مصري مطاعم in جيزة Cairo, Egypt

مطاعم

لارين دوريه: ساندويتشات وأطباق وأكلات شعبية تيك أواي فى المنيل
اصدرت في: 21/11/2012

من وإحنا صغيرين بـ نحب الآيس كريم بتاعه وكان دائمًا أهلنا بـ يقفوا عنده علشان نختار من تشكيلة البولات اللذيذة بتاعته الموجودة فى كشك ألوميتال صغير مرفق بمحل الحلويات «لارين دوريه – La Reine Doree» الموجود فى شارع عبد العزيز آل سعود فى المنيل، ده غير أننا كنا بـ نتردد على المحل نفسه علشان نشتري أطباق حلويات شرقية أو تورتات لو عندنا مناسبة أو رايحين نزور حد عزيز علينا.الفكرة بقى أننا اكتشفنا من فترة أنهم فتحوا فى الكشك الألوميتال ده شباك ثاني جنبه وفيه ممكن تأخذ طلبات تيك أواي لساندويتشات شاورمة ولحوم وفراخ (مافيش مكان للجلوس كله ع الواقف أو فى عربيتك)، فيه يافطة حمراء كبيرة عند الشباك فيها أنواع ساندويتشات كثيرة بأسعارها اللى بـ تتراوح بين 4 للحجم الوسط و15 للحجم الكبير، لكن المفاجأة لما بصينا فى المنيو الورق لقينا أصناف كثيرة جدًا وأطباق فرنسية ومشهيات وطواجن وشوربات وأكلات شعبية زي شوربة الكوارع والفتة ولحمة الرأس وكمان طلبات بالكيلو، استغربنا جدًا إزاى الحاجات دى كلها بـ تجهز فى المكان الصغير ده، لكن حيرتنا راحت أول ما عرفنا أن لهم مطعم فوقهم فى الدور الثاني –بس مش واضح- فيه قعدة وممكن تطلب فيها الطلبات دي، يعني من الآخر الساندويتشات بـ تتجهز فى الكشك الصغير تحت والأطباق فوق.أسعار الساندويتشات والحلويات فى المنيو زي ما هى لكن لو طلبت من قائمة الأطباق بـ يتم إضافة 10% ضريبة مبيعات، طلبنا نجرسكو بالفراخ (12 جنيه) رغم أنها كانت فى الشيك بـ 13 جنيه، مش عارفين! شكل أسعار المنيو مش نهائية؛ فاسأل قبلها برضه احتياطى. وكمان أخذنا ساندويتش لارين (حجم وسط بـ 10 جنيه) وده عبارة عن تشيكن رول مع مايونيز وخس، وباكيت بطاطس (2.50 جنيه)، ومن الأطباق شدنا سكالوب ناتير بـ 35 جنيه (بعد إضافة الضريبة 38.50) وهو عبارة عن شرائح بتلو مع صوص المشروم، وفى الأطباق بـ تختار ينزل معاها ورق عنب ولا أرز ولا مكرونة ولا بطاطس فاختارنا ورق العنب، وللتحلية أخذنا أم على بـ 5 جنيه (قرع العسل والأرز باللبن والبودنج والكريم كراميل كلهم بنفس السعر).الأكل ما أخذش وقت كثير قوي فى التحضير، الساندويتش والبطاطس وأم على جاءوا أول حاجة وبعدها بشوية جاء لنا النجرسكو والسكالوب من المطعم اللى فوق. أخذنا الأكل وروحنا بيتنا والأكل مازال محتفظ بسخونته، النجرسكو كانت رائعة، البشاميل كان كريمي والفراخ مستوية كويس وسخنة ولقينا كمان مع الفراخ قطع مشروم بـ تقدم فى طبق ألومنيوم صغير، السكالوب ناتير كان مستوي كويس وكميته معقولة مع 8 أصابع ورق عنب، العيب الواضح في صوص السكالوب أنه كان مملح زيادة، أرز ورق العنب كان مستوي لكن الورق نفسه كان ناشف استعجلوا عليه شوية، ساندويتش التشيكن رول أو لارين كان حلو قوي، الرول كان مقطع حلقات وشكل الحشو من داخله يفتح النفس، الساندويتش كان حشوه كثير مع الخس الطازج، كان لطيف جدًا، البطاطس مقرمشة ولطيفة لكن العيب الأكبر اللى فى وجه المحل أنهم حطوا لنا أكياس كاتشب ملزقة بوظت لنا أيدينا ومش فاهمين من إيه، وشكل ده الطبيعي عندهم لأن وإحنا هناك كان الولد بـ يطلع زيهم من الكيس علشان يستعملهم، مش فاهمين إزاى كده!!أم على كانت على عكس ما إحنا متعودين باردة من الثلاجة مش ساخنة، بس سكرها كان مضبوط وكميتها كويسة، الخدمة مش محترفة قوي لكن الولد اللى حضر لنا الطلب لطيف ومهذب، ممكن بعد الأكلة الدسمة دي تقفل بآيس كريم من الشباك اللى جنبه، هـ تلاقى أصناف جامدة هـ يعجبك طعمها وسعرها، وخلى بالك فيه أماكن ثانية اسمها "لارين" بس المحل مالوش فروع ثانية.

...

كار كافيه كلوب: مطعم مبتكر على كورنيش الجيزة
اصدرت في: 23/10/2012

على كورنيش الجيزة، وبمدخل مستوحى من فن الخمسينيات، صعب تفوت «كار كافيه كلوب - Car Café Club». أول ما زقينا الباب اللى بـ يشبه أبواب الجراج، رحبت بنا ديكورات المكان المستوحاة من حلبة السباق.لوح أرقام عربيات، وكلاكسات، وكشافات وتذكارات ثانية خاصة بالعربيات بـ تزين المكان بإضاءته الخافتة، والحوائط بلونها الأبيض والأسود. التليفزيونات المسطحة المعروض عليها سباق عربيات بـ يوضح قد إيه هم بـ يعشقوا العربيات. لاحظنا أن عندهم مكان مجهز مخصوص بـ DJ وده أضاف جو شبابى نوعًا ما على محل الأكل الجديد.كان أمامنا اختيارات كثيرة ممتعة بالنسبة لمكان الجلوس؛ كبائن مدورة من الجلد وترابيزات، وكراسى عالية أو منخفضة أو عادية. اختارنا الأخير، وقدموا لنا منيو كبيرة بالعربى. لما سألنا عن منيو بالإنجليزى قالوا لنا أنها مش هـ تُطبع قبل شهر (رغم أن المطعم فتح أصلاً من 3 شهور).بالنسبة للمشروبات، قررنا بسرعة نجرب سموزى ليمون مع نعناع (20.95 جنيه) وآيس تى فانيليا (12.95 جنيه). سموزى الليمون مع النعناع كان عادى وتحس أنه ثلج رقيق أكثر منه خليط طازج من العصير طعمه بـ يلسع. الأيس تى كان نفس الكلام، ويمكن أسوأ شوية كمان. كلمة "مياه بطعم الفانيليا" ممكن يبقى اسم مناسب أكثر للعصير ده علشان ما شفناش فيه ثلج أو حتى شاى.بعد فك شفرة المنيو، لاحظنا أن الأطباق تم تسميتها بالضبط على أسماء عربيات. لفتح الشهية بدأنا بحاجة راقية شوية، وهى أصابع فراخ ليكسس Lexus chicken fingers (31.95 جنيه) مع صلصة المسطردة المسكرة. فاتح الشهية اللى تم تقديمه على شرائح بصل أحمر وجزر مقطعة ما كانش فيه حاجة مميزة، بس على الرغم من كده كان لذيذ. الكمية كانت كبيرة، وممكن تشاركه مع حد ثانى.اختيار الطبق الرئيسى كان صعب؛ أسماء العربيات مش بـ توصف الطبق كويس، علشان كده كان لازم نقرأ الشرح المطول. كمان فيه تشكيلة كبيرة من اللحوم: فراخ، ولحوم، ولحم عجل، ولحم خروف ومأكولات بحرية. قررنا نختار فراخ هيونداى المشوية (65.95 جنيه) وسلاطة تونة فيات (31.95).فراخ هيونداى بـ تُقدم مع اختيارك لاثنين من الأصناف الجانبية من بين خمسة، ده غير أنواع كثير من الصوص. كمية الفراخ كانت كبيرة، ومعاها صوص أبيض دسم طعمه تحفة، وبطاطس dauphinoise بالجبنة مع أرز أبيض سادة. سلاطة تونا فيات كانت بسيطة بس لذيذة، وخفيفة، وطازجة وحجمها كبير. السلاطة بـ تُقدم بشكل كويس فى وعاء زجاج عميق بـ يزينه شرائح ثقيلة شوية من الخبز بالثوم.مافيش قسم للحلويات فى المنيو، علشان كده طلبوا منا نروح على مكان عرض الحلويات علشان نختار من بين مجموعة الكيكات المزخرفة والمخبوزات. اختارنا قطعة تارت تمر لذيذة علشان ننهى احتفالنا. للأسف، عرفنا بعد شوية أن كل الحلويات الموجوده للعرض بس! الحلويات المفروض أنها تتوصل للمطعم، بس مافيش حاجة وصلت فى اليوم ده.عرضوا علينا بدل من التارت قطعة من تشيز كيك شوكولاتة (26.95 جنيه)، وعلشان إحنا متفائلين وافقنا على التغيير بس كان اختيار ندمنا عليه. التشيز كيك رغم أن شكلها مغرى، كانت دافئة ولاذعة، وده مش الطعم الحلو اللى كنا نتوقعه. «كار كافيه كلوب» أكيد عنده شخصية مختلفة، رغم أننا مشينا وإحنا محتارين هو فاضى علشان مش محبوب ولا مش معروف. المكان ده يمشى أكثر مع الجيل الجديد بتصميماته الروشة، قطع الأكل الخفيفة وموسيقى البوب، بس مش بـ نصنفه على أنه من المطابخ البارزة فى المدينة.

...

باستاويسي: مكرونة وحاجات زي كده فى الهرم
اصدرت في: 03/06/2012

أكيد أول حاجة هـ تسألوها لنا يعني إيه "مكرونة وحاجات زي كده".. ببساطة ده شعار مطعم «باستاويسي» اللى موجود بالقرب من شارع العريش الشهير فى الهرم. الاسم مفسر نفسه: "باستا" ده مقطع بمعنى مكرونة والاسم اختاره القائمين على المكان علشان يشد الانتباه مع مزجه مع كلمة باستا.. وبالفعل هما نجحوا فى جذب انتباهنا وخلونا عاوزين نجربه.. وبالنسبة لشعار "حاجات زي كده" نعتقد المقصود به الأكلات اللى داخل فيها المكرونة أو المعجنات بصفة عامة إلى جانب أنهم بـ يعملوا ساندويتشات وكشري. المطعم بـ يقدم أنواع أرز ومكرونة مختلفة بصوصات وإضافات مختلفة بأسعار تبدأ من 3.75 جنيه، فتح فى ديسمبر 2011، وهـ تلاقى فى المنيو بتاعته أقسام: مكرونة أو أرز بصلصة الطماطم، مكرونة بالصوص الأبيض، أرز بالشعرية أو بسمتي بصوص بني (كل دول بحجمين لوكس وسوبر لوكس)، وكمان ساندويتشات (وسط وكبير) بأسعار تبدأ من 4 جنيه للوسط و6 جنيه للكبير. ممكن كمان تطلب كشري عادي (3.75 جنيه) ولوكس (5.50) وسوبر لوكس (7.50)، ولو عاوز تحول الطبق بتاعك كومبو عندك كذا اختيار (مش بس بيبسي وبطاطس 5.50 جنيه) ممكن تختار ما بين بطاطس ومشروب وحلو بـ 7.50 جنيه، أو عيش لبنانى مقرمش ومشروب بـ 4.50 جنيه وعيش لبنانى مقرمش ومشروب وحلو بـ 6.50 جنيه. الحلو عند "باستاويسي" إما أرز باللبن أو مهلبية (الاثنين نفس السعر 3 جنيه)، والمشروبات مياه معدنية وكانز وشاي بس، وفيه أسعار للإضافات لو أنت حابب تزود مكونات معينة. المرة دي ما رحناش المطعم نأكل لكن جربنا خدمة التوصيل اللى جاءت لنا سريعة يمكن علشان كنا فى منطقة قريبة من فيصل، قيمة التوصيل كانت 3 جنيه، والأكل جاء لنا سخن والتغليف بتاعه حلو، أحلى حاجة فيه واللى أثارت إعجابنا أن كل علبة عليها اسم المحتوى إيه وكمان مكتوب تحتها كل الإضافات المتاحة فى المطعم والراجل وهو بـ يغلفها بـ يعلم بالقلم على المكونات اللى بالداخل علشان الناس ما تقعدش تفتح كل علبة وتقلب وتهرى فى الأكل علشان تعرف ده بإيه. طلبنا مكرونة إسباجتى بالسي فوود (سوبر لوكس 19 جنيه)، وأرز بسمتى بشرائح اللحم (سوبر لوكس 13) وبـ يسألك نوع المكرونة إيه والأرز عادي ولا بسمتي وعاوزه سبايسي ولا لأ، وقلنا نجرب الساندويتشات كمان فـ طلبنا كبدة إسكندرانى (حجم كبير 7.50 جنيه) والحلو أخذنا طبق أرز باللبن (3 جنيه). المكرونة كانت حلوة بالصوص الأبيض بس كانت مهرية ومعجنة شوية على عكس السي فوود (جمبري وسبيط) كانوا مستويين كويس ومخدومين عن المكرونة نفسها، الأرز البسمتي واجهنا معاه نفس مشكلة التسوية وكمان كان الصوص البنب مش واضح خالص وإحنا بـ نأكل لكن اللحم كان مستوي كويس وطعمه حلو، ساندويتش الكبدة الإسكندرانى كويس بس عادي ما كانش فيه حاجة مميزة بس مخدوم حلو، مسك الختام كان الأرز باللبن اللى كانت كميته ككويسة بالنسبة لسعره والسكر فيه معقول بس كان كمية الأرز أقل من اللى بـ يقدم فى أماكن ثانية مشهورة بعمله وبـ تقدمه مع الكشري، بس هو حلو بصفة عامة. الفكرة بتاعة المطعم لطيفة بس الأطباق اللى المفروض أنها سوبر لوكس حجمها عادى يأكل فرد واحد وبالتالى الحجم اللوكس هـ يكون صغير قوي، بس عامة فى وسط زحمة شارع الهرم وفيصل لو نفسك هافاك على المكرونة أو أكلة تسد جوعك وسعرها حنين وكميتها لطيفة روح على "باستاويسي".

...

كشري أبو عماد: كشري وطواجن مكرونة في ميدان الجيزة
اصدرت في: 22/03/2012

أكلة الكشري ما يتقالش فيها كلام كثير، يا إما حلوة وتملأ البطن والدماغ يا إما أي كلام وتعرف أنك مش هـ تأكل عند الراجل ده ثاني، وغالبًا بـ تبقى دخلت المحل ده مضطر أو كنت في حتة ما تعرفهاش وعاوز تأكل كشري على أساس أنه الأكلة الوحيدة اللي مخاطرها محدودة علشان مافيهاش لحوم. حصل موقف مشابه معانا وإحنا معديين من ميدان الجيزة في ساعة ذروة والعربيات فوق بعض، وعرفنا أننا مش هـ نروح قبل ساعتين بالمنظر ده، فـ قررنا نأخذ تصبيرة ودخلنا محل لفت نظرنا وعامل أضواء كأنه فرح اسمه «كشري أبو عماد» وهو في ميدان الجيزة نفسه وملاصق لمطعم «جاد» الشهير. المطعم له بوابتين؛ واحدة أمامية بـ تطل على الميدان وواحدة في نهاية المحل بـ تطل على شارع خلفي، والمساحة من الداخل معقولة، فيه حوالي 12 ترابيزة لكن وقت ما رحنا المكان كان مليان على الآخر وده مؤشر كويس لمحلات الكشري. ممكن الناس تقعد على نفس الترابيزة مع ناس ما تعرفهاش، وده بـ يزيد فرص التواصل الاجتماعي بين الناس، وبـ يخلق طاقة إيجابية في المكان وتظهر بقى مواقف الجدعنة والشهامة والناس تقعد تعزم على بعض علشان تقعد والمنظر بـ يبقى ظريف جدًا. المهم لاقينا ترابيزة فاضية ونظرنا للمنيو المتعلق على الحائط، وكان عبارة عن كشري بأحجام مختلفة بأسعار 5 و7 و9 جنيه، أسماء الأطباق طبعًا زي أي محل كشري بـ يحترم نفسه؛ لوكس وسوبر وأبو عماد، وأي إضافة حمص أو عدس أو تقلية بجنيه واحد، ومنيو ثاني للطواجن باللحم المفروم أو الكبدة بأسعار 7 و9 جنيه برضه، وحلويات أرز باللبن بالمكسرات وسادة وأرز باللبن في الفرن. سألنا الجرسون إذا كان ممكن يعمل لنا طبق كشري بالكبدة، على أساس أن المحل بـ يعمل طواجن فيها كبدة بالفعل، قال لنا أنه ممكن طبعًا وهـ يبقى بـ 7 أو 9 جنيه حسب الحجم. الحقيقة أن الكشري بالكبدة أكلة مرتبطة في ذهننا بمطاعم معينة في الإسكندرية لكن اكتشفنا كام محل بـ يعمل الطبق ده هنا في القاهرة، وفرحنا أن «أبو عماد» واحد منهم. الأكل نزل قدامنا بسرعة جدًا كعادة محلات الكشري المحترفة، والكشري لوحده كان رائع والمكونات بتاعته طازجة، لكن الكشري بالكبدة خيب ظننا لأن الكبدة كانت عبارة عن فتافيت كبدة إسكندراني، ومش فريش كفاية، لكن ما كانش وحش لدرجة أنه ما يتاكلش، مع الدقة والصلصلة كل حاجة ممكن تبقى حلوة في محل الكشري. طلبنا بعد الأكل أرز باللبن (2 جنيه) وكان حلو وخفيف زي أي محل كشري ما بـ يعمله. شبعنا من الطبق وما فكرناش نطلب كمالة، لكن قررنا أن المكان ده هـ يستضيفنا كثير في كل مرة نكون واقفين في زحمة ميدان الجيزة وعاوزين نضيع شوية وقت في أكلة مفيدة، لكن مش هـ نخرج بره طبق الكشري التقليدي.

...

الفقير: كباب وكفتة ناقصة تسوية في فيصل
اصدرت في: 26/09/2011

محل رخام أخضر كبير اسمه مكتوب باللون الأحمر على الشارع الرئيسي بعد شارع العشريني في فيصل، مشهور جدًا في المنطقة هناك ومن الأسماء المعروفة للناس أكيلة ومحبي الكباب والكفتة، مطعم وكبابجي «الفقير» عبارة عن دورين فيهم أماكن للقعود فوق وتحت، مكان الشواء تحت على الشمال أول ما تدخل، وهناك بـ يستقبلك كبير الجرسونات ويسألك أنت محتاج إيه، إلا أننا ما جاتش لنا فرصة نقعد نأكل في المحل فـ طلبنا خدمة التوصيل. التوقيت اللي استغرقه الطلب كان أقل من نصف ساعة، التوقيت كان غريب على الرغم من أننا كنا قريبين منهم لكن طالبين طلبات كثيرة، ومن المعروف أن الشواء بـ يأخذ وقت، عامة كان انطباع مدهش في البداية. طلبنا كيلو كباب وكفتة (96 جنيه)، وحمام محشي "زوج" (44 جنيه) وبـ تطلب أنت عاوزه محشي فريك ولا أرز فـ اختارنا واحد بالأرز والثاني بالفريك، ولما بـ تطلب حمام بـ يجي لك معاه مجانًا شوربة حمام، وكمان أخذنا ورق عنب (5 جنيه)، وبطاطس محمرة (3 جنيه)، بـ ييجي مع الطلب أرغفة عيش كثيرة، وبـ ينزل لك مع الطلب أنواع سلاطة مختلفة على الرغم من أن الراجل لما كلمناه ما فهمناش في الأول أنها بـ تيجي عادي مع الطلب، وكان بـ يقول أننا نختار أي نوع سلطة من زبادي بالخيار وخضراء وطحينة وبابا غنوج وطماطم مخللة وخيار مخلل ومخللات مشكلة (الواحدة بـ 1 جنيه)، لكن بعدين قال لنا هو هـ يجيب لنا تشكيلة من الموجود عنده. شكل الأكل كان حلو جدًا وشهي، لكن المفاجأة المخيبة للأمل مع كل قضمة لصنف مختلف من اللي طلبناه كان أن الأكل ناقص تسوية، كل حاجة: الكباب كان ناشف شوية استعجلوا عليه فى التسوية، الكفتة كانت أكثر حاجة كويسة فيهم، الحمام كان مافيهوش لحم يذكر وحجمه صغير وكمية الحشو كانت أكبر منه (يمكن علشان كده كانوا عاملين الطلب في المنيو بالزوج)، كمان الأرز والفريك كانوا جيدين لكن برضه تبقى مشكلة التسوية، شوربة الحمام كان طعمها شوربة عادية مافيهاش أى طعم للحمام، السلطة الخضراء ما كانتش فريش ولا الطماطم ولا الخيار، وورق العنب اللي كنا حاطين أمل عليه ينسينا كل المشاكل دي طلع هو كمان ناقص تسوية وكمية اللف في الصباع الواحد كثير والحشو قليل فكان ثقيل ومافيهوش المزازة الحلوة المشهور بها ورق العنب، كمان البطاطس المحمرة كانت طرية ومزيتة! المنيو فيه أصناف ثانية كثيرة زي: النيفة (الكيلو بـ 96 جنيه)، والريش (الكيلو بـ 120 جنيه)، ممبار باللحم المفروم (الكيلو بـ 84 جنيه)، طلب البوفتيك (35 جنيه)، فتة بالموزة (38 جنيه)، مكرونة فرن (5 جنيه)، والأسباجيتي (8 جنيه)، وبالنسبة للشوربات فيه شوربة خضار (3 جنيه)، وشوربة فراخ مع لسان العصفور (نفس السعر)، أما شوربة فراخ بالكريمة (6 جنيه)، وغيرها أصناف كثيرة. تجربتنا مع الأكل هناك كانت سيئة للأسف، نتمنى أن غيرنا تكون تجربته مختلفة، وإلا ما كانش اشتهر أنه من أشهر الأماكن اللي بـ تعمل كباب وكفتة، نتمنى!

...

الفقير: كفتة وكباب في قلب الهرم
اصدرت في: 21/05/2011

إزاى ممكن مطعمك يفرق عن مطعم تاني وانت بـ تقدم نفس أنواع الأكل المصري ومتخصص في ده؟ المنيو اللي موجودة زي كل المنيوهات اللي في المطاعم التانية فيه طحينة، بابا غنوج، سلطة خيار، بصل، طماطم وبقدونس وطبق المخللات الحادقة وطبق تاني كبير للعيش البلدي. اللي بـ يفرق مطعم «الفقير» عن اي مطعم تاني هو جودة اللحمة اللي عنده وده اللي بـ يفرقهم عن اي مطعم تاني بـ يقدم الأكل المصري وبـ يخلي المكان ده مشهور. المطعم موجود في «كايرو سيتي سنتر» في الهرم في شارع فيصل اللي على طول زحمة. «الفقير» موجود في حتة زحمة قوي وفي مبنى شكله مش حلو ولونه بني كئيب. المطعم من جوة كبير ومليان ناس ومعظمهم بـ ييجوا من أماكن تانية في القاهرة بعيدة عن المطعم. طبق نص كيلو كفتة وكباب بـ 55جنيه وكانت من أحلى الأطباق اللي أكلناها في مصر، اللحمة جاية من مزرعة محلية ومتقطعة كويس وده بـ يخلي اللحمة مافيهاش دهن كتير وطعمها حلو. الكباب والكفتة مستويين على الفحم وبعد سواهم بـ يتحطوا على قطعة عيش كبير، عشان تستمتع بـ طعم المرقة بتاعت اللحمة اللي على العيش. جوزين حمام محشين رز او فريك حسب ما انت عايز بـ 55 جنيه طعمه حلو قوي. في الأول كنا خايفين لأن لون جلد الحمام كان غامق بزيادة، بس أول ما اكلنا اول لقمة طعمها كان حلو قوي والسوى بتاعها رائع. حبينا الحمام محشي فريك اكتر، كان مستوي اكتر وكان مش طري قوي زي الحمام المحشي رز. كتير أصروا على ان الريش الضاني من احلى الحاجات في المنيو، بس احنا حسينا ان اللحمة كانت صعبة قوي في الأكل بس حبينا شكل الطبق لأن كان فيه شكل جمالي للطبق ما بين لون اللحمة اللي زي الشيكولاتة ولون العضم الفضي. طبق المحشي كان فيه محشي ورق عنب وفلفل ومحشي كوسة وكمان الملوخية كانت كويسة بس مش خطيرة يعني. عشان تجرب حاجة مختلفة، «الفقير» بـ يقدم غرفة خاصة للأعداد الكبيرة ليها حمام خاص وتليفزيون. لو انت عايز تحس بـ إختلاف وانت بتأكل اكل مصري ، روح «الفقير» واحجز المكان الخاص واطلب كباب وكفتة. وخلَّي بالك ان وجبة كبيرة في «الفقير» مش هـ تكلفك اكتر من 60 جنيه لفرد واحد.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن