مكان للسهر القاهرة بالليل in وسط البلد Cairo, Egypt

القاهرة بالليل

أفتر إيت: مدخنة وسط البلد!
اصدرت في: 05/04/2011

هـ تلاقيه مستخبي في آخر ممرضيق من ممرات شارع قصر النيل الجانبية، من أهم وأشهر النوادي الليلية في القاهرة. وزي عادة الأماكن دي في أغلب الأحيان هـ تلاقي الدخان والزحمة هما السمة الأبرز في المكان. بس في «أفتر ايت - After Eight» الزحمة لا تطاق والزباين نفسهم خليط من الناس غريب شوية! المكان ده من النوع إللي يا تحبه يا تكرهه، مفيش وسط! وده بـ يفرق من شخص للتاني. ممر الدخول مخيف شوية يحسسك إنك داخل زنزانة من كتر ما هو ضلمة وكئيب. العاملين على الباب مش بـ يدخلوا أي حد، وبـ يدققوا في نوعية الزباين اللي داخلة، وفي الغالب بـ يدخلوا «كوبل» بس. وللأسف لما تدخل جوة هـ تعرف أن التدقيق ده مش جايب نتيجة قوي. عشان تعرف تدخل لازم هـ تزاحم، وتعافر على ما توصل لمكان تقعد فيه! ويا سلام لو عاوز تطلب حاجة تشربها، معاناة. الـ«Minimum Charge» (الحد الأدني للطلب) 100 جنيه طول أيام الأسبوع، ولازم تدفع إنشالله تكون داخل تسلم على واحد صاحبك وخارج تاني! الويترز هناك مركزيين قوي مين دخل ودخل لمين ودفع ولا لأ. أول ما تدخل هـ تلاقي ممر الحيطان بتاعته غامقة وآخره ستاير كبيرة متعلقة بـ تدخلك على مكان الرقص، الـ«دانس فلور - Dance Floor». كان عندنا إحساس وإحنا جوة ان في حاجة تخض هـ تحصل، عفاريت هـ تطلعلنا مثلاً، من كتر ما المكان مدفون تحت الأرض وعامل زي الزنزانة! لو انت غاوي رعب وغموض ممكن تستمتع بالجو ده! رغم أن المكان المنيو بتاعه حلو قوي، إلا أن الزباين بـ يروحوا مخصوص عشان المزيكا والرقص. لو رايح مع مجموعة كبيرة هـ تحتاج تحجز قبليها، وهـ يبقى صعب انك تلاقي مكان على الترابيزات اللي حوالين الـ«دانس فلور» أو تستمتع بالمزيكا من قريب عشان المنطقة دي على طول زحمة. فيه فرق موسيقية بـ تلعب بشكل منتظم هناك زي "سلالم" و"صحرا" و"وسط البلد" طبعاً. "وسط البلد" كانوا بـ يلعبوا على طول هناك قبل ما يتشهروا قوي، بس لسه بـ يلعبوا كل يوم اتنين والمكان بـ يكون مليان على الآخر، وبـ يكون في فقرة كاريوكي كل يوم سبت ولو حابب تعرف الجدول الإسبوعي لـ«أفتر ايت» ادخل على الجروب الخاص بيهم على الفيس بوك.

...

تاماراي: ملجأ أرستقراطيي القاهري بتوع الزمان ده
اصدرت في: 05/04/2011

من ساعة ما شرف الساحة بإفتتاحه في أوائل 2009، «تاماراي» عِرف يحُط نفسه في مكانة أعلى من أرقى وأحسن الأماكن اللي بـ تروحها النخبة في مصر. وبعد حوالي سنتين، النهارده أصبح المكان المفضل لكتير من الفنانين ورجال الأعمال المشاهير. «تاماراي» في الدور التالت في البرج الشمالي من أبراج «نايل سيتي – Nile City Towers» (أبراج ساويرس). وبالرغم من إنه في الدور التالت إلا إن منظر النيل الساحرمن فوق يديك إحساس إنه عالي قوي! ده بالإضافة لتراس رائع، فيه مساحة كبيرة للرقص. وبالنسبة لمكان سُمعته إنه المكان اللي تروحة لو عاوز تشوف "عُلية القوم"، مكان كله VIP من العيار التقيل، راحه «عمرو دياب»، «نيكول سابا» و«هيفا وهبي» وغيرهم، إلا إننا عرفنا نقضي فيه وقت إسترخاء لذيذ، زي أي مكان رائع وبعيد عن الأضواء. ودي حاجة تحسب له. وبالرغم من الديكور اللي مايتقلش عليه أقل من وهمي، بالخشب اللي واخد شكل عشوائي فني، والحيطة اللي تحسسك إنها جرانيت خام من معبد فرعوني، المكان قعدته مريحة جداً، هـ تلاقي كنب مريح بمخدات حرير. والتيمة الدهبي في الديكور وإضاءة السبوتات الهادية بـ تدي جو رومانسي وخلاب. ومكان ترابيزات العشاء التقليدية فيه ترابيزات عالية وبار ماهوجني أنيق. أما المنيو اللي عامله الشيف الفرنسي «جيمي هيرتبيز» فهو زي الديكور كلاسيكي على حق فيه لمسة مختلفة مخلياه مميز جداً. المقبلات بـ تبدأ من سلطات خضرا متطعمة بالصنوبر، وشرايح التفاح أو اللحم البقري الصغيرة، وبـ توصل لسبرنج رول الخضار اللي بـ يدوب في الفم. ومن الوجبات الرئيسية الـ«فيليه منيون» اللي كان لذيذ ورقيق ونزل معاه الـ«سوتيه» التمام وبطاطس مهروسة منحوتة بشكل فني جميل. الخدمة في المكان مضيافة وممتازة (مافيش الإهتمام الزايد الخانق). وكالمتوقع من مكان زي ده، الأسعار عالية، وفي الويكإند فيه حد أدنى للطلب 250 جنيه للفرد. ده غير إن الحجز ضروري جداً طبعاً.

...

لو بيسترو ﭘَب: مكان هادي وسط البلد
اصدرت في: 05/04/2011

إتكعبلنا بالصدفة في مكان جديد في وسط البلد، إسمه «لو بيسترو ﭘَب – Le Bistro Pub». المكان ده إختيار رائع على سبيل التغيير لو كنت متعود تروح «الحرية» أو «النادي اليوناني». بس إوعى تفهمنا غلط، إحنا أكيد بـ نحب الأماكن دي، بس من وقت للتاني بـ تبقى محتاج مكان جوّْه أهدى شوية تاخد فيه مشروب على رواقة. جنب مطعم «لو بيسترو» في شارع «هدى شعراوي» وعلى الناصية اللي بعد «الحرية» هـ تلاقي «لو بيسترو ﭘَب»، هـ تلاقيه مبنى حواليه سور إسود وبسلالم بـ تنزلك للپَب. الديكور من جوة مودرن وألوانه بين الأحمر والرمادي. الإضاءة هادية ومريحة وبـ تدي المكان جو حميمي. القعدة عبارة عن كنب مريح، كل كنبتين بينهم ترابيزة، ده غير الترابيزات العالية المحشورة في مساحات ضيقة. وقت ما كاتب المقال ده كان هناك كان فيه ماتش كورة شغال في التليفزيون وكان واضح أن العاملين في المكان كانوا مستمتعين بالماتش أكتر من أي حاجة تانية، بس وقت ما قررنا نطلب ما حصلش إنهم أظهروا أي ضيق بالعكس كانوا متعاونين ولطاف جداً (للأسف في مصر ده مابقاش أمر طبيعي!). وعشان مطعم «لو بيسترو» جنب الپَب على طول فـ ممكن تطلب أي حاجة من منيو المطعم وانت في الپَب، بس إحنا قررنا نطلب طبق مقبلات صغير وبس. المنيو كان فيه أطباق مقبلات زي «بروشيتا بالفراخ» (البروشيتا عبارة عن عيش محمص بالثوم وزيت الزيتون وأحياناً بـ يتضاف عليه طماطم وفلفل)، وده بـ16 جنيه، وسمك مقلي بنفس السعر، ومزَّات الجبنة والطماطم برضه بـ16 جنيه. إحنا إستقرينا على طبق السلمون المدخن وده بـ28 جنيه و بـ يجي على الوش قطعة عيش توست عليها نبات الكبر(Capers) وقطع البصل والبيض والطماطم. كمية السلمون كانت معقولة بالنسبة للسعر وكان طعمه طازة لحد كبير، بس بعض أجزاء منه كانت تقريباً لسه متجمدة. فيه كمان مجموعة فريدة من الكوكتيلات الغير كحولية زي «ميامي ﭭايس - Miami Vice» و ده عبارة عن موز وليمون ونعناع وسعره 18 جنيه ونص . الفاتورة هـ تيجي بـ 5 جنيه زيادة للفرد للـ"كوڤر – Cover" (وأحياناً بـ يكون المقصود به العيش والزبدة اللي بتـ تقدم قبل الأكل وبـ يضاف برضه في غيابهم في بعض الأماكن). بس مفيش حد أدنى للطلبات (Minimum Charge). في جميع الأحوال، المكان ممتاز لخروجة مختلفة بعد الضهر في وسط البلد. روح «لو بيسترو» لو عايز قعدة هادية تعرف تدردش مع أصحابك فيها بهدوء.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن