شرقي مطاعم in مدينة نصر Cairo, Egypt

مطاعم

موتيارا: أكل ماليزى بجد فى مدينة نصر
اصدرت في: 18/09/2013

كل ما يحصل توسع فى نطاق مطاعم القاهرة، كل ما اختياراتنا من الأكل بـ تزيد غرابتها. الاختيارات دى بـ تشمل وصفات أكل من جميع أنحاء المعمورة، والنهاردة بـ نقدم لكم "موتيارا - Mutiara" فى مدينة نصر وهو مطعم بـ يقدم أكلات ماليزية أصلية، بتشكيلة كبيرة من الوصفات الماليزية. وسط منطقة هادئة من مناطق مدينة نصر، المطعم الشبيه بالكافيتريات الشعبية غير مبهر أو متكلف. مع ترابيزة واحدة فى الخارج، وثلاثة كمان فى الداخل، تشعر من الوهلة الأولى أن المكان على قد حاله. على العموم، بعد ما تفوت الحوائط البلاطية، الترابيزات المعدن والكراسى البلاستيك المتسخة، أجلنا تحفظاتنا مؤقتًا بسبب رائحة التوابل الجميلة المنتشرة فى المكان. وصلنا لجرسون ماليزى مهذب جدًا، بـ يتكلم عربى مكسر بس مفهوم، ورغم أن التواصل كان سهل، تغيير طلبنا فى آخر لحظة كان صعب شوية. المنيو واضحة وضوح الشمس، مكونة من تشكيلة من الشوربة (6 جنيه) ومجموعة متنوعة من أطباق اللحوم والخضروات، وكلهم بأسعار أقل من 15 جنيه. كل طبق معاه طلب جانبى من الأرز الأبيض، الأصفر أو الأحمر. عندهم كوكتيل عصير طازج (6 جنيه) عبارة عن مزيج من البرتقال، موز، فراولة ومانجو، بجانب المعتاد من المشروبات الغازية. طلبنا طبق موتيارا ميكسد تشيكن وطبق لحمة (26 جنيه) بدون الإضافات الاختيارية من السى فوود أو السبيط، مع شوربة Tomyom باللحمة (6 جنيه). سوء فهم بسيط وقت ما طلبنا تسبب فى طلب إضافى زيادة من شوربة غامضة. الأكل وصل بسرعة البرق، وده يثبت كفاءة المطعم الشديدة. شوربة Tomyom كانت عبارة عن مرقة بالليمون، معاها مكعبات لحم لذيذة، شرائح طماطم، خضروات مع لسعة شطشطة معقولة. الشوربة الزيادة كانت بنفس المذاق، والفرق أنها مسبكة وينقصها قطع اللحم والخضروات. طبق موتيارا المخصوص كان طبق كبير لذيذ من الأرز الأصفر عليه لحم وفراخ على الطريقة الماليزية، بـ يقدم معاه بيض مقلى. الكارى كان لذيذ ومش تقليدي، يجمع بين النكهة المميزة، التوابل مع القوام المتماسك. صحيح شكله غريب شوية، بس موتيارا بـ يقدم أطباق ماليزية فريدة بأسعار قليلة بشكل مش طبيعى. مع أكل ممتاز، مع خدمة الموظفين الرائعة، أكيد صعب تشتكى من حاجة ثانية.

...

العودة : مطعم فلسطيني في مدينة نصر
اصدرت في: 18/04/2013

أنكم تحصلوا على أطباق فلسطينية في القاهرة ده مش شيء سهل لكن مطعم العودة -من إدارة عائلة من غزة- بـ يقدم الأطباق المميزة لفلسطين مع اهتمام جامد بالتفاصيل والخدمة الكريمة. في شارع هادئ في مدينة نصر هـ تلاقوا مطعم "العودة" في مكان أنيق وساحة خارجية خضراء نظيفة ولوجو عليه مسجد قبة الصخرة في القدس، فيه مجموعة ترابيزات في الداخل لكن المساحة الخارجية أكبر وفيها نصف دستة ترابيزات بعيد شوية عن بعض وبعيد عن الشارع الشيء اللي يحسسكم بالراحة والخصوصية، زي ما قولنا لكم الشارع هادئ ومافيهوش حركة كثيرة. كنا جايين علشان ساندويتشات الفلافل (1.50 جنيه) المعمول على الطريقة الشامية بالحمص بدل حبوب الفول في الطريقة المصرية، لكن طلبنا مجموعة متنوعة من الأطباق اللي ما قدرناش نقاومها. " تكرم عينك" ده اللي قاله لنا الجرسون بعد ما أخذنا الطلب. ساندويتش الفلافل كان محمص وأخف من الطعمية المصرية، ساندويتشات السوسيس (3 جنيه) معمولة من لحم مفروم ناعم لدرجة أنها بـ تذوب في الفم وسمبوسك السبانخ (2.50 جنيه) كانت مقرمشة من الخارج والحشو جواها بـ يشد. كان فيه اختيارات ثانية فى المنيو زي اللحم المفروم وسمبوسك الجبنة والأوريجانو سعر كل واحدة 3 جنيه. الأطباق الجانبية في منيو مطعم "العودة" هم النجوم أكثر منهم كطلبات جانبية، السلاطة الخضراء اللي عبارة عن كمية متواضعة من الطماطم والخيار والبصل الأخضر كانت رائعة، صوص الـ Vinaigrette كان فيه جرعة كبيرة من الثوم أعطت طعم طازج للخضروات. سلاطة الحمص الكويسة مش سهل تلاقيها وبـ نبقى مضطرين يا إما نشتريها من السوبر ماركت أو نعملها في البيت لكننا طلبنا تشكيلتين مختلفتين علشان نأكلهم مع خبز البيتا (مخبوز خارج المطعم) علشان ترضي رغبتنا، 7 جنيه لكل تشكيلة، الحمص العادي كان ناعم ولذيذ مع رشة زيت زيتون في الوقت اللي كان الحمص المسبح أصغر وطعمه قوي. بعد الوجبة كنا يا دوبك قادرين نتحرك بس كان لازم نقوم على أي حال علشان نشتري برطمان زيتون سيناوي (بـ يقولوا أن طعمه قريب قوي من الزيتون الفلسطيني الشهير)، الخضار المخلل كان متاح برضه في المطبخ النظيف اللي بـ يلمع، الأسعار بـ تبدأ من 5 جنيه للخضار المخلل إلى 40 جنيه بالنسبة للباذنجان المحشي بالمكسرات أو المكدوس. "العودة" تم تسميته نسبة لمبدأ العود للاجئين الفلسطينيين لوطنهم المحتل، بالرغم أن ده ممكن يكون حلم لكثير من الناس إلا أن المطعم الصغير ده في القاهرة بـ يعطي الفرصة للاجئين أنهم يفتكروا شوية الطعم المفضل لهم وكمان يقدموا للمصريين مطبخ طعمه مميز.

...

طبلية: مطعم مغمور خاص بجنينة مول في مدينة نصر
اصدرت في: 06/03/2013

تخيل أن مركز جنينة مول التجاري الشهير له مطعم خاص به؟ مطعم في الدور الأول أمام المدخل الرئيسي مباشرة، اسمه «طبلية» ومكتوب تحت اسمه بخط صغير "المطعم الشرقي". يعني ده المطعم الخاص بالمول وفتح معاه من حوالي 14 سنة، طيب يا ترى حد راح المكان ده قبل كده؟ ولا الناس كلها بـ تروح هناك وتطلع في الأسانسير مباشرة على الدور الثالث اللي فيه الفوود كورت علشان تقعد في «سبكترا» أو تأكل في «كوك دور»؟ إحنا بصراحة كنا بـ نعمل كده لحد ما لمحنا المحل ومدخله الأنيق في الدور الأول وقررنا نستكشفه أكثر. بجانب باب المطعم هـ تلاقي المنيو محطوط على ستاند علشان تقرر أنت ممكن تأكل هنا ولا لأ. أكلات شرقية مصرية هي المسيطرة على المنيو، وبعض المشويات والساندويتشات. دخلنا من البوابة الصغيرة للمطعم لكن فوجئنا أن المكان كبير من الداخل وفيه صالة طعام أشبه بتراس طويل وفيه دور علوي ملحق بالمطعم. ديكورات المكان كلاسيكية لأقصى درجة، والإضاءات بسيطة والترابيزات مغطاة بالمفارش القماشية التقليدية، والموظفين لابسين ملابس رسمية. جو قديم شوية بس الرقي والهدوء بـ يبقى مطلوب أحيانًا، شكل المكان لائق على المنيو بتاعه جدًا، والهدوء اللي هنا هـ ينسيك أنك في المول أصلًا. وأكثر حاجة عجبتنا في شكل المكان التابلوهات والأعمال الفنية المعلقة على الجدران، أعمال مقلدة لفنانين مصريين معروفين وكلها من صميم البيئة والمجتمع المصري، كانت تسليتنا الوحيدة أثناء فترة انتظار الأكل اللي طولت شوية.لازم تجرب المقبلات الشرقية في مكان زي ده، طبق فيه وحدات من السمبوسك والسبرنج رولز والممبار وورق العنب (15 جنيه) كان المذاق فيه أكثر من رائع خاصة الرولز والسمبوسك، لكن ورق العنب كان واضح أنه بارد ومتسخن، لكن البداية مبشرة والشيف هنا ما بـ يهزرش. بوفيه السلاطات (16 جنيه) فيه كل أنواع السلاطات الشرقي بالإضافة للكول سلو، كله فريش وعجبنا شرائح المشروم المقطعة مع الطماطم والبصل. رغم زحمة الأطباق الرئيسية والطواجن والكباب والحمام والملوخية بالأرانب، حسينا أننا مش عاوزين نغامر بأكلات ممكن ما تتعملش بالإتقان الكافي لو مطعم مش متخصص أو مغمور نسبيًا. طلبنا بيف فيليه بصوص الريكفورد مع البطاطس والسوتيه (67 جنيه) ودجاج مطهي بتوابل الماسالا الهندية مع الأرز بالخلطة (55 جنيه) وعجبنا فكرة أن فيه أكلات هندية في المنيو، باعتبارها "شرقية" برضه، وعجبنا أكثر أنها اتعملت بحرفية شديدة، وعجبنا جدًا طبق الدجاج بصلصة الطماطم مع توابل الماسالا وشرائح البطاطس والجزر والبصل، وقطع الدجاج فيه كثيرة لكن مش مخلية، فيها أجزاء من العظم. الصوص مش حار لكن مذاقه فريد، لو حطيته على الأرز الغني بالمكسرات وشرائح جوز الهند هـ تستمع بالوجبة وهـ تتفاجئ من مستوى الشيفات هنا. طبق الستيك فيليه كان مخدوم كويس والسوتيه عندهم رهيب، لكن اللحم كان بـ يشد شوية، وهم ما تأخروش لما طلبنا منهم تسوية زيادة للحم لكن برضه النتيجة ما تغيرتش وده لأن اللحم ما كانش فريش كفاية. طبق أم علي (14 جنيه) هنا حكاية، هـ تخلصه وتطلب واحد كمان "علشان حجمه صغير"، وطلبنا عصير مانجو بجوز الهند "مانجو كولادا" (18 جنيه) لكن جاء لنا سموزي مانجو باللبن، سجلنا ملاحظتنا عند الجرسون المهذب، لكن ما طلبناش تصحيح الطلب واكتفينا بوجبتنا اللذيذة والتحلية الأحلى في «طبلية» وبدأنا نستعد للرحيل.الخدمة جيدة ومحترفة، بطيئة شوية لأن العمال قليلين، والإقبال كمان قليل لأن الدعاية والتسويق للمكان شبه معدومة، ما حدش يعرف المطعم ولا سمع عنه لا من خلال إعلانات ولا مطبوعات ولا من صفحات التواصل الاجتماعي، رغم أن مطبخه متميز فعلًا وأكلاته خطيرة، صحيح الأسعار مش قليلة، لكن بالتأكيد أفضل من اللي بنفس مستواه خارج المولات. تجربتنا كانت جيدة في «طبلية» والمرة جاية هـ نجرب المشويات بعد ما اطمأنينا على المستوى.

...

كمُنَّة: مشويات من مراعي صحراوية في مدينة نصر
اصدرت في: 23/09/2012

اللي راح مرسى مطروح أكيد عرف «كمُنَّة» أحسن محل مشويات وأكلات شرقية في المدينة الساحلية الجميلة، واللي مش بـ يبقى فيه موضع لقدم في موسم المصايف. الجديد هنا أن المطعم ده بقاله أكثر من 50 سنة في مرسى مطروح بفرعه الرئيسي، وفتح أول فرع له خارج مطروح من 3 شهور تقريبًا في القاهرة. كسر غير عادي للقاعدة اللي بـ تخلي المطاعم تحقق نجاحها وشهرتها في العاصمة وبعدين تفتح فروعها في المحافظات. لكن لأن «كمُنَّة» مطعم غير عادي، كان لازم يكون غير عادي في خطوات انتشاره كمان.الأول لازم ننوه على موضوع الاسم، النطق الصح للاسم زي التشكيل اللي عليه بالضبط، وهو مكتوب كده على المنيوهات وعلى المحل من بره علشان ما يبقاش فيه مجال للخبطة، بضم الميم وتشديد النون، يعني مش "كمونة" ولا "كمنة" زي ما الناس بـ تقول. وده جزء من مهمتنا التثقيفية في كايرو 360. إيه المميز في «كَمُنَّة»؟ بعيدًا عن التصميم الشيك والفني جدًا للمحل من الخارج والداخل، والـ 3 طوابق اللي ممكن تقعد فيهم، والديكور الوهمي والكراسي المريحة القريبة من الأرض علشان تفكرنا بالقعدة العربي الموجودة في مطروح لكن بشكل عصري، وبعيدًا عن البراح والخصوصية اللي هـ تحس بهم داخل المكان؛ «كَمُنَّة» بـ يقدم مشاوي من لحم الخرفان الجبلية من مراعيهم في مطروح اللي بـ تتغذى على العشب فقط، يعني مكونات عضوية وصحية، وطعم خرافي للحم بعد التسوية. غير كده كل الأكل البيتي والشرقي هـ تلاقيه هنا، ملوخية بالأرانب وبط وحمام وممبار وطواجن بامية ومسقعة وبسلة ومكرونة بالبشاميل ومحاشي وكل أنواع الشوربات والسلاطات. أخذنا مكان جميل في دور علوي علشان نتفرج على الشارع من الخارج، بدأنا نتفرج على المنيو الغني بالأصناف على عكس الموجود في فرع مطروح اللي أصنافه محدودة شوية. ما ينفعش تيجي هنا وما تطلبش مشويات، وبما أننا كنا جربنا الكباب قبل كده "وبـ نقول لكم أنه تحفة" جربنا المرة دي الكفتة المشوية (130 جنيه للكيلو) والسجق الضاني المشوي (135 جنيه للكيلو) وطبق الحمام المحشي بالأرز (28 جنيه للفردة) علشان ما كانش فيه فريك وقت زيارتنا. السلاطات هنا بـ تنزل شبه مجانية، بـ يضاف 5 جنيه للفرد Cover وسلاطات. كان لازم نسخن بطبق الشوربة المغربي (10 جنيه) اللي فيها لسان عصفور وشبت وكسبرة وصلصة طماطم وقطع لحم ضاني مفتتة، دي وجبة في حد ذاتها وطعمها لذيذ بس دسمة شوية. الطلب مش بـ يتأخر خالص، 10 دقائق تقريبًا كان الأكل كله أمامنا، رغم أن المكان كان مزدحم نسبيًا. سلاطات طحينة وبطاطس بالمايونيز وزبادي وطماطم مخللة وسلاطة بلدي، كلهم أحلى من بعض، بس ركز على الطماطم المخللة دي، وبعدهم الشوربة العجيبة، ثم طبق الحمام المفروش بالأرز المحمر وبعدين السجق الضاني الرفيع والمشوي بطريقة سحرية مش زي أي مكان ثاني، وتتبيلته مالهاش حل. الكفتة كمان فيها مزازة جميلة ولحمها طعمه مميز وكان متماسك جدًا بعد الشواء. الحمام كان شكله صغير قوي في الطبق، لكن الطعم الخيالي خلانا ننسى حجمه. فيه كمية توابل وأعشاب وبهارات غير عادية، وكان فريش ونظيف وأحسن من أي مكان ثاني مشهور بالحمام في القاهرة. بجد هـ تأكل صوابعك وراه. كان نفسنا نجرب الطواجن (30 جنيه) أو البط مع الأرز بالخلطة (60 جنيه) أو الكباب الشمبري أو الفلتو الكندوز المشهور به المحل (160 جنيه للكيلو) لكن مافيش مكان لكل ده. بس حبينا نعطي لكم فكرة عن الأصناف والأسعار. جرب أم علي (14 جنيه) بعد الأكل زي ما إحنا عملنا، أو عصير فريش (10 جنيه)، المانجو على سبيل المثال كان كأنك بـ تأكل ثمرات مانجو مقطعة في كأس عملاق، بجد روعة. الخدمة مهذبة وودوة جدًا مافيش عليها أي ملاحظات، دائمًا هـ تلاقي حد من الموظفين قريب منك وأحلامك في ثانية هـ تبقى أوامر، ومدير المحل شخصيًا بـ يمر ويسأل ضيوفه إذا كانت كل حاجة تمام، وحسينا قد إيه هو فخور بمراعيهم الصحراوية وطريقة التسوية الخاصة بالمحل العريق وهو بـ يعطى لنا فكرة عن طبيعة مطبخ «كَمُنَّة» المتميز.سعداء بوجود «كَمُنَّة» في القاهرة وبـ نوجه رسالة تحذير لكل كبابجية العاصمة، جاء لكم اللي ما بـ يرحمش، بس المهم أن المنافسة الشرسة اللي ما بينكم دائمًا في صالحنا كـ "أكّيلة".

...

الخان: مطعم وكافيه بطابع شرقي في مدينة نصر
اصدرت في: 16/05/2012

مش عارفين إمتى ممكن نقول أننا خلاص غطينا كل محلات ومطاعم شارع عباس العقاد بمقالات نقدية في كايرو 360 لأن الحقيقة كل مرة نعدي فيها من هناك بـ نكتشف أماكن جديدة لسه فاتحة أو بقالها فترة جديدة وإحنا ما أخذناش بالنا منها، ده غير المحلات اللي بـ تغير نشاطاتها وبالتالي بـ تغير أسمائها، وكثير بـ نعتمد على أصدقائنا اللي ساكنين هناك علشان يقولوا لنا لو فيه مكان جديد فتح وإحنا مش كاتبين عنه. أمام محل «قويدر» العملاق على الصف المقابل، هـ تلاقي محل واجهته صغيرة اسمه «الخان»، مطعم بـ يقدم مأكولات شرقية وكافية، موجود في الدور الثاني فوق منفذ بيع منتجات مزارع دينا، وله مدخل خاص به من الدور الأرضي، والملفت في المدخل أنك هـ تلاقي على شمالك كاونتر زجاجي معروض عليه إكسسوارات وحلي وأساور زي اللي بـ تباع في خان الخليلي والمناطق الأثرية. ما قدرناش نعرف دي للبيع ولا للعرض فقط لأن ما كانش فيه حد نسأله! الطابق العلوي مساحته كبيرة وله شكل مستطيل والمسافات معقولة بين الترابيزات، والديكور واخد الطابع العربي بالألوان الخشبية والأرابيسك والنقوش الصوفية على الجدران والأسقف، والمكان كله زي ما يكون تراس مغطى بأسقف معلقة، ومافيش جزء مقفول ومكيف لغير المدخنين، كله مسموح فيه بتدخين الشيشة، لكن ممكن تقعد على أطراف التراس اللي بـ تطل على الشارع وهناك مش هـ تحس بأي دخان وهـ تستمتع برؤية الشارع وهـ تبقى شايف برضه شاشات التليفزيون اللي داخل المحل. رغم أن كل حاجة في شكل المكان والديكور بتاعه بـ توحي أنه كافيه أو قهوة وبس، إلا أن المفاجأة لما بصينا في المنيو ولقينا كل أصناف الأكل تقريبًا موجودة من أول الساندويتشات لحد الموزة البتلو والمشويات. سألنا الجرسون عن أصل المحل وطبيعته وقال لنا أنه في البداية كان مطبخ شرقي وبس وبعد فترة استحدث فكرة الشيشة والقعدة العربي وألعاب الطاولة والشطرنج، وده عمل إقبال أكثر على المكان. وعلشان تجرب أحسن حاجة متميزة في مكان أول مرة تروحه، يبقى تبص في المنيو وتطلب كل طبق مكتوب جنب اسمه اسم المحل نفسه، اللي هو هنا "الخان"، يعني ستيك فيليه بصوص الخان وبيتزا الخان (25 جنيه) الخان كوكتيل (20 جنيه) وآيس كريم الخان وهكذا. تقريبًا عملنا كده بس أكيد ما كانش ينفع نجرب كل حاجة. بدأنا بسلاطة السيزر بالدجاج (22 جنيه) وكانت كميتها كبيرة ومعاها صوص كريمة وجبنة رومي مبشورة وطعمها كان هائل. فيليه اللحم بصوص الخان والجمبري مع الأرز الأبيض والخضار السوتيه (65 جنيه) كان مفاجأة بكل المقاييس، لحم بقري بلدي صافي بصوص المسطردة والتوابل العربية (خلطة خاصة بالمكان) مع وحدات جمبري والسوتيه مع حبات الذرة الحلوة والبروكلي، حجم الطبق كبير ومشبع جدًا والسوتيه كان خيالي. نفس المفاجأة السارة كانت في طبق التشيكن مكسيكان (46 جنيه) صدور دجاج محمرة وموضوعة في الصوص الأحمر بالثوم والذرة، خلطة فريدة ما شوفناش زيها في أي حتة. المفاجأة بالنسبة لنا كانت في الصنعة الخطيرة اللي في الأكل رغم أن تخصص المكان المفروض أنه شرقي، يعني التميز بتاعه يكون في الطواجن والمحاشي والمشويات. لكن بعد ما جربنا الأطباق الرئيسية العالمية هنا وطلعت بالروعة دي، مش قادرين نتخيل المطبخ الشرقي هنا هـ يبقى عامل إزاي. فيه بيتزا بأسعار من 23 لـ 32 جنيه، وأطباق أسماك من 58 لـ 85 جنيه وطواجن خضار باللحوم من 20 لـ 34 جنيه وكل أنواع المشهيات الشرقية والغربية، ده بالنسبة للمأكولات. كل المشروبات الساخنة والباردة والعصائر والكوكتيلات موجودة، وفيه حلويات زي أم علي والتشيز كيك والآيس كريم (25 جنيه) اللي جربناه في الآخر وكان مسك الختام بعد الوجبة اللذيذة. والشيشة للي غاوي (مافيش حد قاعد هناك مش بـ يشيش) بأسعار 9 جنيه للعادي، و15 جنيه للفاخر وفيه مكس بـ 22 جنيه. القعدة حلوة قوي في «الخان»، والخدمة شيك وسريعة، الأكل هناك ممتع مش بس مشبع، والمشروبات كلها فريش، والأسعار بـ يضاف عليها 12 % خدمة بس ومافيش ضريبة. معظم الموجودين في المحل وقت زيارتنا كان واضح أنهم زبائن دائمين للمكان، وأكيد ده ما جاش من فراغ؛ «الخان» عرف يربي زبون.

...

ع الخفيف: ساندويتشات كبدة وسجق في مدينة نصر
اصدرت في: 23/04/2012

المطعم حديث نسبيًا، يعنى فاتح من 7 أو 8 شهور، موجود في عمارات الشرق في الشارع اللي فيه الحديقة الدولية المتفرع من عباس العقاد، جنب مطاعم «ماي كوين» و«شاورما الريم» و«وافلشيوس». المنطقة اللي أمام بوابة الحديقة الدولية دي بقت زي مجمع محلات أكلات سريعة، تركن عربيتك وييجي لك الجرسونات من كل محل من صف المحلات الموجود، أو ممكن تتمشى وتنزل تقعد على واحدة من الترابيزات المرصوصة على الأرصفة المقابلة. المهم أنك هـ تأكل أكل ساخن ولذيذ وبأسعار مهاودة. محل «ع الخفيف» اسم على مسمى، المنيو كله عبارة عن ساندويتشات مكوناتها بسيطة من اللحوم والدجاج والجمبري والحلاوة والقشطة والمربى، وفيه سلاطات وبطاطس محمرة وبيبسي علشان لو عاوز تخلي الساندويتش بتاعك كومبو. أخذنا مكاننا على ترابيزة في الشارع وقعدنا نتفرج على المنيو كثير واللي فيه كل الساندويتشات متوفرة بحجمين أو ثلاثة وبأسعار بـ تبدأ من 3 جنيه وآخرها 19 جنيه للساندويتش. وفي الآخر طلبنا من الجرسون يرشح لنا كام ساندويتش جامد من الحاجات الكثير اللي عندهم، ورده كان جاهز طبعًا؛ كبدة ع الخفيف (3 جنيه) هي كبدة مطبوخة بطريقتهم الخاصة، وشاورما البطاطس (4 جنيه) وده اختراع بـ يتم فيه تسوية البطاطس المحمرة على الجريل بالجبنة الموتزاريلا بطريقة ونكهة الشاورما ومش هـ تلاقيها معمولة بالطريقة دي في أي حتة ثانية. وفيه أصابع السجق الشرقي بالجبنة على الجريل (5 جنيه) وده كمان من ابتكارات المكان. وكفتة السيخ المستوية على الجريل (8 جنيه). بالنسبة للساندويتشات المميزة للمكان تقريبًا دي من المرات القليلة اللي نأكل فيها اختراعات من مكان لسه فاتح جديد وتعجبنا بالشكل ده. كبدة ع الخفيف المطبوخة بالبصل والثوم كانت خرافية، وشاورما البطاطس دي اختراع حقيقي، طعمها جديد وفريد والساندويتش مليان على آخره وبـ نقول لكم لازم تجربوه. علشان نجرب معظم الأصناف اللي في المحل طلبنا الحجم الصغير من كل ساندويتش وطلبنا الأصناف التقليدية زي الكبدة الإسكندراني والسجق التركي المفروم والسجق الإسكندراني المدخن (3 جنيه). كل الساندويتشات من العيش الفينو الطازج واللحوم كلها واضح أنها فريش ونظيفة، وبـ نقول الكلام ده لأن ناس كثير بـ تقلق من أكل الكبدة والسجق خاصة في الشارع، وما كانش فيه مخ وقت ما روحنا رغم أنه مكتوب في المنيو. ممكن تضيف 7 جنيه لأي ساندويتش وتخليه كومبو، وفيه سلاطة خضراء وطحينة ومخللات (3 جنيه للعلبة) وفيه طماطم مخللة بالثوم وبطاطس بالبقدونس وباذنجان وفلفل مقلي (4 جنيه العلبة) وإحنا جربنا الطماطم المخللة والبطاطس دول وبـ نقول لكم أن الطماطم تحفة والبطاطس مش قد كده. بعد الأكل ممكن تأخذ لك واحد سكلانس حلاوة على قشطة على مربى أو شوكولاتة نوتيلا بالموز والعسل (5 جنيه) علشان تقفل القفلة التمام. فيه ساندويتشات عادية لو مش عاوز تدخل في قصة الكبدة والسجق، زي البرجر بالبيض والجبنة والشيش طاووق والهوت دوج والشاورما والجمبري البانيه وكبدة الفراخ، وممكن تطلب كبدة ومخ بانيه بالكيلو (100 جنيه للكيلو المشكل). مطعم «ع الخفيف» أكله حلو بس الجرسون تأخر علينا شوية لحد ما جاب لنا طلباتنا، لكن ده ما يمنعش أن الخدمة كانت مرحبة ومحترفة وأننا حبينا المكان وقررنا يبقى من اختياراتنا المعدودة لأكلة خفيفة ورخيصة في آخر الليل.

...

المذاق العراقي: أكلات عراقية وخليجية في مدينة نصر
اصدرت في: 18/10/2011

عندك حل من اثنين علشان تعرف توصل للمطعم ده، تكون بـ تدور أصلًا على مكان بـ يقدم أكل عراقي وتسأل حد ويدلك عليه ويشرح لك هو فين بالضبط، يا إما تكون معدي بالصدفة في الشارع وتشوف اليافطة الكبيرة المميزة للمحل وتقرر أنك تجرب الأكل العراقي لو ما كنتش جربته قبل كده، وده بالظبط اللي حصل معانا. في شارع عبد الله العربي اللي هو امتداد شارع الطيران في الحي السابع بمدينة نصر موجود مطعم «المذاق العراقي» المتخصص في الأكلات العراقية والعربية. المحل مقسم لجزئين: داخلي مقفول وجزء خارجي في المساحة المفتوحة أمام المحل. قعدنا في الجزء المقفول بعيد عن دوشة الشارع العمومي اللي برة، والقعدة كانت هادئة ولطيفة ولاحظنا أن كل الموجودين في المطعم عراقيين (عرفنا من اللهجة المميزة) وأخذنا شوية وقت على ما الجرسون جاب لنا المنيو لأن واضح أن عندهم نقص في العمالة. الديكور من الداخل عبارة عن مطبخ بكل الأرفف اللي على الجدران والأدوات اللي عليها كأنك قاعد بـ تأكل في المطبخ، عجبتنا الفكرة وعجبنا نظافة المكان عمومًا. المنيو عبارة عن وجبات عراقية وأرز ومرق ومشويات ووجبات عربية ومنيو خاص للكبيبة بكل أشكالها ومنيو للسلاطات، وأول ما قعدنا نزل لنا أطباق سلاطة خضراء من غير أي إضافات توابل لأن أمامنا على الترابيزة كان فيه كل أنواع التوابل والزيت والخل علشان نظبطها على حسب رغبتنا، وكمان علشان إضافات الفتة. الوجبات العراقية بـ تعتمد بشكل كبير على الفتة بالعيش والصلصة واللحم الضاني، وشرائح اللحم المحمر أو الشاورمة العراقي لكن دي للأسف ما كانتش موجودة في المنيو. والأرز والمرق هو الأرز البسمتي مع الخضار بالصلصة المسبكة زي البامية أو الكوسة أو الفاصوليا أو الباذنجان أو البطاطس وبـ يكون سعره 20 جنيه، ولو عاوز إضافة لحمة للخضار بـ يبقى بـ 32 جنيه. طلبنا وجبة عبارة عن فتة عيش أبيض مُشرب بالصلصة الحمراء وقطعة لحم ضاني مسلوقة ودي اسمها في المنيو "تشريب اللحم" وسعرها 40 جنيه. دسمة جدًا والدهن في اللحم الضاني أصلًا كثير، وكانت غلطتنا أننا ما طلبناش اللحم مشوي مش مسلوق أو كنا نطلب أوزي اللحم المشوي (48 جنيه). المهم الوجبة كانت معقولة ومشبعة لفرد واحد لكن كانت ناقصة توابل وحسينا أن الموضوع كان مجرد مكونات محطوطة على بعض لكن "النَفَس" مش موجود. نفس المشكلة مع مقلوبة الدجاج بالخضروات والباذنجان (30 جنيه) اللي جالنا معاها طبق بامية (وده كان أحلى حاجة في الأكل) برضه كانت ناقصة توابل وما حسيناش أن فيه اهتمام بالصنعة لكن كان الاهتمام الأكبر بشكل الأطباق والنظافة. وزودنا طلب كبيبة موصلية (25 جنيه) كمشهيات، وهي فيها شبه كبير من الحواوشي ونفس الحجم تقريبًا لكن فيها برغل بالإضافة للحمة المفرومة وكانت لذيذة ومقرمشة، لكن طول الوقت مش قادرين نفكر في حاجة غير أنها حواوشي مش أي حاجة ثانية. فيه كباب وكفتة بتلو وضاني (على فكرة في العراق الكباب هو الكفتة والعكس) وفراخ مشوية وشيش طاووق وكبدة وفتة كوارع ودولمة، والمشويات هنا بـ تتباع بالربع كيلو علشان تكفي فرد واحد وبأسعار بين 25 لـ 40 جنيه. ووجبة الفاهيتا هنا هي أقرب للشاورمة العراقي اللي قلنا عليها لكن مع شوية اختلافات وسعرها 35 جنيه. الوجبات العربية هي البرياني والأوزي بالمكسرات والعرايس (اللي شبه الحواوشي برضه) وفيه سلاطات شامية وعراقية وأي نوع سلاطة بـ 5 جنيه، وتجربتنا بـ تقول أن السلاطات هائلة في المكان. مش عايزين نظلم الأكل العراقي بتجربتنا في المطعم ده، لأن المعروف أن المطبخ العراقي عريق ومميز، جائز أن الصنعة هنا مش مساعدة أنها تطلع الأكل بالشكل الأمثل، لكن في النهاية «المذاق العراقي» مطعم مميز ومطلوب أنه يكون على خريطة مطاعم كايرو ونتمنى أنه يطور من مطبخه علشان يبقى على قمة ترشيحاتنا للمطاعم العراقية اللي فيها ندرة في مصر.

...

أبو أحمد: فطير لذيذ وشهي في مدينة نصر
اصدرت في: 28/09/2011

على قد ما هو بـ يتخن، الفطير المصري الحلو تقدر تعتمد عليه لو محتاج تأكل أكلة مريحة، وطبعًا كل ما كان ملئ بالمكونات الشهية كلما كان أفضل، وعلى الرغم من أنه بـ يقدم أصناف مختلفة من الأطباق إلا أن مطعم «أبو أحمد – Abo Ahmed» في مدينة نصر مشهور على وجه الخصوص بالفطير اللذيذ وأطباق اللحوم المشوية. المحل شكله مناسب أكثر لنظام التيك آواي والديلفري، وده لأنه غالبًا بـ يكون مزدحم بالزبائن المنتظرة طلباتها في المنطقة بالخارج اللي بـ تطل على الشارع الزحمة. خدمة التوصيل عند أبو أحمد هائلة خاصة لو أنت كمان في المناطق المجاورة للمطعم في مدينة نصر. المنيو مدججة بأطباق متنوعة بـ تبدأ من (10 جنيه) ثمن طبق ساندويتش كباب لحد بيتزا السي فوود والأطباق اللي بـ تقدم حسب الطلب، بمعنى أنك ممكن تطلب أي حاجة نفسك فيها حتى لو مش موجودة في المنيو. أسعار البيتزا بـ تبدأ من 15 جنيه للمارجريتا الوسط، وبيتزا التركي المدخن (28 جنيه) هائلة بأطرافها المقرمشة، وممكن تضيف جبنة زيادة بـ 3 جنيه فقط. وعلى الرغم من كل الأصناف دي، أبو أحمد مشهور بالفطير بتاعه، الفطيرة معمولة عنده بمكونات مضبوطة ومحسوبة ومش مزيتة زي باقي محلات الفطير، ناقد الموضوع جرب فطيرة المشروم (19 جنيه) مع إضافة خليط متنوع من الجبنة المالحة والطماطم والزيتون الأسود، الفطير كان مليان حشو لكن الأطراف المقرمشة كانت جافة شوية، فيه أنواع ثانية من الفطير زي فطيرة الدجاج (18 جنيه)، ومحبى الجبنة مع اختيارك من 7 أنواع جبنة متاحة (25 جنيه) وفطيرة المأكولات البحرية (28 جنيه). باقي المنيو فيها بقى أصناف وأنواع اللحوم المشوية والمأكولات البحرية، كيلو الكباب مع العيش والسلطة هـ تكلفك (120 جنيه)، في حين أن طبق الكاليماري والأرز هـ يكلفك فقط (5 جنيه). ولو فيه مكان في بطنك للتحلية ممكن تبص بصة على جزء التحلية في المنيو الخاص بالفطير الحلو، الفطيرة الحلوة المخبوزة مع شوكولاتة سايحة عليها من فوق (14 جنيه) أو فطيرة بغاشة عادية بسكر بودرة (5 جنيه)، لكن البغاشة كان سكرها أقل من اللي كان متوقع. أبو أحمد عنده تشكيلة كبيرة من الأكل المصري التقليدي على الرغم من من مساحته الصغيرة والشارع الزحمة اللي بـ يطل عليه. ولكن طعامة المنتجات المخبوزة بالزبدة عنده مش طبيعية، وبـ ننصح لو أنت عامل ريجيم المكان ده مش مناسب بسبب الكيلوجرامات اللي ممكن تزيدها هناك من زيارة واحدة.

...

العودة: فول شرقي على أفضل ما يكون!
اصدرت في: 18/06/2011

«العودة» معروف من زمان انه أحسن بديل لسكان مدينة نصر لمحل الفول الشرقي «أبو رياض» اللي في مصر الجديدة. والسر المعروف لكل سكان مدينة نصر - اللي هو أكبر حي في القاهرة - ان في شهر رمضان الفول بتاعهم لا يُعلى عليه، وخصوصاً فول القدسية، والضغط بـ يبقى جامد قوي والناس دايماً بـ تاكل الفول على السحور بكميات كبيرة. بعيد بقى عن شهر رمضان مطعم «العودة» بـ يقدم أحلى الأكلات اللي ممكن تاكلها في القاهرة. وللي مش عارف، فول القدسية ده عبارة عن خليط من الفول المصري المِدَمِس، الحمص السوري و الدُقة. بـ تبقى وجبة ماتتفوتش، وهي معاها البطاطس المحمرة، السلطة الخضراء، البيض الأومليت، العيش الشامي، والطعمية اللي معمولة من الحمص (على عكس الطعمية المصرية اللي بـ تتعمل من الفول). الفطير هناك برضه كويس قوي، بس احنا بقالنا سنين بـ نروح وتقريباً عمرنا ما شُفنا حد بـ يطلبه، طبعاً لان أغلب الناس بـ تروح «العودة» عشان الفول بتاعه. فى رمضان، الزحمة بـ تبتدي أول ما ييجي نص الليل عشان السحور. بعد كده هـ يبقى صعب جداً إنك تلاقي ترابيزة فاضية. القعدة كلها أول عن آخر عبارة عن شوية ترابيزات پلاستيك على الرصيف اللي قدام المحل، والويترز بـ يحاولوا على قد ما يقدروا إنهم ينَزِلوا الطلبات في أسرع وقت. بس عشان تلفت نظر الويتر لانك محتاج منه حاجة هـ تاخد شوية وقت، بس لمّا بـ ياخد طلبك بـ يجيبوه مظبوط. أيوه هو مجرد محل فول، وأيوه القعدة بتاعته على الرصيف، بس مفيش مشكلة ان البنات يقعدوا فيه. وبـ يبقى أحلى عامةً لو رحته مع شِلَة، أينعم هو أسعاره مش رخيصة إلا انها مش غالية برضه. طبقين من فول القدسية، واحد طلب فلافل، عيش، سلطة خضراء، بطاطس محمرة، وبيض أومليت مع 2 كان پيپسي، كلفونا 35 جنيه من غير البقشيش.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن