ملابس رجالي تسوق in مصر الجديدة Cairo, Egypt

تسوق

لاكوست: الماركة العالمية الأسطورية في سيتي ستارز، مصر الجديدة
اصدرت في: 04/09/2013

مع أكثر من 1000 محل حول العالم - اثنين منهم بقوا من أعضاء المشهد التسوقي في القاهرة، شعار لاكوست الصغير منور يافطة المحل زي المنارة بأنوار ساطعة مع واجهات عرض بـ تبرق. اليونيفورم بتاع لاكوست مسيطر على كل أنحاء المحل مع كثرة التي شيرتات البولو بكل ألوانها المختلفة، طبعًا الشعار الرهيب للتمساح منور صدور معظم التي شيرتات إن ما كانش كلها، التداخل موجود في كل قسم وده خلانا نأخذ لحظات علشان نقدر نميز بين الملابس الرجالي والحريمي، وقت زيارتنا كان فيه مجموعة من المعروضات عليها خصومات، وده كان مُعلن داخل المحل. تي شيرتات البولو للسيدات أعلى سعر لها 995 جنيه في الوقت اللي التي شيرتات الثانية بعلامة التمساح المميزة بـ تُباع بـ 1160 جنيه، أسعار التي شيرتات 100 % قطن سعرها 790 جنيه وكان باين قوي قد إيه ملمسها ناعم زي التشكيلة الأصغر بالخطوط الصفراء العادية، التي شيرتات بنصف كم (بداية من 440 جنيه) والفانلات بحمالة (428 جنيه) وتي شيرتات بأكمام طويلة (665 جنيه) وكان فيه عليها عرض بسعر 590 جنيه، البلوفرات الصوف بـ يوصل ثمنها 1720 جنيه، أما فساتين النهار بألوانها البحرية والأزرق والأبيض المخطط ثمنها بقى 1370 جنيه بعد ما كان 1895 جنيه، القمصان المخططة بلونين بسعر 1116 جنيه والجينز الكاجوال يبدأ بـ 1000 جنيه. في مواجهة قسم السيدات قمصان البولو للرجل سعرها بـ يوصل 1000 جنيه، بالتقريب لأسعار القمصان الثانية لمحنا قميص بولو بألوان البرتقالي والأسود بسعر 1290 جنيه وقميص أسود بأزرار كاملة بـ 1292 جنيه، مجموعة صيفية من القمصان الكاجوال بأكمام قصيرة بسعر 770 جنيه وبنطلونات زرقاء بأسعار من 1220: 976 جنيه وشورت بحري من 1390: 875 جنيه، استعدادًا لموسم الشتاء شوفنا جاكيت بسعر 1895 جنيه، كمان فيه قسم للأحجام الأكبر شوية بمجموعة من قمصان البولو وأكثر من موديل للجينز، اللي ثمنها بقى 965 جنيه بدل 1495 جنيه. قسم الأطفال صغير قوي لكن بـ يعرض مجموعة مختلفة من تي شيرتات المرح (بداية من 400 جنيه) وقمصان صغيرة (بداية من 600 جنيه) قمصان النهار للبنات (810 حنيه) وفانلات بحمالات (435 جنيه)، مرة ثانية قمصان البولو العادية كانت بسعر 845 جنيه والإصدارت المميزة من شواروفسكي كريستال كانت بـ تُقدم في علبة هدايا بسعر 990 جنيه. الأحذية بـ تيجي في أكثر من ستايل مختلف؛ المسطح (760 جنيه) والـ canvas بـ 515 جنيه وأحذية الـ plimsols للسيدات (515 جنيه) مع الأحذية المطاطية للسيدات والرجال بأسعار تبدأ من 230 جنيه، تشكيلة الرجالي بـ تضم أحذية كاجوال (بداية من 1140 جنيه)، أحذية رياضية ( بداية من 900 جنيه) والأسبترينات (590 جنيه)، أحذية الأطفال كانت ظريفة قوي بأسعار من 390 جنيه وأحذية البيبهات بسعر 530 جنيه، كمان المحل بـ يضم مجموعة مميزة من الإكسسوارات الجلدية زي المحافظ والأحزمة وشنط اللاب توب وشنط عامل البريد (1180 جنيه). محل لاكوست فعلًا محل بـ يبيع حاجات تدل على سمعته وعدد كبير من اللبس الموحد لكن بأعداد أقل شوية، كنا نحب نشوف أكثر من كده، الأسعار برضه عالية قوي وبكده الواحد بـ يتمنى أن ده ينعكس على مستوى جودة المعروضات.

...

ديفاكتو: ماركة ملابس تركية فى مول صن سيتى بهليوبوليس
اصدرت في: 27/08/2013

من الصعب أنك توصل لصفقة كسبانة من أولها لآخرها فى محلات القاهرة، والسبب أن الأسعار القليلة غالبًا معناها جودة قليلة. ومع إعلانهم عن تخفيضات شديدة على كل معروضاتهم طلعنا على محل الملابس التركى "ديفاكتو "DeFacto- فى مول صن سيتى في هليوبوليس، وشعارنا هو "أهلاً بالتخفيضات". وبعد تأسيسها سنة 2003 زادت شعبية الماركة التركية وبدأت تتوسع للسوق العالمية. المحل مساحته واسعة مقسمة تقريبًا لنصفين: رجالى وحريمى. مئات من الرفوف المنظمة فوقها لوحات لونها أحمر مشرق مكتوب عليها "تخفيضات"، وعليها الأسعار بشكل واضح. موظفين بملابس موحدة بـ ينظموا المعروضات ويعرضوا مساعدتهم على الناس كل فترة، لكنهم فى نفس الوقت مش مميزين، وبكده قدرنا نتفرج براحتنا. حصل لنا حالة من الانبهار بمجموعتهم من الملابس، منها تي شيرتات سادة رجالى وحريمى بياقة دائرية وحرف V، بكل المقاسات والألوان (58: 78 جنيه). نفس الكلام بالنسبة للتي شيرتات البولو بألوانها المبهجة تبدأ من 79 للحريمى و148 جنيه للرجالى. مجموعة من قمصان بحمالات بتطريزة حريمى سعرها 79 جنيه، وتي شيرتات رجالى كاجوال بأكمام طويلة ثمنها 99 جنيه. قمصان عليها مربعات كانت موجودة فى كلٍ من القسمين (129: 148 جنيه) ونفس الكلام بالنسبة لبليزرات سمارت كاجوال (398: 499 جنيه). موجود عدد كبير من الجينزات jeggings، leggings وبنطلونات كتان، قسم الرجالى على وجه التحديد مليان بنطلونات جينز، كتان (249 جنيه) وبنطلونات سمارت كاجوال (179 جنيه- 249 جنيه) تقريبًا بكل الألوان اللى ممكن تتخيلها. شوفنا كمان شورتات مقلمة ظريفة سعرها 249 جنيه مع شورتات ثانية مناسبة للبحر. قسم الحريمى مش بس بـ يقدم جينزات (+179 جنيه)، فيه كمان تشكيلة كبيرة من leggings و jeggings بأسعار من 79 لـ 300 جنيه وعدد كبير من جينزات صيفية برسومات ورود (209 جنيه). تنورات جينز بوسط عالى برضه متاحة بألوان سادة، مقلمة وألوان غامقة (179 جنيه) مع تنورات أطول سعرها 218 جنيه. المحل للأسف كان مليان تي شيرتات مبتكرة لكن جودتها سيئة (59: 229 جنيه) منها عليها شخصيات كرتون أو جمل مالهاش معنى. البلوزات (199: 249 جنيه) كانت شوية على الموضة، منهم منقط على شكل جلد الفهد ومنهم بأزرار بألوان مختلفة. كان شيء لطيف أننا نلاقى قمصان تشبه الجينز (179 جنيه) فى قسم الرجالى، قبل ما نلاحظ أنهم برضه عليهم شعار شكله سيء على الصدر. نروح لحاجة أحسن شوية، بلوفرات سادة (+199 جنيه) متوفرة للرجال والسيدات، بنطلونات رياضية حريمى سعرها 129 جنيه وتي شيرتات رجالى لها جيوب ملونة كان سعرها معقول (118 جنيه). كان متوفر تشكيلة بسيطة من الفساتين الكاجوال (+200 جنيه) مع مجموعة محدودة من ملابس الحوامل متعلق عليه "آخر قطعة". قسم الإكسسوارات كان كبير بالنسبة للجنسين، وبـ يضم كل المطلوب؛ شرابات (25 جنيه- 59 جنيه)، أحزمة شيك (79 جنيه- 129 جنيه)، كوفيات خفيفة بألوان مفرحة (68 جنيه- 99 جنيه)، محافظ وشنط كبيرة وتصميم بسيط (63 جنيه- 119 جنيه)، ساعات ضخمة مبتكرة (278 جنيه) ومجموعة من الأساور الساحرة (69 جنيه) ومجوهرات تقليد. ديفيكتو بـ يقدم تشكيلة ملابس أسعارها مناسبة بمجموعة متنوعة من الألوان، رغم أنهم ممكن يكونوا بعدوا شوية عن منطقة التصميمات الشهيرة اللى على أحدث صيحة. بـ ننصح بالمكان ده للضروريات والإكسسوارات البسيطة.

...

ﭭـون دوتش: ملابس رجالي وإكسسوارات في مصر الجديدة
اصدرت في: 09/02/2013

سمعنا عن المحل من بعض الأصدقاء اللي بـ يترددوا عليه بشكل دائم وبـ يعتمدوا عليه بنسبة كبيرة في معرفة ومتابعة خطوط الموضة الجديدة فيما يخص الملابس الرجالي، وبـ يزوروه في بداية كل موسم علشان يعملوا الدعم الضروري لدولاب الملابس الصيفية والشتوية بأسعار معقولة جدًا وكمان يأخذوا فكرة عن اتجاه الموضة في الموسم الجديد. وطبعًا مش محتاجين نقول أن الموديلات هنا مش أصلية ولكنها تقليد عالي الجودة خاصة لماركات زي Burberry وUS polo وغيرها لكن الغريب أن محل «ﭭـون دوتش – Von Dutch» له حوالي 4 فروع في مصر، وله فرع في الولايات المتحدة وأصحابه المصريين قدروا يحققوا نجاح ملحوظ في مجال استيراد وبيع الملابس الجاهزة والإكسسوارات مش على مستوى مصر بس لكن بدأوا البيزنس الخاص بهم خارج الحدود، وكنا محتاجين زيارة للمكان علشان نعرف إيه المختلف في المحل ده.المحل موجود في شارع الميرغني في مصر الجديدة، جنب معارض أبو غالي موتورز، والمحل في الدور الثاني ولازم تدخل مدخل العمارة وتطلع السلالم علشان توصل له. مساحته من الداخل مش كبيرة خالص؛ كأنها شقة بغرفتين، واحدة معروض فيها البول أوﭭر والجاكت وﭭاترينة عرض زجاجية فيها ساعات ونظارات وbracelets معدنية، والغرفة الثانية للجينز والقميص والتي شيرت. هـ تلاقي تشكيلة ضخمة من البول أوﭭرات الصوف والتريكو والقطن الخفيفة عليها علامات بيربري وأمريكان إيجل وبولو، لكن ما تركزش في الماركات وركز في الموديلات اللي هـ تلاقيها أنيقة لأقصى درجة، والألوان واضحة والتفصيلات مضبوطة وجميع المقاسات موجودة، المفاجأة لما تعرف أن فيه خصم بـ يوصل لـ 50 % على عدد كبير من المعروضات في المحل، يعني البول أوﭭر اللي عجبنا جدًا عرفنا أنه بـ 100 جنيه بدل 200 جنيه، وكذلك الهووديز والسويت شيرت التومي اللي بسوستة من الأمام، بنفس السعر، تقريبًا مستحيل تلاقي حاجة زي كده وبالجودة دي بالسعر ده، بس عرفنا أن التخفيضات مش محددة بمدة وأن الأسعار ممكن تتغير في أي لحظة، بس حتى لو الأسعار الموجودة مغرية جدًا ولازم هـ تلاقي حاجة تناسب ذوقك.القمصان بأسعار من 75 لـ 150 بعد الخصم بموديلات جيدة بس مش رائعة زي البول أوﭭرات والسويت شيرت، الجينز هنا من 150 لـ 230 جنيه، ومش كل الجينز بـ يدخل في الأوكازيونات زي ما كلنا عارفين، بس كل القصات هنا skinny أو Slim بزيادة، والألون الموجودة محدودة بس الخامات جيدة برضه. الأحذية واضح أنها من أحسن المعروضات في المحل، ماركات مش معروفة بس تشبه الـ vans والموديلات الإيطالية الكاجوال من خامات الشامواه والجلد المقلوب، وفيه هاف بووت ببوز رفيع شيك جدًا ومش بـ نلاقيه في أي حتة، وألوان غير معتادة زي الأزرق والبترولي، والموديلات دي كانت داخلة في التخفيض وأسعارها بقت 200 جنيه بدلاً من 300 و250 جنيه. وفيه رف واحد بس عليه مجموعة من الأحذية الأقرب للكلاسيكية دي خارج التخفيضات لأنها لسه واصلة المحل. نظارات Ray-Ban وPesrol وCarrera بأسعار من 300 لـ 600 جنيه، وساعات CK وEsprit بأسعار من 450 لـ 900 جنيه. صحيح كل تقليد بس مش أي تقليد، وخلينا واقعيين ونعترف أن في النهاية كله معمول في الصين، المهم عمرها يكون طويل، إنما بالنسبة للأناقة والستايل مافيش أي فرق بينها وبين الأصلية. فيه عدد من إكسسوارات الرجال زي الخواتم والـ bracelets والكابات وبرنيطة شيرلوك هولمز الشهيرة بأسعار من 40 لـ 60 جنيه. تجربتنا كانت غنية جدًا في «ﭭـون دوتش» وقضينا هناك أكثر من ساعة بـ نتفرج على المعروضات وبـ نجربها، وده راجع للخدمة المحترفة للعاملين هناك اللي فاهمين شغلهم كويس وبـ يساعدوا الزبون كما يجب. بـ نرشح لكم المحل ده ودلوقت بالذات علشان تلحقوا التخفيضات اللي عنده، وممكن تأخذوا فكرة من خلال صفحته على الفيسبوك.

...

يو- تِرن: ملابس كاجوال وكلاسيك رجالي في عمارات العبور
اصدرت في: 21/10/2012

بقى لنا فترة بـ نمر أمام فروع كثير للمحل ده في مصر الجديدة وفي شارع محيي الدين أبو العز في المهندسين وحتى في مول العرب في مدينة 6 أكتوبر، وبـ نبقى عاوزين ندخل نتفرج على معروضاته ونكتب عنه لكن لازم تحصل حاجة تمنعنا وتخلينا نأجلها ليوم ثاني. أخيرًا سمحت الظروف من يومين ودخلنا الفرع الموجود في عمارات العبور في طريق العروبة. له لوجو ضخم باللون البرتقالي هـ تشوفه من بعيد وهو وسط منافسيه الشرسين «أور» و«دانيل هيشتير» وغيرهم من أسماء المحلات الكبيرة الموجودة في الصف ده. «يو- تِرن – U Turn» محل ملابس رجالي مكون من طابقين؛ الطابق الأرضي مخصص للملابس الكاجوال والعلوي للبدل والملابس الكلاسيكية.فيه حاجة غير تقليدية في المحل ده، بالرغم من أنه بـ يعرض عدد من الموديلات المقلدة من ماركات عالمية، بس تقليد ممتاز جدًا أو high copy زي ما بـ يسموه، لكن له فروع كثيرة وأصبح له اسم في عالم الأزياء الرجالي مؤخرًا كأنه بـ يقدم اسمه الخاص على منتجاته أو كأن له مصانع في مصر زي المحلات الثانية المنتشرة بنفس الكثافة. لكن الحقيقة أن «يو- تِرن» بـ يعتمد على الملابس المستوردة من تركيا، وفيه عدد من الماركات المصرية عالية الجودة زي قمصان «نجا أوم» السليم فيت المميزة والظريف أن الموديلات اللي عنده أسعارها أقل منها نفسها في محلات «نجا أوم».في الجينز هـ تلاقي ماركات زي "بول أند شارك" و"بولو" بأسعار 350 جنيه وألوانها الكحلي والأزرق، وخاماتها سميكة وقصاتها شيك جدًا. طبعًا مش محتاجين نقول أنها high copy لأن الأصلي منها بـ يوصل لـ 1000 و1500 جنيه، لكن في نفس الوقت بـ نؤكد لكم أنك مش هـ تقدر تفرق بينها وبين الأصلية إلا باختبار DNA. نفس الكلام على التي شيرت والقميص من نفس الماركات بأسعار من 100 لحد 200 جنيه، وفيه قمصان من ماركات مختلفة لكنها أصلية من تركيا ودي سعرها بـ يوصل لـ 250 جنيه بس موديلاتها غير مألوفة ومناسبة جدًا لو كنت بـ تدور على حاجة ما حدش ثاني ممكن يبقى لابس زيها "بص على صف القمصان الكاروهات اللي على شمالك أول ما تدخل المحل" وكمان فيه عدد من الجاكيتات الجلد والصوف والفرو المبطنة بأسعار وهمية بـ تبدأ من 450 جنيه وآخرها 600 جنيه، وتقريبًا هنا أول مكان نزل ملابس شتوية وجاكيتات وبول أوﭭر. جاكيت عجبنا جدًا كان نفس الموجود حاليًا في «زارا» لكن سعره أقل النصف تقريبًا ومنزوع عنه أي تيكيت يدل على هويته، مش عارفين هو فعلًا زارا ولا لأ، بس المهم أنه حلو وشكله فريد وسعره مغري.في الدور العلوي البِدل كانت مفاجأة في شكلها وألوانها وموديلاتها وأسعارها. أسعار بـ تتراوح بين 900 لـ 1900 جنيه، قصات إيطالية بس التصنيع تركي، وهـ تلاقي كل اللي نفسك فيه من موديلات الـ Slim Fit لو كنت بـ تدور عليها ولقيتها بأسعار خيالية في «سرار» أو «آزارو». هنا ممكن تجيب بدلة كاملة وقميص ماركة «نجا أوم» وكرافتة slim برضه وحذاء وشراب كمان وتدفع 1300 جنيه وتأكد أنك هـ تحس أنك أشيك واحد في مصر. فيه كمان بليزرات بـ تباع بشكل منفصل، تمشي كاجوال وكلاسيك، وفيه ألوان جميلة زي الأزرق الزهري والقطيفة الكاكي والأسعار من 400 لـ 600 جنيه.الأحذية الكاجوال ما شدتناش قوي والتشكيلة الموجودة أصلًا مش كبيرة لكن من باب العلم بالشيء هـ نقولك أن أسعارها من 300 جنيه وأزيَّد شوية. الخدمة هنا جيدة جدًا والبائعين شاطرين وهـ يفرجوك على كل حاجة لكن من غير ما يخنقوك، وهـ يفرجوك على حاجات ممكن تبقى مش واخد بالك منها لأن المعروضات في المحل فعلًا كثير ومتنوعة وعاوزة وقت طويل، وكل ركن هـ تلاقي فيه حاجة لُقطة هـ تحب تجربها أو تشوف شكلها عليك. حاول ما تتأخرش زينا عن زيارة «يو- تِرن».

...

جيوفاني جالي: بيت أزياء برتغالي جديد في سيتي ستارز
اصدرت في: 24/06/2012

في الدور الثالث في المرحلة الثانية في سيتي ستارز وفي ركن هادئ شوية من المول لمحنا محل جديد ما كانش موجود من شهور قليلة، وهو محل ملابس رجالي اسمه «جيوفاني جالي». لفت نظرنا من زجاج العرض الخارجي أن معظم المعروضات كانت ملابس كلاسيك وبِدل كاملة وبولو شيرت. لكن لما دخلنا المحل اللي مساحته متوسطة لاقينا أنه تقريبًا بـ يبيع كل أشكال الملابس الرجالي من البدلة والبليزر لحد الجينز والتي شيرت العادي وكمان الملابس الداخلية والإكسسوارات زي الأحزمة والأحذية والمحافظ. البراند ده برتغالي، وطبعًا من الاسم كنا فاكرينه إيطالي، ومالوش أي فرع في مصر غير الفرع اللي في سيتي ستارز دلوقتي. كل المعروضات داخل المحل عليها تيكيت (ﭼيوﭭاني جالي) أو حرفين الـ G جنب بعض. وعرفنا من العاملين بالمحل أن الماركة دي مشهورة بمنتجات الجلد الطبيعي لأن البرتغال أصلًا مشهورة بالمنتجات الجلدية الطبيعية. وفعلًا بدأنا نتفرج على الأحزمة الجلد (200 جنيه) والأحذية (من 500 لـ 700 جنيه) وكانت في منتهى الشياكة وتفصيلاتها مبتكرة جدًا، خاصة الأحذية المصنوعة من الجلد المطفي المكرمش شوية وعليها خياطات بألوان مختلفة من الخارج، كانت شيك جدًا وكأنها معمولة مخصوص علشان البليزرات غير التقليدية اللي شفناها في المكان، زي البليزر اللبني الفاتح بأقلام زرقاء رفيعة (1500 جنيه) واللي لما جربناه في اللبس حسينا أنه بـ يغير شكل الواحد 180 درجة. لون غريب وتفصيلة غريبة بس عجبتنا! نفس الكلام بالنسبة للبدل المصنوعة من الصوف البرتغالي المميز. ما تتخضش من كلمة صوف في الحر ده، هي ملمسها ناعم وخفيفة، وتنفع لأي فصل، بس الخامة اسمها كده. أسعار البدل من 2500 لـ 3000 جنيه، والألوان الموجودة هي الغوامق والأساسية بس، الأسود والرصاصي والكحلي، ما كانش فيه بني أو بيج. بس مرة ثانية التفصيلات ظريفة وكل المقاسات موجودة. الأسعار تقريبًا واحدة بالنسبة للقمصان الكلاسيك والتي شيرت البولو وهي 399 جنيه، كل الألوان موجودة حتى الوردي والبنفسجي، وعليها طباعات أو من غير. غالية حبتين طبعًا؛ بس برتغالي بقى! كاونتر كبير في وسط المحل معروض عليه ملابس بحر ومايوهات وشورتات شبه الموجودة في Quicksilver وبـ نفس الأسعار كمان وهي 300 جنيه وأنت طالع. الجينز ما لفتش نظرنا قوي في المحل وما حسيناش أن العاملين حتى مهتمين أنهم يفرجونا عليه. لأنهم كانوا مهتمين أنهم يعرفونا كل التفاصيل الخاصة بالمحل وبالمعروضات لأنهم لسه فاتحين قريب وبـ يحاولوا يكسبوا ثقة الزبائن. «جيوفاني جالي» في النهاية بيت أزياء عالمي بـ ينضم لأخواته الموجودين بكثافة في سيتي ستارز، الأسعار متقاربة مع اللي هـ تلاقيه في Sarar وZara وSpring والموديلات كمان. بس كالعادة بـ نفرح لما نعرف أن براند عالمي جديد فتح له محل في مصر.

...

بول & بير: ملابس كاجوال على الموضة وأسعارها معقولة في سيتي ستارز
اصدرت في: 19/01/2012

شهر بـ يعدي وراء شهر وإحنا بـ نمر من أمام محل فاضي عليه إعلان أن هـ يفتتح هنا محل «بول & بير – Pull & Bear»، صبرنا كان بـ ينفذ كل ما كنا بـ نشوفه لكن اللى هون علينا أننا شفنا العمال طالعين داخلين على المكان وشغالين من نار فـ عرفنا أن الموضوع قرب. وأخيرًا أول ما فتح "بول & بير" أبوابه جرينا داخل المكان وكلنا حماس لكن للأسف خاب ظننا من الفرع ده بعد زيارته. الفكرة أننا كان عندنا آمال كبيرة أن الفرع ده هـ يكون أكبر وفيه معروضات أكثر من اللى موجودة في فرع المهندسين، لكن للأسف لقيناه كمان أصغر منه وموجود فى ركن فى الدور الأول بالمرحلة الأولى (جنب محل "زارا - Zara" الضخم). وأكثر حاجة هـ تلاحظها هناك أن ركن الرجال أكبر من السيدات، لكن إزاي؟ إحنا حاسين أننا مش فى بول & بير اللى نعرفه. جودة الملابس إلى حد ما جيدة وأغلب الأسعار معقولة، من الحاجات الحلوة أن بـ ييجي لهم تشكيلة ملابس جديدة كل ستة أسابيع، وبالتالى فرصتك أنك تلاقي موديلات جديدة كل فترة أفضل. ستايل الملابس في بول & بير مريح ومن النوع الكاجوال اللى فيه جانب مرح، وبالتالى تحس أنهم مستهدفين شباب كايرو، التى شيرتات على سبيل المثال بـ يكون عليها غالبًا مطبوعات أو كلام مرح. وغالبًا تلاقيهم برضه بـ يتبعوا تيمة معينة كل فترة فى التصميمات زي المتعلقة بشخصيات ديزنى، لونى تونز، أو مدينة نيويورك وبـ تبدأ من 79 جنيه للسيدات وبـ 129 جنيه للرجال. سعر بنطلون الجينز في بول & بير بـ يبدأ من 399 جنيه للسيدات وبـ 499 جنيه للرجال. وسعر السويت شيرت بالكابوشو (غطاء الرأس) بـ 299 جنيه للجنسين. "بول & بير" عندهم صف كبير من الفساتين اللطيفة على الرغم من أنهم غاليين شوية وأغلبهم عليه رسومات بنانيتي وورد بـ 399 جنيه، وبالنسبة للأحذية هناك مش هـ تقعد أمامها كثير لأنها بلاستيك وجودتها رديئة وسعرها غالي، لقينا هناك صنادل تصميمها بسيط بـ 459 جنيه، فى حين أن الجزم الباليرينا بـ يتراوح سعرها بين 259 و499 جنيه، الاثنين سعرهم عالي قوي بالمقارنة بمثيلاتهم في أى مكان ثاني. لو بـ تدور على بالطو روح المحل بالتأكيد، أغلبها بـ يتراوح سعرها بين 499 و799 جنيه. والسعر الثانى ده ممكن تجيب به بالطو أسود بياقة فرو، أغلب البالطوهات مش مرتبطة بموسم معين وتقدر تلبسها بسهولة لموسمين متتاليين أو أكثر. أفضل شيء بالنسبة لـ "بول & بير" هي التخفيضات بالتأكيد اللى فيه بـ تلاقى خصم على المعروضات بـ يوصل إلى 50% لأن المعروضات بـ تتغير في وقت قليل، وبالتالى ممكن تلاقى عندهم تخفيضات طوال الوقت. طاقم العمل هناك ودود وتلاقيه وقت ما تحتاجه رغم أنهم مشغولين دائمًا بـ توضيب المعروضات. لكن مازلنا بـ نفضل فرع المهندسين على اللى موجود في سيتي ستارز.

...

أور: ملابس بسيطة وأساسية على الموضة في مصر الجديدة
اصدرت في: 27/11/2011

لو بـ تدوري على حاجة تجيبي منها ملابس حريمي أساسية بأسعار معقولة، يبقى «أور - Or» هو المكان المناسب لكي. المحل له كذا فرع في القاهرة كلها. فرع مصر الجديدة موجود في شارع الثورة المزدحم دائمًا. وتبقى فكرة حلوة لو أخذتوا تاكسي لأن من المستحيل أنكم تلاقوا ركنة للعربية هناك. المحل مقسم لـ 3 أقسام، تحت فيه جزم كونفيرس بألوان متعددة. الدور اللي فوق فيه مجموعة ملابس من "دانيال هشتر" وملابس ثانية من «أور». العاملين هناك شكلهم متبعين نظام غريب بخصوص ترتيب المعروضات في المحل. تحسوا أن الملابس مرتبة ترتيب عشوائي بدل ما تبقى على حسب النوع أو اللون. ودي بـ تبقى مشكلة لو عاوزين تدوروا على لون ثاني من نفس الحاجة. «أور» عنده جينزات حلوة جدًا وجودتها كويسة وبأسعار تبدأ من 250 جنيه. هـ تلاقوا هناك كمان القمصان الأساسية بكم طويل وبنصف كم بألوان متعددة وبأسعار تبدأ من 120 جنيه، وده كثير شوية عليهم مقارنة بجودتهم الأقل من المتوسطة. فيه جاكيتات صوف خفيف لطول الوسط بألوان أساسية وساطعة. فيه لون أزرق زهري خطف نظرنا كان سعره 210 جنيه. الجاكيتات الصوف الخفيف الطويلة للركبة كان فيه منها الأسود، الرمادي، والأزرق فقط. متوفر كمان الجاكيتات الجينز بأسعار تبدأ من 270 جنيه. فيه قمصان كاروهات كثير جدًا وبألوان متعددة أسعارها تبدأ من 200 جنيه، وفيه مزج جرئ من الألوان لفت نظرنا. كان فيه كمان قميص مخطط أسود وموف بـ 220 جنيه، وبلوفرات وسويت شيرتات أساسية تبدأ أسعارها من 150 جنيه. فيه جاكيت رمادي عليه رقع واقية للكوع بـ 140 جنيه. ممكن كمان تلاقوا تشكيلة محدودة من الإيشاربات والكوفيات يبدأ سعرها من 80 جنيه، السعر ممكن يبقى عادي، لكنه كثير جدًا على جودتهم. شنطة جلد أخضر هناك كانت بـ 270 جنيه. علشان وقت لمّا إحنا رُحنا المحل كان فاضي، فـ حسينا أن العاملين هناك كثير جدًا، وممكن يبقوا لازقين لك على طول بطريقة مزعجة، خصوصًا لو بـ تحبوا تتسوقوا في هدوء. رغم أن «أور» ممكن ما يبقاش اختيارك الأول لو بـ تدور على ملابس بجودة كويسة، لكن مش هـ يخسرك حاجة.

...

ماكس: ملابس متنوعة بأسعار خطيرة في مصر الجديدة
اصدرت في: 21/09/2011

ممكن نقول عليه مول صغير، أو محل ملابس عملاق، لأنه واخد أول دورين في عمارة ضخمة شيك جدًا أمام البوابة الرئيسية للميريلاند في شارع الحجاز في مصر الجديدة، «ماكس» بـ يفكرنا بمحلات «عمرافندي» في الملابس زمان و«H&M» حاليًا في سيتي ستارز. صاحب سلسلة المحلات هندي الجنسية، وبدأ المجموعة بفرع رئيسي في دبي وبعد كده إنطلق بفروع في معظم الدول العربية زي الأردن والكويت والسعودية وقطروالبحرين ولبنان والسودان وآخيرًا مصر، وبسهولة هـ تلاحظ الطابع الخليجي للمحل خاصة لما تسمع الإذاعة الداخلية للمحل باللهجة الإماراتية المميزة، ولما تشوف بعض موديلات اللبس غير المألوفة في مصر واللي بـ نشوفها أكثر على الخليجيين لما بـ يكونوا في مصر. المحل منظم جدًا، كل ركن مخصص لحاجة معينة، وبشكل عام الدور الأرضي للملابس الرجالي والدور العلوي للسيدات، وفيه جزء خاص لملابس الأطفال ومستلزماتهم في الدور الأرضي. القسم الرجالي فيه كل حاجة ممكن تتخيلها، من أول ملابس البيت والبيجامات الكلاسيكية (أسعارها من 80 لـ 100 جنيه) والملابس الرياضية، مرورًا بالجينز بكل موديلاته وتفصيلاته وألوانه، ولازم نقول أن «ماكس» مميز بتشكيلة الجينز اللي عنده، وسهل تدخل المحل للفرجة بس تطلع وانت شاري بنطلونين أو ثلاثة، أولاً لأن الأسعار مغرية جدًا وبـ تبدأ من 80 جنيه (مافيش محل بـ يبيع جينز محترم بـ 80 جنيه دلوقتي) وأحدث موديلات عنده آخرها 160 جنيه وبعد الخصومات اللي هـ تكون لسة شغالة وقت نشر المقال ده بـ توصل لـ 114 جنيه، يعني يا بلاش. التي شيرتات كثير قوي وأشكال وألوان، من أول البولو شيرت العادي لحد التي شيرتات الواسعة بتاعة مغنيين الراب وفيه طبعًا الموديلات العادية بكل الألوان، والخامات كويسة جدًا والأسعار بـ تتراوح بين 50 لـ 100 جنيه وبرضه ممكن تنزل عن كده في التخفيضات (مكتوب هناك "تنزيلات"..خليجي بقى). في آخر الممر في الدور الأرضي ركن الملابس الرسمية والبدل والقمصان الكلاسيكية، البنطلون القماش بـ يبدأ من 110 جنيه وموجود بكل الألوان الوقورة زي الأسود والرمادي والبني والكحلي، وبـ يكون فيه أقلام طولية رقيقة وخامته جيدة جدًا، والقمصان بـ 130 جنيه والكرافتات بين 30 لـ 50 جنيه ولاقينا الموديلات الرفيعة بأسعار أقل من أي محل تاني. فيه ستاند كبير عليه أشكال وألوان من القمصان طويلة وقصيرة الأكمام، وفي «ماكس» الكاروهات بكل أشكالها واخدة حقها بزيادة، بس الخامات والتفصيلات ظريفة وتليق على كل الأجسام والأحجام. الدور العلوي هو بإختصار مكان لازم أي بنت عايزة تعمل دعم كامل لدولابها تروح عليه، من غير تفاصيل كثير هو فيه كل ما له علاقة بالملابس الحريمي سواء للبيت أو للخروج، موديلات بنطلونات وباديهات كثير جدًا، أي حاجة بـ تشوفي حد لابسها ومش عارفة دي بـ تتجاب منين روحي على «ماكس» وهـ تلاقيها، والأسعار كالعادة أقل من أي محل في أي مول كبير وإن كانت الجودة مش أقل كثير. الملابس الكلاسيكية كمان متوفرة في القسم الحريمي بس الخامات ممكن تكون مش الأفضل. ولفت نظرنا الملابس الرياضية والترينينج سوت الـ 3 قطع بألوان وموديلات تحفة، وسعره كان حوالي 250 جنيه، لكن كل قطعة ممكن تتباع لوحدها. الأطفال ليهم عالم خاص من الملابس في «ماكس»، حتى عربيات ولعب البيبي موجودة، بـ نرشح قسم الأطفال لأي أب وأم عايزين يجمعوا أكبر قدر من الملابس والأدوات لأولادهم من مكان واحد، ودائمًا نضع في الإعتبار موضوع الأسعار مقارنة بالجودة، وهـ نلاقي «ماكس» بـ يحقق المعادلة دي على طول الخط. الأحذية والكوتشيات والشنط والأحزمة هي نقطة ضعف المكان، موديلات عجيبة وألوان مهجورة وأسعار مش منطقية، يستحسن ما تضيعش وقتك قدام ستاندات أي حاجة بـ تتلبس في الأقدام. يمكن الإكسسوارات البناتي والمشغولات والأعقاد حلوة شوية (من 30 لـ 50 جنيه) إنما بشكل عام «ماكس» مش بتاع إكسسوارات. الخدمة جيدة وموظفين المحل لابسين تي شيرتات لونها أحمر ومنتشرين عند كل الأقسام وهـ يساعدوك في موضوع المقاسات والتدوير على حاجة مش لاقيها. «ماكس» لسة ما أخذش حقه من الشهرة والإعتمادية، صحيح رواد مصر الجديدة بقوا عارفينه كويس، لكن المحل يستاهل يكون له زبائن من مصر كلها، لأن النوع ده من المحلات بـ يوفر وقت ومجهود وفلوس، ولو أذواق الحاجات هناك عجبتك هـ تلاقي نفسك زبون دائم وبـ ترشحه لكل معارفك.

...

رافين: ملابس وإكسسوارات كاجوال في عمارات العبور
اصدرت في: 08/09/2011

النجاح والشهرة اللي حققها «رافين - Ravin» في الفترة الأخيرة والفروع المنتشرة في القاهرة والمحافظات إن دلت على شئ فهي بـ تدل على ثقة الشباب في معروضات المحل الكاجوال بزيادة، والأسعار المنافسة اللي بـ تُقدم بها. رحنا فرع «رافين» اللي في عمارات العبور في طريق صلاح سالم، المحل شيك جدًا من بره ومكون من دورين: الأرضي للملابس الرجالي والدور العلوي للحريمي، والديكور مطرقع والحوائط عليها إكسسوارات كثير وبوسترات، والإضاءة هادئة وقليلة، وكانوا مشغلين أغنية هاوس ظريفة معمولة مخصوص للمحل بـ تتكرر فيها كلمة "Ravin Jeans". طريقة عرض الملابس مثالية وما تخليش الناس تتلخبط، وسهل أنك توصل لأي حاجة أنت بـ تدور عليها بنظرة سريعة على الأستاندات والأرفف. وقت زيارتنا كان المحل عامل تخفيضات تصل لـ 70 % والأوكازيون مستمر لحد بداية موسم الخريف ووصول المعروضات الجديدة، وبما أن الأسعار أصلًا معقولة في الأيام العادية، أيام التخفيضات الأسعار بـ تبقى مغرية جدًا وممتازة بالنسبة لجودة الملابس وموديلاتها. الجينز الرجالي أسعاره بـ تبدأ من 150 لحد 190 جنيه حسب الستايل والخامة، طبعًا موجود الـ Straight العادي والـ Skinny بكل الألوان، ماعدا اللون الأزرق الغامق اللي كنا بـ ندور عليه! لكن المقاسات كلها متوفرة ودي ميزة مش موجودة في محلات كثير. القميص الرجالي الكاروهات مسيطر على الأرفف في «رافين»، كل أحجام الكاروهات وألوانها، بأكمام طويلة ومن غير أكمام، أسعارها بـ تبدأ من 100 جنيه بعد التخفيضات. التي شيرتات من أول 50 جنيه لحد 120 جنيه، موديلات مطرقعة ونقشات غريبة وكرنفال ألوان، وفي نفس الوقت فيه موديلات البولو التقليدية بنقشات بسيطة. فيه طبعًا إكسسوارات زي الأحزمة الجلد والحافظات (60 جنيه) وعجبنا جدًا موديلات الأحذية رغم أن التشكيلة مش كبيرة، وأسعارها كانت من 150 لـ 190 جنيه. الدور العلوي المخصص للملابس البناتي المعروضات فيه أكثر طبعًا، طول عمر ملابس البنات فيها أفكار وأشكال أكثر، والوضع مش مختلف في «رافين»، جينز وبنطالونات الصيادين الواسعة (160 جنيه) بألوان البيج والأبيض والموﭫ، وباديهات عليها "علامة السلام" ووجوه مشاهير وستايل سبعينياتي خطير بأسعار وهمية، بـ تبدأ من 50 جنيه لحد 110 جنيه. فيه طبعًا شوية موديلات تقليدية بس محدودة قوي في المحل، بس علشان يحاولوا يرضوا كل أنواع الزبائن وما يخرجوش حد زعلان. الإكسسورارت فيها شنط رياضية بناتي بألوان ساخنة جميلة (60 جنيه) وفيه شنط حريمي حجمها كبير (80 جنيه) والإيشاربات الغجرية المزركشة كانت تشكيلة مش كبيرة لكن ظريفة (40 جنيه). الخدمة سريعة في المحل وهـ تحس براحة نفسية وأنت بـ تتفرج وبـ تجرب الملابس، علشان ما حدش بـ يطاردك وأنت بـ تلف في المحل، ولو سألت عن أي معلومة بخصوص الخصومات أو بضاعة إيه هـ تيجي قريب هـ يقولوا لك معلومات تفصيلية، وهـ يطلبوا رقم تليفونك علشان يعرفوك أول بأول لو فيه جديد في المحل. "رافين جينز" له شخصية مميزة وخلاص قدر يربي زبون، والتخفيضات اللي بـ يعملها طول السنة بـ يخليه خيار أساسي لما نقرر ننزل نعمل شوبنج في أي حتة في كايرو، علشان فروعه الموجودة في كل حتة.

...

أتش & أم - H&M: موضة أوربية بأسعار غير منطقية
اصدرت في: 07/07/2011

«أتش & أم - H&M» من ساعة ما فتح وهو حديث المدينة بين كل مهووسين التسوق٬ وحتى اللي مش بـ يدخلوا محل إلا علشان الشديد القوي. لكن الضجة اللي كان عاملها «أتش & أم» هدأت خلاص وده لعدة أسباب: أولاً أن الناس حست أن الفرع الفخم اللي متكون من دورين في «سيتي ستارز – City Stars»٬ مافيهوش مجموعة البضاعة الشاملة الكبيرة اللي بـ تكون في فروع «أتش & أم» الأوربية. السبب الثاني أن بالرغم من أن الناس ما كانتش متوقعة نفس أسعار بره إلا أنه كان برضه أغلى من المتوقع في بعض المنتجات٬ فـ الفستان من «أتش & أم» بـ500 جنيه٬ وحتى شنطة جلد صناعي بنفس السعر ده كثير شوية. المشكلة الثالثة هي انتشاره الشديد٬ الناس كلها بقيت لابسة منه. الجميل أنه بالرغم من كل ده لسه «أتش & أم» بـ يقدم تشكيلة متنوعة جدًا من الملابس وبـ يضاعف حجم الاختيارات لأي حد نازل وعاوز يشتري هدوم وإكسسوارات بأسعار أحسن من «مانجو - Mango» و«زازا - Zara». المكان فيه لُقط ولازم تروحه في أي جولة تسوق. لكن للأسف القسم الرجالي في حالة إنكماش مستمر٬ وبعد ما كان واخد دور بحاله دلوقتي مش محصل رُكن. الموضوع ده ممكن يكون انعكاس لنسبة المبيعات٬ وبعدين الثابت أن التسوق رياضة نسائية من الدرجة الأولى أصلاً٬ لكن برضه ما يمنعش أن الرجالة بـ يبقوا هم كمان محتاجين تشكيلة ملابس شاملة يختاروا منها. مسئولي البيع مش منظمين زيهم زي الأقسام اللي بـ يبقى عليها خصومات٬ ما تحاولش تطلب مقاس مختلف٬ لأنه في الغالب اللي معروض هو المتاح فقط. في الكام سنة اللي فاتت «أتش & أم» عمل ضجة عالمية لما نزل بخطوط إنتاج لمصممين عالميين زي « Comme des Garçons» و« Matthew Williamson» و« Jimmy Choo»، لكن خطوط الإنتاج دي ما وصلتش مصر! وده بـ يخلينا نشك في قد إيه الفرع المصري متواكب مع الموضة اللي بـ يقدمها «أتش & أم» في البلاد الثانية. لكن في النهاية مش معنى كده أنه مش بـ يزودنا باحتياجاتنا الأساسية٬ وإحنا ممتنين لحاجة زى كده.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح