ملابس حريمي تسوق in القاهرة الجديدة Cairo, Egypt

تسوق

هنكمولر: إعادة Branding وافتتاح لماركة اللانجيري فى كايرو فيستيفال سيتي
اصدرت في: 09/05/2015

أول ظهور لـ هنكمولر - Hunkmoller –أو Bodique وقتها- كان في سيتي ستارز مول من كام سنة فاتوا. بعد التغيير للاسم الجديد فتحوا أحدث فروعهم في واحد من أكبر مولات التسوق –وهو كايرو فيستيفال سيتي- كمحاولة للحفاظ على مكانته وسط مجموعة كبيرة من ماركات اللانجيري الموجودة في مصر. وبما أن مساحة المحل مش كبيرة فمن السهل جدًا أنك تتفرج على المعروضات في جولة واحدة سريعة، استقبلنا اثنين من مسئولي البيع بابتسامة لطيفة، وكلمونا عن عملية الـ Rebranding اللي مرت بها الماركة، بعدها أخذنا جولتنا في المكان مع استعدادهم التام لمساعدتنا وقت ما نحب. أول مجموعة لفتت نظرنا كانت للملابس الرياضية، واللي كانت بـ تضم قطع أي واحدة غاوية جيم هـ تحتاجها؛ من ضمن المجموعة دي Sport bra أسود في وردي (495 جنيه)، بنطلون يوجا لونه أسود (236 جنيه) أما الجاكيت اللي بـ يليق عليه فسعره (375 جنيه). المجموعة المعروضة الخاصة بالمايوهات -واللي كانت مكونة من مايوهات بيكيني فقط- فنعترف أننا ما حبيناهاش، لأن تفاصيلهم كانت كثيرة والشغل فيهم كان زيادة. زي بيكيني لونه وردي فاقع عليه مجموعة من القطع المعدنية، سعر القطعة العلوية (235 جنيه) أما السفلية (150 جنيه). ما اختلفتش الكاش مايوهات عن المايوهات بـ تفاصيلها ونقشتها الغريبة، من ضمنهم واحد عليه مجموعة من النقشات الهندسية المكونة من الألوان: الأحمر، الأزرق والأبيض (395 جنيه). استغربنا أن المعروضات من اللانجيري معظمها غير عملية بالمرة ومش للاستخدام اليومي، لأن الألوان المستخدم فيها صارخة وكمية الدانتيل فيها رهيبة، لفت نظرنا حمالة صدر Bra لونها بنفسجي وعلى أطرافها دانتيل باللون الأسود (315 جنيه)، ومن ضمن العروض اللي كانت موجودة وقت زيارتنا هو أنك تأخذي 3 قطع ملابس داخلية بسعر اثنين (72 جنيه للواحد). بعكس دوشة موديلات المايوهات واللانجيري، مجموعة البيجامات وملابس النوم تميزت ببساطتها، من ضمنهم بيجاما التوب لونه برتقالي وأبيض (181 جنيه)، ومعاه الشورت بسعر (264 جنيه). بالرغم من أن الأذواق المعروضة –خصوصًا في اللانجيري والمايوهات- محتاجة جرأة، وخصوصًا أنها مش للاستخدام اليومي؛ ولكن الملابس الرياضية، بالرغم من قلتها، إلا أنها عملية ومناسبة، ده غير أن القائمين على الخدمة ممتازين، وبـ يتعاملوا بمنتهى المهنية.

...

ريسيرفد: ماركة الملابس الأنيقة تفتتح أول فروعها في مصر داخل كايرو فيستيفال سيتي
اصدرت في: 07/03/2015

المنافسة الحاصلة وسط مشهد الأزياء المصري قوية جدًا، وسط عدد كبير من المولات والماركات الأجنبية اللي بـ تجتاح البلد، من الصعب أنك تلاقي ملابس تجمع بين السعر المعقولة والجودة المناسبة. لحسن الحظ، اسم شهير في عالم الأزياء هو "ريسيرفد - Reserved" افتتح أول فروعه في الشرق الأوسط في كايرو فيستيفال سيتي مول، مافيش كلام أنك من الصعب تجذب عشاق الموضة القاهريين في ظل وجود أسماء مشهورة، لكن مع تقديم ملابس أنيقة بأسعار مناسبة، ريسيرفد عنده القدرة على التواجد. ريسيرفد بـ يعرض ملابس للرجال، السيدات والأطفال، تشمل ملابس داخلية، ملابس كاجوال وسهرة، وملابس رسمية/ سمارت كاجوال، بالإضافة لأحذية، وكل ده تحت سقف واحد. وسط ديكورات المحل الأنيقة بألوان الأسود والأبيض، المحل يتميز بروح عصرية جذابة. من وقت دخولنا، كان معانا واحد من المبيعات بـ يسألنا إذا كنا نعرف أي معلومات عن الماركة، وشرح لنا معلومات أساسية عنها وبعدها سابنا نتمشى بحريتنا. قسم الحريمي، واللي بـ يحتل النصف الأمامي من المحل، مقسوم لقسم الملابس السمارت وقسم للكاجوال. الحاجات اللي شدّت انتباهنا شملت فستان كوكتيل باللون الأزرق النيون (299 جنيه)، بوت أسود بكعب (699 جنيه)، شنطة يد شيك (479 جنيه) وبلوفر طويل مضفر باللون الرمادي (459 جنيه). بعدها تمشينا شوية لحد ما وصلنا للنصف الثاني من المحل، وهناك تفرجنا على قسم الرجالي، واللي كان فيه تشكيلة من التي شيرتات بأكمام طويلة (139 جنيه)، تي شيرتات مطبوعة (150 جنيه)، بليزر أزرق سمارت كاجوال (480 جنيه)، جاكيت منفوخ بغطاء للرأس (459 جنيه) وبنطلونات نحيفة باهتة شوية (299 جنيه). بشكل عام، مسئول المبيعات كان مهذب وجاهز للمساعدة، لكن أوقات كنا بـ نحس الموضوع فيه إلحاح شوية. طبعًا إحنا بـ نقدر المساعدة، لكن عرضه لتقديم مقاسنا مع كل قطعة نلمحها ممكن يكون مربك شوية. من ناحية الجودة، الملابس الموجودة مش مبهرة للدرجة، لكن في الوقت نفسه المحل بشكل عام بـ يقدم منتجات متناسبة مع سعرها وكان واضح فعلاً أن الأسعار معقولة. المهم هنا أننا أكيد هـ نرجع لهم في زيارة ثانية في رحلة تسوق تحافظ على ميزانيتنا من التدمير.

...

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

توب شوب: ماركة الملابس البريطانية رجعت مصر فى كايرو فيستيفال سيتى
اصدرت في: 12/11/2014

التسوق فى القاهرة بـ يزيد رقيه مع افتتاح أسماء عالمية كل يوم والثاني. آخر ماركة تزور مدينتنا هى توب شوب - TopShop، واللي كانت قفلت من فترة فرعها فى المعادي بسبب عدم استقرار الأوضاع فى السنين الأخيرة. بمكانه الجديد فى كايرو فيستيفال سيتي، من أول نظرة، قدرنا نشوف أن توب شوب رجع بخطوط أزيائه العصرية المناسبة للأذواق الراقية. من الإضاءة المسلطة على المانيكانات لليافطات المضيئة المميزة لكل قسم من أقسام المحل، لازم تعيش بكل حواسك مع شكل المكان العصري الرائع. الملابس المعروضة بشكل عام تميل للفخامة. الموظفين كانوا ودودين، وفى نفس الوقت حماسهم مش زائد عن اللزوم. بـ يرحبوا بك ويطلبوا منك تنادي عليهم فى حالة احتجت أي مساعدة، ومافيش إصرار على التواجد طوال الوقت، وهي حاجة كانت فعلًا مريحة. بدأنا على طول فى استكشاف قسم الحريمى علشان نشوف بـ يقدموا إيه، والحقيقة أنهم كانوا عارضين عدد من القطع كفيلة بـ تحويلنا نجوم موضة. شد انتباهنا فستان jumpsuit بلون وردى فاتح (949 جنيه) مناسب للمناسبات الرسمية، مع فستان skater مقلم (519 جنيه) وjumper منفوش مريح (579 جنيه) كمان، المحل بـ يقدم خط أزياء مخصوص للأحجام الصغيرة، لكل السيدات الرفيعين. انتقلنا لقسم الأحذية والإكسسوارات، وهناك كان معروض عدد أكبر أكيد هـ يعجب عشاق التسوق فى القاهرة. أكثر حاجات عجبتنا كانت شنطة ظهر صغيرة من الجلد (549 جنيه)، بوت بكعب من الجلد السويدى (1349 جنيه)، شنطه يد قوية (719 جنيه) وأحذية مسطحة شيك (449 جنيه). نفس الكلام بالنسبة لخط الأزياء الرجالى، توب مان. شوفنا هناك بعض المعروضات منها سويت شيرتات (449 جنيه)، فانلة بحمالات (249 جنيه)، الجينز بكل قصاته (480: 600 جنيه) ومجموعة من التي شيرتات (319 جنيه). الرجالة من حقهم يستمتعوا بشوية إكسسوارات، ولا إيه؟ معروض مجموعة آيس كابات من التريكو (129 جنيه) مع كابات عادية (280 جنيه). كلنا بـ نحتاج شخص ينصحنا إيه يتلائم معانا، خصوصًا وقت ما تكونى لوحدك بدون أصدقاء أو والدتك فى رحلتك التسوقية، وهنا جاءت فكرة المحل المميزة فى صورة خدمة التسوق الشخصية الرائعة. بدون أي تكلفة إضافية، خبير الأزياء الخاصة بالمحل هـ يساعدك فى اختيار حاجة مناسبة أو تجميع طقم كامل من الصفر. بشكل عام، توب شوب بـ يقدم تجربة تسوق فريدة من نوعها. البائع كان بـ يساعدنا وفى نفس الوقت كنا على راحتنا، والخدمة الجديدة اللي بـ يقدموها أكيد هـ تغير من شكل اللعبة. الجانب السلبي الوحيد أن كثير من المعروضات أسعارها عالية، وبناءً على خبرتنا، الأسعار أعلى من جودة وتحمل المعروضات.

...

أويشو: بيجامات وملابس داخلية لطيفة فى كايرو فيستيفال سيتى مول، القاهرة الجديدة
اصدرت في: 16/04/2014

رغم خيارات التسوق بأعدادها الخرافية فى القاهرة، أنك تلاقى غيارات داخلية وبيجامات مميزة وجودتها عالية يعتبر صعب. مع بداية تواجدها فى 2001، ماركة الملابس الأسبانية "أويشو - Oysho" قدرت تحقق نجاح مبهر، وفروعها انتشرت فى العالم، بأكثر من 500 محل حول العالم. مع وجودها فى موقع التسوق الشهير Asos.com، أويشو فتح فروع فى عدد من مولات مصر الضخمة؛ أحدث فرع هو الموجود فى الدور الثانى من كايرو فيستيفال سيتى مول القاهرة الجديدة. طوال وقت زيارتنا، الموظفين كانوا ودودين وبـ يحاولوا يساعدونا، من غير كلام كثير أو تدخل زيادة عن اللزوم. بواجهته الكاملة من الزجاج، المدخل بإضاءته القوية بـ يعرض مجموعة مرتبة بشكل منظم من الملابس الداخلية والبيجامات. شباك العرض بـ يولد جو بناتى لذيذ، مع ألوان خفيفة ورسومات ورد جميلة، آخر المحل معروض فيه صديريات باتر كوب باللون الأصفر، وأزرق بودرة، وأرجوانى وكريمى (150 جنيه) وأطقم نيكر knicker يزينهم أشكال لطيفة. كمان متوفر قمصان حريمى camisoles بسعر 169 جنيه وقمصان نوم، مع شورتات مريحة، أو بنطلونات بيجامات كاملة (229 جنيه) وقمصان نوم بحمالات. عجبنا تحديدًا بنطلون بيجاما (229 جنيه) رقيق مزركش، cami أزرق وأبيض مقلم (199 جنيه) مع غيارات داخلية بنفس الشكل، وكمان عدد من القطع يزينها رسم فراشة خفيف. مجموعة من الأحذية المفتوحة من الخلف برضه متوفرة. لاحظنا كمان مجموعة من الأطقم المبتكرة، عليها وجوه شخصيات الكرتون المعروفة؛ صحيح الشكل ده مش مناسب لكل الأذواق، لكن جودتهم العالية واضحة، والتصميمات مش مزعجة زى أغلب الموجود فى باقى المحلات. فى آخر المحل عدد من الملابس الداخلية المثيرة، منهم مثلاً بالدانتيل الأسود والساتان (399 جنيه)، قمصان بنفس التصميم، بوديهات ونيكرز مزينة بشرائط (99 جنيه). رغم أن واحد من قمصان النوم له سوستة قابلة للتغيير، الغريب أن مافيش فى المحل شرابات تناسبه. فى نفس القسم شوفنا أطقم غيارات عملية عالية الجودة بألوان أسود سادة، أبيض وبيج، منهم صديريات لازمة للتي شيرتات وصديريات من غير حمالات (169 جنيه)، ثونج thongs "غير مرئية" (69 جنيه)، جى سترينجز g-strings، بوكسرات وتوبّات على شكل الجسم. رغم أن مجموعة المقاسات الموجودة كانت معقولة، بس زى أغلب محلات الملابس الداخلية، بعض المقاسات صعب تلاقيها. عندهم كمان ملابس بحر وصيفى بأحجام مناسبة، مع مايوهات بيكينى مبهجة وبفساتين بحر منفوشة، كيمونو (299 جنيه) وصنادل. عجبنا بيكينى بتصميم آزتيك مع رسومات بنفسجى وتطريز تركواز؛ سعر التوب كان 199 جنيه، أما البنطلون سعره 149 جنيه. مجموعة الملابس الرياضية صحيح صغيرة بس كافية، منها صديريات رياضية باللون الأسود والوردى الفاتح، بنطلونات ليكرا (259- 299 جنيه)، مجموعة من التانك توب (199 جنيه) وبلوفرات خفيفة (349 جنيه). مع الاعتماد على الأسود والرمادى باعتبارها الألوان الأساسية للتوبات والبنطلونات، أغلب القطع فيها تقليمة مشرقة من اللون النيون. لاقينا كمان مجموعات من الشرابات الملونة (69 جنيه)، شرابات طويلة مناسبة لأحذية الكعب العالى (49 جنيه) وعلبة فيها أطقم ملابس داخلية. أويشو جايب لنا مجموعة راقية من ملابس البيت، الرياضة وكمان البحر لهوانم القاهرة، يكملهم ملابس داخلية عملية، عالية الجودة وذوقها تحفة بأسعار مناسبة، وبكده يكون مكان متكامل لتلبية احتياجات كل واحدة فى مصر.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن