مأكولات سريعة مطاعم in المعادي Cairo, Egypt

مطاعم

الليدو: أجمل وأرخص برجر بفرع جديد في المعادي
اصدرت في: 09/12/2014

أغلب مطاعم البرجر في القاهرة بـ تتنافس في الطعم والجودة والأسعار والخدمات الأخرى زي المكان وأنواع الأكل بس الحقيقى أن فرع "الليدو – El- Lido" اللي لسه فاتح في المعادي قدر يثبت أن الحاجات دي مش مهمة خالص طالما أن البرجر بتاعك طعمه حلو وسعره معقول. المكان مش كبير، فتح مكان مكتبة ديوان اللي كانت في شارع 9 وأمام Buffalo Burger اللي يعتبر منافس قوي له، خاصة أنه متنوع أكثر وأكبر، بس الليدو صاحب مبدأ "نحن نختلف عن الآخرون" تمامًا. المطعم عبارة عن مطبخ وترابيزة جنب الكاشير وأشبه بالبار وواحدة زيها بس مطلة على الشارع. لما بـ تدخل الليدو، بـ تلاقي المنيو معلق أمامك، وما تستغربش خالص أن المنيو كله عبارة عن: ساندويش برجر بـ 10 جنيه، ساندويتش سوسيس بـ 10 جنيه، باكيت بطاطس بـ 7 جنيه، مخلل بـ 1.5 جنيه، واختيارك من المشروبات الغازية بـ 5 جنيه، أو جرانيتا على حسب موسم الفاكهة بـ 7 جنيه. وتم بحمد الله، مافيش أي حاجة ثانية ولا حتى أنواع مختلفة من البرجر، والغريب بقى أن ده اللي بـ يميز الليدو، لأنهم معروفين بأن البرجر بتاعهم من أشهى أنواع البرجر في القاهرة. الحقيقة أننا طلبنا كل حاجة في المنيو إلا المخلل، بس مع أول قضمة في البرجر اللي زودنا عليه مسطردة بس، ذوبنا في التتبيلة الغنية والحيوية للبرجر، وطعم المسطردة عليه مع التوابل كان منعش ومبهج، كان أكثر برجر متبل ببراعة أكلناه في حياتنا، ومش عليه لا جبنة ولا خس ولا مايونيز، أنت بـ تختار ما بين ثلاثة صوص، كاتشب ومسطردة أو طحينة، ولأننا ذوقنا أنواع برجر كثيرة سواء من مطاعم محترفة أو غير محترفة، إلا أن البرجر ده فعلًا يستاهل أنه يبقى المحل قائم عليه، لأنها أكيد مش هـ تبقى المرة الأخيرة اللي نروح له فيها بعد ما حبينا ساندويتش البرجر بتاعه من أول قضمة، كمان البرجر والسوسيس مشويين على الجريل بدون أي دهون ودي ميزة صحية جدًا، برجر وهمي بـ 10 جنيه بس، لكن للأسف حجم الساندويتش كان قد كف الأيد، يعني مستحيل هـ يشبعك لو أنت جعان، علشان كده كنا متشوقين أننا نذوق ساندويتش السوسيس اللي كان شكله مغري جدًا، بس برضه للأسف تأتي الرياح بما لا تشتهي السفن، السوسيس كان ناقص تسوية وبـ يمط شوية، برغم التتبيلة الرائعة ما قدرناش نكمل الساندويتش اللي برضه كان قد حجم كف الأيد (نصف حجم قطعة سوسيس عادية). أما المزاج الحقيقي كان في باكيت البطاطس، بطاطس شيبسى مقطعة ما بين سميك ورفيع، الحقيقة أننا من عشاق البطاطس بكل أنواعها، فما بالكم وهي شيبسي، نوع البطاطس مناسب جدًا للبرجر خاصة أنها متنوعة قطعة طرية لسمكها وقطعة مقرمشة، وده اللي خلانا نستمتع بكل واحدة على حدة. طبعًا، مع الأكل ده لازم نشرب حاجة، ولما سألنا عن الجرانيتا الجرسون قال لنا أن كان فيه جرانيتا يوسفى وخلصت، وفيه حاليًا جرانيتا سوبيا، قلنا نجربها، والحقيقة أنها كانت ممتعة جدًا، بالذات مع جو الشتاء لما تشرب حاجة مثلجة بـ تنتعش وتزيد نشاط. للأسف خدمة التوصيل لسه ما اشتغلتش عندهم، بس هما وعدونا أنها هـ تشتغل في خلال أسبوعين، لأنهم لسه فاتحين من شهرين بس. نرجع ونقول استمتعوا بوقتكم في الأماكن اللي بـ تحبوها مع الأشخاص اللي بـ تحبوهم واحرصوا أنكم تبينوا لهم ده بالأفعال مش بالأقوال فقط. دمتم سعداء!

...

جاكيت بوتيتو: ما لذ وطاب من البطاطس المخبوزة فى المعادى
اصدرت في: 17/11/2014

فى كل مطاعم القاهرة، لازم تلاقى أكلات مكررة فى كل المنيوهات مهما اختلفت مدارسها، أحيانًا بـ تكون على شكل طلب جانبى أو طبق كامل. فى كل الأحوال، ومهما كان الطبق غالى أو أنت بـ تجربه فين، لازم تلاقيه نصف مستوي (إيه!) ومافيش اهتمام كافى به. مثال حى على كلامنا البطاطس المخبوزة. أكيد تقدر ترش عليها شوية ملح وفلفل وتضيف شوية زبدة وكله يبقى تمام، لكن موضوعنا هنا مختلف شوية عن المعتاد. لغاية وقت قريب، كان فيه محل وحيد بـ يركز جدًا على الطبق ده وهو سيمبلى بوتيتوز، لكن دلوقت سكان المعادى عندهم اختيار جديد فى شارعهم المحبوب، شارع 9. "جاكيت بوتيتو - Jacket Potato" –على حسب تسمية الإنجليز– بدأ الشهر اللى فات، بمطعم شيك متوسط الحجم باختيارين للقعدة، داخل المطعم أو فى الخارج. المطبخ المفتوح بـ يكشف عن بار سلاطات وإضافات من كل الأصناف، ومنه تقدر تطلب تحضير حاجة خارج المنيو الثابتة، أو تعمل حاجة على مزاجك. رحبوا بنا بحرارة على باب المطعم ووصلونا لترابيزة فاضية، لكن إحنا طلعنا فورًا على بار الإضافات علشان نقرر نطلب إيه. المنيو فيها مجموعة متنوعة من اختيارات الفراخ، واللحوم والخضروات، بجانب السلاطات وحلويات من البطاطا الحلوة. طلبنا طبق تقليدى من لحم مفروم بالجبن (37 جنيه) وتشيكن بابريكاش (39 جنيه). وقت التحضير كان قليل جدًا، ودائمًا بـ يكون عندهم كميات من البطاطا خارجة من الفرن وجاهزة للإضافات. البطاطا بـ تُقدم فى علب خضراء حجمها مناسب تقدر تحافظ على الأكل الملخبط وممكن تستخدمها للتيك أوت. طبق اللحم المفروم بالجبن كان بنفس جمال اسمه، يجمع بين كمية محترمة من اللحم المفروم وصوص وسترشير، زبادى بالنعناع وكمية كبيرة من الشيدر المبشور. قاع البطاطس كان محمر صح بحيث يضيف شوية قرمشة، والطبق بشكل عام كان بـ يشبع جدًا. طبق التشيكن بابريكاش كان برضه ممتاز، عبارة عن صدور فراخ بصوص البابريكا (فلفل أحمر حلو)، ساور كريم، مشروم، ومن ثانى، كمية كبيرة من الجبن الشيدر. قررنا نجرب طبق حلو، وكان اختيارنا بطاطا حلوة بالكريمة والعسل (19 جنيه). الكريمة قدرت تخفف شوية من سكر العسل القوى، ونجحت فعلاً فى عمل توازن فى الطعم. صحيح 30 جنيه ممكن يكون كثير شوية على بطاطس مخبوزة، لكن جاكيت بوتيتو يستاهل؛ بـ يقدم لك وجبة سريعة، ولذيذة وبسيطة.

...

مرفيز: اخطف لك وجبة سريعة صحية في المعادي
اصدرت في: 22/10/2014

فيه أوقات بـ تبقى محتاج ساندويتش سخن يشبعك وفي نفس الوقت يبقى صحي ولذيذ، ودي مكونات صعب تتجمع لك في القاهرة، بس "مرفيز – Murphy's" المشهور في المعادي حقق لك المعادلة الصعبة. المحل صغير مش كبير فيه ترابيزتين بس تقريبًا، وبـ يعتمد على أنك تطلب ساندويتشاتك وتمشي أو خدمات التوصيل، المنيو متنوع ما بين الفراخ واللحوم والسلمون، غير الأطباق الجانبية زي أجنحة الفراخ والـ Cheese Balls، وممكن تشوف المنيو كامل في صفحتهم على الفيسبوك. طلبنا كساديلا بالفراخ على الطريقة المكسيكية (31 جنيه)، وهي عبارة عن عيش زي العيش الشامي وجواه صوص مايونيز وجبنة حمراء وخضروات بالصوص المكسيكي (قطع بصل وطماطم وفلفل صغيرة) وبـ تتحط على الجريل علشان تخرج مقرمشة ولذيذة والحقيقة أنها كانت مميزة ومش مقرمشة زيادة أو محروقة، وقدم لنا معاها صوص زيادة وخلطة مكسيكية زيادة. كمان طلبنا ساندويش Fried Chicken with Sweet and Sour sauce بـ 28 جنيه، بس للأسف ما كانش فيه نكهة واضحة زي الكساديلا، والماكينة اللي كانت بـ تسويها سابت أثر أسود كأنه فحم على الساندويتش وده خلانا ما نعرفش نستمتع به للأسف. لكن أجمل حاجة عنده الـ Cirsscuts بـ 12 جنيه، ودي بطاطس محمرة على شكل مربعات في بعض، والحقيقة أنها كانت طرية من جوه ومقرمشة من بره زي ما بـ نحبها بالضبط. حاولنا نطلب Cheese Balls، بس للأسف ما كانتش موجودة عندهم. هـ تلاقي كمان في المنيو بتاعهم هوت دوج مميز بثلاثة أنواع: Classic, Original, Chili، وأسعارهم من أول 9 جنيه للحجم الصغير لـ 25 جنيه. مش بس كده غير أقسام اللحوم والدجاج والجمبري اللي عنده، مرفيز عامل Green Side للنباتيين، واللي فيه Smoked Salmon and Tuna Sandwich، كمان عنده أنواع مميزة جديدة من الساندويتشات زي الروست بيف والـ Steak and Cheese، ده غير أنواع الصوص الخاصة به اللي مش هـ تلاقيها في أي مكان ثاني. وبالنسبة للحلو لو كنت لسه جعان، هـ تلاقي نوتيلا وافل بالحجم اللي تحبه كبير أو صغير، أجمل حاجة في مرفيز أن كله صحي هـ تلاقي فيه الأكل اللي بـ تحبه بأسلوب صحي وممتع، وأسعاره مش غالية.

...

برجر جوينت: فرع المعادى الكلاسيكي اختلف شوية عن زمان
اصدرت في: 05/08/2014

آخر ثلاث أو أربع سنين قدروا يطّلعوا ناس كثير خارج الساحة. قدروا كمان يخرجوا مشروعات ووصّلوا ناس للإفلاس. وسط كل ده، مطاعم كثيرة قدرت تفلت، ومطاعم كبرت وازدهرت، أما إحنا فاهتمامنا كله موجه ناحية معرفة تأثير الكلام ده على جودة الأكل! "برجر جوينت - Burger Joint" المعروف بالفعل لأهل المعادى، كان لوقت طويل هو الوجهة الأساسية لكثير من الشباب الصغيرين لا يمتلكوا اختيارات واضحة للسهر. نقدر نقول أن سبب استمرار برجر جوينت طوال الوقت ده كان خلطه بين الموقع الممتاز وبساطة الأكل. المكان نفسه ما شهدش تغييرات كثيرة، أو مافيش تغييرات أساسًا. لسه محتفظ بمكان صغير مكشوف بكراسى خشب صعب تتحمل الجلوس عليها فى الصيف، ولطيفة فى الشتاء. طلبنا وورمان برجر (42.95 جنيه) ومعاه قطعة برجر إضافية (11 جنيه). طلبنا كمان ويدجز (10.50 جنيه) وحلقات بصل (13 جنيه). الويدجز كانت ساخنة، سميكة ومملحة، وطبعًا زى ما كل زبائنهم عارفين أنك تقدر تطلبها بدلاً من البطاطس فى وجبة الكومبو بدون أى تكلفة إضافية. حلقات البصل، المغطاة بعجينة مقلية سميكة، كانت لذيذة، لكن للأسف ينقصها شوية قرمشة. أما بالنسبة للورمان برجر، اللى عليه طماطم، خس ومايونيز، بالإضافة لبيف بيكون، مشروم، بصل مسكّر وصلصة حلوة، كان لذيذ فعلاً خصوصًا أنه عصارى بشكل هائل. رغم أن العيش والمكونات كانت طازجة، للأسف أغلب العصارة كانت ناتجة عن الإضافات مش من اللحم نفسه، اللى كان مطهى بزيادة ومفحم شوية. لاحظنا كمان أن اللحم مختلف عن زمان، صحيح برجر جوينت عمره ما كان متخصص فى برجر مطهى medium-well، لكن اللحم المطهى بزيادة وطعمه عديم النكهة كان فعلاً محبط كونه من أحد مشاهير المعادى. أكيد إحنا فى منتهى السعادة أن برجر جوينت مازال متواجد علشان يشبع حبنا للبرجر، لكن من المؤسف أننا نشوف مستوى أهم عنصر فى الموضوع بـ يتراجع –ألا وهو قطعة البرجر نفسها- خصوصًا مع ظهور منافس جديد فى كل شبر. هل يقدر الموقع وارتباط مجتمع المعادى به يساعدوا برجر جوينت على الاستمرار؟ سؤال يطرح نفسه.

...

لورد أوف ذا وينجز: بافلو وينجز وبرجر في بلات فورم المعادي
اصدرت في: 03/03/2014

بعد حملة دعاية كبيرة ومشوقة شوفناها في الشوارع وعلى مواقع التواصل الاجتماعي، أخيرًا تم افتتاح أول فرع في مصر لسلسلة مطاعم «لورد أوف ذا وينجز – Lord Of The Wings» في ساحة طعام وألعاب "ذا بلات فورم - The Platform" أو الرصيف النهري الجديد اللي فتح أبوابه للجمهور من شهور قليلة فاتت على كورنيش المعادي. واللي محتاج موضوع طويل نتكلم فيه بالتفصيل عن روعته والكافيهات والمطاعم الموجودة فيه. المكان في الصف المقابل للمحكمة الدستورية العليا على كورنيش المعادي، وبـ ننصحك لو هـ تروح بعربية أنك توصل لبلات فورم وتأخذ أول ملف بعده كأنك راجع ثاني وتركن على الصف المقابل في ساحة الانتظار المخصصة لرواد المكان، لتفادي الزحمة الرهيبة على الصف اللي ناحية النيل. بمجرد ما تدخل من البوابة الرئيسية لبلات فورم هـ تنزل درجتين سلالم علشان تلاقي «لورد أوف ذا وينجز» على يمينك. في مكان داخلي مش كبير للجلوس، إنما القعدة الأساسية كلها في المساحة الخارجية المفتوحة بـ تبص على النيل مباشرة، بكراسي وكنبات أشبه بمطاعم الأمريكان داينر لأن هي دي طبيعة المطبخ الأمريكاني جدًا هنا. الديكور مبهج والمزيكا حلوة وسهل تتابع التليفزيون الموجود في كل مكان في البلات فورم كله وبأحجام مختلفة، المشكلة الوحيدة هنا أنك ممكن ما تستحملش البرد في الشتاء رغم الدفايات المتوزعة في كل حتة، لكن أنت هنا على النيل؛ مش هزار، أنت محتاج بطانية، أو مشروبات ساخنة طوال الوقت. المطعم أصله لبناني، بمعنى أن لبنان هي بلد المنشأ مش أنه بـ يقدم أكل لبناني، فتح فروع في دول كثير عربية وأجنبية وحقق نجاح وحصل عليه إقبال جماهيري، وده علشان تخصصه في حاجة مش منتشرة قوي في المطاعم العالمية وهي أجنحة الدجاج أو الـ Buffalo Wings بالصوصات المختلفة والتتبيلات العجيبة، ده بجانب البرجر اللي هو الأكلة الأساسية للمكان وبعض أطباق الستيك وساندويتشات الدجاج والسلاطات والمقبلات المكسيكية. المنيو ظريف ومبتكر أقرب لـ Check List بـ تعلم فيها على الأصناف اللي أنت عاوزها، فيه نوعين من الأجنحة، المخلية واللي بالعظام، فيه 3 أحجام لكل طبق من الأجنحة، أصغرهم بـ يبقى فيه 6 قطع والوسط 12 قطعة والكبير 24 قطعة، بأسعار بـ تتراوح ما بين 48 جنيه لحد 112 جنيه، والمذاقات هنا مرتبطة إلى حد كبير بمدى حرارة الأجنحة ونسبة الشطة والصوصات الحارة فيها، لكن فيه مذاقات مبتكرة زي الثومية مع جبن البارميجان والخلطة الكورية بالسمسم ودول اللي إحنا جربناهم لأنهم أكثر حاجة مش تقليدية بين الصوصات، والمذاق كان ممتاز في الثومية والجبن السايحة اللي بـ تغطي الأجنحة، والخلطة الكورية بالطماطم والسمسم التوابل كان ملحها زيادة لكن كان طعمها جديد علينا، ومش عارفين إزاي قدروا يعملوا الأجنحة فيليه كده وتبقى مليانة لحم بالمنظر ده! هي دي أجنحة فعلًا؟ الباقي كلها صوصات حارة بدرجات مختلفة، أطباق الوينجز بـ تتقدم مع ساور كريم وشرائح الخضار الفريش. جربنا البرجر 3x3 وهو ساندويتش عملاق فيه 3 قطع برجر مع صنف جانبي من اختيارنا (رقائق ناتشوز مع صلصة مكسيكي) وسلاطة كول سلو وسعره 74 جنيه. بما أن المكان متخصص في البرجر فأكيد البرجر من أحلى الحاجات اللي ممكن تأكلها هنا، اللحم بقري ومستوي كويس قوي، ملحه مضبوط، وإضافات الجبن الشيدر والهالوبينو بـ تخليه ولا أحسن مطعم برجر أمريكاني أصلي. جربنا كمان من المنيو ساندويتش برجر بـ نقوم بتجميعه من اختيارتنا المختلفة (Make your own) من نوع العيش واللحم والجبن والإضافات والتسوية، وده كان سعره 61 جنيه مع العلم أن فيه بعض الإضافات زي البيكون والبارميجان بـ تبقى بمبلغ مستقل غير ثمن الطبق اللي متحدد في منيو Make your own يعني خليك مركز وأنت بـ تختار الإضافات علشان ما تلاقيش الرقم كبر منك قوي. وما تنساش أن البيبسي هنا refill يعني اشرب براحتك، وسعره 22 جنيه. ومن بين 3 أصناف حلويات بس اختارنا التشيز كيك (36 جنيه) بالبلو بيري وكانت ظريفة لكن بدون تميز يذكر. المهم أن الطعم حلو والكميات كبيرة لدرجة أننا أخذنا كميات كبيرة من وجبتنا تيك آواي، ومشينا بدري بسبب البرد والرياح الشديدة اللي ما كانش نافع معاها دفايات، لكن أكيد «لورد أوف ذا وينجز» مكان فريد يستحق يبقى على خريطة المطاعم الأكثر تميزًا في القاهرة بسبب تخصصه وتمكنه الكبير من أطباقه، والخدمة المحترفة والسرعة في الأداء كانوا حاضرين في التجربة، ومن هنا بـ ييجي تقييمنا العالي للوافد الجديد على العاصمة.

...

أموي وكوكيدوز: أكلات سريعة في مدخل جراند مول في المعادي
اصدرت في: 26/09/2013

مش فاكرين إيه اللي كان فاتح مكانهم لما جينا هنا من كام شهر، إحنا كثير بـ نعدي على جراند مول في المعادي وعارفين أن مطعم «أرزاق الكوثر» الشهير موجود هناك، لكن الجديد في زيارتنا الأخيرة أننا لاقينا مطعمين جداد ملاصقين لأرزاق الكوثر ومفتوحين الثلاثة على بعض من الداخل، ولهم مدخلين من واجهة المول نفسه ومنهم ممكن ببوابة داخلية للدور الأرضي للمول. تصميم ظريف والقعدة شبه الفوود كورت لكن صغيرة بـ تخدم ٣ مطاعم بس، والثلاثة لنفس الإدارة لكن كل واحد له كاشير مستقل، لكن لو ما لقيتش حاجة من هنا ممكن تطلبها من هناك والحياة سهلة وأنت في حرم الأخوة الثلاثة والجرسونات بـ يخدموا على كل الترابيزات داخل الفوود كورت المصغر ده. نوعنا الأوردر بتاعنا بين «كوكيدوز – Kokedo's» المتخصص في الدجاج المقلي المقرمش على طريقة كنتاكي وبين «أموي» اللي بـ يعمل شاورما سوري وبس. المكانين شكلهم ظريف وبسيط والمنيو بتاعهم صغير ومحدد لكن لاحظنا إقبال جامد عليهم وخاصة «أموي» اللي كثير من رواد المول بـ يعدوا عليه الأول قبل جولة التسوق ويأخذوا منه ساندويتش شاورما (16 جنيه للحجم الكبير و12 جنيه للصغير) دجاج أو لحم في عيش سوري ملفوف. بدأنا بوجبة دجاج شبه الدينر بوكس بتاع كنتاكي، فيه منها أحجام مختلفة وأسمائها هي Engine و Splinder و Tornado وحاجات تخض كده، لكن كلها شبه بعضها في المكونات وبـ تفرق في عدد قطع الدجاج بس، وأسعار الوجبات 27 و 37 لحد 110 جنيه اللي هي الحجم العائلي. مافيش هنا ساندويتشات أو أرز أوأي أصناف جانبية، هي الفراخ المقلية وبس، ومش سبايسي كمان، أو بمعنى أصح مافيش سبايسي وعادي، كله مشطشط شوية صغيرين ومبهر بشكل لذيذ، وجبتنا كان معاها علبة ثومية وبطاطس محمرة وعجبنا طعم الدجاج جدًا وحسينا أنه مختلف كثير عن كنتاكي وتكساس تشيكن وغيرها من المطاعم اللي بـ تعمل نفس نوع الأكل، التوابل هنا باينة أكثر والقرمشة قوية جدًا والكميات معقولة في الوجبات. من الكاونتر المجاور طلبنا فتة شاورما ميكس (29 جنيه) من «أموي» للأسف تأخرت جدًا بسبب أن الأرز كان لسه بـ يستوي وبعد كده جاء لنا أسوأ طبق فتة شاورما ممكن يحصل بعد فترة الانتظار دي! الأرز بعد ده كله مش مستوي والعيش المحمص غرقان في صوص دسم جدًا ما فهمناش هو إيه بالضبط! وعليها مكسرات مش فريش طعمها غريب، بقينا ننقي قطع الشاورما بس من على الوش لأنها كانت مش بطالة خالص، لكن برضه مش بالمستوى المطلوب. عملنا طبق سلاطات مشكل (8 جنيه) وفي الحالة دي لازم تروح تملأه من بار السلاطات في أرزاق الكوثر وكان فيه تبولة مالهاش طعم، مجرد خضروات وبرغل مثلجين من غير أي نكهة أو توابل، كول سلو معقول وحمص وطحينة كويسين، والثومية أحسن مقبلات تأكلها هنا. الخدمة ودودة بس ده مش كفاية لأنها كانت بطيئة وبعض العاملين خبرتهم محدودة ومعلوماتهم عن الأصناف قليلة. في النهاية عجبنا فكرة المكان والتنوع اللي فيه والمرة الجاية نحب نشوف أصناف جديدة ومستوى أحسن في كل حاجة في «أموي» و«كوكيدوز».

...

زنجر: مقليات سريعة ووجبات مقرمشة في المعادي الجديدة
اصدرت في: 07/05/2013

مش باين قوي وسط المحلات الكثير المنورة في تقاطع شارعي النصر واللاسلكي في المعادي الجديدة، ولازم تنزل له 4 درجات سلم علشان تدخل المحل. مطعم «زنجر» موجود أمام ألبان المالكي اللي من علامات الشارع المميزة، وجنب محل فطائر «تيبيستي». المكان من الداخل كبير وفيه عدد من الترابيزات لو عاوز تأكل داخل المحل، لكن أغلب الناس بـ تأخذ طلباتها تيك آواي وفيه توصيل طلبات للمنازل اللي هو أساس شغل المطعم. وممكن تأخذ كام ساندويتش وتقف تأكل أمام المحل في عربيتك. أول ما تشوف كلمة «زنجر» على المحل أكيد هـ تتوقع دجاج مقرمش بالخلطة السرية زي بتاع كنتاكي، لكن هنا مافيش خلطة سرية، ولا فيه دجاج أصلًا، فيه كبدة ومخ وجمبري وسمك فيليه وسبيط مقرمش وكل حاجة لكن مافيش حاجة "زنجر" زي ما إحنا فاهمين. ومع ذلك قولنا نجرب، ودخلنا أخذنا مكان على أحد الترابيزات وطلبنا وجبة "زنجر" برضه اللي بـ 20 جنيه وبـ يبقى فيها أرز وبطاطس محمرة وسلاطات بجانب اختيارك من الكبدة او الجمبري أو السمك، إحنا أخذنا وجبة جمبري مقلي، وطلبنا طبق مشكل من الكبدة والمخ (الكيلو 120 جنيه). أجمل حاجة السرعة في الأداء، 5 دقائق وكل الأكل كان أمامنا وتشكيلة رائعة من السلاطات والباذنجان والخيار المخلل وسلاطة الكبدة. الكمية في الوجبة كويسة جدًا بالنسبة لمبلغ الـ 20 جنيه، والجمبري كان متوسط الحجم أو أقل من المتوسط شوية وكان مرشوش عليه خلطة من التوابل والكمون خلت طعمه مميز بس ما كانش فيه أي حاجة سبايسي في الأكل علشان كده كانوا حاطين لنا قرن فلفل أخضر حار على وش كل طبق علشان اللي عاوز يولع الدنيا. الأرز كان فريش ومفلفل على غير العادة في المطاعم اللي بـ تعمل وجبات بأسعار قليلة. الكبدة والمخ هنا أحسن حاجة ممكن تطلبها من المحل، مُقطعين رقيق قوي ومقرمشين ومش هـ تحس بطعم الزيت أو القلي. والميزان هنا كريم والكيلو بخيره، مع سلاطة الكبدة والطحينة هـ تستمتع بوجبتك مافيش كلام. ممكن تشتري جمبري بالكيلو (الحجم الكبير 140 جنيه) أو (الوسط 110 جنيه) وممكن تشتري أرز بالجمبري (16 جنيه) أو ساندويتشات سبيط أو فيليه (11 جنيه) ونضمن لك أنك مش هـ تقف كثير لحد ما تأخذ طلبك، كله في الإنجاز والطعم كويس وطريقة تقديم الأكل جيدة وفيه عناية بالنظافة وبالخدمة كمان داخل المحل. جرب كبدة ومخ من مكان غير "الشراقوة" اللي مسيطرين على السوق، وأكيد هـ تحب أكلات «زنجر» اللي مش اسم على مسمى زي ما قولنا.

...

ساندويتشات ميرفى: رابس وساندويتشات مضبوطة فى المعادى
اصدرت في: 14/11/2012

فى واحد من أهدأ الشوارع الجانبية الكثيرة فى المعادى هـ تلاقى محل ساندويتشات صغير اسمه "ميرفيز"، أمام المطعم فيه ساحة فناء مودرن فيها مكان وحيد متاح للجلوس، ترابيزتين حدائق مع كام كرسي، من الأفضل أنك تطلب خدمة التوصيل أو تأخذ أكلك تيك أواى لو المكان زحمة، وعلى الرغم من مساحته الصغيرة إلا أن واجهته هـ توصل لك انطباع جيد لما تروح لأول مرة.لما هـ تدخل المكان هـ تحس أنك دخلت مطبخ، هـ تلاقى كاونتر صغير للأكل بـ يفصل بينك وبين الشيف، المنيو صغيرة لكن فيها تشكيلة لطيفة جدًا من الرابس والجريلدوجز Grilledogs والأطباق الجانبية والصوصات والمشروبات والحلويات، كنا مش عايزين نقول على ميرفى أنه المكان الوحيد فى المعادى اللى بـ يقدم ساندويتشات فى الوقت اللى مافيش حاجة أمامك فى المنطقة تقول عكس كده.طلبنا رابس فراخ مقلية بصوص سويت أند ساور (20 جنيه)، حجم كبير لجريلدوج (21 جنيه)، وبطاطس بالجبنة (9 جنيه)، ورابس نوتيلا بالبندق (12 جنيه) علشان ننهى بها زيارتنا، ثلاجة المشروبات مليانة بالمشروبات المعتادة وكمان مشروبات صودا غير معتاد أنك تلاقيها، والمفاجأة أننا دفعنا أقل من 100 جنيه فى وجبة لفردين هناك.وصل أكلنا، للحظة الأولى كنا محبطين من حجم الساندويتشات والأكل اللى أكيد مش هـ يشبع جوعنا فى حين أن حجم البطاطس المحمرة كانت كبيرة وطعمها رائع، لكن للأسف كان عليها صوص جبنة مش جبنة حقيقية سايحة، الرابس كان عيشها سميك وملفوف كويس علشان يضمنوا أن مافيش حاجة تقع أو تخرج من هنا ولا هنا.الرابس والجريلدوج كانوا مقرمشين، وبصرف النظر عن حجمهم كان طعمهم تحفة وشبعونا –وده بـ يفكرنا أننا ما نتخدعش بالحجم، يعني "يوضع سره فى أضعف خلقه"، رابس الفراخ المقلية كان فيها خس طازج واتبسطنا جدًا من اختيارنا لصوص السويت أند ساور، الجريلدوج كانت بالضبط زي ما الهوت دوج المفروض بـ يتعمل صح، فرانكفورت حجمه كبير لونه بمبى محطوط فى رابس دافئة مع المسطردة والكاتشب والبصل المقلى والجبنة. بعد ما قعدنا شوية علشان نعطى فرصة لمعدتنا تهضم فتحنا رابس النوتيلا، العجين كان سميك وعليه الشوكولاتة وقطع البندق وكانت طِعمة جدًا، للأسف بس التعليق الوحيد أنها كانت ملسوعة بدل ما كان المفروض يبقى لونها ذهبي. لكن طعمها كان كويس. لو أنت في يوم كنت عاوز تأكل أكل فى السريع ومختلف إحنا بـ نرشح لك بشدة "ميرفى" لأنك كمان هـ تقدر تجيب رابس ملفوفة بعناية ممكن تأخذها وتمشي تستمتع بها فى طريقك لو مافيش مكان أو وقت تقعد.

...

برونتو: تيك آواي وخدمة توصيل في زهراء المعادي
اصدرت في: 01/11/2012

"برونتو" يعني "بسرعة" باللغة الإيطالية، الكلمة دي مستخدمة على محلات كثير في مصر مع اختلاف نوع السلع أو الخدمات اللي بـ تقدمها. والمرة دي كان مطعم أكلات سريعة وفطائر وبيتزا، مافيهوش مكان للجلوس، كله تيك آواي أو توصيل. ونقدر نقول أن المقال ده متخصص شوية لأن المطعم اللي بـ نتكلم عنه موجود في مجمع "بيتشو أمريكان" السكني في منطقة زهراء المعادي وهو من أهم أماكن توصيل الطعام في المنطقة المحيطة الهادئة جدًا، وقليلة المحلات جدًا جدًا، وبـ يعتمد عليه السكان هناك في الأوقات المتأخرة لأنه شغال 24 ساعة، وكمان لأنه بـ يعمل كل أصناف المأكولات والوحيد من نوعه في الحي هادئ. وبـ نقول أن المقال متخصص لأنك مش هـ تعدي على «برونتو» أو تتصل به إلا لو كنت عايش هناك أو رايح لحد من أصدقائك في المربع ده لأن مافيش حاجة ثانية تتعمل هنا غير السكن والزيارات العائلية.المطعم صغير وتصميمه زي أي محل بيتزا أو فطاطري ممكن تشوفه، لكن الجديد هنا أنه بـ يعمل وجبات دجاج روستو وكباب حلة وبانيه وسمك فيليه مع الأرز بالخلطة والخضروات، بجانب الباستا والنجرسكو وأشكال مختلفة من المعجنات، وهـ تلاقي كل أنواع السلاطات والمقبلات والبيتزا الشرقي والإيطالي والفطائر الحلوة والحادقة وكريب وساندويتشات.جربنا خدمة التوصيل واتصلنا عملنا طلب لما كنا في بيت قريب من المجمع السكني اللي قولنا عليه وحسبنا الوقت اللي هـ يوصل لنا فيه وكان تقريبًا 45 دقيقة. بس ده لأن الطلب كان عبارة عن وجبة رول دجاج مخلي ومحشي (33 جنيه) مع الأرز بكبدة الدجاج، وفطيرة شرقي باللحوم حجم كبير (39 جنيه) وإسباجيتي بالجبنة الرومي (6 جنيه) وكريب بالشوكولاتة (13 جنيه) والمكسرات لزوم التحلية، طلب كبير وفيه شغل؛ فـ توقعنا بعض التأخير.الصنعة وشطارة الشيف ظاهرة في كل الأكلات، رول الدجاج أكلة مش سهلة ومع ذلك طلعت تحفة وبهاراتها تمام ومخدومة كويس قوي، والأرز بالخلطة كان لذيذ وكثير. الفطائر والمكرونات هي لعبة «برونتو» وما تفاجئناش لما لقيناها حلوة وغنية بالحشو والجبن السايح والمذاق الأصلي للفطيرة الشرقي. والسلاطات (الطماطم والطحينة) معقولة بس مش بجودة الأكلات الرئيسية. طبعًا فيه حجمين للبيتزا أو الفطير والمكرونات والساندويتشات، واللي تأكدنا منه في تجربتنا دي أن الشيف شاطر جدًا في كل المأكولات الحادقة والأطباق الرئيسية، لكن المأساة كانت في كريب النوتيلا بالمكسرات والموز اللي طلبناه وما قدرناش نأكل منه قضمتين. عجين سميك ومش مستوي خلانا مش قادرين نمضغ ولا فتفوتة، وتخلصنا منه كله رغم كل الشوكولاتة والمكسرات اللذيذة اللي عليه. «برونتو» حل سهل وسريع لما تتزنق في عزومة أو لما البيت يكون مافيهوش أكل أو الأكل اللي فيه مش على مزاجك، اتصل أو عدي عليهم لو كنت قريب وهـ تلاقي هنا كل ما لذ وطاب وبأسعار هينة ما تبوظش ميزانية الشهر. أكيد كل منطقة فيها واحد زي «برونتو»، هـ نحاول نعدي على كل حي ونكتشف لكم «برونتو» الخاص بها.

...

الشاميات السورية: سحور تقليدي وخفيف في المعادي
اصدرت في: 25/07/2012

هو ليه السحور مش بـ يحلى غير في الشارع! أو بمعنى أصح مش داخل المحل أو المطعم، إنما في الهواء الطلق أو الخيمات الخارجية أو حتى على رصة الكراسي والترابيزات اللي على الرصيف اللي أمام المحل. أول ما بـ نلاقي محل صغير أو عربية فول وحولها ترابيزات كثير وجرسونات بـ يلفوا عليهم بالأكل والشرب نفسنا بـ تتفتح وبـ نعتبر ده الشكل المثالي للسحور. قريب من كورنيش المعادي وتحديدًا في شارع طريق مصر حلوان الزراعي وأمام «بيت الدونتس» فيه مطعم صغير اسمه «الشاميات السورية» اللي واضح من اسمه هو متخصص في إيه، لكن في الأيام الأولى في رمضان مش بـ يقدم غير منيو السحور المصري الخالص من فول وفلافل وبطاطس وباذنجان، لكن خلال أيام هـ يرجع يقدم كل أنواع الأكل السوري واللحوم والمقبلات ثاني. لكن في زيارتنا دي ما كانش فيه أي حاجة لها علاقة بالمطبخ السوري غير الفلافل السورية اللي بـ تبقى شبه صوابع الكفتة. لكن اللي عجبنا هناك هو القعدة على جانب الطريق وسط العائلات والشباب اللي بـ يحبوا ينزلوا يتسحروا بره. مافيش مظاهر رمضانية خالص، لا زينة ولا فوانيس ولا أغاني ولا راديو ولا تليفزيون، منك للشارع على طول ومش هـ تعمل أي حاجة هنا غير أنك تأكل وتشرب بيبسي بعد الأكل، بس هـ تنبسط والأكل والقعدة هـ يعجبوك. طلبنا من الجرسون الوحيد اللي في المحل ينزل لنا وجبة سحور متكاملة، أطباق فول بالزبدة (4.5 جنيه) بيض بالبسطرمة (5 جنيه) وجبنة قريش وبطاطس محمرة وفلافل سوري (3 جنيه) وسلاطة خضراء وباذنجان مخلل (2 جنيه). أسعار ظريفة جدًا بالنسبة للمعادي وبدأنا أكل بعد ما عملنا الطلب بـ 5 دقائق بس. الفلافل السوري خطيرة ومشطشطة حسب الطلب، والسلاطات والمخللات حلوة، إنما الفول كان مضروب في الخلاط بزيادة والكمية في الطبق قليلة جدًا، كأنه عصير فول، ولما بـ تأكله بالعيش الشامي الخفيف اللي بـ يقدموه هـ تحس أنك عايز طبقين كمان من الفول ده. لكن البطاطس والأومليت كانوا حلوين وهم اللي شبعونا فعلًا في الوجبة دي. مافيش منيو ولا أي حاجة، الطلبات كلها في دماغ الجرسون، والخدمة سريعة بس كانت ممكن تبقى أسرع لو كان فيه جرسون ثاني مع الشخص الموجود بالفعل. رغم أن الفول كان مش قد كده، لكن عجبنا المكان ونظافته وبـ نفكر نيجي مرة نجربه ثاني لما يكون رجع المنيو السوري بالكامل.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن