من متعة مسرح العرايس دي وأثرها الجميل اللي بتسيبه في الطفولة وحتى الشباب ظهر وسطنا الفنان المحترف/محمد فوزي بكار فنان مسرح عرايس ساقية الصاوي حاليًا وصاحب مشروع "عروسة ماريونت" اللي هنحكي لكم بالتفصيل هو إيه بالضبط في مقالنا ده بس بعد ما نبدأ مع الفنان المبدع ده من أول مشواره. الفنان محمد فوزي بكار نشأ في الواحات بيرعى أغنام في بلده وكانت متعته وبهجته لما يمسك الطينة ويبتدي يشكلها وينحتها على شكل عرايس وبني آدمين، ثم انتقل هنا للقاهرة علشان يخش كلية تربية فنية وتميز بشكل كبير أوي في مادة اسمها (الأشغال الفنية) وهي مادة كانت بتهتم بالأزياء المصرية القديمة اللي ابتدى محمد يطبق المادة دي على عرايس وكانت لازم تكون شئ بيتحرك؛ فمن هنا بدأ محمد يعمل أول عروسة ماريونت والشرارة الأولى لموهبته كانت من قلب كُليّته. نجح جدًا محمد في كليته وقرر هيكمل طريق نحت العرايس للآخر فابتدى يطور نفسه عن طريق فيديوهات من على اليوتيوب وورش ياخدها أونلاين مع فنانين أجانب يتعلم فيها ميكانزم نحت الجسم وتفاصيل صناعة العروسة. محمد كان شغال في ساقية الصاوي من 2004 بيدي ورش تعليم فنون للأطفال وبعدين شارك في فريق التصنيع في مسرح عرايس الساقية في 2007 السنة اللي اتعملت فيها أول حفلة ليه وكانت عرض (أم كلثوم تعود من جديد) في مارينا. بعد أول عرض ده ابتدى محمد يتعرف ويسافر بلاد كتيرة زي الجزائر وتونس ولبنان يقدم عروض وياخد ورش يطور بها نفسه. محمد كفنان ناجح جدًا أخد سلم النجاح كامل؛ من أول شاب في فريق تصنيع العرايس في الساقية لمدير فني مسرح الساقية لمدير مسرح الساقية إلى أن وصل لفنان مسرح الساقية حاليًا، المسرح اللي بيقدم باستمرار حفلات أم كلثوم الشهرية الناجحة جدًا وعبدالحليم ومنير ولسه القوس مفتوح يتحمل أنه يتحط فيه أسامي ضخمة كتير. استثمر الفنان نجاحه ده وبدأ يقدم ورش للناس يعلمهم فيها الفن ده في أماكن مختلفة سواء في المرسم بتاعه في الزمالك أو غيره وبدأ يعمل مشروعه "عروسة ماريونت" اللي بيقدم من خلاله أفكار مبتكرة كتير أشهرهم فكرة "عروسة ليك ولحبيبتك" وهي إن ال couple المخطوبين مثلًا بينحتوا عنده عروستين واحدة بشكل الولد وواحد بشكل البنت، حاجة إبداع كده. الانترنت هو تقريبًا المكان اللي محمد بيتواصل مع الناس من خلاله.. تقدروا تتابعوا شغله وتتواصلوا معاه من هنا. يدوم إبداع المبدعين.

...

مهرجان القاهرة الثامن للجاز: فعاليات منوعة وأسماء كبيرة
اصدرت في: 13/10/2016

مهرجانات القاهرة الفنية من الحلو اللي مابيخلصش، مابنلحقش نخلص من النشوة والسعادة اللي سايبهم لنا مهرجان إلا وتلحقنا القاهرة بمهرجان تاني يحافظ على الانبساط عند معدلاته المطلوبة، وده شيء يستحق الشكر والامتنان الحقيقة. على بعد أسبوع بالضبط من النهارده هنكون على معاد مع بدء فعاليات مهرجان القاهرة للجاز (Cairo Jazz Festival) اللي هييجي استكمالًا لسلسلة المهرجانات الموسيقية والغنائية اللي حفلت بيهم الشهور القليلة الماضية، لكن المهرجان ده يختلف عنها جميعًا بطابعه الأكثر عصرية، وجماهيريته الشبابية العريضة. يذكر أن المهرجان بدأ للمرة الأولى سنة 2008، وأن نسخته الحالية هي رقم 8 بعد سبع نسخ سابقة نالت رضا وإعجاب جماهيري كبيرين، وده اللي مهد الطريق لجميع النسخ اللاحقة أنها تضمن جمهورها من قبل بدايتها وبغض النظر عن الأسماء المشاركة. المهرجان هيقام على مدار 3 أيام، ودي فترة قصيرة نسبيًا في عمر المهرجانات، لكن أيامه تم اختيارها بعناية علشان تكون في آخر الأسبوع في وقت الإجازات الرسمية علشان الأمر يسمح بإقامة فعاليات أكتر على مدار كل يوم من أيامه، ويضمن حضور جماهيري أكبر. فعاليات المهرجان السنة دي هيستضيفها الحرم اليوناني –The Greek Campus- في وسط البلد، وهيشارك فيها فنانين مستقلين وفرق غنائية وموسيقية من 13 دولة مختلفة، البحرين هتكون الممثل العربي الأبرز مع حضور فردي للفنانة اللبنانية "تانيا صالح" في يوم الافتتاح، بجانب مصر و 11 دولة أجنبية أخرى، هتبدأ الفعاليات يوم الخميس 20 أكتوبر في تمام السابعة مساءً بحفل "علاء غواص" و "ليكويد" من البحرين على المسرح الرئيسي، وهتستمر الفعاليات لحد يوم السبت 22 أكتوبر وهتختتم بحفل "رباعي كارمن رويفاسيب" من الدانمارك اللي هيبدأ 10:00 مساءً على المسرح الرئيسي. أبرز الأسماء المشاركة في المهرجان هتكون: "حمزة نمرة" وفرقة "HOH" و "شادي القصير" ومجموعته من مصر، ومن البرتغال "كارمن سوزا"، و "أوركسترا أندروميدا ميجا إكسبرس" من ألمانيا، و "علاء غواص" من البحرين، وجميلة لبنان "تانيا صالح". اعرفوا أكتر عن فعاليات المهرجان وتفاصيلها ومواعيدها عن طريق متابعة الفعالية الإلكترونية على فيسبوك من هنا، أو متابعة صفحة المهرجان على فيسبوك من هنا، أو متابعة الموقع الخاص بالمهرجان من هنا.

...

اعرف أكتر عن فعاليات افتتاح مقر معهد جوتة في شكله الجديد
اصدرت في: 10/10/2016

معهد جوتة من الأماكن اللي نقدر نعتبرها قلعة كبيرة من قلاع الثقافة والفن في القاهرة، مش بس علشان الأنشطة المنوعة، إنما كمان علشان كل نشاط من الأنشطة دي –حتى الترفيهي منها- بيكون ليه هدف تثقيفي أو تعليمي مهم، وده يضمن لرواد المكان انبساط مستمر، وفائدة كبيرة في نفس الوقت. معهد جوتة هيفتتح المقر بتاعه في صورته الجديدة في الدقي (17 شارع حسين واصف) خلال أيام، وافتتاح مكان زي ده ماينفعش يعدي من غير ما يتم استغلال الحدث في تقديم وجبة فنية وثقافية دسمة لرواد المعهد ولكل جمهور الفن والثقافة في القاهرة، وده بالفعل اللي تم الترتيب ليه من قبل القائمين على المكان، ونظرة سريعة على شكل وفعاليات الافتتاح هتخليك تحس أنه الأمر أشبه بمهرجان مش مجرد حفل افتتاح عادي. الفعاليات هتبدأ يوم الخميس القادم (13 أكتوبر) وهتستمر على مدار يومين كاملين لحد نهاية الجمعة 14 أكتوبر، وهتتنوع بين عروض أفلام وندوات ومجالس قراءة وحفلات وعروض مسرح وغيرها، بما يحقق الإرضاء المطلوب لشتى الأذواق بين جمهور الفن والثقافة في العاصمة. تقدروا تعرفوا كل اللي هتحتاجوا تعرفوه عن الفعاليات وطبيعتها ومواعيدها وضيوفها وكل المعلومات المهمة الأخرى عن طريق متابعة الجدول المنشور على الموقع الإلكتروني الخاص بالمعهد من هنا، أو متابعة ما ينشر على الفعالية الإلكترونية المنشورة على فيسبوك من هنا.

...

إبداع: مركز ثقافي ومكتبة في وسط البلد
اصدرت في: 07/09/2016

هو مكتبة ومركز ثقافي، اسمه إبداع، فيه كل الأنشطة الثقافية واللي هنتكلم عنها بالتفصيل، وكمان لازم نقول إن إبداع دار نشر وبقى لها فترة طويلة في السوق، فلما دار نشر تقرر تعمل مكتبة ده معناه إنهم عاوزين ينتشروا ويبقوا موجودين في الحياة بشكل كبير، ودي خطوة تحسب لهم، لكن الأول لازم نتكلم عن حاجتين مهمين. الحاجتين الحاجة الأولي سؤال وجودي مرتبط بالثقافة بيقول "هو ليه كل المكتبات والمراكز متجمعة في وسط البلد؟" ويمكن الإجابة على السؤال ده كانت في قعدات المثقفين وحاولوا يجاوبوا عن السؤال ده ويوصلوا لإجابة مختصرها، وسط البلد بقت تجمع للمثقفين والثقافة والناس اتعودت على كده، كمان وسط البلد مركز مهم وكل الناس سهل يوصلوا له. السؤال الثاني بقى إيه هي مواصفات المركز الثقافي؟ قبل ما تعمل مركز ثقافي لازم يكون عندك مجموعة مواصفات مهمة تاخد بالك منها، ومن المواصفات دي إن المكان يكون كبير وواسع وتهويته حلوة، موقعه متميز، قريب من المترو والمواصلات قدر الإمكان، فيه مكان قريب لركنة العربية، ويكون دور أرضي أو أول بالكتير غير كده لأ، علشان الناس مبتحبش السلالم، بتحب تنزل من العربية توصل على طول لمكانها، كمان لما بيبقى دور أرضي على شارع رئيسي ده بيخلي المكان متشاف كويس. إبداع مركز إبداع الثقافي بقى قرر يخبط المواصفات دي، واختار منها إنه يكون قريب من المترو، وهو بالفعل قريب من محطة المترو بشكل كبير، لكنه في الدور الثاني فوق مطهم "بجة" ويمكن ده خلى عدد من الكتاب يتكلموا عن اختيار المكان وإن اللي رايح هناك في الغالب الناس اللي عايزة تاكل مش اللي عايزة تقرأ، لكن لما دخلنا المكان لاقيناه مكان جيد وفيه عرض لعدد كبير من الكتب، وبيحاول كمان يعمل مهرجانات وأشكال جديدة للدعاية عن طريق الخصومات اللي وصلت لحد 50% لمجموعة كتب..كمان بيعملوا ورش عمل وجلسات قراءة، ويمكن حفلات التوقيع أكثر حاجة بقت تميز المكان هناك، علشان بتتعمل مجانًا وده خلى فيه ناس تقرر تروح تعمل حفلات التوقيع هناك، وكمان عاملين نادى إبداع للقراءة، وكل ده بيتم جوه المكان وهو مش واسع قوي، لكنه محاولة جيدة لنشر الثقافة في زمن بقى صعب يعترف بها.

...

يحكى أنّ: علم أطفالك بحدوتة جميلة
اصدرت في: 05/09/2016

يحكى أنّ ... أنّ إيه ؟ أن من سنين في راجل حب يخلي ابنه صاحب التسع سنوات يحب القراءة، فأول كتاب أهداه إليه هو كتاب لتوفيق الحكيم صاحب الأسلوب الأدبي العميق وأحد روّاد الكتابة المسرحية اللي سُمّي التيار بتاعها بالمسرح الذهني لصعوبة تجسيده في العمل المسرحي، فكان التطور الطبيعي هو نفور الابن من القراءة لبداية تجربته في القراءة مع محتوى ثقيل وغير مناسب، وتوتة توتة. إنك تحبب الطفل في القراءة، في مجتمع علاقته بالقراءة غير جيدة، وفي جيل أثرت عليه التكنولوجيا بشكل كبير وأصبحت تاخد كل وقته واهتمامه، وفي وقت أصبح فيه الكتاب هو رمز للمذاكرة فأصبح مش صديق للطفل، ده شئ صعب ومحتاج فن، وفي زحمة وقت الأهالي أصبح ده صعب وحتى لو عملوا كده مابيكونش في وقت يتأكدوا فيه من محتوى الكتاب اللي الطفل بيقراه، وده مش كويس لأن الكتاب أحد مصادر المعلومات المهمة للطفل وبيثق فيها فلو كان محتواه غير مناسب عمريًا أو فكريًا ده بيأثر على بناء الأساست العقلية للطفل. وده ببساطة اللي هيساعدك فيه فريق عمل "يحكى أن". يحكى أن هي تعتبر مكتبة متخصصة لكتب الأطفال، وبتعتبر هي مكان مناسب يقدر فيه الطفل أنه يبحث عن كتب للقراءة، لكن اللي بيميّز المكان أن الكتب دي مختارة بعناية شديدة وبيتأكد الفريق اللي بيشتغل في يحكى أن من ملائمة محتواها تماماً لطفلك. هدف يحكى أن بشكل أساسي هو تحفيز الأطفال على القراءة، وتحسين علاقتهم بالكتاب، وبالقراءة، وده بيتم من خلال مدربّين معتمدين، وحكائين متخصصين، وناس لهم خبرة سابقة في مجال الأطفال والتعامل معهم، ده غير الأنشطة المختلفة اللي بتتعمل للأطفال في المكان وبتنمي مهاراتهم، منها حاجات ليها علاقة مباشر بالقراءة زي؛ الحكي، تذوق الكتاب، قصة في أغنية وده بيبقى ممتع للطفل لأنه بيشغل فيه كل حواسه، بيرقص وبيسمع و بيفكر وبيحكي، وكمان مسرح عرايس. ده غير الأنشطة الإضافية زي اليوجا، والرسم، والطبخ، والعلوم، والزراعة، ودي أنشطة اختيارية، والأنشطة دي بتتم في ورش عمل بتنظمها "يحكى أن" للأطفال، بتستمر الورشة لمدة يومين وبتتنظم مواعيدها على حسب المشتركين فيها. وبالفعل حضرنا ورشة من الورش مع يحكى أنّ، ولقينا إن أجمل حاجة بتميّز الورشة بعد أنها مكثفة ومفيدة وممتعة للكبير قبل الطفل -بالرغم من ان المكان بيستهدف الأطفال- هي المعاملة الجميلة واللي فيها قدر كبير من الرُقيّ والنضج -والأهم- الخبرة، من المدربين للأطفال، وده اللي بيخلّي المكان دهفعلياً آمن للطفل. يحكى أن بيستهدف فئة عمرية معينة وهي من 3 إلى 12 سنة، وده لأنهم بيشوفوا إن الطفل بيبدأ يدرك الكتاب ويتعامل معاه من سن 3 سنين، وده وقت مناسب جدًا أنك تبدأ تعوّد فيه طفلك أنه يصاحب الكتاب، بل إن في دراسات حديثة أصبحت بتنصح الأم أنها تقرأ للطفل وتحكي له، وتسمعه مزيكا من وهو في بطنها! أما سن 12 سنة فده لأنه بعد كدا بيبدأ الطفل يدخل على مرحلة مختلفة وبالتالي محتوى ونوعية الكتب اللي بتلفته وبتفيده بتختلف عن المرحلة السابقة. يحكى أن كيان مرن ومتنقل، وبالتالي هتلاقيهم بينزلوا في معارض الكتب وبيعملوا ورش بالتعاون مع حضانات للأطفال ده غير مقرهم الأساسي في 4 - عمارات رابعة الاستثمارية، أول عباس – مدينة نصر. وأكيد لو تواصلت معاهم تقدر تعرف تفاصيل أكتر بكتير عن الكيان وعن الورش الجديدة اللي بينظموها، وده من خلال صفحتهم على فيس بوك ( يُحكى أنّ yo7ka_Anna )، أو البريد الإلكتروني Booking@yo7ka-anna.com أو رقم التليفون 01067298513 .

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن