مكتبات تسوق in المعادي Cairo, Egypt

تسوق

مكتبة آدم: أفضل مكتبة تلاقي فيها كتب أطفال بكل اللغات في المعادي
اصدرت في: 11/10/2014

طبعًا المكتبات حاليًا بقيت كثيرة جدًا، وبـ تتنافس في الأسعار والخدمات، بس الحقيقة في كل المكتبات اللي رحناها في القاهرة، ماشوفناش مكتبة بـ تهتم بكتب الأطفال وكل احتياجاتهم التعليمية، زي "مكتبة آدم-Adam Bookshop"في جراند مول المعادي. أول ما بـ تدخل المكتبة بـ تلاقي على أيدك اليمين كروت للتهنئة بأشكال مختلفة وجمل ظريفة، بعد كده هـ تلاقي على طول مجلدات عن مصر وتاريخها والعمارة لمحبي المجلدات والتاريخ وبالمناسبة كان عليها تخفيض 20%، كمان فيه مجلات خاصة بوصفات الطبخ وأسعارها معقولة تبدأ من 20 جنيه. وطبعًا بـ تشوف كل الروايات اللي متاحة حاليًا في الأسواق، بأسعارها المعتادة والـNotebooksاللي عليها أشكال هندسية مميزة وجمل بخط عربي أصيل، سواء لكلمة واحدة زي "حلم" أو "علم" أو "حياة" أو لبيت شعر زي "أحبك حبين حب الهوى وحبًا لأنك أهل لذاك"، وأبيات ثانية كثير بكل الألوان. كمان فيه براويز فيها صور فنانين الزمن الجميل زي فاتن حمامة وشادية وأحمد رمزي وعماد حمدي ونجوم ثانية. وبراويز مكتوب عليها بالخط العربي، كلمة واحدة زي "محبة" أو "حب" أو بيوت شعر برضه، والحقيقة أن أسعاره معقولة ومتناسبة. سعر البرواز على حسب حجمه ونوعه بـ يبدأ من 65 لـ125 جنيه. أما بقى الكنز الكبير، يكمن في كتب الأطفال.. عارف إحساس علي بابا وهو بـ يقول: "ذهب.. ياقوت.. ألماظ.. أحمدك يا رب"، إحنا بـ نبقى عاملين كده وسط كتب الأطفال هناك، مبدأيًا أنت عندك أربع لغات للكتب: إنجليزي وفرنساوي وألماني وطبعًا عربي. مما لا شك فيه أن قسم العربي عندهم أقل ما يقال عليه أنه متنوع، لأنه غني جدًا بكل أنواع القصص والكتب اللي بـ تنمي مهارات الطفل وأسعارهم بـ تبدأ من 10 لـ100 جنيه. مش بس كده عنده كمان كتب صغيرة جدًا لقصص ديزني وقصص ثانية مبتكرة الواحدة بـ 10 جنيه بس. نيجي بقى للأقسام اللي بلغات ثانية، غير طبعًا القواميس اللي لا غنى عنها في أي مكتبة شخصية، هـ تلاقي كتب صغيرة فيها الأرقام والحروف للأطفال وقصص بأحجام مختلفة وكتب للتلوين، كما فيه لعب بـ تحفز روح الإبداع للأطفال سواء في التلوين أو الإكسسوارات. الحقيقة أكثر حاجة لفتت نظرنا غير القصص وكتب التربية للأطفال اللي متنوعة برضه، الكتب الألمانية والفرنساوية طبعًا لندرة وجودهم وأسعارهم المعقولة، واللي بـ تبدأ من 15 لـ 150 جنيه. أما كتب اللغة الإنجليزية غير القصصوالروايات وكتب التربية، فيه كتب بـ تساعد الطفل في كل العلوم تقريبًا:حساب وعلوم طبيعية وكتب للمساعدة على القراءة والقواعد اللغوية Grammar، وأسعارها معقولة جدًا. لو عاوز تشتري كتب لأولادك أنسب مكان لك هو مكتبة آدم، وممكن تظبط نفسك أنت كمان بكام رواية وNotebook، علشان مكتبة آدم بـ تجمع لك كل اللي تحتاجه في مكان واحد.

...

ليفر دو فرانس: محل بيع كتب ساحر فى المعادي
اصدرت في: 27/03/2012

محلات بيع الكتب من العلامات المميزة لمنطقة المعادي. ده بجد، مافيش زاوية أو ناصية شارع إلا ولازم تتوقع أنك تلاقيهم فيها، وطبعًا مع وجود كل المكتبات دي أكيد فيه تنافسية عالية وبعضهم يعتبر أفضل وأشهر، لكن للأسف «ليفر دو فرانس – Livres De France» ما وصلش للمرتبة دي. المحل سهل تلاقيه، محاط بشجيرات صغيرة وزرع متسلق ويافطة مرسوم عليها بخط اليد اسم المكان. لكن المدخل غير واضح وما تقدرش تلاحظه لأنه مستخبي فى جانب المبنى. الديكور الداخلى للمكان مخيب للأمل، فيه مساحة صغيرة مفتوحة لكن مليانة على آخرها من الأرض للسقف كتب، وفى نهاية الغرفة فيه طرقة بـ تؤدي لغرفة أكبر لكتب الأطفال. الشباك الكبير الموجود في آخر الحائط شمال بالكاد مدخل ضوء خافت لكن عامل تأثير حلو قوي على الأرضية والحوائط، الكتب محطوطة على الأرض وبعضها فى صناديق أو على ترابيزات أو أرفف، وملفوفة ببلاستيك شفاف ودى طبعًا حاجة كويسة وإضافة لهم لأن الكتب بـ تحتفظ بكونها جديدة وما بـ تتبهدلش عندهم. أغلب الكتب المعروضة مقتصرة بشكل أساسي على اللغة الفرنسية، سواء كتب أصلية أو مترجمة من كتب مؤلفيها إنجليز أو مصريين (زي نجيب محفوظ، وباولو كويلهو.. إلخ). فيه قسم للكتب الإنجليزي فقط لكن أغلبها متعلق بالتاريخ المصري القديم. أسعار الكتب معقولة بـ تتراوح بين 60 إلى 80 جنيه للكتب اللى غلافها ورقى، وبـ توصل لحد 200 جنيه للكتب اللى غلافها مقوى وفقًا لأقدمية أو حداثة الكتاب. فيه كمان كتب متعددة بلغات مختلفة ومعاهم القاموس المرفق بهم للبيع، أكثر مفاجأة كانت مفرحة لنا كانت قطة الشارع اللى أصحاب المكتبة تبنوها وقاعدة تحت الكاشير على مخدة منفوخة. بصفة عامة على الرغم من أن «ليفر دو فرانس» مكان ساحر بالفعل إلا أنه مش بالضرورة من المكتبات المتميزة فى المجال. فكرة أن أغلب الكتب فرنسية قلل من تميزها إلا أنه ممكن يعجب البعض.

...

بوكس & بوكس: ركن الكتب الهادي
اصدرت في: 21/04/2011

حمى المكتبات (محلات كتب، مش مكتبات إستعارة) إنتشرت في المعادي، كل فترة قصيرة بـ نكتشف مكتبة فتحت في شارع من شوارع الحي الهادي. زيادة على مكتبة «ﭭوليوم 1 - Volume 1» اللي تعتبر من أقدم المكتبات في المعادي وفرع مكتبة «ديوان» الجديد في شارع 9، و«كتب خان» في شارع اللاسلكي، فتحت أفضلهم حتى الآن: «بوكس & بوكس – Books & Books » محل هادي ومريح للأعصاب في منطقة دجلة في شارع 199 اللي إبتدى يكون ليها حس من السنة اللي فاتت لما المحلات إبتدت تفتح واحد ورا التاني وخلِت أي حد عايز ينزل يتمشى بعد الضهر أو في الويك إند يروح على الشارع ده اللي بقى مصحصح وكله حياة. ولو هـ تاخد بنصيحتنا وتتمشى في المنطقة دي، محبو القراءة منكم لازم يقفوا شوية عند المكتبة، المحل الصغير ده في ثروة أدبية حقيقية، الكتب مش كتير، لكن ده مش المهم لأنها متنقية بعناية، وعندها مجموعة من أحدث وأهم الكتب العربية والإنجليزية من دور نشر محلية ودولية وفيها مجموعة كبيرة من إصدارات الجامعة الأمريكية بالقاهرة «AUC Press» ، ده غير تشكيلة هدايا صغيرة. المكان هايل سواء كنت عايز إصدارات حديثة أو بـ تلف على الأرفف بـ تدوّر على الكلاسيكيات الأدبية. في ترابيزات عرض بـ يكون عليها دايماً الإصدارات الجديدة وميزتها إنها مش بـ تخليك تلف كتير ومعروضة حسب الموضوع أو المجال فبـ تسهل الدنيا عليك خصوصاً لو هـ تشتري كتاب هدية لواحد صاحبك. العاملين في المكتبة متعاونين وعندهم معلومات هـ تفيدك وإنت بـ تدوَّر أو مش عارف بالظبط انت عايز إيه. من ناحية الأسعار الكتب الإنجليزية بـ تتراوح بين 65 لـ150 جنيه، والكتب والروايات العربية بـ تكون من 20 لـ100 جنيه، وكتب الأطفال بـ تبدأ من 20 جنيه. المالك «فؤاد حظي» هدفه الأساسي من المكتبة ترغيب الأطفال في القراءة وبذل مجهود كبير عشان يحقق ده، هـ تلاحظ أن المحل عارض كتب أطفال والسن الأكبر شوية باللغتين العربية والإنجليزية وبطريقة هـ تغري أي طفل يدخل المكان مهما كان مش بـ يحب القراءة. كل حاجة موجودة لجميع الأعمار من الأطفال وسن المراهقة لحد السلاسل المفضلة للشباب. وبالنسبة للكبار الكتب مش أقل جاذبية أبداً وميزة المكان إنه هادي ويساعدك على الإسترخاء وتقدر تتمشى براحتك وقهوتك في إيدك بين الأرفف وتشوف عالم الكتب بـ يقدملك إيه جديد.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن