أثاث ومستلزمات منزل تسوق in المعادي Cairo, Egypt

تسوق

جزازى: إكسسوارات منزلية يدوية لطيفة فى المعادى
اصدرت في: 21/12/2013

نتيجة للاتجاه السائد ناحية الإنتاج بكميات كبيرة، عدد قليل من محلات القاهرة بـ يقدم روعة المصنوعات اليدوية. فى وقت من الأوقات كانت حرف زى النجارة والحدادة من الأساسيات، دلوقت صعب تشوف حرفيين بـ يقدموا صناعات راحت فى طى النسيان. على العموم، دلوقت فيه صناعة سريعة النمو غير ملحوظة فى المدينة، بـ تهدف لتقديم مصنوعات يدوية بسيطة ومبتكرة. البداية كانت مع مرسى علم –في منطقة Deep Sea Eco Lodge– وتخصص جزازى فى الإكسسوارات المنزلية والديكورات المصنوعة من زجاجات المياه الفاضية. بعد بداية تراجع السياحة المصرية مع ثورة 25 يناير، قرر أصحاب المكان نقل الورشة لمنطقة الفسطاط، مع صالة عرض راقية فى شارع 250 بالمعادى. دخولك لصالة العرض يحسسك فورًا أنك دخلت فى عقل شخص عبقرى؛ إحساسك بالإبداع الموجود فى المحل يشبه وجودك فى متحف يعرض فنون مطرقعة. بعيدًا عن الكشك المكون من الزجاج والخشب، باقى الديكور والأثاث مصنوع من مواد مُعاد تدوريرها، وكمان الترابيزات من بكرات خشبية وأصص زرع زجاجية. كل أشكال الإضاءة فى الصالة، من اللمبات للنجف مصنعة من زجاجات الكحوليات والنبيذ. وبما أن من الممكن تعديل منتجاتهم، الأسعار تختلف من حاجة للثانية؛ لو بـ نتكلم فى المتوسط، حامل شموع بسيط –من نصف عبوة زجاجية وملحق بها قاعدة خشبية للشمع– سعره 75 جنيه، وعند عمل تعديلات سعره ممكن يوصل 100 جنيه. الطريقة الأساسية لتعديل الزجاج تتم عن طريق التجميد. أسعار اللمبات تبدأ من 125 جنيه لو هـ تضيف مفتاح كهربائى وزر للمبة. نجف كلاسيك ومودرن برضه متوفر بأسعار تبدأ من 300 جنيه، والنجف بالتحديد تعديلاته كثيرة ومتعددة ممكن توصل سعره لغاية 3000 جنيه. من أكثر الحاجات اللى شدت انتباهنا مجموعة من زجاجات Smirnoff، معلقة من لوح خشبى موصل بالسقف (300 جنيه/ للمتر). جزازى كمان بـ يشجع أقرانه عن طريق بيع منتجاتهم فى صالة عرضه. توقع هنا تلاقى شنط سفر و tyre seatsمن ريشاكل، مع خط مثير للاهتمام من عم عزت اللى بـ يصنع نماذج موتوسيكلات وسيارات من الأدوات اليومية زى أدوات الأكل، علب المشروبات الغازية الصفيح والغازات المسيلة للدموع. بـ يُباع كمان منتجات محمد عاطف، صانع لمبات على شكل روبوت من الأنابيب ومخلفات معدنية ثانية بـ ترسم بسمة على وجه محبى الإلكترونيات. مع منتجات بإيدى الاستثنائية من الخشب والمفروشات المصنعة فى منطقة الصعيد وتحديدًا أخميم، كل المعروضات فى جزازى معمولة من خامات مستعملة مُعاد تدويرها. جزازى بـ يقدم منتجات مبتكرة ومختلفة بأسعار مناسبة، وفى نفس الوقت مصنوعة يدويًا من خامات صديقة للبيئة للسوق المصرية.

...

إيه إم فيرنتشر: معرض أثاث مودرن شيك في المعادي
اصدرت في: 25/11/2013

المعرض موجود في مكان هادئ جدًا وهو أبراج بدر في زهراء المعادي بالقرب من الطريق الدائري، لاحظنا أن المنطقة بدأت تتحول ببطء لسوق للأثاث والمستلزمات المنزلية والديكورات بعد ما فتح عدد من المحلات والمعارض في نفس المكان في الكام سنة الأخيرة، وواضح أن المنطقة هـ تبقى مقصد كثير من الناس من اللي بـ يجهزوا شققهم أو بـ يجددوا الفرش. محل «إيه إم فيرنتشر – A M Furniture» فتح من شهور قليلة وعبارة عن معرض لمنتجات المصنع الموجود في المريوطية، وده مش المعرض الوحيد لكن فيه واحد ثاني في شارع 9 في المقطم. وأول حاجة لفتت انتبهانا طبعًا كانت الاسم وافتكرنا أنه فرع من محلات American Furniture الشهيرة اللي بـ تستخدم حروف A M كاختصار لاسمها وبـ تكتبه على لافتات المحلات الخاصة بها، لكن الموضوع كان مجرد تشابه أسماء، وإن كان ما حبكش يستخدموا نفس الحروف في اسم المحل وهم بـ يبيعوا نفس المنتج. المهم دخلنا المعرض الهادئ، وكنا لما شفناه من الخارج افتكرناه بـ يعمل مطابخ بس لأن كل اللي ظاهر من الواجهة الزجاجية كان مطابخ مودرن، لكن عرفنا لما دخلنا أنه معرض صغير فيه عينات للعرض من منتجات المصنع، بـ يعمل كل حاجة تتخيلها، ممكن تختار من التصميمات الموجودة في سابقة الأعمال اللي هـ يفرجك عليها مدير المعرض على الكمبيوتر، وممكن تأخذ التصميم اللي أنت عاوزه معاك وهم هـ يعملوه بحرفية عالية، وتأكدنا من ده لما شوفنا بعض النماذج للغرف اللي أنجزوها بنفس الشكل الموجود في الصور المأخوذة من كتالوجات عالمية، لكن طبعًا جودة التقفيل ونوع الخشب حاجة ما نقدرش نحكم عليها من الصور. إدارة المعرض بـ تقول للعميل تقدر تروح تستلم من المصنع قبل مرحلة الدهان، وتعاين "اللمسات النهائية" بنفسك وما تستلمش لو فيه أي حاجة مش عاجباك، هو التسليم بـ يأخذ وقت شوية، حد أقصى 45 يوم لكن هم غالبًا بـ يسلموا في اليوم الـ 35 والدفع بـ يبقى 50% عند التعاقد و35% في زيارة المصنع و15% عند الاستلام، والتوصيل والتركيب على المعرض طبعًا. شوفنا مطابخ ممتازة من حيث التصميم ونوع الخشب اللي عرفنا أنه كونتر زان، المتر هنا (فوق وتحت) بـ 1500 جنيه شامل المقابض والزجاج لكن من غير الإكسسوارات والكماليات زي الصفايات والرخام، غالي شوية بس واضح أنه يستاهل، فيه مهندس متخصص بـ ييجي البيت يرفع المقاسات وبـ يطلع التصميم ملائم تمامًا للمساحة حتى لو كانت صغيرة جدًا، شوفنا أمثلة على ده في سابقة أعمالهم. نفس الكلام في غرف النوم اللي أسعارها بـ تتراوح من 12000 جنيه لحد 25000 جنيه، وغرف السفرة من 12000 لـ 20000 جنيه، وشوفنا ليڤينج ودريسنج روم وفيه بعض الترابيزات والكونسول المعروضة هنا بأسعار من 1000 لـ 3000 جنيه، وهي غالية كدة لأن الخشب نفسه من أجود الأنواع، وهـ تحس بالفرق بينه وبين الموجود في معارض كبيرة مشهورة بالأثاث المودرن اللي بـ تستخدم أخشاب الـ MDF الأقرب للكرتون المضغوط، لكن برضه الغالي ثمنه فيه، والأسعار فيه النهاية تبدو مبررة. فيه ضمان على منتجات «إيه إم فيرنتشر» مدى الحياة، بمعنى أنك بـ تبلغ لو محتاج صيانة لأي حاجة اشتريتها من هنا، وبـ يتم تحديد ميعاد خلال 3 أيام وييجي الصنايعي يصلح المشكلة بدون أي مقابل، خدمة جيدة بـ تعلي من أسهم المحل. من تجربتنا في المعرض ومع إدارة المكان شعرنا بالاحترافية والاهتمام بالعميل، لكن التجربة العملية حاجة ثانية، وانطباعنا الجيد عن المعرض مرتبط بشراء أو تصنيع غرفة أو مطبخ ونعرف مدى التزامهم بكل اللي قالوه، لأن الالتزام في الحاجات دي بقى عملة صعبة، لكن في النهاية عجبنا معرض «إيه إم» للأثاث ونتمنى أنهم يعيدوا التفكير في موضوع الاسم.

...

كارا ديورا: إكسسوارات منزلية وديكورات في المعادي الجديدة
اصدرت في: 05/12/2012

محل صغير وفي مكان مش ظاهر قوي، لكن في نفس الوقت له سمة مميزة جدًا، هي أنه عارض حاجات مش تقليدية، أول ما تشوفها من زجاج العرض الخارجي هـ تحب تدخل وتسأل عن أسعارها وتشوف لو فيه حاجات أغرب موجودة بالداخل بصالة العرض الصغيرة نسبيًا.محل «كارا ديورا- CaraDura» موجود في أبراج بدر بجوار كارفور المعادي، قريب جدًا من محل «أوتلت» اللي بـ يبيع منتجات أديداس وليـﭭايز على الطريق الدائري الخاص بالمعادي. المحل ده بـ يفتح الصبح بدري جدًا على غير عادة المحلات من النوع ده، وبـ يقفل أبوابه بدري كأنه شركة قطاع عام. يعني لازم تروح قبل المغرب كده علشان تعرف تدخل المحل وتتفرج براحتك. المحل مكون من طابق واحد وشكله مش مبهر قوي من الخارج زي باقي محلات الموبيليات والديكورات، لكن بمجرد ما بـ تقف أمام زجاج العرض الخاص به هـ يلفت نظرك تشكيلة الأباجورات وﭭازات الورود والأشجار الصناعية، وعدد من الكونسولات الحديدية والخشبية، والأسعار بـ تتراوح بين 100 و500 جنيه للأباجورات والنجف و200 لـ 500 للكونسول. وعجبنا في النوع ده من المعروضات أن ألوانها كثيرة ومتنوعة، ومش مقصورة على الأسود والبني والأبيض، لكن فيه إكسسوارت كثير باللون الأحمر والأخضر الزرعي والأزرق الفاتح والأصفر. داخل المحل هـ تلاقي عدد من ترابيزات السفرة المصنوعة من الحديد الفرفورجيه، وكراسي بـ تباع بشكل منفرد وكنبات وقعدات للحدائق والمصايف، وده لأن «كارا ديورا» قريب من مجمعات سكنية كثيرة فيها فيلات وحدائق، ده غير أنه قريب من طريق العين السخنة، فهو بـ يلعب على الزبائن من النوع ده، اللي عندهم فيلات أو لسه بـ يفرشوا شاليهاتهم. مافيش غرف كاملة عند «كارا ديورا» إلا فيما ندر، معظم المعروضات محطوطة بشكل فردي وممكن تجمع عدد من قطع الأثاث علشان تعمل الغرفة الخاصة بك حسب ذوقك وأحلامك، وممكن تطلب قطعة معينة حتى لو مش موجودة في العرض وإدارة المحل هـ تحاول توفرها لك خلال فترة من 4 أيام لأسبوع. بالإضافة للكتالوجات الموجودة اللي فيها عدد من تصميمات غرف الجلوس والرُكنات والإكسسوارات المصاحبة لها. الخدمة هادئة زي طبيعة المحل، ما حدش هـ يلاحقك وأنت بـ تتفرج والحوار بينك وبين العاملين هـ يبقى عبارة عن رد على استفساراتك وبس، ودي حاجة ريحتنا جدًا، خاصة أننا كنا بـ نتفرج بهدف الفرجة ومش بـ ندور على حاجة معينة. ممكن تروح «كارا ديورا» لو بـ تدور على أنتيكة أو قطعة ديكور مميزة ومش غالية، وممكن تروح تجهز بيتك الساحلي بالكامل.

...

ثيودورز: أثاث عملى تحفة فى المعادى
اصدرت في: 21/08/2012

مافيش شك أن مشهد التسوق فى القاهرة بـ يشهد مؤخرًا انتشار كبير لسوق الأثاث والتحف إلى حد كبير، وبقت حاجة طبيعية أنك تلاقى محل تحف فى أى مكان قريب منك. الشعبية المتزايدة للموضوع ده بـ يتركز أكثر فى مناطق الزمالك والمعادى، وعلشان ثيودورز واحد من الأسماء المشهورة فى المجال، قررنا نأخذ فكرة. المحل مخفى شوية فى منطقة منعزلة فى المعادى، ومظلل نتيجة وجود شمسية مخططة فوقه، وطبعًا الظل أكيد حاجة كويسة فى وسط شمس الصيف الحارقة. يافطة المحل الكبيرة ولون المكان الأزرق من بره اللى يخطفوا العين هما مصدر الألوان الوحيد وسط المكان الهادئ. زجاج العرض الخاص بالمحل بـ يقدم كمان ألوان مع مجموعة من الترابيزات بألوان زاهية، بالإضافة لمجموعة كراسى لونها بنى غامق، القطع المعروضة مشوقة وبـ تحمس الناس أنهم يدخلوا ويشوفوا المحل بـ يقدم إيه ثانى. رغم أن المكان من الداخل مكيف الهواء، لكنه صغير شوية وضيق. موسيقى الـ Oldies كانت طالعة من السماعات فى وقت زيارتنا، وده حسسنا أننا رجعنا لفترة السبعينيات. معظم مساحة المحل معروض فيها ترابيزات طعام مصممة على الطراز الفيكتورى الرائع ومصنوعة من خشب البلوط الأبيض سعرها 12.000 جنيه. سرير كبير بأربعة أعمدة يحتل ركن كامل من المحل، مزين بمجموعة من الملايات وتشكيلة من مستلزمات غرفة النوم. كمان غرفة نوم ضخمة موجودة فى جزء ثانى من المكان، ومعها إطار بداخله مرآة كبيرة وتشكيلة من اللوحات على الطراز بـ تحيط بإطارها الغامق الملون. من أغرب الحاجات فى المحل هى أن مافيش أى مساعدة محترفة، ومعظم المنتجات غير مسعّرة ومافيش أى واحد تقدر تسأله، الموضوع كان مزعج نوعًا ما. رغم كده، البضاعة اللى سعرها موجود كانت تحفة. مجموعة من الكؤوس القديمة المنقوشة سعرها 850 جنيه، وطقم كبايات شاى صينى مزين بنقوش صينية وصور سعره 1250 جنيه. بعض الناس ممكن يحسّوا أن أسعار المنتجات المعروضة سعرها غالي، لكن لو بصينا أنها تعتبر تحف، فالأسعار المطلوبة متوقع أنها تكون فى مستوى السعر ده. بوجه عام، المحل يعتبر تجربة لطيفة قوى والقطع الموجودة أكيد هـ تثير حماس أى مصمم ديكور أو أى اثنين متزوجين جديد وبـ يحبوا التحف.

...

هوم سنتر: اكتشف بيتك في مول جديد في المعادي
اصدرت في: 26/12/2011

على قد ما عجبنا المكان بكل تفاصيله، على قد ما اتضايقنا أنه مش واخد حقه في الدعاية ومعرفة الناس به. «هوم سنتر – Home Center» عبارة عن مول داخل مول؛ مدينة البارون هي مدينة سكنية على الطريق الدائري في المعادي جنب نادي الصيد، وفيه مجمع تجاري كبير خاص بالمدينة، داخله مبنى ضخم مكون من 3 طوابق مكتوب عليه بلون أخضر مضيء «Home Centre». لو ما لمحتش المول وأنت على الطريق السريع من بره، أكيد هـ تلمح مبنى «النساجون الشرقيون» العملاق اللي جنبه على نفس الصف، هـ تهدي السرعة ساعتها وتدخل أول يمين من بعد المول وترجع في الطريق البطيء اللي آخره مدخل مدينة البارون والمول. المكان مقسم بتنظيم شديد، الدور الواحد مساحته كبيرة ومقسم على شكل أركان، كل ركن بـ يبيع أحد لوازم البيت، من أول غرف النوم والمفروشات لحد الشاليمو بتاع العصير مرورًا بكل أشكال الديكورات والإكسسوارات ولوازم المطبخ. الدور الأرضي فيه الديكورات والأباجورات وتابلوهات الحائط، كل الموديلات مودرن وأشكالها غير تقليدية، أكثر حاجة عجبتنا كانت الأباجورات اللي بـ ستاند على الأرض وبأسعار من 170 لـ 270 جنيه، وفيها أكثر من لمبة بـ تتحرك بأذرع منفصلة عن الستاند الرئيسي، وفيه مجموعة ثانية من الأباجورات لغرف النوم والريسبشن بتصميمات عصرية فريدة مش شبه أي حاجة في أي مكان ثاني ودول أسعارهم من 500 لـ 800 جنيه. تابلوهات سيريالية وتكعيبية ونقوش بارزة بأحجام وألوان مختلفة تليق على كل موديلات الديكور اللي في بيتك بأسعار من 50 لحد 2000 جنيه، وساعات حائط وحليات ستائر وبطاطين وتشكيلات من اللحاف والمخدات وأدوات مطبخ وأطقم صيني وتيفال وميلامين وفخار (عجبنا طقم شاي بالصواني والبراد لقينا سعره 1169 جنيه) وحاجات ثانية كثير من اللي بـ تبقى محتاجها في البيت ومش عارف دي بـ تُباع فين أو اسمها إيه. والمكان مناسب جدًا لتجهيز الفنادق والقرى السياحية والفناء الخارجي للفيلات والنوادي، فيه ركن خاص للحاجات دي. الدور الثاني مخصص للموبيليات، أنتريه وسفرة وركنات وترابيزات وكراسي جلد مستقلة وكراسي مساج وغرف نوم. وأنت بـ تتمشى في الدور ده هـ تلاقي كل غرفة سواء ريسبشن أو غرفة نوم مصممة بعناية ومهندس ديكور شاطر قوي اللي موزعها ومختار الإكسسوارات اللي فيها بشكل مغري يخليك عاوز تشتري الغرفة كلها، لكن طبعًا سعر كل قطعة لوحدها مش قليل، ورغم أن فيه تخفيض 50% على كم كبير من المعروضات، إلا أن الأسعار لسه غالية، ورصدنا بعض المعروضات بسعر أغلى 25% من محلات ثانية بره، صحيح العرض هنا شيك ومغري، لكن فرق السعر يخلينا لازم نتأكد أن الحاجة اللي هـ نشتريها من هنا مش هـ نلاقيها في أي مكان ثاني. في الدور الثالث فيه موبيليا كلاسيك وستيل لكن مش بنفس مستوى الموديلات المودرن في المول، يمكن أكثر حاجة عجبتنا هنا كانت عربية الشاي الصغيرة (695 جنيه) وقطعة واحدة عبارة مكتبة وستاند لشاشة LCD ودي كانت بـ 4515 جنيه. مش هـ نقدر نكتب عن كل حاجة شفناها لأن المعروضات فعلًا كثير ومتنوعة بطريقة مفرحة، يعني فعلًا محتاجين أكثر من زيارة علشان نأخذ وقتنا في الفرجة على كل ركن بتمعن. الخدمة جيدة والموظفين بـ يكونوا قريبين منك لو احتجت مساعدة لكن عمرهم ما بـ يتدخلوا إلا لو أنت طلبت منهم حاجة. شعار «هوم سنتر» هو "اكتشف منزلك الرائع من خلالنا" وهو معبر جدًا لأن فعلًا لو خيالك واسع هـ تقدر تكون لوحة فنية بديعة في بيتك وكله من معروضات «هوم سنتر».

...

شيفلد: إكسسوارات منزلية ومفروشات في المعادي
اصدرت في: 26/11/2011

محل كبير مكون من دورين موجود في شارع اللاسلكي بالقرب من ميدان فلسطين في المعادي الجديدة، «شيفلد - Sheffield» شكله من بره ممكن ما يوحيش بكل المعروضات اللي في الداخل، كل اللي باين من زجاج العرض الخارجي مجموعة أطقم شاي وبعض الفازات والكريستالات، لكن بمجرد دخول المحل هـ تعرف أنه فيه معروضات كثير جدًا وبأذواق مختلفة ومنظمة بشكل ممتاز. الإضاءة هادئة داخل المكان وماشية مع الطابع الكلاسيكي للمعروضات. الدور الأول فيه مجموعة كبيرة من أطقم الصيني والفضيات والفناجين والصواني، وفيه المطلي بالفضة وفيه كمان أطقم من الكريستال، الأسعار متاحة من أول 300 جنيه للطقم لحد 800 جنيه، وممكن تختار قطع معينة مش لازم تأخذ الطقم كامل. مجموعة صواني تقديم وأباريق وبرادات شاي بسعر 450 جنيه، ولو أضفنا الفناجين كاملة هـ ندفع 150 جنيه زياة يبقى كله 600 جنيه. أدوات المطبخ وأطقم الملاعق والسكاكين بأسعار من 400 لـ 600 جنيه، وفيه نقشات كثير وهـ تحس فعلًا قد إيه هي قيمة من وزنها وشكل الشنطة اللي بـ تترص داخلها. طقم سكاكين بالحامل الخشبي أو (الجراب) بتاعهم فيه منه أحجام مختلفة وبأسعار من 150 لـ 340 جنيه. رف زجاجي كامل للفازات والكريستالات والبونبونيرة وطفايات السجائر، أسعار الحاجات دي بقى أغلى من المتوقع، حتى لو كانت كريستال أو نقشاتها مميزة، ما ينفش نشوف فازة بحجم صغير جدًا بما يزيد عن 200 جنيه، وطبق متوسط لتقديم الفاكهة بـ 335 جنيه وده بعد التخفيض، وكان سعره أصلاً 550 جنيه. الدور الثاني مخصص للموبيليا ومعظمها غرف سفرة بأحجام مش كبيرة وبأسعار من 4000 لـ 6000 جنيه، وفيه مجموع من دواليب الفضية والبوفيهات والترابيزات الصغيرة المستقلة، كل المعروضات في القسم ده تعتبر ستيل، وعجبنا قوي عربية الشاي الخشبية المطعمة بحليات من الفضة وكان سعرها 1500 جنيه، وكان فيه موديل ثاني أصغر شوية وأرخص 100 جنيه. فيه كنبات وركنات مودرن لكن عددها مش كثير، ألوان مبهجة وفاتحة زي الأحمر والبرتقالي، وفيه كنبات جلدية باللون الأبيض والأسود ودي كانت بـ 8100 جنيه، بعد ما كانت بـ 16000 جنيه! وعجبتنا كنبة ثانية صغيرة باللون الأحمر السادة بـ 1750 جنيه. في آخر المحل في الدور العلوي مجموعة كبيرة من الأباجورات الكلاسيكية وبعض نباتات الزينة وقطع الديكور بأسعار من 200 لـ 1000 جنيه حسب الحجم. المعروضات كلها عليها ماركة «شيفلد» ولوجو التاج المميز لها، وفيه أطقم شاي وصيني بـﭭاري ألماني وليموج فرنسي وياباني، وفيه أطقم ملاعق وشوك شيك جدًا ماركة "ألبكا" وفيه كريستال بوهيمي صناعة يدوية وساعات حائط بتصميمات العصر الباروكي والقوطي ده غير مجموعة ضخمة من التحف والأنتيكات. الخدمة غير مريحة والموظف اللي كان بـ يلف معانا وإحنا بـ نتفرج كان مش ودود كفاية ومع ذلك كان بـ يلف وراءنا في كل حتة في المحل، لكن إحنا بـ نعذره لأن المعروضات حساسة جدًا وممكن لو حد لمسها تتكسر بسهولة.

...

شاتكس: مفروشات وإكسسوارات غالية في المعادي
اصدرت في: 02/11/2011

في أبراج بدر الموجودة بجوار الطريق الدائري بالمعادي الجديدة، وقريب من محلات «هابيتاتHabitat - » و«أديداس أوتليت – Adidas Outlet» اللي ممكن تشوفهم وأنت على الطريق السريع، وممكن تنزل من الطريق الدائري على الطريق الداخلي البطئ من عند «كارفور» لحد ما توصل لأبراج بدر اللي كل الأدوار الأرضية بتاعتها تقريبًا تجارية وفيها محلات ومطاعم. «شاتكس - Shatex» له يافطة مضيئة باللون الأحمر هـ تلفت نظرك في المكان الهادئ المظلم أحيانًا، مساحة المحل مش كبيرة من الداخل، تقريبًا يكفي 3 أو 4 قطع أثاث كبيرة بالكثير، وعلشان كده وقت زيارتنا كان فيه كنبة واحدة كبيرة وركنة وبعض الترابيزات متوسطة الحجم، وباقي المعروضات كانت عبارة عن سجاد ملفوف ومستود على الجدران وبعض التحف والفازات والأباجورات موزعين في المكان. كمية كبيرة جدًا من كتالوجات الأقمشة بألوان وخامات مختلفة ممكن تختارها لأي موديل من أي قطعة أثاث، والسعر مش بـ يفرق كثير من خامة للثانية. الأسعار غالية رغم أن فيه تخفيضات بـ توصل لـ 50% وقت زيارتنا. عجبنا كرسي من غير مساند (نيقوسيا بانكيت) زي ما مكتوب في تيكيت الموديل وكان سعره 1500 جنيه بعد الخصم، وقبل الخصم كان بحوالي 3000 جنيه! كثير جدًا على مجرد كرسي خاصة أنه مش أنتيكة زي حاجات ثانية معروضة في المحل. لكن ده ما يمنعش أن الأنتيكة فعلًا كان سعرها غير عادي، وكانت عبارة عن دولاب أو شوفونيرة من المعدن، ومرسوم عليها لوحة شهيرة لبيكاسو، رسمها فنان بطريقة يدوية على قطعة الأثاث بحيث تأخذ شكل منحنيات القطعة والأدراج الموجودة فيها، شكلها كان ملفت وفني جدًا، وسعرها كان 25 ألف جنيه بس! أكثر حاجة أسعارها معقولة في المحل هي الركنات والكنبات الكبيرة، تصميمات أنيقة جدًا، والقماش دائمًا على ذوقك أنت، وأسعار بـ تبدأ من 2900 جنيه فما فوق، السجاد كمان كان فيه موديلات مبتكرة زي حلقات الوبر الصوف العملاقة باللون البني (2750 جنيه)، والسجاد المودرن بكل أشكاله بأسعار بـ تبدأ من 1500 جنيه. وترابيزات للأنتريه أو غرف المعيشة خامتها ممتازة بأسعار من 1800 جنيه لـ 2500 جنيه. وللعلم كل الأسعار اللي بـ نقولها هنا بعد الخصم، وأي معروضات متعلق فيها تيكيت السعر وبادج باللون الأحمر ده معناه أن لسه عليه خصم. الأنتيكات والأباجورات الموجودة في المحل شيك ورقيقة، ومش شبه أي مكان ثاني، فازات بأحجام متوسطة بسعر 500 جنيه، وصواني عبارة عن قطع معدنية بأشكال هندسية مستوية وبأحجام مختلفة ممكن تستخدمهم مدمجين في بعض كصينية واحدة، أو ممكن تستخدم كل قطعة منفردة، وأسعار القطع بـ تكون ما بين 300 لـ 500 جنيه حسب الحجم. أباجورة ضخمة مكونة من 3 مكعبات خشبية ومحاطة بالقماش كان شكلها جميل وسعرها كان 1500 جنيه. المحل على قد ما هو صغير لكن كان فيه معروضات مغرية كثير ممكن تقف تتفرج عليها وقت طويل، وخدمة العملاء جيدة وواعية، ومواعيد التسليم مظبوطة. «شاتكس» مكان مثالي لإضافة بعض اللمسات الجمالية بعد ما تكون بالفعل فرشت البيت من مكان ثاني أسعاره أقل شوية، إلا إذا كنت مستعد للفاتورة كويس.

...

فيجن مودرن لايتنج: إضاءات رخيصة ومطرقعة في المعادي
اصدرت في: 05/09/2011

تجهيز وتصميم ديكورات بيتك في مصر ممكن يبقى تجربة صعبة ومتعبة جدًا، محلات كثير بـ تقدم الموديلات الفرنسية الشيك والكلاسيكية العتيقة، ولكن فيه اتجاه سائد لبعض المحلات اللي بـ تسعى أنها تعمل طفرة في الموديلات المودرن وغير التقليدية لإكسسوارات البيت. المشكلة أن لو الأسعار في «ديزاينوبوليس» و«سيتي ستارز» معقولة في الحاجات الكلاسيكية، هـ تلاقي أسعار المعروضات المودرن خيالية وعالية جدًا. ومع ذلك فيه بعض الاستثناءات في بعض الأماكن المستخبية في القاهرة؛ الفكرة بس أنك تعرف إزاي توصل للأماكن دي. « فيجن مودرن لايتنج – Vision Modern Lighting» واحد من المحلات دي بـ يقدم إضاءات حديثة وإكسسوارات بأسعار ممتازة. المحل موجود في شارع النصر الحيوي في المعادي، المحل تصميمه غريب بكل الأضواء النيون اللي بـ تزغلل العين والمدخل الخلفي بتاعه، وركن العربية أمامه صعب جدًا. وما تتضايقش من الناس اللي هـ تطلع لك من تحت الأرض علشان تساعدك في الركنة، كل دي تضحيات لازم تدفعها علشان في النهاية هـ تستفيد من العروض والأسعار المذهلة في المحل، علشان توصل له لازم تطلع سلالم تعدي بها فوق الفوود كورت اللي في المبنى، وتدخل أول يمين في الدور الأول. المحل دورين ومليان على آخره بكل معروضات الإضاءة اللي ممكن تخطر على بالك. من أول النجف المدور الزجاجي العملاق (من 300 لـ 800 جنيه) لحد الأباجورات الصغيرة الفضية وسبوتات الحمامات. المحل فيه كل حاجة وبأسعار منطقية، والخدمة ممتازة، والناقد كاتب المقال كان معاه موظف بيع شاطر وفاهم جدًا وسهل مهمتنا في البحث كثير. طبعًا لازم نقول أن السعر على قدر الجودة، يعني مقابل الأسعار الزهيدة الجودة ممكن ما تكونش أحسن حاجة ممكنة، ومعظم المعروضات مستوردة من الصين. المكان ده علشان تشتري إضاءات مطرقعة ورخيصة بس مش معمرة، يعني ما نقدرش نقول أن هي دي حاجة العمر اللي مش هـ تتغير. معظم التصميمات كانت فيها شوية مبالغة، كمية كريستالات وألوان كثير في مساحات صغيرة، ومع ذلك لو دورت كفاية في المحل أكيد عينك هـ تقع على أباجورة أو نجفة اللي لما تأخذها وتعلقها في بيتك أكيد شكلها هـ يتغير عن ما هي موجودة وسط مهرجان المعروضات والألوان ده. وكاتب المقال وجد بالصدفة لمبات سقف من الأرابيسك ومليانة تفاصيل دقيقة وشيك قوي بـ 120 جنيه الواحدة. لسبب ما المكان بـ يبيع لوحات زيت أصلية، إحنا ما انبهرناش قوي بها، بس الأكيد أن كل حاجة ولها زبونها، فمافيش مانع تأخذ فكرة وتتفرج عليها بالمرة، وأن المحل له موقع على الإنترنت متميز ومعتنى به جدًا وفيه كتالوج للمعروضات، ودي حاجة غير معتادة في المحلات الصغيرة اللي مالهاش فروع ثانية.

...

بدوية: مفروشات يدوية في المعادي
اصدرت في: 11/05/2011

السجاجيد اللي بـ تبقى منسوجة يدوي، النجف النحاس اللي تفاصيله دقيقة جداً، والأثاث البامبو المتين، كل ده مجرد جزء من الحاجات الكتيرة اللي موجودة في «بدوية». محل ديكور وهدايا للبيت موجود في الدور اللي تحت الأرضي في عمارة سكنية في المعادي. المحل ده موجود بقاله كام سنة، بس لأن موقعه مش باين فمش معروف كفاية. العمارة موجودة بعد الكوبري اللي بـ يخَرَج من المعادي على طول والناس بـ تبقى مِعَدِية بسرعة ومش بـ تاخد بالها منه. وغير كل ده طبعاً فيه مشكلة الركنة، والأحسن إنك تروحله مَشي عشان توفر على نفسك المشكلة ديه. أول حاجة هـ تلاحظها هناك هي الأثاث البامبو اللي محطوط جنب المدخل على طول، الكراسي والترابيزات البامبو اللي هناك بـ تنفع جداً للفرش الخارجي للحدائق والفراندات وأسعار البامبو في «بدوية» مناسبة جداً، الحاجات عنده بنص الثمن اللي في المحلات المعروفة وكمان جودتها عالية. المحل ممكن يبقى مكان مناسب جداً ليك لو انت عايز تفرش البَلكونة أو الجنينة بتاعة بيتك. فيه برضه شوية إكسسوارات تنفع للبيت، وأغلبها تنفع بالأخص للحمامات. من أكتر الحاجات المحبوبة في «بدوية» وحدة التخزين اللي عبارة عن برواز خشب وأدراج بامبو بتـ تفتح وتـ تقفل بسهولة، وفي تشكيلة كبيرة من الألوان بس بالطلب، وكمان أسعارها معقولة ما بين 400 و800 جنيه على حسب المقاس وعدد الأدراج أوالأرفف. "كف فاطمة" التقليدي بـ يتباع كمان هناك كزينة للبيت ومعمول من الصفيح ومتزين بالخط العربي أو بالعين الزرقاء (بحوالي 15 جنيه)، أما المرايات اللي في براويز نحاس كانت بـ تبتدي من 30 جنيه للواحدة. «بدوية» كمان عنده حاجات زي الجلاليب، الچاكيتات الجلد الرجالي وسراير الأطفال. كل المنتجات مُصنعة محلياً ويدوياً، وده طبعاً بـ يضيف لها سحر خاص. النجف النحاس التقليدي اللي بقى منتشر قوي دلوقتي موجود هناك برضه بس بأسعار رخيصة جداً بالمقارنة مع محلات تانية، وبـ يبتدوا من 300 جنيه. لو مش عايز نجفة نحاس بس عايز تضيف حاجة شرقية لبيتك ممكن تشوف المنتجات الصغيرة التانية اللي متوفرة هناك زي الأباچورات مثلاً.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح