أثاث ومستلزمات منزل تسوق in مدينة نصر Cairo, Egypt

تسوق

آخر العنقود: هدايا بأسعار منافسة في جنينة مول
اصدرت في: 05/01/2012

مفهوم البضاعة اللُقطة هي أنك تلاقي أعلى جودة بأقل سعر، ودي مهمة مش سهلة في مصر بشكل عام. علشان كده محل زي «آخر العنقود» في جنينة مول هـ تلاقيه دائمًا مليان على آخره وكل زبون بـ يدور على "لُقطته". المحل ده مافيش حاجة مش بـ يبيعها! بعيدًا عن الملابس هـ تلاقي كل حاجة من توكات الشعر للأدوات المكتبية للديكورات، ودور كامل للملابس الداخلية للسيدات والأجهزة المنزلية. «آخر العنقود» فيه أقسام كثير لحاجات مالهاش علاقة ببعض، وتفاصيله كثير وصعب تتفرج على كل حاجة في المحل في يوم واحد. لكن العامل المشترك في كل المعروضات دي أن أسعارها مهاودة جدًا. الجزء الأول من المحل المكون من دورين مخصص لإكسسوارات الشعر وفيه عشرات الصناديق مليانة بتوكات وبنس الشعر أشكال وألوان بأسعار بـ تبدأ من 3 جنيه. فيه مجموعة من لعب الأطفال البلاستيكية بس باين عليهم خامتهم نص نص، وفيه شخصيات الكارتون المعروفة وعربيات سباق وملابس أطفال وألعاب تعليمية زي بازل الحروف الأبجدية (15 جنيه) وكتب الأطفال (3 جنيه). الأرفف المحيطة عليها كريم شعر وشامبو من ماركات معروفة بأسعار ما تختلفش كثير عن أسعار الصيدليات والأماكن الثانية. وفيه أنواع مغمورة من المكياج لكن بأسعار مغرية (8 جنيه أنبوبة مسكارا) لكن طبعًا مش متأكدين من الجودة. ممكن تجيب كل ألوان المانيكير من هناك بسعر 3 جنيه للعبوة! وفيه قسم للعطور بأسعار بـ تتراوح بين 80 جنيه وأقل أو أكثر، وفيه عبوات للتجربة. الدور العلوي فيه تشكيلة من الصدريات الرياضية المصنوعة من القطن (15 جنيه) وجوارب حريمي بأطوال وخامات مختلفة (3.5 جنيه) والدور ده عمومًا أوسع ومريح أكثر في الحركة وهـ تشعر خصوصية أكبر في اللف والتدوير. فيه مجموعة من الأكواب والمجَّات السيراميك بسعر 12 جنيه للواحد، وعدد من التابلوهات واللوحات الزيتية منها المنقوش عليه آيات قرآنية ورسوم فرعونية وأسعارها بـ تبقى ما بين 25 جنيه لـ 150 جنيه حسب الحجم. لو كنت في جنينة مول لازم تلقي نظرة على «آخر العنقود»، لازم تطلع منه بشوية حاجات ع الماشي حتى لو ما كنتش ناوي تشتري حاجة، لكن الأسعار هـ تخليك تشتري. وما ينفعش نقول لك روح اشتري حاجة معينة من هناك، لكن غالبًا كل اللي هـ تفكر فيه هـ تلاقيه.

...

ستار وود: موبيليات مصرية وذوق متوسط
اصدرت في: 01/06/2011

من أهم الحاجات اللي الواحد لازم يراعيها في بيت بـ يفرشه هو ان الأثاث اللي بـ يفرش بيه البيت يكون متين ومعمول من خامات جيدة تعيش معاه. الأثاث اللي في «ستار وود – Star Wood » معمول من الزان والكونتر زان وبالتالي بـ يضمنلك الجزئية دي. المحل اللي موجود في مركز محلات الأثاث حالياً في مدينة نصر بمنطقتينه السادسة والسابعة وأماكن تانية، ليه مصانع في القاهرة بقى له زمن وبالتالي كل منتجاته صناعة محلية بإستثناء كام ترابيزة متنطورين في المكان. الأذواق ستيل مع بعض اللمسات المودرن وتميل للشعبية وده واضح في ديكور المكان نفسه. فيه قطع مبتكرة ومش تقليدية لكن احنا شعرنا ان أغلب التصميمات فيها حاجة ناقصة. كان مثلاً فيه مكتبة (7000 جنيه) عبارة عن أربع ضلف، كل إتنين على مستوي مختلف من الأرض وجزء متعلق على الحيطة فوق الجزء السفلي، وممكن وضعهم فوق بعض حسب المساحة وفي الحالة دي بـ يبقى شكلهم وحدة واحدة، لكن الجزء العلوي كان الخشب اللي في خلفيته اسود على عكس البني الفاتح اللي في الوحدات التانية، وده خلَّى المكتبة مش متناسقة مع بعضها. أوض السفرة والنوم كانت أسعارها بـ تتراوح ما بين 17 ألف لـ21 ألف تقريباً وكلها معمولة من الزان للشاسيه والكونتر للقشرة، وكان باين عليها متانتها. عندهم جوة كمان كتالوج للأوض المش معروضة (ودي بعضها قديم وتقليدي بزيادة) وممكن يجهزولك أوضة مخصوص في 45 يوم. الصالونات في «ستار وود» بـ تبدأ من 6500 جنيه وكان عندهم صالون ليزي بوي بحوالي 13 ألف جنيه، فيه كنبة 2 وكنبة 3 وفوتيه. وفوتيه الليزي بوي لواحده كان بـ3800 جنيه تقريباً. وكانوا عارضين كنبة ركن متغطية بالشاموا وعليها عرض بـ4600 جنيه، واللي متغطية كتان بحوالي 6300 و5700 من غير القماش (وعلى فكرة الكتان بـ يستحمل والأفضل لو انت مش ناوي تغير بسرعة) وممكن تختار لون القماش وبـ تستلم الكنبة باللون اللي اخترته بعد 15 يوم. الترابيزات اللي في المكان كلها ماليزي - على حسب ما قاللنا المسؤول عن البيع في المكان - واسعارها بـ تبتدي من 1600 جنيه.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن