لبناني مطاعم in القاهرة الجديدة Cairo, Egypt

مطاعم

بيسترو تمارا: الأكل اللبنانى الأصلى وصل كايرو فيستيفال سيتى
اصدرت في: 19/01/2015

الأكلة اللبناني مستحيل نقدر نقول لها لأ. بطريقة ما بـ تقدر تكون خفيفة وفي نفس الوقت كافية لإشباع أي اشتياق لأكلة دسمة من اللي هى، بيسترو تمارا واحد من أحدث المطاعم فى القاهرة، واللي قدر يحقق شهرة واسعة بصفته مطعم لبناني، دلوقت فتح أحدث فروعه فى القاهرة الجديدة، وإحنا بدورنا ما فوتناش الفرصة. تمارا بـ يقدم مكان صغير مقفول كان مليان على آخره وقت زيارتنا، بجانب قعدة منعشة فى الخارج، بـ تطل على نافورة كايرو فيستيفال الراقصة الشهيرة. الطابع العام للمكان يغلب عليه الشكل العربى المودرن، مع نجف مبهر وأثاث شيك، الجرسون وصلنا لمكاننا المكوَّن من كراسي معدن ملونة مش مريحة. الغريب أن مافيش أي منيو قُدمت لنا لغاية ما طلبناها من واحد من الجرسونات المشغولين باستمرار. تمارا بـ يقدم ما لذ وطاب من الأكلات اللبناني، من المناقيش اللذيذة (30 جنيه) وشاورمة رائعة (40: 60 جنيه)، لعدد من الاختيارات المشوية، أطباق فريك (20: 35 جنيه) وفتّة (55: 80 جنيه)، قدر قسم الحلو عندهم يغرينا، وبعد نظرة سريعة، اختارنا طبقهم الشهير غزل بيروت (45 جنيه) وآيس كريم بالتوت والكاجو (30 جنيه). أطباق الحلو وصلت سريعًا بعد كام دقيقة، ولازم نقول أن طريقة التقديم كانت هائلة، غزل بيروت قُدم على شكل بولتين آيس كريم زبادي بالمستكة عليهم غزل بنات بنكهة المستكة ومرشوش عليها فستق مطحون. مع أول قضمة، عرفنا أن طعمه أجمد كمان من شكله الرائع، وده بالرغم من الطعم المسكّر شوية، آيس كريم الزبادي عبارة عن 3 بولات، وكان أقل مستوى من الغزل وكمية الكاجو فيه قليلة، لكن مافيش شك أنه كان منعش. المشكلة الرئيسية من غير كلام كانت الخدمة؛ كان لازم نطلب الشيك مرتين وبرضه وصل بعد فترة. علشان نلخص الموضوع، إبداع تمارا فى التصميم الشرقي للمكان كان هائل؛ تصميم المكان بصراحة مبهر. غزل بيروت يعتبر من أكثر الحلويات المبتكرة اللى جربناها من فترة. من وجهة نظرنا، كل اللي محتاجينه فى تمارا هو شوية انضباط فى منطقة الخدمة وبكده يستحق العلامة الكاملة.

...

أوليفز: أكل وروح لبنانية في فرع كايرو فيستيفال سيتي
اصدرت في: 05/03/2014

طبعًا كلنا سمعنا عن كايرو فيستيفال سيتي وعن كمية المطاعم والكافيهات اللي فتحت هناك، أوليفز مطعم لبناني قرر يفتح فرعه الثالث بعد فرع داون تاون مول وسيتي ستارز في كايرو فيستيفال سيتي عند منطقة النافورة الراقصة. اختيار المطعم للمكان ده كان ذكي جدًا لأن المنظر الرائع أمام النافورة الراقصة اللي كل ثلث ساعة بـ تلاقيها اشتغلت مع مزيكا عالية بــ تعمل جو جميل جدًا للقعدة والمكان، ده غير طبعًا الهواء الجميل اللي أنت بـ تحس به لو اخترت تقعد في المنطقة المفتوحة من المطعم، إنما لو اخترت تقعد في المطعم نفسه من جوه هــ تحس بهدوء نفسي وجو دافئ. أول ما وصلنا قررنا نقعد في التراس علشان نستمتع بالهواء الجميل اللي بره، أول ما قعدنا جاء لنا الويتر وعرفنا على نفسه وقال لنا أنه هـ يبقى معانا النهارده في كل الطلبات، أخذنا منه المنيو وبدأنا نتفرج على الأكل اللبناني الكثير اللي فيه، كان موجود جزء خاص بالإفطار ما بين الفول والطعمية والأومليت بكل الأنواع زي السبانيش أومليت والأومليت بالجبنة (11: 23 جنيه) وركن السلاطات كان فيه تشيكن سيزر سلاد وسلاطة الفتوش اللبنانية والتبولة (19: 37 جنيه). الأطباق الرئيسية تتنوع ما بين أطباق البيف والتشيكن والسيي فوود (42: 79 جنيه)، نخش بقى على الجزء اللبناني شوية زي المناقيش بتاعتهم اللي كانت رائحتها اللذيذة في كل المكان زي منقوشة زعتر، لبنة، تركي، كفتة (15: 27 جنيه)، عندهم كمان جزء ساندويتشات لو عاوزين حاجة سريعة كده (23: 37 جنيه). قررنا نطلب سلاطة كرسبي تشيكن اللي كانت عبارة عن 4 قطع فراخ كرسبي بـ يقرمشوا تحتهم خس وبهارات وصوص الليمون الخفيف اللي كان طعمه لذيذ جدًا، طلبنا كمان طبق تشيكن مع أعشاب الليمون (47 جنيه) وطبق الجمبري كرسبي (69 جنيه)، الأطباق الرئيسية كلها بـ ينزل معاها خضار سوتيه وإحنا بـ نختار ما بين الأرز العادي أو الأرز بالبهار فــ اختارنا الأرز بالبهار علشان نجربه، التشيكن مع أعشاب الليمون كانت من ألذ ما يكون بطعم الليمون مع الصوص الأبيض اللي كان مغرق التشيكن، أما طبق الجمبري الكرسبي فكمية الجمبري فيه وحجمه حاجة كده من اللي قلبك يحبه، والجمبري كان لونه ذهبي وبـ يقرمش ونزل معاها صوص مسكر كان له طعم هائل مع الجمبري. بعد ما خلصنا كنا محتاجين نريح شوية من كمية الأكل اللي شبعنا منها أوي لكن برده ما قدرناش نقاوم منيو الحلويات بتاعتهم اللي كان مليان بالوافلز والتشيز كيك وكيك الشوكولاتة بالآيس كريم وأسعارهم كانت من (23: 30 جنيه)، طلبنا تشيز كيك جاء لنا في أقل من 5 دقائق وكان صوص الفراولة مغطيه بطريقة شهية، إنما طعمه كان هـ يبقى أفضل لو كانت البسكويت اللي تحت التشيز مش جامدة بالطريقة دي خلتنا ما نقدرش حتى نكسره بالمعلقة. "أوليفز" واخد أكثر مكان استراتيجي في كايرو فيستيفال سيتي، الأكل لذيذ وشهي والخدمة هناك كانت ممتازة.. آه نسينا نقول لكم أن الويترز وهما بـ يأخذوا الأوردر ما كانوش بـ يكتبوا وراك، لأ ده كل واحد فيهم كان معاه زي تابلت صغير علشان يعمل الأوردر أسرع.

...

لا فيلا فيروز: مطعم لبناني بأجواء مميزة فى سيتي بلازا، القاهرة الجديدة
اصدرت في: 17/09/2013

مع زيادة عدد السكان السريعة فى منطقة القاهرة الجديدة، لاحظنا افتتاح عدد من المطاعم الجديدة بهدف إرضاء الأذواق المختلفة. من بين الأماكن دى المطعم اللبنانى "لا فيلا فيروز- La Villa Fayrouz ". المدخل غامض شويتين، بـ يعتمد بس على يافطة صغيرة ترشد الزبائن للمدخل الموجود فى نهاية الممر. المطعم يحسسك بالروح اللبنانية الحقيقية، وكل القعدات فى الخارج مكونة من ترابيزات بمفارش أحمر وكريمى، مع لمبات حائط على الطراز العربى ولوحة كبيرة للرمز اللبنانى، الفنانة الكبيرة فيروز. بسرعة وصلنا وبدأنا رحلتنا مع المنيو، ورغم أن عجبنا الأسماء الأصلية للأطباق اللبنانية، كان المفروض يكون عليها شرح للمكونات، وده تسبب أننا –ومعانا كمان الجرسون- نحتار شوية. بعد وقت بسيط، وصلت مقبلاتنا المتنوعة بين البارد والساخن، عبارة عن فتوش (15 جنيه)، حمص (12 جنيه)، كبد فراخ (26 جنيه)، بطاطس ساخنة (12 جنيه) وسمان (40 جنيه). بالنسبة لكميات الأكل فكانت كبيرة، أما التقديم فمحتاج لمسة إبداعية؛ الحمص كان لذيذ لكن مزيت شوية، ورغم أن الفتوش كان لاذع زى ما توقعنا، المشكلة كانت اختفاء طعم النعناع. كبد الفراخ كانت مطبوخة كويس، بس برضه مليانة زيت وكمية عصير الرمان قليلة، أما البطاطس الساخنة طهيها كان ممتاز والطعم الحراق مناسب. اللحم فى قطعتي السمّان الصغيرين للأسف كان ناشف وصعب التقطيع، ومفرود فوق فرش من البقدونس مع صوص ليمون مزيت على الأخر. أطباقنا الرئيسية من فتة فراخ Chicken Sagya Fattah (30 جنيه) وميكس جريل فيروز (50 جنيه) وصلوا بعد فترة بسيطة. فوجئنا ببحيرة من الزبدة السائحة على وش الطبق، لدرجة أننا رجعنا فتة الفراخ تانى علشان يشيلوها. حتى بعد تصفية الزبدة، فضل الطبق ثقيل جدًا؛ الكمية الصغيرة من الأرز كان معناها أن الكمية الزيادة من الزبادى والطحينة مسيطرين على الطبق. على الناحية الثانية، الميكس جريل كان أخف وأطعم بكثير. القطع الصغيرة من الشيش طاووق، الكباب والكفتة كلهم كانوا طريين وتتبيلتهم مناسبة، وبكده قدروا يعوضوا شوية إحباطنا من الفتة. دقت ساعة الحلو يا شباب! لكن للأسف عرفنا أن مافيش أى نوع من التحلية متوفرة يومها. ارسلوا لترابيزتنا طبق هريسة كنوع من المجاملة، صحيح ما كانتش طازة زى ما بـ نحبها، لكن عليها مسحوق جوز الهند قلل شوية من عدم رضائنا. على الرغم من الجو اللبنانى المشوق، "لا فيلا فيروز" بـ يعانى من أوجه قصور، والسبب عدم توازن الأطباق والخدمة المتواضعة. عمومًا بـ ننصح بعد فك شفرة المنيو بالأطباق الخفيفة المشوية.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن