نظارات تسوق in Cairo, Egypt

تسوق

ﭭـون دوتش: ملابس رجالي وإكسسوارات في مصر الجديدة
اصدرت في: 09/02/2013

سمعنا عن المحل من بعض الأصدقاء اللي بـ يترددوا عليه بشكل دائم وبـ يعتمدوا عليه بنسبة كبيرة في معرفة ومتابعة خطوط الموضة الجديدة فيما يخص الملابس الرجالي، وبـ يزوروه في بداية كل موسم علشان يعملوا الدعم الضروري لدولاب الملابس الصيفية والشتوية بأسعار معقولة جدًا وكمان يأخذوا فكرة عن اتجاه الموضة في الموسم الجديد. وطبعًا مش محتاجين نقول أن الموديلات هنا مش أصلية ولكنها تقليد عالي الجودة خاصة لماركات زي Burberry وUS polo وغيرها لكن الغريب أن محل «ﭭـون دوتش – Von Dutch» له حوالي 4 فروع في مصر، وله فرع في الولايات المتحدة وأصحابه المصريين قدروا يحققوا نجاح ملحوظ في مجال استيراد وبيع الملابس الجاهزة والإكسسوارات مش على مستوى مصر بس لكن بدأوا البيزنس الخاص بهم خارج الحدود، وكنا محتاجين زيارة للمكان علشان نعرف إيه المختلف في المحل ده.المحل موجود في شارع الميرغني في مصر الجديدة، جنب معارض أبو غالي موتورز، والمحل في الدور الثاني ولازم تدخل مدخل العمارة وتطلع السلالم علشان توصل له. مساحته من الداخل مش كبيرة خالص؛ كأنها شقة بغرفتين، واحدة معروض فيها البول أوﭭر والجاكت وﭭاترينة عرض زجاجية فيها ساعات ونظارات وbracelets معدنية، والغرفة الثانية للجينز والقميص والتي شيرت. هـ تلاقي تشكيلة ضخمة من البول أوﭭرات الصوف والتريكو والقطن الخفيفة عليها علامات بيربري وأمريكان إيجل وبولو، لكن ما تركزش في الماركات وركز في الموديلات اللي هـ تلاقيها أنيقة لأقصى درجة، والألوان واضحة والتفصيلات مضبوطة وجميع المقاسات موجودة، المفاجأة لما تعرف أن فيه خصم بـ يوصل لـ 50 % على عدد كبير من المعروضات في المحل، يعني البول أوﭭر اللي عجبنا جدًا عرفنا أنه بـ 100 جنيه بدل 200 جنيه، وكذلك الهووديز والسويت شيرت التومي اللي بسوستة من الأمام، بنفس السعر، تقريبًا مستحيل تلاقي حاجة زي كده وبالجودة دي بالسعر ده، بس عرفنا أن التخفيضات مش محددة بمدة وأن الأسعار ممكن تتغير في أي لحظة، بس حتى لو الأسعار الموجودة مغرية جدًا ولازم هـ تلاقي حاجة تناسب ذوقك.القمصان بأسعار من 75 لـ 150 بعد الخصم بموديلات جيدة بس مش رائعة زي البول أوﭭرات والسويت شيرت، الجينز هنا من 150 لـ 230 جنيه، ومش كل الجينز بـ يدخل في الأوكازيونات زي ما كلنا عارفين، بس كل القصات هنا skinny أو Slim بزيادة، والألون الموجودة محدودة بس الخامات جيدة برضه. الأحذية واضح أنها من أحسن المعروضات في المحل، ماركات مش معروفة بس تشبه الـ vans والموديلات الإيطالية الكاجوال من خامات الشامواه والجلد المقلوب، وفيه هاف بووت ببوز رفيع شيك جدًا ومش بـ نلاقيه في أي حتة، وألوان غير معتادة زي الأزرق والبترولي، والموديلات دي كانت داخلة في التخفيض وأسعارها بقت 200 جنيه بدلاً من 300 و250 جنيه. وفيه رف واحد بس عليه مجموعة من الأحذية الأقرب للكلاسيكية دي خارج التخفيضات لأنها لسه واصلة المحل. نظارات Ray-Ban وPesrol وCarrera بأسعار من 300 لـ 600 جنيه، وساعات CK وEsprit بأسعار من 450 لـ 900 جنيه. صحيح كل تقليد بس مش أي تقليد، وخلينا واقعيين ونعترف أن في النهاية كله معمول في الصين، المهم عمرها يكون طويل، إنما بالنسبة للأناقة والستايل مافيش أي فرق بينها وبين الأصلية. فيه عدد من إكسسوارات الرجال زي الخواتم والـ bracelets والكابات وبرنيطة شيرلوك هولمز الشهيرة بأسعار من 40 لـ 60 جنيه. تجربتنا كانت غنية جدًا في «ﭭـون دوتش» وقضينا هناك أكثر من ساعة بـ نتفرج على المعروضات وبـ نجربها، وده راجع للخدمة المحترفة للعاملين هناك اللي فاهمين شغلهم كويس وبـ يساعدوا الزبون كما يجب. بـ نرشح لكم المحل ده ودلوقت بالذات علشان تلحقوا التخفيضات اللي عنده، وممكن تأخذوا فكرة من خلال صفحته على الفيسبوك.

...

إيريس ديزاينرز: نظارات أصلية فى الزمالك
اصدرت في: 21/01/2013

من المؤكد أن "إيريس ديزاينرز - Iris Designers" الموجود فى شارع أبو الفدا فى الزمالك أمام سيكويا هـ يثير اهتمام أى واحد يعدى أمامه. بداية الشعار اللى فوق الباب فكرته مبتكرة، عبارة عن خطوط معمولة من اللمبات وبسرعة بـ تعطى المكان طابع روش أنيق، وزجاج العرض الأمامى المشرق بـ يعرض مجموعة من النظارات، مرتبة بطريقة مثالية على أرفف بسيطة من الخشب.اسم إيريس مستوحى من آلهة يونانية خيالية لألوان الطيف، بس دلوقت هو بـ يستخدم كاسم لوصف الجزء الملون من العين. وعلشان كثير مننا مضطر أنه يلبس النظارة -مش باختيار منه- لازم نحس بالراحة لما نلبس حاجة زى دى. وهنا بقى يبدأ دور إيريس ديزاينرز.إيريس ديزاينرز هو مشروع عائلى صغير، وبـ يختاروا النظارات المعروضة عندهم بالواحدة علشان يضمنوا أن مجموعتهم تضم أحسن التصميمات من أكبر المصممين القديرين. قابلنا واحد من أصحاب المحل كان عنده من المعرفة والحماس اللى يخليه يجاوب على كل أسئلتنا عن الماركات، والموديلات وحتى العدسات سواء بكشف أو من غير. فريق أيريس يقدر يركب أى كشف عدسات على كل أنواع النظارات وحتى على التكنولوجيا الجديدة المضادة للصدمات من هويا.إيريس ديزاينرز مش بس بـ يقدم نظارات طبية، ده كمان عنده مجموعة كبيرة من نظارات شمس شيك من أسماء معروفة زى بلجارى، وبولو، ورالف لورين، وبرادا، وبربيرى، وتوم فورد، ودولشى & جبانا، وبيرسول وملوك نظارات الشمس راى بان وفوج. رغم أن معظم الموجود يناسب السيدات أكثر، فيه كمان مجموعة صغيرة مناسبة للرجال وللجنسين. أسعار نظارات شمس راى بان وفوج تتراوح بين 780 و1500 جنيه على حسب الموديل. أيريس كمان عنده عدسات ملونة غير تقليدية، تقدر تضيف لمسة مختلفة على أى نظارة تختارها، وكمان تكنولوجيا العدستين الإضافية الحصرية القابلة للتبديل من راى بان بسعر 2460 جنيه.عدسات مدورة شبه نظارة هارى بوتر لسبب مجهول واضح أنها بدأت تدخل حيز الموضة للرجال والسيدات. نزلت بيرسول نظارة بإطار رفيع سعرها 1915 جنيه. أيريس ديزاينرز كمان بـ يقدم حصريًا نظارات روشة من الخشب صديقة للبيئة من شوود بعدسات تقلل من انعكاس الضوء إما مدورة (2500 جنيه) أو مربعة (2100 جنيه).مجموعة كبيرة للسيدات برضه من النظارات المبهرة. إحنا تقريبًا جربنا كل الموجود وأضفنا معظمهم لقائمة أحلامنا من المشتريات. فى الأول شوفنا نظارة شمس كلاسيكية كبيرة لونها أسود من بلجارى سعرها 3320 جنيه وواحدة بنفس الحجم من برادا لونها غريب سعرها 1970 جنيه. كمان وقعنا فى حب موديل Mediterranean من بلجارى " sporting stones and gems on the temples" –مشهورين من الإعلانات- بسعر 3290 جنيه. وبجانب ده، دولشى & جابانا نزلت نظارة رائعة على الموضة، على شكل جلد الفهد ودى سعرها كان 2900 جنيه.وقت زيارتنا كانوا منزلين عرض لطيف؛ أخذنا 5 ستيكرات على شكل يد إبهامها بـ تشاور لفوق زى شعار لايك على الفيسبوك علشان تختار بهم نظارتك المفضلة. كل ستيكر منهم بـ يقدم تخفيض 5%، وكده نظريًا نقدر نأخذ خصم 25% على سعر أى نظارة.ورغم أن النظارات فى إيريس ديزاينرز تعتبر من فئة السعر العالي، لكن الأناقة والجودة المقدمين من مصممين عالميين تستحق ثمنها.

...

ثريا مصطفى: زيارة ثانية لمحل نظارات كلاسيكية رخيصة فى وسط البلد
اصدرت في: 29/09/2012

البائعين القدامى فى القاهرة لسه مُصرين أن القديم مافيش أحسن منه، وإحنا موافقين على الكلام ده. معرض بصريات “ثريا مصطفى” فى وسط البلد بـ يخلينا مشدودين دائمًا بكمية النظارات الكلاسيكية الرخيصة اللى خلتنا نتفرج لساعات.المحل مكانه بعد بار "الحرية"، وحسب كلام مسئولة المبيعات اللطيفة إيمان رأفت أن ده أول محل للنظارات يفتح فى القاهرة واللى فتحه هما جدودها لما اختاروا مكانه من حوالى 70 سنة. مُعلق على الحائط صورة جدها وهو لابس كاسكيت من موضة الخمسينيات مغطية جوانب وجهه.فى سنة 1968، ثريا مصطفى والدة إيمان تولت المسئولية، ورجعت مهنة العائلة من جديد بعد ما حطت اسمها وبصمتها عليه من ناحية الجودة، والنظارات المستوردة من أحدث الماركات العالمية زى جاك فاث Jacques Fath، وموريل كوتيه Morel Cottet وجاى لاروش Guy Laroch.مجموعة ثريا الكبيرة من الإطارات الأصلية من أزمنة مختلفة لدرجة أنها بطلت تنزل، بس هى لسه بـ تُباع عندها لحد دلوقتى. نظارة دايتونا كوتيه من الثمانينات، اللى لو طلبتها أون لاين هـ تكلفك مئات الدولارات، سعرها عندها 275 جنيه؛ وواحدة ثانية جاى لاروش بـ 150 جنيه بس.وعلشان تمشى مع الموضة مجموعة ثريا مصطفى بـ تغطى مجموعة من النظارات من الأفياتور والواى فاريرز wayfarers لغاية نظارات المغنى جون لينون المدورة المميزة. لو عاوز شكلك يبدو واحد ذكى، أو واحد ماشى مع الموضة أو حتى تاجر مخدرات، ثريا مصطفى هى المكان المناسب.أي موديل ممكن يتجهز لك سواء بعدسات خاصة، عدسات طبية، عدسات بـ تغير لونها في الشمس، أو حتى عدسات مصبوغة بألوان كلاسيكية، واللى بـ يشتكوا من قصر أو طول النظر يقدروا يروحوا عند ثريا مصطفى بنظارتهم القديمة وهم هـ يقيسوها ويضبطوا العدسة من غير كشف نظر جديد وبـ تجهز فى حوالى ساعتين.خلال زيارتنا، إيمان قدمت لنا نصائح قيمة وصادقة من غير أى غرض هدفه أننا نشترى أكثر. بعد ثلاث ساعات من خلع ولبس نظارة وراء نظارة لدرجة أنهم خلونا نروح على كاونتر العرض علشان نختار بنفسنا، إحنا كنا فعلاً مفتونين بالمعروضات ونفسنا نشترى كل الموجود، وأخيرًا فاصلنا في خمس نظارات إيطالى وفرنساوى كلهم بـ 650 جنيه، من ضمنهم نظارة ماركة لاكوست وعلى ستايل الواى فاريرز ذراعها رخامى لونه أزرق مخضر سعرها 350 جنيه. بصراحة ما قدرناش نقاوم.بأسعار تبدأ من 75 جنيه لقطعة مناسبة ومريحة، وتسليم فى نفس اليوم، هـ تفضل ثريا مصطفى هى المناسبة لرغباتنا فى حدود الميزانية. علشان كده لازم تزور المكان وتشوف المجموعة الكبيرة، بس لو سمحت، خذ وقتك وحاول ما تشتريش كل الموجود.

...

جولي: نظارات شمسية وطبية في الدقي
اصدرت في: 04/04/2012

فروعه منتشرة في كل أحياء القاهرة، له لوجو مميز بالألوان الفضي والأحمر تقدر تميزه من بعيد، بصريات «جولي- Joly» واحد من أهم محلات النظارات الشمسية والطبية في مصر، وبسهولة ممكن تروح تختار من بين كل الموديلات العالمية الموجودة عنده وبـ تتجدد بشكل موسمي، وطبعًا الخدمة هناك احترافية ومتخصصة وده بـ يسهل مهمتك أكثر وأكثر. زرنا فرع الدقي الموجود في شارع مصدق، المساحة من الداخل مش كبيرة لكن الستاندات موزعة بشكل منظم، وكالعادة هـ تلاقي موديلات الموسم الجديد New Arrival في أول ستاندات هـ تقابلك عند مدخل المحل، وكان فيها التشكيلة المعتادة من Police وPrada وموديلات خاصة للسيدات من المصممين العالميين زي Chanel و Bulgari واللي أسعارهم كانت بـ تتراوح ما بين 2000 لـ 3000 جنيه. وستاند عليه موديلات الأﭭياتور التقليدية للـ Ray-Ban اللي مش بـ تتغير أبدًا، لكن عجبنا موديلات جديدة فيها عدسات خاصية الاستقطاب أو Polarized Sunglasses ودي بـ تتلخص في حجب الأشعة الضارة عن العين وتجميع الضوء بشكل معين لرؤية أفضل على الطريق، وبـ تمنع رؤية السراب على الطرق السريعة وفي الصحارى وهكذا، ممكن تعمل اختبار سريع وأنت في المحل وتجرب تلبسها وتشوف كتابة مش واضحة على ورقة معينة، وبـ تظهر الكلمات بوضوح بمجرد ما تلبس النظارة. موديلاتها بألوان مختلفة منها الأزرق والرمادي والأسود وأسعارها بـ تبدأ من 1100 جنيه للشنبر البلاستيك وباقي الموديلات من 1700 لـ 2500 جنيه. دورنا على موديلات Oakley اللي بـ نحبها لقينا ستاند في آخر المحل لكن ما كانش معروض موديلات كفاية من النظارات الشمسية وكان كل الموجود شنابر طبية بألوان جذابة وأسعار بـ تبدأ من 1000 جنيه، وعرفنا أن قريب هـ ييجي لهم موديلات Oakley الشمسية الجديدة. فيه عرض كان اتعمل في عيد الأم اللي فات وهو لسه مستمر لحد دلوقتي وهو عرض 3x1 اللي فيه تقدر تأخذ أي نظارة سعرها لا يزيد عن 850 جنيه لو اشتريت أي نظارة بنفس السعر أو أكثر، وبـ تأخذ كمان قسائم شراء لمطاعم «يتسا» اللي في مول العرب في 6 أكتوبر بقيمة 200 جنيه، بصراحة عرض مغري، وهـ تلاقي موديلات كثير شيك جدًا بالـ 850 جنيه أو أكثر شوية، ومعظمها من ماركة Tommy Hilfiger المعروضة على استحياء في أحد جوانب المحل. كل الماركات موجود منها الطبي والشمسي زي Gucci، Dior، Tiffany & Co وPolar وغيرهم، وطبعًا «جولي» بـ يعمل العدسات الطبية بجودة عالية جدًا، والاستلام في نفس اليوم. الموظف اللي في الفرع كان مهذب وسابنا على راحتنا في الفرجة والتجريب، لكن المشكلة أنه لازم يبقى قريب جدًا مننا طول الوقت وطبعًا دي سياسة المحل، ودي حاجة قد تكون مزعجة لبعض الناس.

...

سنتر بوينت: مول داخل مول سيتي سنتر المعادي
اصدرت في: 04/03/2012

تعودنا مؤخرًا نلاقي ماركات عالمية مش موجودة في أي حتة داخل مبنى معادي سيتي سنتر العملاق الشهير بـ «كارفور». آخر اكتشافاتنا كان مول داخل المول. «سنتر بوينت – Centerpoint» سلسلة محلات لها فروع في كل عدد من دول الخليج والشرق الأوسط، وأخيرًا بقى لها فرعين في مصر، واحد في الإسكندرية والفرع الوحيد في القاهرة موجود في كارفور المعادي. البداية كانت بفرع صغير في البحرين من حوالي 40 سنة وكان فيه ماركة واحدة بـ تُباع في المول وهي «بيبي شوب» بعدها بدأ في التوسع تدريجيًا لحد ما وصل للشكل اللي هو عليه دلوقتي وهو عبارة عن مول مكون من طابقين، بـ يضم 4 ماركات كل منها متخصص في نوع معين من الملابس والأدوات، والماركات الموجودة هي «بيبي شوب - Babyshop» لملابس الأطفال وأدواتهم و«سبلاش – Splash» للملابس الرجالي و«شو مارت – Shoe Mart» للأحذية الرجالي والحريمي والكوتشي و«لايف ستايل – Lifestyle» للتحف والإكسسوارات المنزلية. «سنتربوينت» فتح مكان «زارا - Zara» اللي كان موجود في نفس المكان قبل ما يقفل فرعه، المحل مساحته كبيرة وفيه الدور الأرضي مخصص للملابس والأحذية والدور العلوي فيه أدوات منزلية وأدوات أطفال. الـ 4 ماركات اللي ذكرناهم موزعين بشكل واضح في أركان المول وهـ تلاقي كل ماركة عاملة عروض وتخفيضات خاصة بها بشكل مستقل عن مظلة «سنتربوينت». فيه بعض ماركات ثانية واخدة أركان في المحل زي «دي إن إم – DNM» للأحذية والإكسسوارات و«أديداس» و«بوما». المكان هـ يفكرك كثير بمحلات «إتش & إم – H&M» و«ماكس – Max» اللي سبق وكتبنا عنهم في كايرو360، نفس موديلات الملابس والأسعار وحتى طريقة توزيع المعروضات وطريقة تعامل موظفين البيع. وفيه سمة مميزة للمكان هي أن غالب عليه الطابع الخليجي في بعض موديلات الملابس، لكن في نفس الوقت هـ تلاقي كل التصميمات والأذواق بس هـ تتعب شوية في البحث لأن الأرفف والأركان كثير فعلًا. عجبنا بشكل خاص موديلات «سبلاش» الرجالي الكاجوال (مافيش في المول ملابس كلاسيك) والأسعار كانت مغرية جدًا. بول أوﭭر صوف خفيف بألوان مختلفة بسعر 250 جنيه، والجينز بأسعار من 200 لـ 350 جنيه، وفيه قسم للملابس الداخلية والإكسسوارات الرجالي من «سبلاش» وبما أنه عامل تخفيضات بـ توصل لـ 50 % بـ نرشح لكم زيارة القسم ده لأن الموديلات حلوة والأسعار ممتازة. في «بيبي شوب» في الدور العلوي هـ تلاقي بجانب الملابس وأدوات الأطفال الأساسية فيه أثاثات وتجهيزات الحضانات ونوادي الأطفال، وبرضه فيه خصومات كبيرة يا ريت تلحقوها. «لايف ستايل» فيه ديكورات منزلية وفواحات وشموع شيك جدًا وإكسسوارات وتابلوهات وشنط هدايا ومكياج هدايا لكل الأعمار خاصة من سن 16 لـ 21 سنة. مش هـ ينفع نتكلم عن أسعار كل حاجة في «سنتربوينت» العملاق، لكن يكفي أننا نقول أنك ممكن تعمل جولة تسوق كاملة داخل المكان وما تحتاجش تروح أي محل ثاني، وأي كانت ميزانيتك ممكن تلاقي حاجات على قدها. هـ يلفت نظرك في المكان كمية اللافتات اللي عليها كلمة (Sale) باللون الأحمر، وكأن المكان فتح بس علشان يعمل تخفيضات. لكن ده طبعًا في صالح المستهلك في النهاية. «سنتربوينت» دلوقتي في كايرو، إضافة جديدة لسلاسل المتاجر العملاقة في العاصمة، منتظرين فروع أكثر في المستقبل، وبـ نقول لكم أن المكان بجد يستحق الزيارة.

...

ثريا مصطفى للنظارات: أجمل نظارات كلاسيكية
اصدرت في: 30/06/2011

كلاسيكيات الستينيات والتسعينيات٬ والنظارات الغير تقليدية اللي كانوا بـ يلبسوها الفنانين والمشاهير٬ كل ده موجود في محل «ثريا مصطفى». والنظارة عامةً سواء للحماية من الشمس أو لزوم الشياكة أو حتى طبية٬ دايماً بـ تقول كتير عن الشخص اللي لابسها٬ فكل ما الإختيارات بـ تزيد كل ما بـ يكون أحسن. بالصدفة البحتة إكتشفنا المحل ده اللي فيه من الكلاسيكيات ما يبهر بالقدر الكافي اننا نعتبره كنز للي غاوي نظارات. مش كده وبس ده كمان الأسعار الهايلة والخدمة مش متكلفة ومريحة فـ بـ تزود من قيمة المكان. قريب من قهوة الحرية في باب اللوق٬ ومنظره من بره غالباً مش هـ يثير عندك أي فضول ولا هـ يخليك عاوز تدخله، لكن لو بـ تدور على حاجة مميزة مفيش منها إثنين٬ مش محتاج تدور في حتة تانية. الأرفف عليها نظارات من جميع أنحاء العالم في كل الأشكال والأحجام. لو بـ تدور على حاجة مطرقعة٬ كبيرة وعدساتها ألوانها مبهجة٬ أو بـ تدور على «أڤياتور - Aviator» قديمة كلاسيكية٬ هـ تلاقي اللي انت عاوزه عند «ثريا». لو محتاج نظارة طبية ونظرك ضعيف زي حالاتي، بـ ياخدوا النظارة بتاعتك يقروا من عليها نظرك ويعملولك واحدة جديدة٬ ولو مش معاك النظارة ولا الكشف هـ يرشحولك دكتور عيون كويس تروح له. الخدمة كفء وبـ يسلموا النظارة في أقل من يوم. لو متلخبط ومش عارف تختار إيه «ثريا» شخصياً هـ تساعدك وتقولك رأيها بصراحة. هـ تشجعك تجرب حاجة مجنونة٬ وهـ تقولك على الحاجات اللي شكلها جديد وفي نفس الوقت لايقة على وشك. شنبر وعدسات مضادة للإنعكاس (Anti-reflection)٬ كانوا بـ250 جنيه بس. ونظارة شمس «أڤياتور - Aviator» ذهبي كانت بـ75 ٬ السعر لوحده خلانا عارفين اننا هـ نرجع تاني قريب. عدي على «ثريا» وألقطلك نظارة من النظارات الرائعة اللي هي بـ تبيعها وضيف على الستايل بتاعك لمسة مختلفة وجذابة.

...

سي & كو: نظارات طبية وشمسية في المهندسين
اصدرت في: 11/06/2011

في شارع لبنان الحيوي جداً في منطقة المهندسين أحد فروع سلسلة محلات بصريات «سي & كو – C & Co» اللي إنتشرت بشكل كبير في فترة قصيرة. فروع في مصر الجديدة ومدينة نصر وداخل كل المولات المعروفة، وكل الفروع ليها نفس التصميم والديكور من جوة تقريباً. واجهة المحل باللون الأبيض واللوجو المميز مرسوم باللونين الأحمر والأبيض على الخلفية باللون الأزرق. المدخل إزاز والكونتر بـ يكون أول ما تدخل المحل على اليمين، وباقي أركان المحل وجدرانه كلها عليها استاندات معروض عليها النظارات والشنابر. بعد المدخل بـ تنزل درجتين سلم عشان تدخل مساحة مربعة تعتبر هي مكان العرض الرئيسي في المحل وطبعاً كل حيطة عليها مراية وكل ستاند عليه بوستر بتاع ماركة معينة بس الحقيقة أن مش كل النظارات تحت البوستر ده على نفس الستاند بـ تبقى من نفس الماركة، ماعدا ستاند «Police» وصورة "تامر حسني" نجم دعاية الشركة في الشرق الأوسط حالياً على البوستر اللي فوق الستاند؛ كل النظارات والشنابر هنا «Police» فعلاً. وأسعارها بـ تبدأ من 1500 جنيه لحد 2500 جنيه. كل الماركات العالمية تقريباً موجودة، بس لفت نظرنا موديلات ماركة «Ermenegildo Zegna» الإيطالية الكلاسيكية بألوانها الأسود والبني، واللي متصممة عشان تليق أكتر مع البِدل والملابس الـ (Semi – Formal) وكان سعر واحد من موديلاتها اللي عجبتنا قوي 2500 جنيه. بما أن مفيش حد يحب يدخل محل بصريات وما يلاقيش نظارات «راي بان – Ray Ban» فيه ستاند كبير عليه كل موديلات 2011 من الماركة المفضلة عند المصريين وأسعارها بـ تبدأ من 1000 جنيه وأنت طالع. فيه موديلات كتير زي «D&G» و«GUCCI» و«Fossil » و«Chanel» و«Bvlgari» وكلها بموديلات ترضي جميع الأذواق، الكاﭼوال بزيادة والوقور بزيادة والمعتدل، وكلها معاها الضمانات بتاعتها. وفيه من نفس الموديلات دي شنابر طبية شيك قوي وطبعاً فيه تركيب عدسات وبـ يختلف سعرها حسب الموصفات اللي العميل بـ يحددها، بس هم بـ ياخدوا الكشف الطبي ويعملوا العدسات الطبية فوراً. الخدمة جيدة بس إحساس إن فيه حد ماشي وراك في كل ركن في المحل ممكن يفقدك الشعور بالراحة في إنك تتفرج وتجرب الموديلات براحتك، موظفين البيع فاهمين ومتعاونين جداً، بس بـ يكون أفضل لو وقفوا على مسافات كافية من العميل وينتظروا لو هو سأل على حاجة يمدوه بالمعلومة. عموماً هي دي سياسة المحل في خدمة العملاء وبـ تختلف من مكان للتاني. أثناء زيارتنا للفرع كان فيه عرض ظريف هو أنك تجمع الأرقام الفردية لتاريخ ميلادك وحسب الرقم الناتج بـ تاخد بيه خصم، يعني لو المجموع 50 مثلاً بـ تاخد خصم 50 % وهكذا. وده مستمر حتى نفاذ الكمية وعلى موديلات معينة، وفيه طبعاً ماركات خارج كل العروض وأسعارها خيالية ودي موضحة في قائمة محطوطة على الكاونتر عشان ما تبنيش آمال قبل ما تدخل المحل. «سي & كو – C & Co» سلسلة محلات بصريات هـ تلاقي فيها كل اللي تتخيله في عالم النظارات وبموديلات السنة اللي إحنا فيها وموديلات السنين اللي فاتت بأسعار أقل شوية.

...

بصريات التيسير: نظارات تقليد شيك وغالية
اصدرت في: 18/05/2011

الشمس في القاهرة موجودة طول السنة، صيف شتا، بالنهار وبالليل أحياناً!! النضارات الشمس للأناقة مش بس عشان الشمس. لما نكون بـ ندور على نضارة راي بان Ray Ban أﭭياتور أو شنبر ديور Dior حاجات زي دي أسعارها مش هـ تقل عن كام ألف جنيه والقرار هـ يبقى صعب أنك تشتريها ولا لأ، طيب أيه المانع انك تجيب تقليد ممتاز للحاجة دي وبسعر لا يقارن بالأصلي؟ «التيسير» موجود على ناصية شارعين نوبار ومحمد محمود في وسط البلد، بـ يبيع نضارات شمس تقليد بس بجودة عالية جداً، بس الأسعار مش رخيصة زي ما تتخيل. المحل صغير وبالتالي التشكيلة الموجودة مش كبيرة بس هـ تلاقي معروضات مش موجودة في سلاسل محلات بصريات كبيرة في القاهرة. مثلاً في نضارة تقليد لـ روبرتو كاڤالي Roberto Cavalli سعرها 420 جنيه ومن النوع الكبير الموضة (بقالها كام سنة ولسة مكملة) مدارية نص الوش بالمعنى الحرفي. المجموعة اللي موجودة فيها أشكال ظريفة مش تقليدية وبالذات الموديلات اللي فيها شغل حوالين العدسات وحليات معدنية والشنابر الأبيض والأسود، أشكال متطورة وحديثة جداً، ومهما كانت النضارة خيالية ولفتت إنتباهنا بس مش لدرجة 420 جنيه لحاجة تقليد. فيه تقليد لأشكال الـ راي بان أﭭياتور ( aviator ) المشهورة بس هنا بقى الشنبر باللون الوردي والأبيض، وطبعاً في الشنابر الفضي والذهبي العادية ودي أسعارها 240 جنيه. وبنفس السعر هـ تلاقي تقليد موديل الـ وايفيرر Wayfarer الـ راي بان وإشترينا منهم شنبر لونه نبيتي. فيه كمان تقليد لـ أرماني Aramani وشانيل Chanel و دي&چي D&G . المحل مش بـ يعمل نضارات طبية بس لو رحت معاك العدسات بتاعتك ممكن يركبوها على أي شنبر. هدوء المحل ومساحته الصغيرة تعتبر ميزة خاصة لو ماكنتش عايز تشوف معروضات وماركات كتير تخليك متردد، والعاملين في المحل متعاونين ومستعدين يردوا على أي إستفسار. رغم الأسعار الغالية بس لازم نقول أن التقليد معمول بحرفية شديدة ومن غير أي عيوب في الصناعة او التصميم، يعني لو العين مش خبيرة مش هـ تقدر تفرق بين الشنابر الأصلي والتقليد. لو بـ تدور على نضارة شمس بـ موديلات عالمية وعليها أسامي أشهر المصممين بغض النظر عن الأصالة، روح على «التيسير».

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن