دليل البرامج والمسلسلات - مقالات عن برامج ومسلسلات العالم العربي

تليفزيون

دوت شباب: برنامج كوميدي شبابي على قناةmbc
اصدرت في: 02/04/2016

هادي الشيباني محامي سعودي بدأ رحلة حياته على اليوتيوب، وعمل انتشار كبير فى السعودية وعدد مشاهدات عالية جدًا، وطبعًا علشان القنوات بتاخد بالها الفترة دي من السوشيال ميديا قرروا يجيبوه ويعمل برنامج فى mbc وطلع برنامج "شباب دوت" اللى بيتكلم تقريبًا عن كل حاجة بشكل كوميدي. هادى لقبه دلوقت هو محامى الشباب لأنه مهتم جدًا بعرض قضايا الشباب والكلام عنها، ويمكن هو ده سبب تميزه وشهرته فى عالم الإنترنت ومن بعده عالم الميديا، الشباب محتاجين أكيد اللى يتكلم عنهم وعن الحاجات اللى بيفكروا فيها وعن مستقبلهم وعن اللى بيشغل بالهم، مش كل حاجة اهتمام بالموضة والفن والفنانين، فيه حاجات ثانية كثير بتهم الشباب، وده اللى بيحاول يعمله هادي فى برنامجه اللي اختار له اسم قريب منهم وبيعبر برضه عنهم: "دوت شباب"، يعنى علامة الإنترنت اللى هو سبب شهرة الشيباني، والشباب اللى بيتكلم عنهم ومحور برنامجه. لو بصينا على البرنامج واللى فيه هنعرف على طول ليه البرنامج اتشهر بالذات فى الوطن العربى ودول الخليج، لأنه بيجيب ضيوف من الخليج وبيتكلم عن الشباب فى المجمل يعني هتلاقي حلقات عن التعصب الرياضي وأثره على الشباب والمجتمع، والعلاقة بين المعرفة والسوشيال ميديا، والعمليات التجميلية للشباب. طريقة هادى فى التقديم حلوة لأنه بيحب الكوميديا، وكل حلقاته فيها ضحك وهزار ماعدا الحلقة اللي عملها عن وفاة ملك السعودية (رحمه الله) دي كانت واحدة من أكتر حلقات الحزن اللى ممكن تشوفوها، وطبعًا كان كل التليفزيونات العربية فى حالة حزن عليه. التصوير عادى فى البرنامج وكمان الديكور، مجرد ستوديو وقعدة مع الضيوف اللى بيستضيفهم وأغلبهم برضه من الشباب، وبيعرض تقارير من الشارع، وفيها برضه تقارير مضحكة زى الرقصة اللي خلت واحد يدخل السجن، أو عروسين اتخانقوا يوم زفافهم، وأنتم عارفين بقى قد إيه الشباب بيحب المواقف دى وبيتفاعل معاها.. البرنامج واضح من التفاعل معاه أن أغلب اللى بيتفرجوا عليه من دول الخليج وقليل لما بتيجى مشاركات من مصر، لكنه برنامج لطيف بيعرض معلومات جديدة وبيركز على قضايا مهمة كتيرة وبيخلينا نشوف العالم الخليجي من وجهة نظر مختلفة، يعنى بيغير فى القناعات الخاصة بشباب الخليج وأنه شباب بيحب السهر والسفر وكده، بنشوف مشروعات وإعلام رقمي وتجارة ورياضة وحاجات لها علاقة بتنمية المجتمع، والشباب هما أهم حاجة فى الدنيا لازم نركز عليهم وننميهم ونخليهم أحسن ناس علشان بلادنا تطلع للأمام.

...

اليوم في ساعة: برنامج هادي على قناة النهار
اصدرت في: 31/03/2016

لما قناة النهار أعلنت عن برنامجها "اليوم في ساعة" كنا متوقعين أننا هنشوف برنامج إيقاعه سريع وتقارير كتير وتصوير فى كل حتة فى العالم وهنعرف منه إيه بقى اللى حصل على مدار اليوم فى كل حتة فى العالم ونبقى مشدودين كده.. مش هما اللى قالوا اليوم فى ساعة؟.. يعنى الفكرة حلوة عاوزين يجمعوا كل أحداث اليوم فى ساعة واحدة، يعنى أنتم عندكم القدرة أنكم تعملوا كده يبقى أنتم جايبين فريق قوى جدًا قاعد بيتابع ويصور ويعمل شغل ما يخرش المياه.. لكن اللي حصل العكس.. البرنامج شغال على مياه هادية قوى، مع أن المفروض أن اسمه يخلى الإيقاع سريع وتبقى مش عارف تاخد نفسك وأنت بتتفرج عليه، تعرفوا لما تطبخوا على نار هادية علشان الأكل يستوى حلو، بالضبط ده اللى بيحصل فى اليوم فى ساعة. طيب اليوم فى ساعة بقى بيعمل إيه؟ هو باختصار بيشوف إيه الأخبار اللى سمعت مع الناس اليوم اللى قبله أو اللى قبل قبله ويتكلم عنها مع ضيف، بصوا بالراحة هنقول لكم شكل البرنامج، هو برنامج توك شو طبعًا من غير كلام، وما أكترهم. البرنامج بيعرض مجموعة من الأخبار وبتعلق عليها دعاء جاد الله مقدمة البرنامج، وطبعًا لازم تجيب تقرير مع الناس تسألها إيه رأيها فى اللى حصل ده، لكن ده مش بيحصل مع كل الأخبار، بيبقى مع الأخبار السخنة بس.. وبعدين تجيب ضيف تتكلم معاه على قضية الحلقة زى مثلًا القمح المسرطن، الكوبرى اللى وقع مرتين مع أنه لسه جديد، وبتجيب ضيوف متخصصين صراحة وده معناه أن معاها فريق إعداد قوى ودى من الحاجات اللى تحسب لها، يعنى هتلاقوا وزير سابق أو مدير مكتب أو مساعد وزير حالى أو متخصص فى الحاجة العلانية أو استشارى فى الموضوع الفلاني.. ولحد كده تمام، ونطلع بقى بتقرير فى وسط ما الضيف بيتكلم عن نفس الموضوع، وبس خلاص، مافيش ابتكار، مافيش جديد، مافيش حالة كده تخليك عايز تتفرج أو تشوف أو تتابع. الكاميرا مركزة على المذيعة أو على الضيف وتحس أن المخرج متضايق وهو بيخرج البرنامج، ما بيعملش نقلات كتيرة، ساعات يفتح الصورة وخلاص ويسيبهم يتكلموا، وممكن ده يكون راجع أن المذيعة دعاء جاد الله هادية زيادة عن اللزوم، وده بيخلى الحلقة رتمها هادى برضه.. لكنها شاطرة فى إدارة الحوار واختيار الأسئلة.. بس يا دعاء ده مش كل حاجة!

...

Yes I am Famous: برنامج للمشهورين بس على mbc مصر
اصدرت في: 24/03/2016

أيوه أنا مشهور.. تحس كده من الاسم أنك أمام برنامج طبقى، يعنى حاجة كده أيوه أنا جامد وحلو ومعروف ومش هاممنى حد، ده الإحساس اللى حسينا به من أول ما عملوا البرومو بتاع البرنامج ومن اسمه كمان، المهم شمرنا وقولنا نتوكل ونشوف بقى إيه الموضوع. البرنامج فكرته مش جديدة، يعنى مقابلة مع نجم من النجوم ويقعد يتكلم عن حياته ومسيرته الفنية وكده، لكن الجديد بقى أنه مركز على النجوم وبس يعنى مش الناس المعروفة ووشها مألوف، لأ البرنامج مقرر أنه يعمل مقابلات مع نجوم بجد ناس عدت يعنى وبقى لها كتير فى مجالها. كان هيبقى برنامج مش لطيف لو ركز على الغناء والتمثيل وبس، على اعتبار يعنى أن دول أكتر ناس مشهورة، لكن البرنامج معاه فريق قوى بيركز وعارف هو بيعمل إيه، وفريق تسويق كمان بيفهم، علشان أول حلقتين من البرنامج كانوا مع النجم عادل إمام وأنتم عارفين بقى يعنى إيه عادل إمام، وده كان اختيار صح جدًا علشان الناس بقى لها كتير ما شافتش عادل إمام فى برنامج، وكمان الناس عاوزة تعرف عن حياته باعتباره واحد من القليلين اللى باقيين من جيله، وإزاى وصل للى هو فيه، علشان بدأ من الصفر وكده. البرنامج حلو مافيش كلام، اختيار مكان التصوير على خشبة المسرح بيعطى انطباع بأهمية المسرح وكمان علاقته بعادل إمام لأنه من أشهر الناس اللى علمت مسرح وكمان من أشهر الناس اللى قعدت تعمل مسرح فترة طويلة، يعنى العرض الواحد ممكن يقعد أكتر من سنة، حتى أنه قال أنا ممكن أتسجل فى موسوعة جينيس. البرنامج فكرته قايمة على استضافة المشاهير والكلام عن حياتهم وسيرتهم، وبيلعب كمان على فكرة أسرار النجوم وحكايات بيحكوها أول مرة. المذيعة منى الشرقاوى زوجة السيناريست والكاتب يوسف معاطى مجتهدة وقادرة تعمل حالة حلوة خاصة فى الحلقة الأولى واللى كان رد عادل إمام فيها قليل قوى.. وكمان شطارتها بتبان فى استرسالها وأنها ما كانتش متخوفة من القعدة أمام نجم كبير، وأهم حاجة أنها بعد عادل إمام هتجيب لاعب برشلونة الشهير جدًا ليونيل ميسى، يعنى البرنامج إنتاجه ضخم جدًا علشان يجيب النجوم دى ولسه فى الحلقات الجاية هيجيبوا مورجان فريمان ومحمد منير، بس أكيد هيعوضهم إعلانات يعنى. الديكور مش هينفع نتكلم عليه، علشان كل نجم بديكور مختلف، يعنى عادل إمام على خشبة المسرح ووراه خلفية كبيرة فيها بوسترات لأفلامه ومسرحياته، أما ميسى ففى مكان مفتوح على البحر، وده برضه من ضمن المصاريف اللى هتخلى البرنامج اسمه يضرب فى العالى.

...

من أمريكا: على طريقة الخواجة لامبو فى قناة النهار
اصدرت في: 08/03/2016

تقفيل بره: تقفيل بره زى ما بيقولوا.. حاجة كده من عند الخواجة.. وأنت عامل إيه خبيبى؟.. فاكرين "الخواجة لامبو" القصيدة الشهيرة للأبنودى واللى فيها بيوصف مشهد فى أسبانيا كأن عم الأبنودي الله يرحمه كان هناك.. هى دى فكرتنا عن الميديا لما تيجى تتكلم عن حاجة تبقى بالضبط شايفها وعارف هى إيه وبتعمل إيه وإيه خباياها.. ومين اللى تعرف تجيب منه المعلومة.. أما لما تتكلم عن أمريكا فده موضوع مختلف تمامًا. الخواجة لامبو: الإعلامية جيهان منصور خلال برنامج "من أمريكا" بتحاول تشوف الدنيا عاملة إزاى هناك، فى الكوكب الشقيق أمريكا.. البرنامج بيهتم بالسباق الرئاسي الأمريكي، ده كمان غير التركيز على الجوانب الحياتية للمواطن الأمريكي، وبيركز على أهم الأعمال السينمائية فى هوليوود وأنتم عارفين هوليوود بقى واللى فيها يغطى برنامج لوحده، ده غير المتابعات الرياضية فى أمريكا، بخلاف اللقاءات اللى بتعملها جيهان هناك مع شخصيات بارزة سواء عربية أو أمريكية. الموضوع فى مجمله حلو بيحاول يفهم سر الديمقراطية الأمريكية وتفاصيل السياسة الخارجية وصناعة السينما والتعليم والطب والرياضة، يعني عين على بلاد العم سام. العم سام: مشهورة أوى جملة العم سام وطبعًا كلنا عارفين أنها بتروح على طول ناحية الولايات المتحدة الأمريكية، وأنك تعمل برنامج عن بلاد العم سام، صعب، صراحة افتكرنا فى الأول أن الموضوع هيبقى مجموعة تقارير متجمعة من فيديوهات وخلاص، لكن الموضوع طلع غير كده والحلقات الأولى أكدت أن جيهان منصور سافرت وراحت قابلت مسؤولين هناك، وعملت تقارير حصرية لها ولبرنامجها وده طبعًا بيعطى مصداقية كبيرة للبرنامج ولفريق العمل، جيهان سريعة فى كلامها ومركزة فى اللى بتقوله وإعلامية مخضرمة عندها المقدرة على عمل حلقات مش حلقة واحدة والبرنامج فى مجمله حلو، ولو فضل ماشى على نفس الوتيرة وبيروح يسافر لهناك ويجيب تقارير من كل حتة فى أمريكا هيبقى حاجة قوية. كمان البرنامج مختلف شوية عن برنامج باسم يوسف اللى عمله عن أمريكا وكان قريب من الفكرة، لكن باسم كان بيعمل حاجة كده شبه وثائقية عنهم.. أما جيهان بتحاول تجدد فى المحتوى وتكلمنا عن أمريكا اللى ما نعرفهاش، أمريكا اللى غايبة عننا، يعنى الكواليس اللى فى الشارع والسياسة والمهرجانات والثقافة الأمريكية، وهو موضوع مجهد صراحة، وجنب ده فيه مخاطرة، مخاطرة مع الجمهور اللى يا ترى هيشده الموضوع ويتفرج على أمريكا، ولا كفاية عليه برامج التوك شو المصرى.. سؤال مش إحنا اللى هنجاوب عليه، لكن الزمن كفيل يقول لنا.

...

نهار جديد: مسخرة وتقارير على قناة النهار
اصدرت في: 05/03/2016

البداية: مش هـ نبدأ بقى بداية تقليدية ونقعد نحكى عن البرنامج وحكايته وكده.. لا الموضوع المرة دى مختلف.. إحنا بـ نتابع كثير برامج صباحية على قنوات مختلفة، وتقريبًا مافيش قناة إلا وعملت برنامج صباحى، لازم نقول حاجة مهمة فى الأول.. أن البرامج الصباحية أنواع، يعنى فيه صباحية جادة جدًا ومتابعة للأخبار وتقارير تقيلة جدًا وحاجة دسمة فعلًا، وفيه بقى اللى بـ يعمل حاجات خفيفة لكنها بـ تقرب من جو الإسفاف من كثر الخفة اللى بـ تقدمها، أما بقى كونك تعمل حاجة ميكس كده ما بين التقل والخفة، هنا لازم نقول أن فيه فكرة حلوة. الجديد: بصوا بقى، مافيش جديد صعب تجيبه فى فكرة برنامج صباحى، لازم تختار موضوعات خفيفة وتعمل تقارير وتدخل مداخلات تليفونية مع الناس، وتجيب موضوعات قريبة من الناس تخليهم يتابعوك على الصبح كده، وهما لسه بـ يقولوا: "يا فتاح يا عليم يا رزاق يا كريم".. الجديد بقى هو فى طريقة التقديم، يعنى ثلاثة مذيعين مش بـ يقولوا شعارات ولا بـ يسفوا لكنهم عاملين حالة حلوة، حالة من البهجة فى القناة على الصبح وده صراحة اللى مخلى البرنامج متميز، أنك تنبسط وتستفيد على الصبح، وإحنا عاوزين إيه بقى غير كده. البرنامج: كده نقدر نكلمكم عن البرنامج وفكرته، هو برنامج صباحى من تقديم خالد عليش وأسماء مصطفى وداليا أشرف على قناة النهار، وفيه موجز لأهم وآخر الأنباء لكنه موجز سريع وخفيف، وكمان فيه تقارير بـ تطلع تتكلم عن مبادرات شبابية كثير موجودة فى الشارع وبـ تعمل حاجة، وبـ يعملوا مداخلات تليفونية عن موضوع الحلقة اللى بـ يهتم بحاجات لها علاقة بالناس، يعنى يتكلموا عن مشاكل الناس وهمومهم، والطرق والمجتمع وكل ده بدم خفيف. وطبعًا مش محتاجين نقول أن عليش قالب الستوديو مسخرة على الهواء، حتى وهو بـ يكلم المخرج بـ يقول له: "يا عم حرام عليك خرمت ودنى عرفت أن فيه تليفون جاى"، وخد عندك بقى ضحك السنين طوال البرنامج وهو بـ يهزر مع المخرج ومع الضيوف وكمان مع المذيعتين اللى معاه، ومن الواضح طبعًا تأثيره الطاغى على البرنامج وأنه هو اللى ماسك الدفة فيه، لكن ده مش بـ يقلل من أسماء وداليا اللى عاملين شغل حلو، وبـ ينقلوا الكلام ما بينهم بسلاسة وما حدش بـ يقطع على حد، كلهم متناغمين مع بعض وده اللى بـ يكمل الحالة الحلوة اللى فى البرنامج. كمان الديكور بتاع البرنامج هادى ومش مكلف والصورة والكادر الواسع اللى بـ يختاره المخرج مريح للعين، ونقلته للتقارير وعدم تنقل الكاميرات كثير بـ يخلوك مش متوتر وأنت بـ تتفرج على البرنامج.. بصوا اتفرجوا عليه وانبسطوا كل يوم الصبح.. الواحد عاوز إيه غير أنه يبدأ يومه بضحك وهزار وحالة حلوة.

...

بتوقيت مصر: اعرف بلدك بحيادية على قناة العربي
اصدرت في: 25/12/2015

"بتوقيت مصر" برنامج على قناة العربي بـ يهتم بالإنسان المصري بشكل عام وبكل حاجة بـ تشغله من كل أنواع القضايا بشكل خاص السياسية، وبـ يرصد المجال العام المصري بشكل دقيق.. وبـ يهتم بكل تفاصيله. البرنامج عنده فقرات متنوعة يعنى هـ تلاقوا الخبرية والاستقصائية، وطبعًا مش هـ ينسوا الحوارات السياسية المرتبطة بالقضايا اللي بـ تهم المواطن المصري، والجميل بقى أنه مش بـ يقف عند كده وبس.. ده كمان بـ يغطي الفعاليات الفنية من مهرجانات وحفلات ومسرح وندوات ومؤتمرات، وبـ يطرح مقدم البرنامج أهم الأسئلة اللى بـ تحاول تجيب قرار الضيف.. وده طبعًا راجع لفريق الإعداد المميز اللى فى البرنامج ده واللى لازم نقول أنه تم اختياره بعناية، والمفيد فى البرنامج أنه بـ يتكلم فى القضايا اللى بـ تفرض نفسها بقوة على الساحة المصرية، وبـ يحاول تقريب المسافة للمشاهد العربي وده البعد المهم فى الموضوع علشان يفهم إزاى المواطن المصري بـ يتعامل مع همومه وبـ يجاوب على أسئلة مهمة فى السياسة والاجتماع والاقتصاد. هـ نلاقى ضيوف من كل أطياف المجتمع ومن مجالات كثيرة.. وعندهم مراسلين بـ يغطوا مصر تقريبًا وطبعًا مصر فيها أحداث كثير بـ تخلى البرنامج على طول عنده قضايا مثيرة ومهم أنك تتابعها. البرنامج بـ يستقبل ضيوفه فى الستوديو وبـ يعمل تقارير وبـ ياخد مداخلات تليفونية من كل الأطراف.. ودى حاجة مهمة لازم نقول عليها يعنى لو فيه خطأ من جهة حكومية بـ يجيب المسؤول على التليفون ويكلمه ويخلى المراسل ينزل الشارع ويسأل الناس وكمان بـ يجيب ناس متخصصين من هيئات مختلفة علشان يحاول يغطى القضية من كل الجوانب.. مع أن القناة عربية إلا أنها مش متحيزة لحد ضد حد ولا مع طرف ضد طرف، هى بـ تحاول تنقل الصورة زى ما هى موجودة بالضبط علشان تقول لنا إيه الموضوع وإيه اللى بـ يحصل.. وبـ تجيب ناس من اليمين واليسار مع الحكومة ومع المعارضة وشيوخ دين من كل الأطياف علشان تحاول تقول أنها بـ تجيب الحقيقة، والحقيقة أننا شايفين أنها بـ تقول قد إيه مصر غنية بناسها وبعلمائها ومتخصصيها ورجالها وستاتها، ويا رب بتوقيت مصر نشوف مصر حلوة.

...

نفسنة: برنامج ضحك وهزار وإسفاف على قناة القاهرة والناس
اصدرت في: 10/11/2015

الاسم: بداية من الاسم لازم نقول أن "نفسنة" مصطلح مصري صميم المقصود به أن حضرتك (عزيزي القارئ) بـ تغير أو بـ تكره أو بـ تحسد شخص ثاني أحسن منك.. أننا نشتغل على مصطلح بالعمق "السيء" ده ونعمله برنامج ده بـ يطرح أمامنا أفكار كثيرة حول طبيعة البرنامج إيه أصلًا.. يعني هل مثلًا هـ يكلمنا عن الناس اللى بـ تكره بعض؟ ويحاول يحل الموضوع ولا الناس اللى بـ تنفسن على بعض ويحسدوا بعض ويحلوا مشكلة الحسد؟ صراحة لما شوفنا أول حلقات من البرنامج فهمنا أن الاسم غير البرنامج خالص، وهو اسم دعائي وبس.. لكن الدعاية هي السر. السر: شخص 1: أنا عاوز أعمل برنامج. شخص 2: يا ابني برنامج إيه؟ ده للمشهورين بس. شخص 1: بس أنا موهوب وأعرف أشتغل مذيع. شخص 2: ومال الميديا في مصر ومال الموهبة؟.. دي حمادة وده حمادة ثاني خالص. شخص 1: يا ابني الموهوب هـ يوصل. شخص 2: ابقى وريني لو اتعرفت. (بعد مرور 6 شهور) كل الميديا فى مصر بـ تتكلم عن (شخص 1) هايدى وشيماء وانتصار: البرنامج اللى معانا النهارده من تقديم ثلاثة فنانات: هايدي كرم – شيماء – انتصار، ما حدش ممكن ينكر أن الثلاثة ممثلات بجد وعملوا أدوار حلوة وقدروا يؤدوا في عدد كبير من الأعمال.. وأن اختيار الثلاثة مع بعض توليفة تنجح أي برنامج.. لأن عندك هايدي بنت الطبقة الغنية، وانتصار اللى بـ تمثل الطبقة المتوسطة، وشيماء اللى بـ تمثل الطبقة الشعبية، وبـ يدور البرنامج حول اختيار موضوع والدردشة حوله واختيار ضيف يقول رأيه حول الموضوع وكمان بـ يسألوه عن جوانب شخصية في حياته ومشواره... كل اللى فات ده عادي وكان ممكن يبقى برنامج هايل جدًا ومشهور والناس تحبه.. لولا.. وآه من لولا دي اللى خلتهم يختاروا موضوعات "شائكة"، يعني الكلام عن الجنس في المطلق والمعاكسات والستات اللى بـ تخون والرجالة اللى بـ تبص بره وسايبة زوجاتهم.. والمشكلة مش هنا لأن دي حالات موجودة في المجتمع –ولو بشكل قليل– المشكلة بقى في تناولهم للموضوع والتصريحات اللى بـ تطلع، أنهم عاوزين يبانوا متفتحين ومش هاممهم حاجة فـ نلاقي تصريحات زي: "أن عادى لما الناس تتفرج على الأفلام الإباحية"، وعادي لما يبقى فيه مشاهد إباحية في الأفلام... وعادي وعادي وكان البرنامج كل همه أن الإباحية تبقى تمام في المجتمع والناس ما تزعلش، وطبعًا التصريحات دي لاقت هجوم كثير.. لأن اللى نعرفه عن الميديا أنها بـ تناقش مشاكل المجتمع وتحلها.. مش تزودها.

...

5 مووواه: برنامج جميل لولا الإطالة على قناة Ten
اصدرت في: 20/05/2015

الفنانة الاستعراضية "فيفي عبده" في العرض الأكبر لها وتحدي جديد.. ده برنامجها الجديد، بعد تجربتها مع برنامج "أحلى مسا" هي والفنان هشام عباس على قناةmbc مصر، واللي ما حققش النجاح المرجو منه، رغم الإنتاج الكبير للموضوع. لكن تعالوا نركز مع 5 مووواه، والاسم اللي أثار جدل في الأوساط أول ما نزل، يعنى إيه يبقى فيه برنامج اسمه كده، والمهم عدى الموضوع عادي.. وبدأت الناس تتابع اللي بـ يحصل على الشاشة بعيدًا عن الاسم. البرنامج سهرة عائلية مجرد تتر البرنامج يؤكد لك أنه مليان بالناس من كل الطبقات شباب وبنات وعواجيز والراجل الكبير والفلاح وغيره وغيره. سواء اختلفنا مع فيفي عبده أو اتفقنا مع اللي بـ تقدمه، لازم نقول أن اللي مافيهوش كلام أنها فنانة لها قبول وجاذبية على عكس المتوقع في تقديم الفنانين للبرامج، لكن هنا فيه حالة مختلفة من الطيبة والجدعنة ويمكن ده علشان هي أصلًا بنت بلد، ودي كمان المميزات اللي خلت الناس تتابعها من أيام فيلم "امرأة واحدة لا تكفي" لغاية "5 موواه"، وشايفين كمان أنها لسه محافظة على رشاقتها ودي من العلامات المهمة على نجاح "الممثلة" والعين وحشة يا جماعة، فيا ريت "خمسة وخميسة كده" وكمان لازم نقول أن أداءها طبيعي جدًا، مش بلاستك زي ناس ثانية ما ينفعوش يبقوا في الميديا أصلًا، أو ناس بقوا شبه العرايس من كثر عمليات التجميل. أما عن خط سير الحلقة فطبعًا تبدأ فيفي عبده الحلقة بمقدمتها السريعة والحيوية، وبـ تجيب فنان هو ضيفها، وبـ تعمل تقرير محترم عنه، أسلوب وطريقة فيفي مسيطرة على روح البرنامج، وكمان لزماتها المشهورة بها في أغلب الحلقات "الله الله الله.. بسم الله... الله أكبر". زي كثير من برامج التوك شو بـ تهتم بالنجوم علشان الجماهيرية، ومن ضيوفها "نادية مصطفى، إيهاب توفيق، مايا دياب، دينا، سعد الصغير". ديكور البرنامج بـ يفكرنا بحفلات "ليالي التليفزيون"، فاكرين المسرح ساعتها كان شكله عامل إزاي؟.. المسرح كبير وتفاصيله ماشية مع موضوع البرنامج، كرسي لفيفي وكرسيين للضيوف، وكمان معاها فرقة موسيقية بـ تعزف.. ده جنب الجمهور علشان يعملوا تفاعل مع الحدث، وكمان شاشة بـ تعرض صور وذكريات للفنان ومقاطع من أعماله، ومن أهم الحاجات اللي بـ نأخذها على البرنامج هو وقته الطويل جدًا لأن مع رتم الحياة السريع ما حدش عنده طاقة ولا قدرة يقعد يستحمل ساعتين، كان كفاية قوي ساعة واحدة، ونسيبكم تحكموا.

...

الحكم: طلع القاضى اللى جواك على mbc مصر
اصدرت في: 11/05/2015

القاضى: جربت تنصب نفسك قاضى قبل كده؟.. وتحكم على حد.. طب لما تيجى تحكم بـ تحكم بالعدل ولا بـ تحكم هواك فى الموضوع؟ طب إيه رأيك لو قالوا لك هـ تحكم على شخص معين.. وأنت تعرفه يا ترى هـ تعمل إيه؟.. طيب بلاش، لو قالوا لك أنك هـ تحكم على شخص مشهور وتقول كل اللى نفسك فيه يا ترى هـ تعمل إيه؟ أسئلة كثيرة جاءت فى دماغنا وإحنا بـ نتفرج على برنامج "الحكم"، البرنامج الحوارى اللى بـ يحكم على ضيوفه. الحكم: غالبًا البرامج الحوارية بـ تعطى فرصة للمشاهير للكلام عن جديدهم وأسرارهم ومشاكلهم، لكن نادرًا ما بـ تعطى الجمهور الحق في إصدار الحُكم على النجوم، انطلاقًا من هنا، كان لازم يكون فيه برنامج يعطى الجمهور مساحة واسعة للتعبير عن رأيه عن طريق أسئلة بـ تُطرح عليهم وبـ تبقى متعلقة بالضيف، ويقولوا رأيهم بحرية بقى. برنامج "الحكم" بـ يجمع كل الاستفتاءات دى ويخليها أمام الضيوف علشان يتعرفوا على رأي الجمهور فيهم أو رأيه فى قضية معينة حصلت معاهم. برنامج "الحكم" مع الإعلامية وفاء الكيلاني بـ يستضيف أسبوعيًا نجم من مختلف المجالات سواء كانت فن، شعر، صحافة، أزياء، رجال أعمال وغيرها علشان يردوا على الحكم اللي صدر بحقهم. الفكرة: فكرة البرنامج جيدة بالفعل.. وفيها تجديد، حتى التقارير اللى بـ تتعمل عن الضيوف فيها تجديد وتعب من فريق الإعداد اللى بـ نحييهم.. لأنهم بـ يوصلوا عن معلومات حقيقية جدًا عن الضيف وأحيانًا صعب أنها تيجى فى تقرير عن نجم وممكن نضرب مثال بالتقرير اللى اتعمل عن الفنان سعد الصغير واللى فيه جابوا قصة حياته من أول المكان اللى وُلد فيه والدبلوم اللى حصل عليه وأنه اشتغل عند الشاعر مصطفى كامل 3 سنين علشان يكتب له أغنية ولما ما رضيش سابه.. وجابوا تفاصيل كثير لدرجة أنهم جابوا شهرته لما كان صغير وبـ يطبل فى المنطقة بتاعته.. كانوا بـ يقولوا عليه "لهلوبة فى الطبلة". الديكور: ديكور البرنامج هائل، مش واخد شكل منصة الحكم ولا حاجة لكنه واخد شكل الأثاث "المودرن" ومعمول بشكل جيد وممتع للعين ومريح يعنى وكمان المدرجات المعمولة خصيصًا للجمهور شكلها جيد جدًا. الحالة: البرنامج بـ يصنع حالة حلوة على الرغم من أنه بـ يوجه تهم للنجم اللى بـ يستضيفه.. لكن وفاء قادرة تمثل مع الممثلين اللى بـ ييجوا أو تغنى مع المغنيين اللى بـ تستضيفهم وده بـ يصنع حالة مختلفة عن باقى البرامج، خاصة أن وفاء عندها مقدرة عالية على مجاراة الضيف واستخراج اللى عنده.. وهى دى فكرة المذيع، الحالة الى بـ يقدر يصنع من برنامجه حالة جديدة وحكم. الفكرة فى النهاية بـ تقف عند فكرة الحكم والجمهور اللى بـ يعطى انطباعه الخاص عن الضيف وبـ يقول هو مصدقه ولا لأ.. ممكن يكون مش حقيقى بدرجة 100% لكنه فيه شيء من الحقيقة.

...

ليلة سمر: الجرأة والضحك والشهرة على mbc مصر 2
اصدرت في: 03/05/2015

سمر يسرى ولدت 22 مايو عام 1975.. وحصلت على إجازة فى إدارة الأعمال من جامعة سيتى الأمريكية.. وشغالة فى المجال الإعلامى تقريبًا من سبع سنين علشان تنضم أخيرًا لقطار mbc مصر وتقدم برنامج جديد. "ليلة سمر" اسم البرنامج واللى واضح جدًا أنه قائم على شهرة سمر يسرى قبل ما يكون قائم على شهرة النجوم اللى بـ يستضيفهم.. ودى فكرة برضه لأن سمر مشهورة بجرأتها وحيويتها فى البرامج وده اللى خلى نجمها يلمع فى الفترة الأخيرة. والبرنامج زى ما بـ يوصفه موقعmbc مصر مش بـ يتكلم عن الفكرة وإنما بـ يتكلم عن سمر فبـ يقول وعلى طريقة السهل الممتنع: "بـ تعود لنا المذيعة الأكثر جرأة فى السنوات الأخيرة فى مصر سمر يسرى".. يبقى الناس هناك فاهمين أن الموضوع قائم على حاجتين أساسيتين وماسكين فى بعض.. الأولى هى سمر نفسها والثانية هى جرأتها. والبرنامج شغال بدون خطوط حمراء وبدون رقابة، بـ يناقش أهم القضايا من خلال ضيوفه اللى أغلبهم من نجوم الفن والثقافة والغناء.. وبـ يتكلم عن الأحداث المثيرة للجدل واللى بـ تشغل الرأى العام فى مصر.. وفى سهرة شبه يومية بـ تجمع سمر نجوم الفن والغناء والمثقفين والرياضيين والمجتمع ونادرًا السياسة حول ترابيزة واحدة.. بـ يتناقشوا فى مختلف القضايا.. ومن أكثر المميزات أن المناقشة بـ تدور فى جو كوميدى وترفيهى ما حصلش قبل كده وهى دى الخلطة: "الجرأة والكوميديا والنجم"، صراحة لازم البرنامج ينجح. والسؤال بقى: البرامج دلوقت بقيت شهرتها من شهرة جرأة مذيعها؟ وهل الجرأة هى اللى بـ تخلى البرامج الحوارية برامج حوارية؟ ولو ده فعلًا ليه مش بـ نشوفه فى برامج "التوك شو" الخاصة بالمسؤولين والسياسيين؟ يعنى السؤال هى الميديا بـ تعتمد على الجرأة وبس ولا فيه حاجات ثانية للموضوع؟ تعالوا نبص على نوعين من الحاجات: الحاجة الأولى هى الخلطة اللى ما ينفعش تغلط أبدًا.. وهى "الضحك والنجم والجرأة" لو عرفت تجمعهم مع بعض مع حد شاطر كده وبـ يفهم ومقطع السمكة وذيلها.. يبقى لازم يعمل برنامج ناجح. والنوع الثانى بقى هو المذيع الشاطر المتعلم اللى قادر يجيب ضيوف مهمين بـ يناقشوا قضايا مهمة وقادر يدير حوار كويس علشان يوصل معلومة للناس بشكل صحيح.. أو يخليهم يفهموا قضية وطبعًا كلنا عارفين القضايا الكثيرة اللى فى حياتنا وبـ نهتم بها. الإخراج جيد ومهتم بالضيوف أكثر من الجمهور.. والكاميرا شغالة على كل الزوايا من الضيوف للجمهور للمذيعة.. وأنتم بـ تتفرجوا على البرنامج ركزوا فى الموضوعات اللى بـ يناقشوها واسألوا نفسكم كده: هو إحنا مهتمين بالقضايا دى ولا لأ..

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول