إيطالي مطاعم in القاهرة الجديدة Cairo, Egypt

مطاعم

روسو بومودورو: مطعم إيطالى جديد بـ يقدم بيتزا من نابولى فى داون تاون القطامية
اصدرت في: 16/05/2013

فضلنا سنين طويلة نسمع عن شكوى القاهريين من نقص مطاعم القاهرة اللى بـ تقدم بيتزا جامدة واستحملنا كلنا مطاعم مش عارفة تفرق أصلاً بين عجينة البيتزا وعجينة العيش. دلوقت نقدر نقول لك المشكلة اتحلت؛ سلسلة المطاعم العالمية روسو بومودورو Rossopomodoro، وصلت من نابولى –بعد أكثر من 120 فرع حول العالم– علشان تنقذنا. فكرنا شوية كده، طالما ده مطعم إيطالى فتح فى داون تاون القطامية، وكمان من نابولى المعروفة بأنها موطن البيتزا الإيطالية، يبقى أكيد هـ يقدم بيتزا حلوة؛ ولحسن الحظ، إحساسنا كان فى محله. تجربة الأكل الأنيقة فى روسو بومودورو بدأت بديكوراته من الخشب باللون الأبيض، كتابات متعددة على الحائط ومطبخ مفتوح على المطعم بطريقة لطيفة. المكان مش وهمى يعنى، بس الأكل عند روسو بومودورو هو أقرب حاجة ممكنة للأكل فى نابولى نفسها. جاء لنا حالة من خيبة الأمل أول ربع ساعة، والسبب كان الأسعار المكتوبة بخط اليد على المنيو ولبس الجرسونات اللى شبه ملابس مضيفين الطائرات فى الخمسينيات. عمومًا المنيو شدت انتباهنا وأخذنا وقت شوية علشان نقدر نحدد طلبنا، قبل ما نجرب البيتزا؛ مارجريتا (49 جنيه)، فور تشيز (59 جنيه) وفيجيتيريان (53 جنيه). بيتزا المارجريتا كانت رائعة؛ السطح الخارجى كان طري مع قرمشة خفيفة والعجينة نفسها طعمها كان روعة ومافيهاش طعم الدقيق. صوص الطماطم كان واضح فيه قد إيه الطماطم طازجة وطعمها مسكر بشكل جميل، والموتزاريلا كانت دسمة. بشكل عام، تتبيلة البيتزا كانت روعة مع طعم مملح بسيط ومش مزيتة خالص. بيتزا فور تشيز كانت عبارة عن جبن كاتشوكافالو، وموتزاريلا بقرى، وجبن ريكفورد وجبن بروفولونى المدخن، ونكهاتها كانت متوازنة بحيث طعم الجبن القوى ما يغطيش على البيتزا نفسها. الفيجيتريان بيتزا كان عليها باذنجان طازج، وكوسة، وفلفل أحمر وأصفر، وجبن بارميزان وريحان، وبرضه كان فيها نفس توازن النكهات. طبعًا يبقى تهريج لو زورنا مطعم إيطالى وما جربناش مكرونة من عنده، وعلشان كده طلبنا بينيتا (52 جنيه). الطبق ده بـ يُقدم مع طماطم شيري، وباذنجان مقلى، وكوسة وجبن Pecorino، وطعمه كان رائع زى البيتزا. كل مكونات الطبق كانت طازجة وشهية، بس كمية الخضروات والجبن كانت قليلة شوية. بالنسبة للحلو، اشتركنا فى ثلاث قطع لذيذة من Calde Calde بسعر 15 جنيه، وكانت عبارة عن عجينة بيتزا مقلية عليها شوكولاتة نوتيلا وسكر فانيليا. الطعم المالح للعجينة كان عامل تناقض جميل مع الإضافات المسكرة، ويعتبر اختيار رائع بالنسبة لعشاق الشوكولاتة. بعيد عن مستوى الخدمة الغريب –الجرسونات كانوا على راحتهم بزيادة فى التعامل مع الزبائن– نقدر نقول أن أكل روسو بومودورو يغطى على أى عيوب.

...

باستامانيا: باستا وبيتزا وبانيني في التجمع الخامس
اصدرت في: 04/11/2012

لما تلاقي مكتوب على إعلانات مطعم أو لافتات الدعاية الخاصة به أن له فروع في إنجلترا والكويت وماليزيا وسوريا والإمارات وسنغافورة وبروناي، ده غير أن هو في الأصل إيطالي، يا ترى توقعاتك بالنسبة للمحل هـ تبقى عاملة إزاي؟ واللي يضاعف من توقعاتك العالية بخصوص المطعم هو موقعه في مول الداون تاون في شارع التسعين في التجمع الخامس. والديكور الأنيق للمحل من الداخل. «باستامانيا – Pastamania» موجود في الدور الثاني من المول على مساحة كبيرة بالمقارنة بباقي محلات المول، وديكوراته كاجوال وشيك جدًا ومناسبة تمامًا لجو البيتزا والباستا وهـ تلاقي جدار كامل معروض عليه من خلال أرفف زجاجية مكونات البيتزا وأشكال المكرونات والصلصات المستخدمة وبعض الخامات والخضروات وبوسترات لها علاقة بالمطبخ. والإضاءة ناعمة وظريفة والجو العام للمكان مريح ومغري بالقعدة، خاصة وأنت شايف شبابيك بـ تطل على المطبخ والأفران وكل شباك بـ يطلع صنف أكل معين، يعني هـ تبقى متابع طبقك من أول مرحلة العجين لحد ما يطلع سخن مولع من الشباك ويوصل على ترابيزتك، ومتابعة وانتظار الأكل هنا كان جزء شيق من التجربة بالنسبة لنا.طيب إيه المشكلة؟ الحقيقة أن مع أول طبق نزل أمامنا عرفنا أن فيه حاجة مش مضبوطة؛ طبق المقبلات المنوعة اللي طلبناه كان بـ 48 جنيه وكان فيه وحدات أجنحة الدجاج وأصابع موتزاريلا وبطاطس الكريس كت وبروسكيتا الخبز بالطماطم. الطبق كان الكميات فيه قليلة على سعره أو سعره غالي على اللي فيه، بطاطس الـ Criss Cut المقطعة على شكل شبكة زي المقرمشات أو السناكس كان طعمها غريب وكأن فيها مواد حافظة وواضح أنها مش طازجة، خبز الباجيت اللي عليه الطماطم المتبلة كمان كان محمص بزيادة وطعم الخميرة ظاهر فيه يعني مش طازج، أنقذ الطبق أجنحة الدجاج اللي كانت لذيذة ومميزة مش شبه أي مطعم ثاني وكمان الموتزاريلا ستيكس الغنية بالطعم رغم أنها ما كانتش متماسكة وبـ تُقطع بمجرد ما نمسكها. صوصات المارينارا والمكسيكان والكاتشب الحار كانت لذيذة مع الطبق ده.المنيو غني بأنواع البيتزا بـ 3 أحجام وبأسعار تتراوح بين 20 جنيه للحجم الصغير لحد 58 جنيه لأكبر حجم. وممكن تطلب أي نوع بيتزا ويتعمل لك بطريقة الكازوني الملفوف. وفيه بيتزا خضروات بأنواع مختلفة. جربنا بيتزا سوبريم بالدجاج والسلامي والمشروم والأناناس (48 جنيه) وللأسف كان لنا عليها تحفظات لأن السلامي كان طعمه أقرب للانشون وبرضه مش فريش كفاية والمشروم كان قليل جدًا والأناناس (الكمبوت) كان كثير بس نفس مشكلة أنه مش طازج، أحسن حاجة في البيتزا كانت العجين والموتزاريلا الكثير اللي عليها. الباستا هنا أشكال وألوان، وكل مقاسات وأنواع المكرونة موجودة ، وكل الصوصات العجيبة اللي بالريحان والصنوبر والبومودورو والبلوتشيز وأي أعشاب لها علاقة بالباستا الإيطالية هـ تلاقيها موجودة. طلبنا باستا بصلصة الطماطم والفلفل الحار وقطع السجق أو (المقانق) اسمه بيف سالسيتشيا (32 جنيه) وسألنا الجرسون لو كان الموجود مقانق (له طعم وشكل مختلف) فعلًا زي الموجود في الصورة اللي في المنيو مش مجرد سوسيس عادي، فأكد لنا أنه زي الصورة بالضبط. وطبعًا جاء لنا الطبق وزي ما توقعنا كان عليه أصابع السوسيس اللي ممكن تجيبها في أكياس من أي سوبر ماركت، وكانت مسلوقة ومحطوطة على شرائح المكرونة الفيتوتشيني بالصوص الحار. الطعم كان ظريف والكمية معقولة بالنسبة للسعر وكل حاجة، بس خدعة المقانق كانت مؤذية بالنسبة لنا.فيه أنواع خاصة من الباستا مع الستيك والسكالوب وفيه لازانيا ونجرسكو وسلامون مقلي، أسعارها أغلى شوية من 70 لـ 120 جنيه. وفيه بانيني وبعض أنواع الحلويات والبيتزا الحلوة بالموز والنوتيلا (21 جنيه). الخدمة مش محترفة وفيها قلة خبرة ويمكن ده لأن الإقبال مش كبير على المحل لقلة الدعاية ومكانه المستخبي شوية داخل المول. ومع ذلك الفاتورة كان فيها 22 % خدمة وضريبة كان ممكن نتقبلها في ظروف ثانية لكن المكان هنا بوصفه مطعم أكلات سريعة وكاجوال كان المفروض يستغنى عن بند من الاثنين في الفاتورة زي ما مطاعم كثير بـ تعمل كعنصر جذب للزبائن.ما تخليش توقعاتك عالية وأنت رايح «باستامانيا» وتعامل معاه كمكان لبيتزا خفيفة أو باستا سريعة بعد شغلك أو قبل ما تروح البيت. ممكن تدفع فلوس قليلة وتأكل أكلة ظريفة في مكان شيك وهادئ، بس ركز في المنيو علشان تعرف تأخذ القرار الصح حسب الميزانية.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن